Щьмшид: Ԝәзир, ча һʹәԝас ә кӧ һәр һʹәфти әм Кʹьтеба Пироз шеԝьр дькьн. * Ве рʹоже чахе мә хәбәр дьда, пьрс бал тә пешда һат дәрһәԛа Пʹадшатийа Хԝәде. Тә пьрси, ԝәки чьма Шәʹдед Йаһоԝа баԝәр дькьн кӧ Пʹадшатийа Хԝәде сала 1914-да дәстпекьр сәрԝертийе бькә.

Ԝәзир: Әре, мьн әʹдәбйәтәкә ԝәда хԝәнд ԝәки Пʹадшатийа Хԝәде жь сала 1914 дәстпекьр сәрԝертийе бькә. Әве йәке һʹәԝаса мьн пешда ани чьмки ԝә гот, ԝәки һʹәму һинкьрьнед ԝә сәр һʹиме Кʹьтеба Пироз ьн.

Щьмшид: Рʹаст ә, һәма ӧса йә.

Ԝәзир: Мьн хԝәха жи бь тʹәмами Кʹьтеба Пироз хԝәндийә, ле найе бира мьн ԝәки щики дәрһәԛа ве сале те готьне, демәк дәрһәԛа сала 1914. Мьн һәла һе онлайн Кʹьтеба Пирозда жи гәрʹийа. Легәрʹинеда мьн ньвиси «1914», ле тʹӧ әʹламәти нәдит.

Щьмшид: Ԝәзир, әз дьхԝазьм пʹайе тә бьдьм. Йа пешьн, чьмки тә Кʹьтеба Пироз педа хԝәнд. Әв йәк дьдә кʹьфше, ԝәки тӧ бь рʹасти Хәбәра Хԝәде һʹьз дьки.

Ԝәзир: Рʹасти жи Кʹьтеба Пироз кʹьтебәкә мӧһим ә.

Щьмшид: Ԛайил ьм тʹәви тә. Диса әз дьхԝазьм пʹайе тә бьдьм, чьмки тӧ Кʹьтеба Пироз дьди хәбате сәва кӧ щабед пьрсед хԝә бьвини. Тӧ һәма ӧса дьки, ча Кʹьтеба Пироз дьбежә. Әв һелан дькә фәʹмкʹарийе бьгәрʹьн. * Гәләк баш ә, ԝәки тӧ бона ве йәке ԛәԝате дьди хәбате.

Ԝәзир: Зәʹф рʹази мә. Мьн хԝәш те Кʹьтеба Пироз леколин кьм. Зани, мьн һʹәвәки кʹур леколин кьр у дит, ԝәки дәрһәԛа сала 1914 ве кʹьтебеда, кʹижан кӧ әм һин дьбьн, һьнә әʹламәти һатьнә дайине. Ԝедәре те готьне дәрһәԛа хәԝна пʹадшаки, кʹижани кӧ хәԝнеда бахәкә гәләк мәзьн дит. Әв бах һатә бьрʹине у ԝәʹдә шунда диса гьһишт. Тьштәки ви щурʹәйи бу.

Щьмшид: Әре, рʹаст ә. Әв пʹехәмбәрти кʹьтеба Данийел сәре 4-да ньвисар ә. Ԝедәре те готьне дәрһәԛа хәԝна Пʹадше Бабилоне, демәк Нәбукәднәсәр.

Ԝәзир: Әре, әв һәма әв бу. Мьн чәнд щара әв пʹехәмбәрти хԝәнд, ле рʹаст бежьм, мьн ӧса жи фәʹм нәкьр ча әв гьредайи йә тʹәви Пʹадшатийа Хԝәде у сала 1914.

Щьмшид: Зани, Ԝәзир, Данийел пʹехәмбәр жи һʹәта хьлазийе фәʹм нәдькьр әв пʹехәмбәрти, кʹижан кӧ әԝи жь бина бәр Хԝәде ньвиси.

Ԝәзир: Рʹасти?

Щьмшид: Әре. Дина хԝә бьде Данийел 12:8-да чь ньвисар ә: «Мьн бьһист, ле мьн фәʹм нәкьр (ИМ)».

Ԝәзир: Әз тʹәне ниньм, Данийел жи фәʹм нәдькьр, ча баш ә.

