Julio: Ernesto, * nabé riuuladxeʼ modo huayuinu de cani rusiidiʼ Biblia. Rietenalaʼdxuʼ nase que gunabadiidxaluʼ xiixa de Reinu stiʼ Dios la? guʼdxuʼ naa rapuʼ gana gannuʼ xiñee laadu, ca testigu stiʼ Jiobá, rusíʼdidu binni iza 1914 nga bizulú cayuni mandar Reinu stiʼ Dios.

Ernesto: Dxandíʼ, biindaʼ ni lu tobi de ca revista stitu, luni rieeteʼ bizulú Reinu stiʼ Dios cayuni mandar lu iza 1914, ne qué ñeneʼ ni. Laatu riniʼtu guiráʼ ni runi cretu zeedacani lu Biblia.

Julio: Zacapeʼ nga laani, cani runi credu zeedacani lu Biblia.

Ernesto: Peru naa maʼ biindaʼ guidubi Biblia ne qué rietenalaʼdxeʼ pa zeeda iza ca luni. Nga runi biyubeʼ iza «1914» lu ti Biblia nuu lu Internet peru qué nidxelaʼ gastiʼ.

Julio: Guizáʼ galán cani maʼ biʼnuʼ riʼ. Primé la? maʼ biindaluʼ guidubi Biblia. Nga rusihuinni guizáʼ rusisácaluʼ ni.

Ernesto: Ya, para naa la? gástiruʼ sti libru jma risaca qué laani.

Julio: Ngaca riníʼ iqueʼ. Ne sti cosa galán ni biʼnuʼ nga, luni biyúbiluʼ ni racaláʼdxiluʼ gánnaluʼ. Biʼnuʼ cásipeʼ modo na Biblia gúninu: cadi gusaana de guyúbinu guizíʼdinu jma. * ¡Guizáʼ galán ni rúniluʼ ca!

Ernesto: Xquíxepeʼ lii Julio. Napaʼ gana guiziideruaʼ nga runi. Ne maʼ biyuberuáʼ jma de iza 1914 ne bidxelaʼ xiixa ni caníʼ de laani lu libru cadúʼndanu que. Cuzeeteni de ti yaga naroʼbaʼ ni bigácabe, peru bigaani sti biaje... Zacá ga ni zuluáʼ.

Julio: Ah, dxandíʼ. Profecía zeeda lu capítulo 4 stiʼ Daniel que ndiʼ naluʼ. Ruzeeteni ni guníʼ xcaandaʼ Nabucodonosor, rey stiʼ Babilonia.

Ernesto: Laani nga. Biindaʼ ni stale biaje peru dede yanna cadi cayeneʼ diaʼ paraa rieeteʼ de Reinu stiʼ Dios o de iza 1914 luni.

Julio: Cadi guizaalaʼdxuʼ. Nin profeta Daniel, hombre bicaa profecía riʼ qué ñene xi bicaa.

Ernesto: Dxandíʼ la?

Julio: Ya. Biiyaʼ xi bicaabe raríʼ lu Daniel 12:8: «Binadiaʼgaʼ peru qué ñénediaʼ».

Ernesto: Dxandíʼ naluʼ, cadi naasiaʼ nga cadi cayeneʼ ni pue njaʼ. Maʼ qué ziuaa piaʼ xizaa.

Julio: Peru, nannuʼ xiñee qué ñene Daniel ni la? Purtiʼ caʼruʼ diʼ guedandá dxi gusiene Dios ca diidxaʼ ca. Peru ca dxi riʼ maʼ zanda guiénenu ca profecía bicaa Daniel.

Ernesto: Maʼ zanda guiénenu cani la?

Julio: Maʼ, ne ngapeