മൈക്കിൾ: ജോൺ, ബൈബിളിനെക്കുറിച്ചുള്ള നമ്മുടെ ചർച്ചകൾ ഞാൻ വളരെ ആസ്വദിക്കുന്നുണ്ട്. * നമ്മൾ ഒടുവിൽ സംസാരിച്ചപ്പോൾ എന്നോട്‌ ഒരു ചോദ്യം ചോദിച്ചിരുന്നല്ലോ? ദൈവരാജ്യം 1914-ൽ ഭരണം ആരംഭിച്ചെന്ന് യഹോവയുടെ സാക്ഷികൾ വിശ്വസിക്കുന്നത്‌ എന്തുകൊണ്ടാണെന്നല്ലേ ചോദിച്ചത്‌?

ജോൺ: അതെ. ഞാൻ നിങ്ങളുടെ ഒരു പുസ്‌തകം വായിച്ചപ്പോൾ, ദൈവരാജ്യം 1914-ൽ ഭരണം തുടങ്ങിയെന്നു കണ്ടു. എനിക്ക് അതിശയം തോന്നി. കാരണം നിങ്ങളുടെ വിശ്വാസങ്ങളെല്ലാം ബൈബിളിനെ അടിസ്ഥാനപ്പെടുത്തിയാണെന്നല്ലേ താങ്കൾ പറയാറുള്ളത്‌.

മൈക്കിൾ: അതു ശരിയാ.

ജോൺ: ഞാൻ ബൈബിൾ മുഴുവൻ വായിച്ചിട്ടുണ്ട്. പക്ഷേ ഒരിടത്തും 1914 എന്നൊരു വർഷം കണ്ടതായി ഓർക്കുന്നില്ല. ഒരു ഓൺലൈൻ ബൈബിളിലും “1914” സെർച്ച് ചെയ്‌തു നോക്കി. ഒരൊറ്റ പ്രാവശ്യംപോലും അതു കണ്ടില്ല.

മൈക്കിൾ: ഏതായാലും, ബൈബിൾ മുഴുവൻ വായിച്ചതിന്‌ ഞാൻ ജോണിനെ അഭിനന്ദിക്കുന്നു. താങ്കൾക്ക് ബൈബിളിനോട്‌ വളരെ സ്‌നേഹമുണ്ടെന്ന് മനസ്സിലായി.

ജോൺ: അതുണ്ട്. ബൈബിൾപോലെ ഒരു പുസ്‌തകവും വേറെയില്ല.

മൈക്കിൾ: അതെ, അതെ. പിന്നെ മറ്റൊന്നിനുംകൂടെ ഞാൻ അഭിനന്ദിക്കുന്നു. ഒരു സംശയം വന്നപ്പോൾ ഉത്തരത്തിനായി ബൈബിളിലേക്കാണല്ലോ നോക്കിയത്‌. വിവേകത്തിനായി ‘തിരഞ്ഞുകൊണ്ടിരിക്കാനാണ്‌’ ബൈബിളും പ്രോത്സാഹിപ്പിക്കുന്നത്‌. * അതിനുവേണ്ടിയുള്ള ശ്രമം വളരെ നല്ലതാണ്‌.

ജോൺ: താങ്ക്യൂ. കൂടുതൽ പഠിക്കണമെന്നാണ്‌ എന്‍റെ ആഗ്രഹം. സത്യം പറഞ്ഞാൽ നമ്മൾ പഠിച്ചുകൊണ്ടിരിക്കുന്ന ഈ പുസ്‌തകത്തിൽ 1914-നെക്കുറിച്ചുള്ള ചില ഭാഗങ്ങൾ ഞാൻ വായിച്ചു. അവിടെ ഏതോ ഒരു രാജാവു കണ്ട സ്വപ്‌നത്തെക്കുറിച്ചു പറയുന്നുണ്ട്. ഒരു വൃക്ഷം വെട്ടിയിട്ടെന്നോ അത്‌ പിന്നെയും വളർന്നെന്നോ മറ്റോ.

