Cody: Naek o, yamarisen kaku kuyawos Refo radine. * Ras yarama ani, wafuken rosai ḇefnai fa Saksi Yahwe sikyar Karajan Allah ḇyepoik ro taun 1914 ya in.

Jon: Imbo. Syap buk anya, yamam boi doḇe Karajan Allah irandak fa ḇyepoik ro taun 1914 in. Yakara kaker na kukro woḇe rosai wakyar na neknam ro Refo ya ḇae.

Cody: Imbo kaku.

Jon: Ayama yawasya Refo ya rawo ibro kwar. Fama, yamam boi, mnuk oso ḇaḇeri ḇeyakfas taun 1914 ine. Inja, yamam Refo ro Internet ma yasewar ”1914”. Ḇape, fasfas ḇesasyar ya doḇe, ”Roi ine naisya ḇa”.

Cody: Ipyum kaku kukro wawasya Refo ya fa ibro kwar. Yakyar Auma wamarisen kaku faro Manseren Allah Wos Ḇyena.

Jon: Imbo, kukro manggundaya yamam Refo ine iḇese ro syap-syap ḇese.

Cody: Ayano yakara radirya. Yamanen au kukro swewar fa wafawi roi nabor ro Refo ya. Waso pyum rosai Refo ikofen na, isoine ’swewar pdef’ fa wasmai fawawi. * Ima roi ḇepyum diri.

Jon: Kasumasa. Manggundaya yamarisen yafawi nabor syadi wer. Yasewar fa yafawi syadi ma yasrow fasfas ḇekofen taun 1914 ro syap kukfarkor ine. Syap ine doḇe raja oso isya myafu ai knam ḇeba kaku skar i mura isur wer, rya fawar ḇyena ryadirya in.

Cody: Oh imbo. Syap anya dawosḇair ḇardadi ḇero syap Daniel fasal 4, ḇekur Nebukhadnezar ḇeraker Babilon.

Jon: Yo irya. Yawasya ker ḇardadi anine. Ḇape, yafawi mnis ḇaim fasfes ḇyena kuker Allah Karajan Ḇyedi ḇaido taun 1914 ya.

Cody: Imbo, Nabi Daniel manggundi dakfawi mnis ḇaim wos fyas anna!

Jon: Kaku ke?

Cody: Imbo. Ro dine, ro Daniel 12:8 ya, doḇe, ”Aya ido yarower kam na, imboi yafawi na ḇa.”

Jon: Oh, inja aya kako yakfawi mnis na ḇaim ido, sasar oḇa in.

Cody: Kaku. Fyor iwara, Daniel dakfawi mnis ḇaim roi fyas na kukro ro fafisu ani Manseren Allah kyara ḇaim fa snonggaku sya sifawi mnis ḇardadi-ḇardadi ro syap Daniel. Ḇape ro fafisu koḇedine, bisa kofawi mnis kaku na.

Jon: Kofawi na ro?

Cody: Rwama kuwasya mnuk ḇepur ya. Daniel 12:9 ya doḇe, ”Wos nane nḇe kankunes ma neyokef isof ro awar ḇepupes ya.” Inja, ḇardadi ine sfas na fyoro kaku kwar imboi ḇarpur mura insape sifawi na, isoine ro fafisu ”awar ḇepupes ya”. Raris nari kuyawos ro farkarkor Refo kuḇena, roi nabor naisya nfasnaiḇair koisne kokenem kwar ro papupes ras-ras ḇepupes ani. *

Jon: Rarya ido, bisa fasnai pyan ḇardadi anya ḇe aya ke?

Cody: Imbo ḇae.

Cody: Ḇepon ya, yafawar kermgun rosai Raja Nebukhadnezar myam ro mafu ḇyeja. Raimnai, na kuyawos knam kaku ro mafu ani in?

Jon: Imbo.

