David: John, ekj jleich daut emma sea, met die von de Schreft to vetalen, soo aus wie daut nu aul ieremol jedonen haben. * Daut latste Mol fruachst du mie äwa Gott sien Kjennichrikj. Du fruachst, wuarom Jehova siene Zeijen jleewen, daut Gott sien Kjennichrikj aune 1914 haft aunjefongen to rejieren.

John: Jo. Ekj läsd eent von june Bieekja un doa säd daut, daut Gott sien Kjennichrikj haft aune 1914 aunjefongen to rejieren. Un dan wort ekj nieschierich, wiels du sajchst emma, daut jie aul june Lieren oppe Schreft stetten.

David: Jäa, daut stemt, wie doonen.

John: Na, ekj hab de Schreft selfst aul derchjeläst, oba mie denkjt daut von kjeenen Varsch, wua daut von daut Joa 1914 rät. Un doawäajen socht ekj uk em Internet en eene Bibel no “1914”. Oba soon Varsch kjeem noanich väa.

David: Ekj mott die werkjlich lowen, John, daut du de Schreft hast gaunz derchjeläst. Du motst Gott sien Wuat werkjlich väl räakjnen.

John: Jo, daut doo ekj. De Schreft es daut wichtichste Buak.

David: Doa best du gaunz em rajchten. Un ekj mott die uk doafäa lowen, daut du enne Schreft no de Auntwuaten sieekjst fa diene Froagen. Du deist krakjt daut, to waut de Schreft ons toorot: daut wie wieda sellen no Vestentnis sieekjen. * Un daut es sea goot, daut du daut soo aus dit deist.

John: Dankscheen. Ekj well uk noch wieda lieren. Un doawäajen deed ekj noch een bät mea nosieekjen, äwa daut Joa 1914, en daut Buak, waut wie studieren. Un doa rät daut von eenen Droom, waut een Kjennich haud. Daut wia von eenen grooten Boom, waut dan aufjehakt wort un dan wada trigjwoss, ooda irjent soo waut.

David: Ah jo. Daut es de Profezeiunk, waut en Daniel, Kapitel 4 oppjeschräwen es. Dee rät von eenen Droom, waut de Kjennich Nebukadnezar von Babel haud.

John: Jo, daut es krakjt dee. Ekj hab de Profezeiunk välmol äwajeläst, oba rajcht jesajcht kaun ekj noch emma nich vestonen, waut dee met Gott sien Kjennichrikj ooda met daut Joa 1914 to doonen haft.

David: Weetst John, nich mol de Profeet Daniel kunn aules vestonen, waut dise Profezeiunk krakjt bedied!

John: Opp iernst nich?

David: Nä. Kjikj mol hia en Daniel 12:8 (PB). Hia sajcht Daniel: “Ekj hieed, oba vestunt am nich”.

John: Soo ekj sie nich de eensja. Nu feel ekj mie aul een bät bäta.

David: Daniel vestunt de Profezeiunk nich, wäajen daut wia noch nich de Tiet, waut Gott bestemt haud, wua de Menschen de Profezeiungen von daut Buak Daniel sullen gaunz vestonen. Oba nu en onse Tiet kjenn wie dee aul bäta vestonen.

John: Wuarom sajchst du daut?

David: Kjikj mol, waut wie en dän näakjsten Varsch läsen kjennen. Daniel 12:9 (PB, von ons dunkel jemoakt), doa sajcht daut: “De Wieed sent veschloten un vesäajelt, bat de Doag, dee nom Enj gonen.” Soo dise Profezeiungen wudden mau väl lota to vestonen gonen, en “de Doag, dee nom Enj gonen”, ooda en de latste Tiet. Un boolt woa wie en ons Bibelstudium lieren, wuarom wie sajen kjennen, daut wie nu krakjt en dee Tiet läwen. *

John: Soo, kaust du mie dan de Profezeiunk en Daniel utlajen?

David: Ekj woa mien bastet vesieekjen.

David: Well wie ieescht mol seenen, waut de Kjennich Nebukadnezar en sienen Droom sach. Un dan kjenn wie doaräwa räden, waut dee bediet.

John: Jäa.

David: En dän Droom sach Nebukadnezar eenen grooten Boom, waut bat aum Himmel rieekjt. Un dan hieed hee Gott sienen Enjel sajen, daut dän Boom sull aufjehakt woaren. Oba Gott säd, daut dän Boom sien Stobben sull enne Ieed stonen bliewen. Un no eene Tiet von “säwen Joa” sull de Boom wada waussen. * Toom ieeschte Mol erfeld dise Profezeiunk sikj aun dän Kjennich Nebukadnezar. Wan de Kjennich Nebukadnezar uk een majchtja Kjennich wia, soo aus een Boom, waut bat aum Himmel rieekjt, wort am oba aufjehakt fa eene Tiet von “säwen Joa”. Weetst du noch, waut dan passieed?

John: Nä, mie denkjt daut goanich mea.

David: Kjeen Trubbel. De Bibel wiest, daut Nebukadnezar onkluak wort em Kopp fa säwen Joa. Un en dise Tiet kunn hee nich aus Kjennich rejieren. Oba aum Enj von de säwen Joa wort Nebukadnezar wada kluak em Kopp un funk wada aun to rejieren. *

John: Ok, bat hia kom ekj noch met. Oba waut haft aul dit met Gott sien Kjennichrikj un daut Joa 1914 to doonen?

David: Dise Profezeiunk erfeld sikj twee Mol. Daut ieeschte Mol erfeld dee sikj, aus de Kjennich Nebukadnezar fa een Stootje nich rejieren kunn. Un de tweede Erfellunk haft doamet to doonen, daut fa eene jewesse Tiet Gott siene Rejierunk opphieren wudd. Soo, dise tweede Erfellunk, haft met Gott sien Kjennichrikj to doonen.

John: Oba woo weetst du daut, daut de Profezeiunk eene tweede Erfellunk haft?

David: Daut kjenn wie vestonen, wan wie de Profezeiunk läsen, en Daniel 4:14 (PB). Doa sajcht daut, “daut de Menschheit enseenen woat, daut de aulahechsta Gott äwa de Velkja un Lenda rejieet. Hee stald däm äwa daut Rikj, wäm hee well”. Kaust seenen, hia rät daut von wäm, waut “äwa de Velkja un Lenda rejieet”?

John: Jo, daut sajcht, daut “de aulahechsta Gott äwa de Velkja un Lenda rejieet.”

David: Jo, daut stemt. Un doaraun kjenn wie seenen, daut de Profezeiunk sikj nich bloos om Nebukadnezar haundelt. Daut haft uk met de Rejierunk äwa aule “Velkja un Lenda” to doonen, aulsoo met Gott siene Rejierunk äwa de Menschen. Un daut paust uk met daut toop, wua daut Buak Daniel ver un no dise Profezeiunk von rät.

John: Waut meenst du doamet?

David: En daut Bibelbuak Daniel jeit daut emma wada om dautselwje Teema. Sea foaken jeit daut doabennen doarom, wan Gott sien Kjennichrikj rejieren wudd, met sienen Sän Jesus aus Kjennich. Biejlikj, well wie mol een poa Kapitels trigj kjikjen. Wurscht du wellen Daniel 2:44 (PB) läsen?

John: Jo. Daut sajcht: “To dee Tiet von dise Kjennichs woat Gott em Himmel een eewjet Rikj oppstalen. Kjeena woat daut jeemols äwamajchtjen. Daut woat aule aundre Kjennichrikjs en Bieta bräakjen un venichten, oba woat selfst opp emma bliewen.”

David: Dankscheen fa daut läsen. Wurscht du sajen, daut dis Varsch met Gott sien Kjennichrikj to doonen haft?

John: Ekj weet nich neiw.

David: Kjikj nochmol, daut sajcht, daut daut Rikj woat selfst “opp emma bliewen.” Daut es waut, waut wie von Gott sien Kjennichrikj wudden sajen kjennen, oba jleefst du, wudd wie daut uk von eene menschelje Rejierunk sajen kjennen?

John: Nä, daut jleew ekj nich.

David: Hia es noch eene Profezeiunk en daut Buak Daniel, waut von Gott sien Kjennichrikj rät. Daut es de Profezeiunk en Daniel 7:13-14 (PB, von ons dunkel jemoakt). Daut rät von eenen, waut lota noch mol rejieren wudd. Daut sajcht, hee kjricht “Macht un Pracht un Krauft. Un de Menschen von aule Velkja, Lenda, un Sproaken bäden am aun. Sien Rajcht to rejieren wudd nienich to Enj komen, un sien Rikj wudd kjeena äwanämen”. Kaust du seenen, von waut daut hia wada rät?

John: Daut rät hia wada von een Rikj.

David: Daut es rajcht. Un daut rät nich bloos von irjent een Rikj. Kjikj, daut sajcht, daut dit Rikj wudd äwa “aule Velkja, Lenda, un Sproaken” Macht haben. Met aundre Wieed jesajcht, dit Kjennichrikj wudd äwa de gaunze Welt rejieren.

John: Daut haud ekj nich kunt vestonen, oba du best rajcht, daut sajcht hia soont.

David: Un kjikj uk, waut de Profezeiunk noch sajcht: “Sien Rajcht to rejieren wudd nienich to Enj komen, un sien Rikj wudd kjeena äwanämen.” Daut hieet sikj sea soo aus daut, waut wie jroz en de Profezeiunk jeläst haben en Daniel 2:44, nich soo?

John: Jo, daut hieet sikj soo.

David: Soo, bat nu hab wie jeseenen, daut de Profezeiunk von Daniel, Kapitel 4 jejäft wort toom de Menschen weeten loten, daut “de aulahechsta Gott äwa de Velkja un Lenda rejieet”. Dise Wieed wiesen dietlich, daut dise Profezeiunk noch eene jratre Erfellunk haud aus bloos dee, wua Nebukadnezar met en wia. Un opp miere Städen en daut Buak Daniel kjenn wie Profezeiungen doavon läsen, daut Gott sien Kjennichrikj oppjestalt woat un daut sien Sän doa de Harscha sennen woat. Wudd wie no daut no nich uk sajen kjennen, daut de Profezeiunk en Daniel, Kapitel 4 uk waut met Gott sien Kjennichrikj to doonen haft?

John: Daut wudd eena noch sajen kjennen. Oba ekj kaun doawäajen noch emma nich vestonen, woo jie opp daut Joa 1914 komen.

David: Na, well wie nochmol wada trigjgonen, no dän Kjennich Nebukadnezar. Hool em Denkj, daut de Boom von de Profezeiunk Nebukadnezar väastald. Hee kunn fa säwen Joa nich rejieren, wäajens hee onkluak wort em Kopp. Dise Tiet wia to Enj, aus Nebukadnezar wada kluak wort em Kopp un wada aunfunk to rejieren. Un en de tweede Erfellunk von de Profezeiunk, wudd Gott siene Rejierunk fa een Stootje opphieren. Oba daut wia nich wäajen Gott waut orrajchtet jedonen haud.

John: Waut meenst du doamet?

David: En de Bibel woat von de israelitische Kjennichs, waut en Jerusalem rejieeden, jesajcht, daut dee “opp däm HARN sienen Troon” sauten. * Dee deeden en Gott sienen Nomen äwa sien Volkj rejieren. Soo, dise Kjennichs stalden Gott siene Rejierunk väa. Oba met de Tiet worden de mieeschte Kjennichs von Israel Gott ojjehuarsom un de mieeschte von de Israeliten deeden äa schlajchtet Biespel no. Un wäajen de Israeliten ojjehuarsom worden leet Gott daut too, daut de Babelonia dee en daut Joa 607 v. Chr. jewonnen. Un von dee Tiet aun, jeef daut kjeene Kjennichs mea en Jerusalem, waut Jehova väastalden. Un daut es dan, aus Gott siene Rejierunk fa eene Tiet opphieed. Kjemst noch met?