മൈക്കിൾ: അതു ശരിയാ. ദാനിയേൽ 4-‍ാ‍ം അധ്യായത്തിൽ പറഞ്ഞിരിക്കുന്ന പ്രവചനമായിരിക്കും ജോൺ ഉദ്ദേശിച്ചത്‌. ബാബിലോണിലെ നെബൂഖദ്‌നേസർ രാജാവ്‌ കണ്ട ഒരു സ്വപ്‌നവുമായി ബന്ധപ്പെട്ടതാണ്‌ അത്‌.

ജോൺ: അതു തന്നെ. ഞാൻ ആ പ്രവചനം പലവട്ടം വായിച്ചു. സത്യം പറഞ്ഞാൽ ആ പ്രവചനത്തിന്‌ 1914 എന്ന വർഷവുമായോ ദൈവരാജ്യവുമായോ ഒരു ബന്ധവും കണ്ടില്ല.

മൈക്കിൾ: ജോണിന്‌ അറിയാമോ, ദൈവം പറഞ്ഞതുപോലെ ദാനിയേൽ എഴുതിയെങ്കിലും അവയുടെ പൂർണമായ അർഥം, എഴുതിയ ദാനിയേലിനുപോലും മനസ്സിലായില്ല!

ജോൺ: അതു ശരി. അത്‌ അതിശയമായിരിക്കുന്നല്ലോ!

മൈക്കിൾ: അതുകൊണ്ടാണ്‌, ദാനീയേൽ 12:8-ൽ “ഞാൻ കേട്ടു എങ്കിലും ഗ്രഹിച്ചില്ല” എന്ന് അവൻ പറഞ്ഞിരിക്കുന്നത്‌.

ജോൺ: അതു കേട്ടപ്പോൾ ആശ്വാസമായി. അപ്പോ, എനിക്കു മാത്രമല്ല മനസ്സിലാകാത്തത്‌.

മൈക്കിൾ: ഈ പ്രവചനങ്ങൾ, മനുഷ്യർക്ക് പൂർണമായും ഗ്രഹിക്കാനുള്ള ദൈവത്തിന്‍റെ സമയം വന്നിട്ടില്ലായിരുന്നു. അതുകൊണ്ടാണ്‌ ദാനിയേലിന്‌ അതു മനസ്സിലാകാഞ്ഞത്‌.  എന്നാൽ നമ്മുടെ നാളിൽ അത്‌ കൂടുതൽ വ്യക്തമായി മനസ്സിലാക്കാൻ കഴിയും.

ജോൺ: അതെന്താ ‘നമ്മുടെ നാളിൽ’ എന്നു പറഞ്ഞത്‌?

മൈക്കിൾ: തൊട്ട് അടുത്ത വാക്യം കണ്ടോ. ദാനീയേൽ 12:9: “ഈ വചനങ്ങൾ അന്ത്യകാലത്തേക്കു അടെച്ചും മുദ്രയിട്ടും ഇരിക്കുന്നു.” അതിന്‍റെ അർഥം ഈ പ്രവചനങ്ങൾ പിന്നീട്‌ അതായത്‌ ‘അന്ത്യകാലത്ത്‌’ മാത്രമേ ഗ്രഹിക്കാൻ കഴിയുമായിരുന്നുള്ളൂ എന്നാണ്‌. ആ അന്ത്യകാലത്താണ്‌ നാം ഇപ്പോൾ ജീവിക്കുന്നതെന്നു തെളിവുകൾ സൂചിപ്പിക്കുന്നു. നമ്മുടെ ബൈബിൾചർച്ചയിൽ അധികം താമസിയാതെ നാം അന്ത്യകാലത്തെക്കുറിച്ചു പഠിക്കും. *

ജോൺ: ദാനിയേൽ പുസ്‌തകത്തിലെ ആ പ്രവചനം ഒന്നു വിശദീകരിച്ചുതരാമോ?

മൈക്കിൾ: ഞാൻ ശ്രമിക്കാം.

മൈക്കിൾ: ആദ്യമായി, നെബൂഖദ്‌നേസർ രാജാവ്‌ സ്വപ്‌നത്തിൽ കണ്ട കാര്യങ്ങൾ ഞാൻ ചുരുക്കിപ്പറയാം. എന്നിട്ട് അതിന്‍റെ അർഥം വിശദീകരിക്കാം.