Щьмшид: Бь рʹасти Данийел фәʹм нәдькьр, чьмки Хԝәде һʹәсаб дькьр кӧ һе ԝәʹдә нәһатийә инсанәтерʹа нишана ве пʹехәмбәртийе бь тʹәмами әʹйан кә, ле ньһа ԝәʹдә һатийә у әм дькарьн әве пʹехәмбәртийе бь тʹәмами фәʹм кьн.

Ԝәзир: Тӧ жь кʹӧ ве йәке зани?

Щьмшид: Ԝәрә әм диса рʹезәке бьхуньн. Ижар Данийел 12:9, ԝьра те готьне: «Һʹәта дәма даԝийе әв тьшт вәшарти у моркьри нә (ИМ)». Демәк әв пʹехәмбәрти тʹәне «дәма даԝийе», йан жи рʹожед хьлазийе ԝе бенә фәʹмкьрьне. Зутьрәке әме сәр һʹиме Кʹьтеба Пироз шеԝьр кьн, ԝәки ньһа әм һәма ви ԝәʹдәйида дьжин, демәк рʹожед хьлазийеда. *

Ԝәзир: Тӧ дькари мьнрʹа пʹехәмбәртийа жь кʹьтеба Данийел шьровәки?

Щьмшид: Әре, дьфькьрьм әзе бькарьбьм.

Щьмшид: Серида ԝәрә әм кьн бькьнә бира хԝә Пʹадша Нәбукәднәсәр хәԝнеда чь дит. Паше әм дькарьн шеԝьр кьн кӧ әв хәԝн чь дьһатә һʹәсабе.

Ԝәзир: Тʹәмам.

Щьмшид: Хәԝнеда Нәбукәднәсәр бахәкә зәʹф мәзьн дит, кʹижан кӧ дьгьһиштә әʹзмен. Паше әԝи бьһист ча мәләке Хԝәде әʹмьр кьр, ԝәки ԝи бахи бьбьрʹьн. Ле Хԝәде гот ԝәки кочʹе бах у кʹока ве әʹрдеда бьһельн. Паши «һʹәфт дәма» әв бах диса ԝе шин буйа. * Щара пешьн әв пʹехәмбәрти сәр Нәбукәднәсәр Пʹадша һатә сери. Рʹаст ә әв пʹадшаки навдар бу, мина бахе кӧ дьгьһиштә әʹзмен, ле әв сәр «һʹәфт дәма» һатә бьрʹине. Те бира тә паше чь ԛәԝьми?

Ԝәзир: На, найе бира мьн.

Щьмшид: Тьшт набә. Жь Кʹьтеба Пироз әм педьһʹәсьн, ԝәки Нәбукәднәсәр ча те кʹьфше һʹәфт сала һʹьше хԝә ӧнда кьрьбу. Ԝи ԝәʹдәйи пʹадша нькарьбу сәрԝерти бькьра. Хьлазийа һʹәфт сала Нәбукәднәсәр һатә сәр һʹьше хԝә у бәрдәԝам кьр сәрԝертийе бькә. *

Ԝәзир: Әв йәк фәʹмдари йә. Ле ча әв дәрәщә Пʹадшатийа Хԝәде у сала 1914-ва гьредайи йә?

Щьмшид: Әзе кьн тәрʹа шьровәкьм. Әв пʹехәмбәрти дӧ щара гәрәке бьһата сери. Щара пешьн, сәр Нәбукәднәсәр Пʹадша һатә сери, чахе сәрԝертийа ԝи һатьбу сәкьнандьне. Щара дӧда, чахе сәрԝертийа Хԝәде һатә бьрʹине. Әв щурʹе дӧда, кӧ ча әв пʹехәмбәрти дьһатә сери, Пʹадшатийа Хԝәдева гьредайи бу.

Ԝәзир: Ле тӧ жь кʹӧ зани, ԝәки әв пʹехәмбәрти гәрәке щара дӧда жи бьһата сери?

Щьмшид: Бәри пешьн, хԝәха пʹехәмбәрти мәрʹа ԝе йәке әʹйан дькә. Ль гора Данийел 4:17 әв пʹехәмбәрти һатьбу дайине ԝәки «йед дьжин бьла бь вейә бьзаньбьн кӧ ль сәр ԛьраләтийа мьрова Йе кӧ Бьльнд ә сәрԝерийе дажо у ԝе дьдә зьламе кӧ жерʹа дьхԝазә у һәри ньмьзе мьрова датинә сәр ԝе». Тә дина хԝә дайе, ԝәки ԝьра те готьне «ԛьраләтийа мьрова» йан жи сәрԝертийа мәрьва?