John: Ekj jleew, noch jo.

David: Soo, aune 607 v. Chr. funk de Tiet von säwen Joa aun, aus doa kjeen Kjennich mea Gott siene Rejierunk väastald. Un aum Enj von dise Tiet wudd Gott eenen nieen Harscha ensaten. Oba ditmol wudd daut nich oppe Ieed sennen, oba em Himmel. Un daut es uk dan, wan de aundre Profezeiungen von Daniel sikj erfellen wudden, waut wie jroz läsden. Soo, nu es de Froag, wanea wudden dise säwen Joa to Enj sennen? Wan wie daut ieescht vestonen, dan kjenn wie uk weeten, wanea Gott sien Kjennichrikj wudd aunfangen to rejieren.

John: Ah, nu weet ekj. Du woascht secha sajen, daut de Tiet von säwen Joa aune 1914 to Enj wia!

David: Krakjt soo es et!

John: Oba woo weet wie daut?

David: Na, aus Jesus oppe Ieed wia, jeef hee auntovestonen, daut dise Tiet von säwen Joa noch nich to Enj wia. * Doano mott daut eene sea lange Tiet sennen. Dise Tiet von säwen Joa funk hundade Joaren ea aun, aus Jesus no de Ieed kjeem un dee jinkj uk noch wieda, aus Jesus aul wada em Himmel wia. Un hool uk em Denkj, daut de Bediedunk von Daniel siene Profezeiungen mau wudd enne latste Tiet kloa woaren, en “de Doag, dee nom Enj gonen”. * Rom daut Joa 1870 intressieeden opprechtje Bibelforscha sikj sea fa dise Profezeiungen un deeden sikj dee dolla unjastonen. Un met de Tiet kunnen dee emma bäta vestonen, daut dise Tiet von säwen Joa aune 1914 wudd to Enj sennen. Un välet, waut to dee Tiet enne Welt passieed, wees uk kloa, daut Gott sien Kjennichrikj daut Joa haud aunjefongen, em Himmel to rejieren. Un daut Joa funk de Tiet aun, waut de Schreft de latste Tiet nant. Ekj weet, daut kaun nu aules een bät väl sennen toom bejriepen . . .

John: Jo, daut es. Ekj woa mie aules nochmol derchläsen, om daut ekj daut aules noch kloara hab.

David: Sorj die nich, daut dieed mie uk een Stoot, bat ekj ieescht mol kloa haud, woo daut aules tooppaust. Oba oppet weinichste hop ekj, daut die onse Unjahoolunk jeholpen haft to seenen, daut Jehova siene Zeijen äaren Gloowen von daut Kjennichrikj oppe Schreft stetten.

John: Jo, daut es gaunz secha. Ekj jleich daut emma to seenen, woo jie aules met de Schreft utlajen, waut jie jleewen.

David: Un ekj kaun seenen, daut du daut uk soo west. Soo aus ekj aul säd, daut es een deel toom daut aula opp eemol bejriepen. Un secha twiewelst du uk noch äwa eenjet. Biejlikj, nu weet wie, daut de Tiet von säwen Joa met Gott sien Kjennichrikj to doonen haft un daut dee Tiet aune 607 v. Chr. aunfunk. Oba woo krakjt weet wie daut, daut dise Tiet von säwen Joa aune 1914 to Enj wia? *

John: Jo, doa hab ekj noch mienen Twiewel äwa.

David: De Schreft halpt ons krakjt to weeten, woo lang dise Tiet von säwen Joa es. Wurscht du jleichen, daut wie ons daut daut näakjste Mol unjastonen? *

John: Jo, daut wudd ekj jleichen.