ജോൺ: ശരി.

മൈക്കിൾ: സ്വപ്‌നത്തിൽ, ആകാശത്തോളം എത്തുന്ന ഒരു പടുകൂറ്റൻ വൃക്ഷം നെബൂഖദ്‌നേസർ രാജാവ്‌ കണ്ടു. ആ വൃക്ഷം വെട്ടിയിടാൻ ദൈവത്തിന്‍റെ ദൂതൻ കല്‌പ്പിക്കുന്നത്‌ അവൻ കേട്ടു. എന്നാൽ അതിന്‍റെ തായ്‌വേര്‌ അഥവാ കുറ്റി വെട്ടിക്കളയാതെ നിറുത്തണമെന്നു ദൈവം പറഞ്ഞു. “ഏഴു കാലം” കഴിഞ്ഞ് വൃക്ഷം വീണ്ടും വളരുമായിരുന്നു. * ഈ പ്രവചനം ആദ്യം നെബൂഖദ്‌നേസർ രാജാവിന്‍റെ കാര്യത്തിൽത്തന്നെ ബാധകമായി. ആകാശത്തോളം എത്തിയ വൻവൃക്ഷംപോലെ ഉന്നതനായ രാജാവായിരുന്നെങ്കിലും “ഏഴു കാല”ത്തേക്ക് അവൻ വെട്ടിയിടപ്പെട്ടു. എന്താണ്‌ സംഭവിച്ചതെന്ന് ഓർക്കുന്നുണ്ടോ?

ജോൺ: ഇല്ല, അത്‌ ഓർക്കുന്നില്ല.

മൈക്കിൾ: സാരമില്ല. തെളിവനുസരിച്ച് ഏഴു വർഷത്തേക്കു നെബൂഖദ്‌നേസരിന്‍റെ സുബോധം നഷ്ടപ്പെട്ടതായി ബൈബിൾ പറയുന്നു. ആ സമയത്തു രാജാവായി ഭരിക്കാൻ അവനു കഴിഞ്ഞില്ല. ഏഴു കാലങ്ങൾ കഴിഞ്ഞപ്പോൾ നെബൂഖദ്‌നേസർ സുബോധത്തിലേക്കു തിരിച്ചു വരികയും വീണ്ടും ഭരണം തുടങ്ങുകയും ചെയ്‌തു. *

ജോൺ: ഇവിടം വരെ ഓകെ. പക്ഷേ ഇതിന്‌ ദൈവരാജ്യവും 1914 എന്ന വർഷവും തമ്മിൽ എന്താണ്‌ ബന്ധം?

മൈക്കിൾ: നമുക്ക് അതിലേക്കു വരാം. യഥാർഥത്തിൽ ഈ പ്രവചനത്തിന്‌ രണ്ടു നിവൃത്തിയുണ്ട്. ഒന്നാമത്തേത്‌, നെബൂഖദ്‌നേസർ രാജാവിന്‍റെ ഭരണം തടസ്സപ്പെട്ട, നമ്മൾ ഇപ്പോൾ ചർച്ച ചെയ്‌ത സംഭവമാണ്‌. എന്നാൽ രണ്ടാമത്തെ നിവൃത്തിയിൽ ദൈവത്തിന്‍റെ ഭരണത്തിനാണ്‌ കുറച്ചുകാലത്തേക്കു തടസ്സം വരുന്നത്‌. ഈ രണ്ടാമത്തെ നിവൃത്തിയാണ്‌ ദൈവരാജ്യവുമായി ബന്ധപ്പെട്ടിരിക്കുന്നത്‌.

ജോൺ: ഈ പ്രവചനത്തിന്‌ ദൈവരാജ്യവുമായി ബന്ധപ്പെട്ട രണ്ടാമതൊരു നിവൃത്തികൂടിയുണ്ടെന്ന് നിങ്ങൾക്ക് എങ്ങനെയാണു മനസ്സിലായത്‌?

മൈക്കിൾ: പ്രവചനത്തിൽത്തന്നെ അതിന്‍റെ ഒരു സൂചനയുണ്ട്. ദാനീയേൽ 4:17-ൽ ഈ പ്രവചനം നൽകിയതിന്‍റെ ഉദ്ദേശ്യത്തെക്കുറിച്ച് പറയുന്നു. ‘അത്യുന്നതനായവൻ മനുഷ്യരുടെ രാജത്വത്തിന്മേൽ വാഴുകയും അതിനെ തനിക്കു ബോധിച്ചവന്നു കൊടുക്കയും ചെയ്യുന്നു എന്നു ജീവനോടിരിക്കുന്നവർ അറിയേണ്ടതിന്‌’ ആണ്‌ പ്രവചനം രേഖപ്പെടുത്തിയത്‌. ഈ വാക്യത്തിൽ ‘മനുഷ്യരുടെ രാജത്വം’ എന്ന പ്രയോഗം ശ്രദ്ധിച്ചോ?

ജോൺ: ‘അത്യുന്നതനായവൻ മനുഷ്യരുടെ രാജത്വത്തിന്മേൽ വാഴുന്നു’ എന്ന ഭാഗമല്ലേ?

മൈക്കിൾ: അതുതന്നെ. ആരായിരിക്കും “അത്യുന്നതനായവൻ?”

ജോൺ: അത്‌ ദൈവമായിരിക്കും.

മൈക്കിൾ: ശരിയാണ്‌. അപ്പോൾ ‘മനുഷ്യരുടെ രാജത്വം’ എന്ന് ഇവിടെ പറയുന്നതോ? അത്‌ മനുഷ്യരുടെമേലുള്ള അത്യുന്നതനായവന്‍റെ അഥവാ ദൈവത്തിന്‍റെ ഭരണമാണ്‌. ഇതിൽനിന്നും, ഈ പ്രവചനത്തിൽ നെബൂഖദ്‌നേസരിന്‍റെ ഭരണം മാത്രമല്ല, ദൈവത്തിന്‍റെ ഭരണവും ഉൾപ്പെട്ടിട്ടുണ്ടെന്ന് മനസ്സിലാക്കാം. ഈ പ്രവചനത്തിന്‍റെ പശ്ചാത്തലം നോക്കുമ്പോൾ നമുക്ക് അത്‌ കുറച്ചുകൂടെ മനസ്സിലാകും.

ജോൺ: എന്നു പറഞ്ഞാൽ?

മൈക്കിൾ: ബൈബിൾപുസ്‌തകമായ ദാനിയേലിൽ ഒരു കേന്ദ്രവിഷയത്തെക്കുറിച്ച് പല പ്രാവശ്യം പറയുന്നുണ്ട്. ദൈവത്തിന്‍റെ പുത്രനായ യേശുക്രിസ്‌തുവിന്‍റെ കീഴിലുള്ള ഭരണത്തിലേക്ക് അത്‌ എപ്പോഴും വിരൽചൂണ്ടുന്നു. ഉദാഹരണത്തിന്‌, നമുക്ക് ഏതാനും ചില അധ്യായങ്ങൾ പുറകിലേക്കു പോകാം. ദാനീയേൽ 2:44 ഒന്നു വായിക്കാമോ?

ജോൺ: ശരി. അവിടെ ഇങ്ങനെ വായിക്കുന്നു: “ഈ രാജാക്കന്മാരുടെ കാലത്തു സ്വർഗ്ഗസ്ഥനായ ദൈവം ഒരുനാളും നശിച്ചുപോകാത്ത ഒരു രാജത്വം സ്ഥാപിക്കും; ആ രാജത്വം വേറെ ഒരു ജാതിക്കു ഏല്‌പിക്കപ്പെടുകയില്ല; അതു  ഈ രാജത്വങ്ങളെ ഒക്കെയും തകർത്തു നശിപ്പിക്കയും എന്നേക്കും നിലനില്‌ക്കയും ചെയ്യും.”

മൈക്കിൾ: കൊള്ളാം. ഈ വാക്യം ദൈവരാജ്യത്തെക്കുറിച്ചാണ്‌ പറയുന്നത്‌ എന്നു ജോണിന്‌ തോന്നുന്നുണ്ടോ?

ജോൺ: ഇല്ല. എനിക്ക് അത്ര ഉറപ്പില്ല.

മൈക്കിൾ: ഈ രാജത്വം ‘എന്നേക്കും നിലനില്‌ക്കുമെന്നു’ പറയുന്നത്‌ ശ്രദ്ധിച്ചോ. ദൈവരാജ്യത്തിന്‍റെ കാര്യത്തിൽ അങ്ങനെ പറയാം. എന്നാൽ ഏതെങ്കിലും ഒരു മാനുഷ ഗവണ്മെന്‍റിന്‍റെ കാര്യത്തിൽ അങ്ങനെ പറയാൻ കഴിയുമോ?

ജോൺ: ഇല്ലെന്നു തോന്നുന്നു.

മൈക്കിൾ: ദൈവരാജ്യത്തെക്കുറിച്ചു ദാനിയേൽ പുസ്‌തകത്തിൽത്തന്നെ പറയുന്ന മറ്റൊരു പ്രവചനം നോക്കാം. ഭാവിയിൽ ഭരിക്കുന്ന ഒരു ഭരണാധികാരിയെക്കുറിച്ച് ദാനീയേൽ 7:13, 14-ലെ പ്രവചനം ഇങ്ങനെ പറയുന്നു: “സകലവംശങ്ങളും ജാതികളും ഭാഷക്കാരും അവനെ സേവിക്കേണ്ടതിന്നു അവന്നു ആധിപത്യവും മഹത്വവും രാജത്വവും ലഭിച്ചു; അവന്‍റെ ആധിപത്യം നീങ്ങിപ്പോകാത്ത നിത്യാധിപത്യവും അവന്‍റെ രാജത്വം നശിച്ചുപോകാത്തതും ആകുന്നു.” ഈ പ്രവചനത്തിൽ നമ്മുടെ വിഷയവുമായി ബന്ധമുള്ള എന്തെങ്കിലുമുണ്ടോ?

ജോൺ: ഇവിടെ ഒരു രാജ്യത്തെക്കുറിച്ച് പറയുന്നുണ്ട്.

മൈക്കിൾ: അതുതന്നെ. ഇത്‌ ഒരു സാധാരണ രാജ്യമല്ല. “സകലവംശങ്ങളും ജാതികളും ഭാഷക്കാരും” ആയവരുടെ മേൽ ഈ രാജ്യത്തിന്‌ ആധിപത്യം ലഭിച്ചു എന്നല്ലേ പറഞ്ഞിരിക്കുന്നത്‌. അതിന്‍റെ അർഥം, ഇതൊരു ആഗോളഭരണമായിരിക്കും.

ജോൺ: അതു ശരിയാ. പക്ഷേ, എനിക്ക് അതു മനസ്സിലായില്ലായിരുന്നു.

മൈക്കിൾ: പ്രവചനത്തിൽ ഇങ്ങനെയും പറയുന്നുണ്ട്: “അവന്‍റെ ആധിപത്യം നീങ്ങിപ്പോകാത്ത നിത്യാധിപത്യവും അവന്‍റെ രാജത്വം നശിച്ചുപോകാത്തതും ആകുന്നു.” നാം ഇപ്പോൾ വായിച്ച ദാനീയേൽ 2:44-ലെ പ്രവചനവുമായി ഇതിനു സാമ്യമില്ലേ?

ജോൺ: ഉം. ഉണ്ട്.