Ԝәзир: Әре, ԝьра те готьне «кӧ ль сәр ԛьраләтийа мьрова Йе кӧ Бьльнд ә сәрԝерийе дажо».

Щьмшид: Рʹаст ә, ле тʹәхмина тә, кʹе йә Йе Һәри «Бьльнд»?

Ԝәзир: Әз дьфькьрьм хәбәрдан дьчә дәрһәԛа Хԝәде.

Щьмшид: Рʹаст ә. Демәк әв йәк дьдә кʹьфше, ԝәки әв пʹехәмбәрти нә кӧ тʹәне дәрһәԛа Нәбукәднәсәр ә. Әв ӧса жи дәрһәԛа «ԛьраләтийа мьрова» йә, демәк дәрһәԛа сәрԝертийа Хԝәде сәр инсанәтерʹа. У әв йәк жь контексте жи те кʹьфше.

Ԝәзир: Бь ве йәке тӧ чь дьхԝази бежи?

Щьмшид: Тʹәмамийа кʹьтеба Данийелда тʹемәкә сәрәкә дәрбаз дьбә. Әв кʹьтеб диса у диса дина мә дькʹьшинә сәр ԝе йәке кӧ Пʹадшатийа Хԝәде ԝе бе сазкьрьне, кʹидәре кӧ Кӧрʹе Хԝәде, Иса Мәсиһ, ԝе сәрԝертийе бькә. Ԝәрә әм чәнд сәрийа пашда һәрʹьн. Тӧйе бьхуни Данийел 2:44?

Ԝәзир: Әре, ԝьра ньвисар ә: «Дь рʹожед ԝан пʹадшада, Хԝәдайе әʹзмана ԝе пʹадшатийе кʹьфш кә, йе кӧ ԝе тʹӧ щар кʹӧта нәбә. У әв пʹадшати мьләте майинрʹа ԝе нәйе дайине. Әԝ ԝе әԝан һʹәму пʹадшатийа һурдәхԝәши кә у кʹӧта кә, ле хԝәха ԝе һʹәта-һʹәтайе бьминә (ДТʹ)».

Щьмшид: Спас. Тӧ ча дьфькьри, әв рʹез дәрһәԛа Пʹадшатийа Хԝәде йә?

Ԝәзир: Һмм, ньзаньм.

Щьмшид: Дина хԝә бьде ԝьра те готьне, ԝәки әв Пʹадшати «ԝе һʹәта-һʹәтайе бьминә». Тʹәне Пʹадшатийа Хԝәде дькарә һʹәта-һʹәтайе бьминә, ле дәрһәԛа пʹадшатийа мәрьва әм нькарьн ве йәке бежьн, рʹаст ә?

Ԝәзир: Дьфькьрьм әре, рʹаст ә.

Щьмшид: Кʹьтеба Данийелда диса пʹехәмбәрти дәрһәԛа Пʹадшатийа Хԝәде һәйә. Һәла бьньһерʹә, әв ньвисар ә кʹьтеба Данийел 7:13, 14-да. Дәрһәԛа пʹадше ахьрийе ӧса һатьбу пʹехәмбәртикьрьне: «Сәрԝерти, бәрзи у пʹадшати дан ԝи. Һʹәму гәл, мьләт у кәсед жь һәр зьмана жерʹа хӧлами кьр. Сәрԝертийа ԝи сәрԝертикә һәрһәйи йә у пʹадшатийа ԝи ԝе тʹӧ щар һьлнәшә (ИМ)». Ве пʹехәмбәртийеда ԛә тьштәк тәрʹа нас ә?

Ԝәзир: Ԝьра те готьне дәрһәԛа пʹадшатийе.

Щьмшид: Рʹаст ә, ле әв пʹадшати жь пʹадшатийед дьн щӧдә дьбә. Дина хԝә бьде, ԝьра те готьне ԝәки әв пʹадшати ԝе сәрԝертийе бькә сәр һʹәму щьмәʹт, «мьләт у кәсед жь һәр зьмана». Щурʹәки дьн бежьн, әв пʹадшати ԝе сәр тʹәмамийа дьнйайе сәрԝертийе бькә.

Ԝәзир: Дәрһәԛа ԝе йәке әз нә жи фькьри мә. Ле тӧ рʹаст и, әв рʹез һәма ве йәке дьбежә.

Щьмшид: Дина хԝә бьде, әв пʹехәмбәрти диса чь дьбежә: «Сәрԝертийа ԝи сәрԝертикә һәрһәйи йә у пʹадшатийа ԝи ԝе тʹӧ щар һьлнәшә, (ИМ)». Әв мина ве пʹехәмбәртийе йә, кʹижан кӧ мә һежа Данийел 2:44-да хԝәнд, тӧ ԛайил и?

Ԝәзир: Әре, әԝана мина һәв ьн.

Щьмшид: Ԝәрә әв йәк чь кӧ мә һʹәта ньһа шеԝьр кьр, әм кьн бьԝәкʹьлиньн. Пʹехәмбәрти жь кʹьтеба Данийел сәре 4 һатьбу дайине, ԝәки мәрьв бьзаньбьн кӧ Йе Һәри Бьльнд һәйә сәрԝере тʹәмамийа инсанәте. Әв йәк дьдә кʹьфше, ԝәки әв пʹехәмбәрти нә кӧ тʹәне дәрһәԛа Нәбукәднәсәр ә, ле пекһатьна вейә дьһа мәзьн жи һәйә. У тʹәмамийа кʹьтеба Данийелда пʹехәмбәртийед дьн жи һәнә дәрһәԛа сазкьрьна Пʹадшатийа Хԝәде бьн сәрԝертийа Кӧрʹе ԝи. Сәр һʹиме шеԝьркьрьна мә, ча тӧ дьфькьри, әм дькарьн бежьн ԝәки пʹехәмбәртийа жь кʹьтеба Данийел сәре 4 жи дәрһәԛа Пʹадшатийа Хԝәде йә?

Ԝәзир: Тʹәхмина мьн әре, ле әз диса жи һәвгьредана тʹәви сала 1914 навиньм.

Щьмшид: Ԝәрә әм диса бькьнә бира хԝә Нәбукәднәсәр Пʹадша. Те бира тә баха жь пʹехәмбәртийе те һʹәсабе Нәбукәднәсәр Пʹадша. Сәрԝертийа ԝи һатьбу сәкьнандьне, чахе бах һатьбу бьрʹине у сәр һʹәфт дәма һатьбу һиштьне. Әԝ әв ԝәʹдә бу, кʹәнге пʹадша сәр ԝәʹдәки һʹьше хԝә ӧнда кьрьбу. Әв һʹәфт дәм хьлаз бун, чахе Нәбукәднәсәр һатә сәр һʹьше хԝә у пʹадшати ԝирʹа һатьбу вәгәрʹандьне. Щара дӧда әв пʹехәмбәрти һатә сери, чахе сәрԝертийа Хԝәде сәр ԝәʹдәки һатьбу сәкьнандьне, ле мәʹни әв нибу кӧ кемасикә Хԝәде һәбу.

Ԝәзир: Әв чь те һʹәсабе?

Щьмшид: Ԝәʹде бәре дәрһәԛа пʹадшед Исраеле, кʹижан кӧ Оршәлимеда сәрԝерти дькьрьн, дьготьн ԝәки әԝана сәр тʹәхте Йаһоԝа рʹуньштьнә. * Әԝана сәрԝертийа Хԝәде әʹйан дькьрьн. Сәрԝертийа ԝан пʹадша ча бежи сәрԝертийа Хԝәде бу. Ле ԝәʹдә шунда, һʹәчʹи зәʹф жь ԝан пʹадша пьшта хԝә данә Хԝәде, у һʹәчʹи зәʹф жь бьнәлийед ԝан жи чʹәʹв данә ԝан. Жь бо нәгӧһдарибуна Исраелийа Хԝәде изьн да, ԝәки сала 607 Б.Д.М. Бабилони ԝана алт кьн. Жь ԝи ԝәʹдәйи иди тʹӧ пʹадшаки Оршәлиме пʹадшатийа Йаһоԝа әʹйан нәдькьр. Әв йәк дьһатә һʹәсабе ԝәки сәрԝертийа Хԝәде һатьбу бьрʹине. Ньһа фәʹмдари йә?

Ԝәзир: Фәʹмдари йә.

Щьмшид: Ча әм дьвиньн сала 607 Б.Д.М. әв һәбу дәстпека һʹәфт дәма, демәк дәстпека ԝи ԝәʹдәйи, чахе сәрԝертийа Хԝәде һатьбу сәкьнандьне. Хьлазийа һʹәфт дәма Хԝәде гәрәке пʹадшаки тʹәзә кʹьфш кьра, кʹижани кӧ ԝе сәрԝертийа ԝи әʹйан кьра, ле ижар жь әʹзмен. Һәма һьнге пʹехәмбәртийед дьн жь кʹьтеба Данийел, кʹижан кӧ мә тʹәвайи пешда хԝәнд, гәрәке бьһатана сери. Ле ньһа пьрс пешда те, әв һʹәфт дәм кʹәнге хьлаз бу? Һәрге әм бькарьбьн щаба ве пьрсе бьстиньн, әме пебьһʹәсьн, ԝәки Пʹадшатийа Хԝәде кʹәнге дәстпекьр сәрԝертийе бькә.

Ԝәзир: Мьн фәʹм кьр. Әз дьфькьрьм, ԝәки һʹәфт дәм хьлаз бу сала 1914, рʹаст ә?

Щьмшид: Әре рʹаст ә, әʹфәрьм!

Ԝәзир: Ле жь кʹӧ әм ве йәке заньн?

Щьмшид: Чахе Иса сәр әʹрде бу әԝи да кʹьфше, ԝәки һʹәфт дәм һе хьлаз нәбьбу. * Демәк әв ԝәʹдәки гәләк дьреж ә. Һʹәфт дәм дәстпебу бь сәда сала пешийа һатьна Иса сәр әʹрде у диса гәләк сал паши чуйина ԝийә сәр әʹзмана бәрдәԝам дьбу. Ӧса жи бинә бира хԝә ԝәки мәʹна пʹехәмбәртийа Данийел гәрәке әʹйан нәбуйа һʹәта рʹожед хьлазийе. * Һʹәԝас ә, ԝәки хьлазийа ԛьрʹна 19 леколинкʹаред Кʹьтеба Пирозә дьлсах һелан бун кʹур әве пʹехәмбәртийе у пʹехәмбәртийед дьн леколин кьн. Ԝана фәʹм кьр, ԝәки һʹәфт дәм гәрәке сала 1914-да хьлаз буйа. У ԛәԝьмандьнед дьнйайеда избат дькьн, ԝәки һәма сала 1914 Пʹадшатийа Хԝәде дәстпекьр жь әʹзмен сәрԝертийе бькә. Һьнгеда рʹожед хьлазийе дәстпебун, демәк хьлазийа ве дьнйайе. Тӧ иро гәләк тьшт пеһʹәсийайи у һьм жи әв тьшт бона тә тʹәзә нә.

Ԝәзир: Әре, әз гәрәке әʹсә әве әʹламәтийе диса бьхуньм, ԝәки рʹьнд ле фәʹм кьм.

Щьмшид: Бәр хԝә нәкʹәвә, мьнрʹа жи ԝәʹдә лазьм бу сәва кӧ әв һәр тьшти рʹьнд фәʹм бькьм. Ле әз баԝәр ьм ԝәки әв шеԝьркьрьна мә али тә кьр тедәрхи, ԝәки баԝәрийа Шәʹдед Йаһоԝа дәрһәԛа Пʹадшатийа Хԝәде, сәр һʹиме Кʹьтеба Пироз ә.

Ԝәзир: Әре, рʹаст ә. Тʹьме мьнрʹа һʹәԝас буйә бьвиньм, ԝәки һун тʹӧ тьшти жь хԝә набежьн, дәԝсе һун бь сайа Кʹьтеба Пироз баԝәрийа хԝә избат дькьн.

Щьмшид: Ча әз дьвиньм, тӧ жи дьхԝази ԝәки баԝәрийа тә сәр һʹиме Кʹьтеба Пироз бә. Әм иро рʹасти жи гәләк тьшт пеһʹәсийан, ле дьԛәԝьмә диса пьрсед тә һәнә. Мәсәлә мә шеԝьр кьр ԝәки һʹәфт дәм Пʹадшатийа Хԝәдева гьредайи йә, у әв ԝәʹдә дәстпебу жь сала 607 Б.Д.М. Ле жь кʹӧ әм заньн ԝәки әв һʹәфт дәм хьлаз бу сала 1914? *

Ԝәзир: Әре, һʹәԝас ә пебьһʹәсьм.

Щьмшид: Кʹьтеба Пироз али мә дькә тедәрхьн кӧ әв һʹәфт дәм чьԛас ԝәʹдә дькʹьшанд. Ԝәрә щарәкә дьн әве тʹеме шеԝьр кьн. *

Ԝәзир: Тʹәмам.