Cody: Ro Nebukhadnezar mafu ḇyeja, myam ai knam ḇeba kaku oso, ikaki raryas isof ro farsyos iyaswa. Mura, ryower Manseren Allah iwan malaikat fa ikar ai knam anya. Imbape, Manseren Allah iwan fa knam ḇyeja srir na ro saprop ya dori isof ro ”swaf fafisu ri fik” imnai. Raimnai, ai knam ani nari isur wer. * Randak ya, ai knam ro ḇardadi ani kyur ḇe Raja Nebukhadnezar manggundi. Sifawi i ḇe Raja ḇeararer kaku raris ai knam ḇekaki syadi isof ro farsyos, imboi nari sifrur i fa dado ḇaido skar i fa ḇyarek rawo ”swaf fafisu ri fik” imnai. Waswarepen kaker rosai ḇejadi wer ke?

Jon: Sye, oroḇa.

Cody: Iryanido. Mam Refo ya doḇe Nebukhadnezar syawo isof ro ”swaf fafisu ri fik”, ḇaido taun ri fik. Ro swaf fafisu ri fik anya imnai, Nebukhadnezar swaruser ḇyena namnis kaḇer ma ḇyepoik ḇe Raja wer. *

Jon: Bisa yafawi kermgun na. Ḇape, rariso ine nya fasfes kuker Allah Karajan Ḇyedi ma taun 1914 rai?

Cody: Ḇekaku ya, ḇardadi anya ryarirya ro nyan ri suru. Ḇepon ya, fafisu Raja Nebukhadnezar imnai fa ḇyepoik. Ḇesuru ya, fafisu Allah ḇaḇepapoik Ḇyedi imnai. Inja, ḇesuru ine iso ḇena fasfes kuker Karajan Allah.

Jon: Moḇsa wafawi ḇardadi ine kyur ḇe Nebukhadnezar derer monda ḇa mboi Karajan Allah kako?

Cody: Ḇepon ya iso, ro wos ḇero ḇardadi anya kwar. Ro Daniel 4:17 ya, ḇardadi anya Manseren Allah byuk na insama ”snonggaku ḇekenem syakam nari sifawi snar Ḇekaki Syadi iso Manḇepoik faro karajan snonggaku sya ma byuk na faro mansei monda imarisen sya”. Mam ro mnuk ine, wos ḇeyoḇe ”karajan snonggaku” isya ke?

Jon: Imbo. Doḇe ”Ḇekaki Syadi iso Manḇepoik faro karajan snonggaku”.

Cody: Yo. Inja kwara ido, mansei sor ḇe ”Ḇekaki Syadi” ine?

Jon: Manseren Allah manggundi ke?

Cody: Kaku. Inja ro mnuk ine kofawi ḇardadi ine kyur ḇe Nebukhadnezar derer ḇa. Ḇardadi anya kyur kako ḇe ”karajan snonggaku”, isoine ḇaḇepapoik ro Allah fa ḇyepoik snonggaku sya. Mnuk-mnuk ḇese ro syap Daniel kyur kako ḇe roi ine.

Jon: Rosairya wer?

Cody: Syap Daniel ro Refo dawosḇair knam kaku ro roi oser. Syap ine ikofen ḇepon ḇekur Karajan Allah ma Raja ro karajan ani, isoine Manseren Allah Roma Ḇyedi, Yesus i. Rupa ra, komam ro fasal-fasal ḇepon ya. Bisa wawasya pyan Daniel 2:44 ya ke?

Jon: Bisa ḇae. ”Ro fafisu raja-raja ansi, Allah ḇepoik ro nanggi nari ḇyawes Karajan ḇepok ḇepromes ḇa. Er ḇesesya na sipok sḇepoik Karajan ani ḇa. Karajan ani nari imkokpres ma ḇye karajan nane kam fa napromes. Karajan ani derer iso nari ḇepoik pdef isof fyoro-fyoro.”

Cody: Kasumasa. Kwara ido, karajan sap ro dine kyur ḇe Karajan Allah ke?

Jon: Hmm. Yakyar manggun ḇa.

Cody: Iryanido. Mam mnuk ine doḇe Karajan ine iso ”nari ḇepoik pdef isof fyoro-fyoro”. Kwara kada, pamarenta oso isya ḇepoik pdef isof fyoro-fyoro raris Karajan Allah ke?

Jon: Oroḇa ḇeri.

Cody: Kaku. Kumam ro syap Daniel, ḇardadi oso ḇese isya wer ḇekofenḇair Karajan Allah ine. Dapḇair Manḇepoik ro Karajan ani. Sfas roi ine ro syap Daniel 7:13, 14. Dine doḇe, ”Byuk ḇe [Yesus i] papoik, syowi, ma karajan, insama snonggaku ḇeraker er ma wos ḇebor sfarmyan ḇe i. Ḇaḇepapoik ḇyedi iso ḇaḇepapoik ḇekain fyoro, ḇepok ḇemnai ḇa, ma karajan ḇyedi nari ipok ipromes ḇaḇeri.” Mam ido, roi ḇemnis kaku rosai mam ro ḇardadi ine ma ḇardadi insanja?

Jon: Ḇardadi ine dawosḇair karajan kako in.

Cody: Kaku ḇeri. Ma inema karajan ḇefamfnom risya ḇa. Dine doḇe, Karajan ine nari ḇyepoik faro, ”snonggaku ḇeraker er ma wos”. Roi nane nafrur fa kofawi Karajan ine nari ḇyepoik faro supswan ine ḇesiper.

Jon: Yakara ine kyaku in.

Cody: Ḇardadi anya ikofen radine kako, ”Papoik ḇyena iso papoik ḇekain fyoro-fyoro, ḇepok ḇepromes ḇa, ma karajan ḇyedi ipok ipromes ḇaḇeri.” Mam ḇardadi ine imnis kuker ḇardadi insanja kuwasya ro Daniel 2:44 anya ke?

Jon: Imbo sumnis kaku.

Cody: Kukara pyum rosai kufarkor ine ari. Sinan byuk ḇardadi ro Daniel fasal 4 ine insama snonggaku syakam sifawi ”Ḇekaki Syadi iso Manḇepoik faro karajan snonggaku”. Ro wos ine, bisa kofawi ḇardadi ine kyur ḇe Nebukhadnezar derer ḇa. Oso wer ido, ro syap Daniel, komam ḇardadi-ḇardadi ḇesena naisya ḇeḇair ḇe fafisu Karajan Allah dores ma Allah Roma Ḇyedi iso ḇepoik ḇe raja ro karajan anya. Inja kwara ido, ḇardadi ro Daniel fasal 4 ine ḇyefesepen kuker Karajan Allah ke?

Jon: Imbo yakara rarirya. Mboi, yamam ḇaim roi ine ḇyefesepen kuker taun 1914 ya.

Cody: Kuswarepen wer Raja Nebukhadnezar i. Refo ikofen ro ḇardadi anya bo doḇe ima imnis ra ai knam ḇeba ani. Imnai fa ḇyepoik ro fafisu ono kukro syawo, iso ai knam ani skaruk na ma srir na fa nbarek monda ro swaf fafisu ri fik. Inja ro swaf fafisu ri fik ine imnai insape Nebukhadnezar swaruser ḇyena namnis kaḇer. Rarirya kako, Allah ḇaḇepapoik Ḇyena namnai ro swaf ḇeḇeso monda, ḇape ine fyasnai ḇa snar Manseren Allah syambraḇ fa ḇyepoik ḇa.

Jon: Yafawi mnis ḇaime.

Cody: Ro awar Refo naiwara, raja-raja ḇeraker Israel ḇepoik ro Yerusalem sima Refo fyasnai si raris sisya ”skain ro ḇarpon Yahwe karapesa Ḇyedi”. * Sefaker faro Allah fa sḇepoik faro Yahwe kawasa Ḇyesi ro supswan ine. Inja, raja-raja ansi ḇaḇepapoik sena ima Allah Ḇyenairi. Ḇape, ḇarpur mura, raja ḇebor sya sisouser faro Allah ḇa ma kawasa sesi saksouser ḇa. Snar er Israel sisouser ḇa mura, Allah myam monda Babilon sya skafyo si ro taun 607 MḆ. Ro ras anya ḇe bo, raja-raja ḇefaker faro Yahwe I ro Yerusalem sisya wer ḇa kwar. Inja, ine rya kokofen Allah ḇaḇepapoik Ḇyedi imnai fa ḇyepoik. Bisa wafawi snai roi ine ke?

Jon: Imbo.

Cody: Snar Allah ḇaḇepapoik Ḇyedi imnai fa ḇyepoik ro taun 607 MḆ, inja taun ani iso randak ro swaf fafisu ri fik. Ro papupes taun ani, Manseren Allah kyanow manḇepoik ḇebabo ḇefaker I. Fafisu ine, manḇepoik ani isya ro nanggi. Roi nane posa kwar ido, insape ḇardadi-ḇardadi ḇese ro syap Daniel na ndarirya. Inja, fakfuken ya iso: Taun risaiso swaf fafisu ri fik imnai ya? Kofawi na kada, bisa kofawi fafisu risai Karajan Allah irandak fa ḇyepoik ya.

Jon: Swaf fafisu ri fik ine imnai ro taun 1914 ya ke?

Cody: Kaku ḇeri!

Jon: Kofawi na ro?

Cody: Kuswarepen fafisu Yesus ifarmyan ro supswan ine, doḇe swaf fafisu ri fik anya imnai ḇaime. * Inja, swaf fafisu ri fik ine swaf ḇekwan kaku. Fafisu Yesus ryama ḇe supswan ine ḇaime, swaf fafisu ri fik ine irandak ro taun utin naiwara kwar. Yesus kyaḇer ḇe nanggi kwar yo, swaf fafisu ri fik ine imnai ḇaime. Insanja, kuyawos ḇardadi ḇero syap Daniel anya kwar, insape na kofawi pyum na ro ”ras-ras ḇepupes” ya. * Kumam kada, ro papupes taun 1800 ḇe bo, snonggaku ḇeḇeso sisewar kaku fa sifawi roi ine ma ḇardadi-ḇardadi ḇese ro Refo ya. Insape sifawi swaf fafisu ri fik nari imnai ro taun 1914. Sikyar kaku roi nabor ḇeḇejadi ro dunya ine nfasnai kaku Karajan Allah isya ḇyepoik kaku kwar ro nanggi taun 1914 ya. Ro taun ani, ras-ras ḇepupes ḇaido papupes dunya ine ḇyerak. Kaku ḇabo, fandun fa farkor fawas roi ine insama wafawi pyum na in . . .

Jon: Imbo kaku ḇae. Insape nari yafarkor na wer samaido yafawi pyum na.

Cody: Kwara samswen awer, aya kako randak ya yafawi mnis ḇardadi-ḇardadi ine ḇeri ḇa. Ḇape, kuyawos roi ine samaido nari nafnoḇek Au fa mam roi Saksi Yahwe sikyar ḇekur Karajan Allah nama neknam ro Refo ya.

Jon: Imbo, kaku in. Yamanen mgo kaku kukro mgoma mgokyar kaku rosai Refo ikofen ya.

Cody: Yamam au kako. Raris insanja yakofen kwar, kofandun swaf fa kofarkor roi ine. Nwa fakfuken kaker ke? Rupa ra, kofawi kwar swaf fafisu ri fik ani ḇyefesepen kuker Karajan Allah ma irandak ro taun 607 MḆ. Ḇape, rariso kofawi swaf fafisu ri fik anya imnai ro taun 1914 ya? *

Jon: Imbo in. Kofawi na roryo?

Cody: Refo fyasnaiḇair swaf fafisu ri fik kawanwan ḇyena. Wamarisen ido, nari yakaḇer wer fa kumam kankarem ḇyena ro Refo ya. Rarso? *

Jon: Oh imbo. Na yawaf au.