മൈക്കിൾ: ഇതുവരെ ചർച്ച ചെയ്‌ത കാര്യങ്ങൾ നമുക്ക് ഒന്നുകൂടെ നോക്കാം. ‘അത്യുന്നതനായവൻ മനുഷ്യരുടെ രാജത്വത്തിന്മേൽ വാഴും’ എന്ന് ജനങ്ങൾ അറിയേണ്ടതിനാണ്‌ ദാനിയേൽ 4-‍ാ‍ം അധ്യായത്തിലെ പ്രവചനം നൽകിയിരിക്കുന്നത്‌. അതിന്‍റെ അർഥം നെബൂഖദ്‌നേസർ ഉൾപ്പെട്ട നിവൃത്തിയേക്കാൾ കൂടുതലായ ഒരു നിവൃത്തി ഈ പ്രവചനത്തിനുണ്ടെന്നാണ്‌. കൂടാതെ, ദൈവരാജ്യഭരണത്തെക്കുറിച്ചും ഭരണാധികാരിയെക്കുറിച്ചും ഉള്ള പല പ്രവചനങ്ങളും ദാനിയേൽ പുസ്‌തകത്തിൽ കാണാൻ കഴിയും. അങ്ങനെയെങ്കിൽ, നമ്മൾ പരിചിന്തിക്കുന്ന ദാനിയേൽ 4-‍ാ‍ം അധ്യായത്തിലെ പ്രവചനത്തിനും ന്യായമായും ദൈവരാജ്യവുമായി ബന്ധമുണ്ടായിരിക്കില്ലേ?

ജോൺ: ഉണ്ടായിരിക്കേണ്ടതാണ്‌. പക്ഷേ, ഇപ്പോഴും ഈ പ്രവചനങ്ങൾക്ക് 1914-മായുള്ള ബന്ധം പിടികിട്ടിയിട്ടില്ല.

മൈക്കിൾ: അങ്ങനെയെങ്കിൽ, നമുക്ക് നെബൂഖദ്‌നേസർ രാജാവിന്‍റെ കാര്യത്തിലേക്കു തിരിച്ചുപോകാം. പ്രവചനത്തിന്‍റെ ആദ്യനിവൃത്തിയിൽ വൃക്ഷം അവനെയാണ്‌ ചിത്രീകരിച്ചത്‌. ആ വൃക്ഷം വെട്ടിയിടപ്പെട്ട ഏഴു കാലത്തേക്കു, അതായത്‌ നെബൂഖദ്‌നേസരിന്‍റെ സുബോധം നഷ്ടമായ കാലത്ത്‌, അവന്‍റെ ഭരണം തടസ്സപ്പെട്ടു. നെബൂഖദ്‌നേസർ സുബോധത്തിലേക്കു തിരികെവന്ന് വീണ്ടും ഭരണം തുടങ്ങിയപ്പോൾ ആ ഏഴു കാലങ്ങൾ അവസാനിച്ചു. ഇനി, ഈ പ്രവചനത്തിന്‍റെ രണ്ടാമത്തെ നിവൃത്തിയിൽ ദൈവത്തിന്‍റെ രാജത്വം കുറച്ചു കാലത്തേക്കു തടസ്സപ്പെടും. എന്നാൽ, ദൈവത്തിന്‍റെ ഭാഗത്തുള്ള എന്തെങ്കിലും വീഴ്‌ചകൊണ്ടല്ല ഇതു സംഭവിക്കുന്നത്‌.

ജോൺ: മനസ്സിലായില്ല.

മൈക്കിൾ: ബൈബിൾകാലങ്ങളിൽ യെരുശലേമിൽ ഭരിച്ചിരുന്ന ഇസ്രായേല്യരാജാക്കന്മാർ “യഹോവയുടെ സിംഹാസനത്തിൽ” ഇരുന്നു ഭരണം നടത്തുന്നതായി പറഞ്ഞിരുന്നു. * ദൈവത്തെ പ്രതിനിധാനം ചെയ്‌തുകൊണ്ടാണ്‌ അവർ ജനത്തെ ഭരിച്ചത്‌. അതുകൊണ്ട്, ആ രാജാക്കന്മാരുടെ ഭരണം വാസ്‌തവത്തിൽ ദൈവത്തിന്‍റെ രാജത്വത്തെയാണ്‌ അർഥമാക്കിയത്‌. കാലം കടന്നുപോകവെ, ആ രാജാക്കന്മാരിൽ മിക്കവരും ദൈവത്തോട്‌ അനുസരണക്കേടു കാണിച്ചു, ഇസ്രായേല്യരിൽ ഭൂരിഭാഗവും അതേ പാത പിന്തുടരുകയും ചെയ്‌തു. അവർ അനുസരണക്കേടു കാണിച്ചതുകൊണ്ട് ബി.സി. 607-ൽ ബാബിലോണ്യർ  അവരെ കീഴടക്കാൻ ദൈവം അനുവദിച്ചു. അതിനു ശേഷം യഹോവയെ പ്രതിനിധാനം ചെയ്‌തുകൊണ്ട് യെരുശലേമിൽ ഒരു രാജാവും ഭരിച്ചില്ല. ആ അർഥത്തിലാണ്‌ ദൈവത്തിന്‍റെ ഭരണം തടസ്സപ്പെട്ടത്‌. ഇതുവരെ പറഞ്ഞിടത്തോളം മനസ്സിലായല്ലോ, അല്ലേ?

