Cameron: Jon, mo vremem apresie bann diskision ki nou abitie gagne lor Labib. a Dernie fwa ki nou ti koze, ou ti poz mwa enn kestion lor Rwayom Bondie. Ou ti demann mwa kifer bann Temwin Jéhovah zot krwar ki Rwayom Bondie inn koumans dirize an 1914.

Jon: Wi, mo ti pe lir enn zot bann piblikasion, ek li ti dir ki Rwayom Bondie ti koumans dirize an 1914. Me mo ti anvi konn plis, parski zot dir ki zot krwayans baze lor Labib.

Cameron: Wi, sa li vre.

Jon: Bon, mo’si mo konn inpe seki ena dan Labib. Me mo pa rapel mo’nn trouv enn verse ki koz lor lane 1914. Alor mo ti al fer enn resers dan Labib lor Internet ek mo ti tap “1914.” Be, mo pann trouv nanye.

Cameron:Avan tou Jon, les mo felisit ou pou de kitsoz. Premierman, parski ou enn kikenn ki lir Labib. Sa montre ki ou bien kontan Parol Bondie.

Jon: Wi mo bien kontan lir Labib, pena so deziem sa.

Cameron: Ou ena rezon. Me mo ti pou kontan felisit ou osi parski ou esey rod repons ou bann kestion dan Labib. Ou’nn fer exakteman seki Labib ankouraz nou fer: ‘Kontign rode’ pou konpran. b Li bon ki ou pe fer sa bann gran zefor la.

Jon: Mersi. Mo anvi kontign aprann. Ofet, mo ti fouy enn tigit plis ek mo ti trouv de-trwa linformasion lor 1914 dan sa liv ki nou pe etidie la. Li fer mansion enn rev ki enn lerwa ti fer, kot ti ena enn gro pie ki ti koupe ek ki apre ti repouse, anfin enn zafer koumsa.

Cameron: A wi. Profesi ki trouv dan Daniel sapit 4 sa. Sa konsern enn rev ki Neboukadnetsar, lerwa Babylone ti gagne.

Jon: Wi samem sa. Plizir fwa mo’nn lir sa profesi-la. Me mo pa pe trouve ki rapor sa ena avek Rwayom Bondie ouswa lane 1914.

Cameron: Pa kas latet Jon, parski mem profet Daniel pa ti konpran tou bann parol ki Bondie ti inspir li pou ekrir!

Jon: Vremem?

Cameron: Wi. Get seki li ti dir dan Daniel 12:8: “Me mwa, mo ti tande, me mo pa ti arive konpran.”

Jon: Be mo pa tousel alor. Ouf! Mo’nn soulaze.

Cameron: Ofet, Daniel pa ti konpran, parski pa ti ankor ariv ler pou Bondie fer bann dimounn vremem konpran sinifikasion bann profesi ki trouv dan liv Daniel. Me asterla, dan nou lepok,  nou pe kapav konpran pli bien sa bann profesi-la.

Jon: Kifer ou dir sa?

Cameron: Bon, get verse ki vini apre ki dir. Daniel 12:9 dir: “Sa bann parol-la pou bizin res sekre ek sele ziska lepok lafin.” Alor, se bien apre ki ti pou reisi konpran sa bann profesi-la, dan “lepok lafin.” Ek kouma nou pou aprann apre dan nou letid Labib, tou bann prev montre ki nou pe viv sa lepok-la. c

Jon: Be, ou pou kapav explik mwa sa profesi-la?

Cameron: Ale, mo pou eseye.

Cameron: Pou koumanse, les mo rakont ou an-gro seki Lerwa Neboukadnetsar ti trouve dan so rev. Apre nou get so sinifikasion.

Jon: Dakor.

Cameron: Dan so rev, Neboukadnetsar ti trouv enn gro pie ki ti pre pou tous lesiel. Apre li ti tann mesaze Bondie donn lord pou koup sa pie-la. Me selman, Bondie ti dir les so rasinn dan later. Apre enn peryod “set letan,” sa pie-la ti pou repouse. d Sa profesi-la ti aplik ar Lerwa Neboukadnetsar an premie. Mem si li ti enn lerwa bien inportan​—parey kouma sa pie ki ti pre pou tous lesiel la​—dan enn fason sinbolik, ti koup li pou “set letan.” Eski ou rapel ki ti arive apre?

Jon: Non, mo pa rapel.

Cameron: Pa grav. Labib montre ki Neboukadnetsar ti vinn fou pandan set an. Pandan sa letan-la, li ti nepli kapav dirize kouma lerwa. Me kan sa set letan-la ti fini, Neboukadnetsar ti regagn so lespri ek ti rekoumans dirize. e

Jon: Ziska ler mo pe reisi konpran ou. Me ki rapor tousala ena avek Rwayom Bondie ek lane 1914?

Cameron: Seki nou bizin konpran, sa profesi-la ena de lakonplisman. Premie lakonplisman, se kan Lerwa Neboukadnetsar ti aret regne pou enn peryod letan. Deziem lakonplisman-la konsern regn Bondie ki ti arete pou enn tan. Alor, se sa deziem lakonplisman-la ki ena enn rapor avek Rwayom Bondie.

Jon: Be kouma ou kone ki sa profesi-la ena enn deziem lakonplisman ki konsern Rwayom Bondie?

Cameron: Premierman, nou gagn enn indis dan profesi-la limem. Dapre Daniel 4:17, ti ekrir sa profesi-la “pou ki bann ki vivan kone ki sa Kikenn ki Pli Gran la, Li Sef dan rwayom bann dimounn ek ki Li donn sa ninport kisannla Li anvi.” Eski ou’nn remark sa lexpresion “rwayom bann dimounn” la?

Jon: Wi, li dir “sa Kikenn ki Pli Gran la, Li Sef dan rwayom bann dimounn.”

Cameron: Exakt. Kisannla ou panse “sa Kikenn ki Pli Gran la”?

Jon: Mo panse ki se Bondie.

Cameron: Bien bon. Alor nou konpran ki sa profesi-la pa konsern zis Neboukadnetsar. Me li konsern osi “rwayom bann dimounn,” setadir, Bondie so regn lor bann dimounn. Ek sa li lozik kan nou get kontex sa profesi-la.

Jon: Ki ou pe rod dir?

Cameron: Ofet, kan nou lir Liv Daniel, nou trouv enn tem prinsipal. Sa liv-la touletan met laksan lor Rwayom Bondie ki’nn etabli dan lesiel ek ki pou dirize par Garson Bondie, Jésus. Par exanp, anou get enn-de sapit avan. Ou pou kapav lir Daniel 2:44 silvouple?

Jon: OK. Li dir: “Dan lepok sa bann lerwa-la, Bondie ki dan lesiel pou etabli enn rwayom ki zame pa pou detrir. Ek sa rwayom-la pa pou vinn pou okenn lot pep. Li pou kraz tou sa bann rwayom-la ek li pou fini zot, ek limem ki pou regne pou touletan.”

 Cameron: Mersi. Eski ou panse ki sa verse-la isi pe koz lor Rwayom Bondie?

Jon: Hmm. Mo pa tro kone.

Cameron: Me remarke, isi li dir ki sa Rwayom-la “pou regne pou touletan.” Sa li vre pou Rwayom Bondie, me eski nou kapav dir sa pou bann gouvernman imin?

Jon: Non, mo pa krwar.

Cameron: Anou get enn lot profesi dan Daniel ki koz lor Rwayom Bondie. Se profesi ki trouv dan Daniel 7:13, 14. Konsernan enn dirizan ki pou vini apre, profesi-la dir: “Ti donn li dominasion, loner, ek enn rwayom, pou ki bann pep, bann nasion ek bann lang, zot tou servi li. So dominasion li enn dominasion ki pou dire pou touletan ek ki pa pou fini, ek so rwayom zame pa pou detrir.” Eski ena kitsoz ladan ki ou’nn trouv parey kouma dan lot profesi-la?

Jon: Wi, la osi li koz lor enn rwayom.

Cameron: Se vre. Me pa ninport ki rwayom. Remarke, li dir ki sa Rwayom-la ti pou ena lotorite lor “bann pep, bann nasion ek bann lang.” Savedir ki sa Rwayom-la pou dirize lor later antie.

Jon: Zame mo ti trouv sa koumsa avan, me ou ena rezon. Samem ki li pe dir la.

Cameron: Ek get osi seki sa profesi-la dir: “So dominasion li enn dominasion ki pou dire pou touletan ek ki pa pou fini, ek so rwayom zame pa pou detrir.” Eski ou pa trouv sa parey kouma profesi ki nou ti fek lir dan Daniel 2:44?

Jon: Wi, li parey.

Cameron: Anou fer enn ti rezime lor seki nou finn examine ziska ler. Ti ekrir profesi Daniel sapit 4 pou ki bann dimounn kone ki “sa Kikenn ki Pli Gran la, Li Sef dan rwayom bann dimounn.” Sa bann parol-la montre bien ki sa profesi-la ena enn pli gran lakonplisman ki sa lakonplisman ki ti konsern Neboukadnetsar la. Ek atraver liv Daniel, nou trouv bann profesi konsernan Rwayom Bondie ki’nn etabli dan lesiel ek ki pou dirize par so Garson. Alor, eski nou kapav dir ki sa profesi ki trouv dan Daniel sapit 4 la osi ena enn rapor avek Rwayom Bondie?

Jon: Wi, li paret lozik. Me la osi mo pa trouve ki rapor sa ena avek 1914.