ജോൺ: ഒരുവിധം.

മൈക്കിൾ: അങ്ങനെ, ദൈവത്തിന്‍റെ ഭരണത്തിനു തടസ്സം വന്ന ആ ഏഴു കാലങ്ങളുടെ കാലഘട്ടം ബി.സി. 607-ൽ ആരംഭിച്ചു. ഈ ഏഴു കാലങ്ങൾ കഴിയുമ്പോൾ, ദൈവത്തെ പ്രതിനിധാനം ചെയ്യുന്ന ഒരു പുതിയ രാജാവിനെ അവൻ അവരോധിക്കും, എന്നാൽ യെരുശലേമിലല്ല, പിന്നെയോ സ്വർഗത്തിലായിരിക്കും. അപ്പോഴാണ്‌, ദാനിയേൽ പുസ്‌തകത്തിൽ പറഞ്ഞിരിക്കുന്ന മറ്റു പ്രവചനങ്ങൾ നിവൃത്തിയേറുന്നത്‌. ഈ ഏഴു കാലങ്ങൾ എപ്പോഴാണ്‌ അവസാനിക്കുന്നതെന്ന് ജോണിന്‌ സംശയം തോന്നിയേക്കാം. ഇതിന്‌ ഉത്തരം കിട്ടിയാൽ ദൈവരാജ്യം എപ്പോഴാണ്‌ ഭരണം തുടങ്ങിയതെന്നു നമുക്കു മനസ്സിലാക്കാം.

ജോൺ: എന്‍റെ ഊഹം ശരിയാണെങ്കിൽ, ഏഴു കാലങ്ങൾ അവസാനിക്കുന്നത്‌ 1914-ൽ ആയിരിക്കും, അല്ലേ?

മൈക്കിൾ: അതു തന്നെ! കൊള്ളാം.

ജോൺ: പക്ഷേ, അത്‌ എങ്ങനെ ഉറപ്പിക്കാം?

മൈക്കിൾ: നമുക്കു നോക്കാം. യേശു ഭൂമിയിലായിരുന്നപ്പോഴും ഏഴു കാലങ്ങൾ അവസാനിച്ചിട്ടില്ലെന്ന് അവൻ സൂചിപ്പിക്കുകയുണ്ടായി. * അതുകൊണ്ട്, അത്‌ ഒരു നീണ്ട കാലഘട്ടമായിരിക്കണം. ഏഴു കാലങ്ങൾ യേശു ഭൂമിയിൽ വരുന്നതിനു നൂറുകണക്കിന്‌ വർഷങ്ങൾക്കു മുമ്പേ തുടങ്ങിയതാണ്‌. യേശു സ്വർഗത്തിലേക്കു പോയതിനു ശേഷവും അതു തുടരും. ദാനിയേൽ പുസ്‌തകത്തിലെ പ്രവചനങ്ങളുടെ അർഥം ‘അന്ത്യകാലം’ വരെ വ്യക്തമാകുകയില്ലായിരുന്നു എന്നു പറഞ്ഞത്‌ ഓർക്കുന്നുണ്ടല്ലോ. * 1800-കളുടെ അവസാനമായപ്പോഴേക്കും ആത്മാർഥതയുള്ള ബൈബിൾ വിദ്യാർഥികൾ ഇത്‌ ഉൾപ്പെടെയുള്ള ബൈബിൾപ്രവചനങ്ങൾ താത്‌പര്യപൂർവം പരിചിന്തിക്കാൻ പ്രചോദിതരായി എന്നതാണ്‌ രസകരമായ സംഗതി. ഏഴു കാലങ്ങൾ 1914-ൽ അവസാനിക്കുമെന്ന് അവർ തിരിച്ചറിഞ്ഞുതുടങ്ങി. അന്നു മുതലുള്ള സുപ്രധാന ലോകസംഭവങ്ങൾ 1914-ൽ തന്നെയാണു ദൈവരാജ്യം സ്വർഗത്തിൽ ഭരണം ആരംഭിച്ചത്‌ എന്നതിന്‌ ഉറപ്പുനൽകി. ലോകം അന്ത്യകാലത്തേക്ക് അഥവാ അതിന്‍റെ അവസാന നാളുകളിലേക്ക് പ്രവേശിച്ചത്‌ ആ വർഷമായിരുന്നു. പുതിയ വിവരങ്ങളായതുകൊണ്ട് ഇതെല്ലാം മനസ്സിലാക്കാൻ ജോണിനു കുറച്ചു ബുദ്ധിമുട്ടായിരിക്കുമെന്ന് എനിക്ക് അറിയാം . . .