Cameron: Bon, nou retourn avek Lerwa Neboukadnetsar. Dan premie lakonplisman sa profesi-la, sa gran pie-la ti reprezant Neboukadnetsar. Li ti aret regne pou enn tan kan ti koup pie-la ek ti les li koumsa mem pou set letan, setadir, kan li ti vinn fou pandan set an. Sa peryod set letan la ti fini kan Neboukadnetsar ti regagn so lespri ek ti rekoumans dirize. Dan deziem lakonplisman sa profesi-la, Bondie ti pou aret regne pou enn peryod letan​—me sa pa vedir ki Bondie inn fer kit erer.

Jon: Ki ou pe rod dir?

Cameron: Dan lepok Biblik, bann lerwa Izraelit ki ti regne dan Jérusalem ti koumadir pe asiz lor “tronn Jéhovah.” f Zot ti reprezant Bondie kan zot ti diriz So pep. Alor, regn sa bann lerwa-la ti vremem enn fason pou montre ki Bondie ti pe dirize. Me avek letan, laplipar sa bann lerwa-la ti dezobeir Bondie ek laplipar bann Izraelit ti swiv zot move lexanp. Akoz zot ti dezobeir, Bondie  ti les bann Babilonien atak zot ek gagn viktwar lor zot an 607 Avan Nou Lepok. Apartir sa lane-la, ti nepli ena okenn lerwa pou reprezant Jéhovah dan Jérusalem. Se dan sa sans-la ki koumadir Bondie ti aret regne. Ou pe arive konpran asterla?

Jon: Wi mo pe konpran.

Cameron: Alor 607 Avan Nou Lepok, se lane kot sa set letan-la ti koumanse, ek peryod letan kot Bondie ti pou aret dirize ti koumanse. Kan sa set letan-la fini, Bondie ti pou met enn nouvo dirizan pou reprezant Li​—me sann fwa-la, enn kikenn ki dan lesiel. Se lerla ki bann lezot profesi ki nou ti lir dan Daniel pou realize. Me pli gran kestion se: Kan eski sa set letan-la ti fini? Si nou reisi reponn sa kestion-la, nou pou kone kan Rwayom Bondie ti koumans dirize.

Jon: A dakor. Les mo devine​—sa set letan-la ti fini an 1914, pa vre?

Cameron: Exakteman! Ou’nn konpran.

Jon: Me kouma nou konn sa?

Cameron: Ofet, kan li ti lor later, Jésus ti fer konpran ki sa set letan-la pa ti ankor fini. g Alor sa ti bizin enn long peryod letan. Sa set letan-la ti koumanse plizir santenn lane avan ki Jésus vinn lor later, ek li ti kontigne mem si Jésus ti fini retourn dan lesiel. Rapel osi ki pa ti pou arive konpran sinifikasion bann profesi Daniel ziska “lepok lafin.” h Li interesan pou kone ki, ver lafin bann lane 1800, bann etidian Labib ti bien interese ar sa bann profesi-la ek zot ti examinn tousala an profonder. Se lerla ki zot ti koumans konpran ki sa set letan-la ti pou fini an 1914. Ek depi 1914, bann gran levennman dan lemond prouve ki se sa lane-la mem ki Rwayom Bondie ti koumans dirize dan lesiel. Se lerla ki bann dernie zour, setadir lepok lafin ti’nn koumanse. Mo kone ki tousala li ase nouvo pou ki ou konpran tou enn sel kout . . .

Jon: Wi. Mo pou bizin relir sa bann profesi-la ankor pou mo konpran zot pli bien.

Cameron: Pa gagn traka. Mo’si mo ti pran boukou letan pou konpran sa bann profesi-la ek zot lakonplisman. Me mo espere ki sa diskision ki nou’nn gagne la finn ed ou trouve ki krwayans bann Temwin Jéhovah lor Rwayom Bondie, li baze lor Labib.

Jon: Wi biensir. Mo finn touletan inpresione parski tou zot bann krwayans li baze lor Labib.

Cameron: Ek mo trouve ki ou’si ou ena dezir pou gagn bann repons ki sorti dan Labib. Me kouma mo’nn dir ou, li pa fasil pou konpran tou enn sel kout. Sirman ou ena ankor lezot kestion. Par exanp, nou’nn arive konpran ki sa set letan-la ena enn rapor avek Rwayom Bondie ek ki li ti koumanse an 607 Avan Nou Lepok. Me, kouma nou kone ki sa set letan-la ti fini an 1914? i

Jon: Wi, mo ti pe reflesi lor la.

Cameron: Labib limem ed nou pou kone ki kantite lane exakteman sa set letan-la reprezante. Eski ou ti pou kontan mo vini lot kou pou nou koz lor la?

Jon: Wi, pena problem.