ജോൺ: അതെ. എന്താണെങ്കിലും ഇതൊക്കെ ഒന്നുകൂടെ പരിശോധിച്ചു നോക്കിയാലേ ശരിക്കും മനസ്സിലാകൂ.

മൈക്കിൾ: സാരമില്ല. ഇതൊക്കെ കൃത്യമായി മനസ്സിലാക്കാൻ എനിക്കും കുറെ സമയമെടുത്തു. പക്ഷേ, ഈ ചർച്ചയിൽനിന്ന് ഒരു കാര്യം ജോണിനു എന്തായാലും മനസ്സിലായിക്കാണുമെന്നു ഞാൻ കരുതുന്നു, ദൈവരാജ്യത്തെക്കുറിച്ചുള്ള യഹോവയുടെ സാക്ഷികളുടെ വിശ്വാസങ്ങൾ ബൈബിളിൽ അധിഷ്‌ഠിതമാണെന്ന്.

ജോൺ: നിങ്ങളുടെ വിശ്വാസങ്ങൾ ബൈബിളിൽ അധിഷ്‌ഠിതമായിരിക്കുന്നത്‌ എന്നെ വളരെ അതിശയിപ്പിച്ചിട്ടുണ്ട്.

മൈക്കിൾ: ജോണിനും അതുതന്നെയാണ്‌ ഇഷ്ടമെന്ന് എനിക്ക് തോന്നിയിട്ടുണ്ട്. ഞാൻ നേരത്തേ പറഞ്ഞതുപോലെ, എല്ലാംകൂടെ മനസ്സിലാക്കാൻ അല്‌പം ബുദ്ധിമുട്ടു തോന്നിയേക്കാം. ഇപ്പോഴും ചില സംശയങ്ങൾ ബാക്കിയുണ്ടായിരിക്കും, അല്ലേ. ഉദാഹരണത്തിന്‌, ഏഴു കാലങ്ങൾ ദൈവരാജ്യവുമായി ബന്ധപ്പെട്ടിരിക്കുന്നെന്നും അത്‌ ബി.സി. 607-ൽ തുടങ്ങിയെന്നും നമ്മൾ മനസ്സിലാക്കി. എന്നാൽ, ഏഴു കാലങ്ങൾ 1914-ൽ അവസാനിച്ചെന്ന് കൃത്യമായി നമുക്ക് എങ്ങനെ മനസ്സിലാക്കാം? *

ജോൺ: ഞാൻ അതെക്കുറിച്ച് ചിന്തിക്കുകയായിരുന്നു.

മൈക്കിൾ: ഏഴു കാലങ്ങൾ കൃത്യമായി എത്ര ദൈർഘ്യമുള്ളതാണെന്നു മനസ്സിലാക്കാൻ ബൈബിൾതന്നെ നമ്മെ സഹായിക്കും. അടുത്ത തവണ നമുക്ക് ആ വിഷയത്തെക്കുറിച്ച് ചർച്ച ചെയ്‌താലോ?

ജോൺ: അതു കൊള്ളാം. ▪ (w14-E 10/01)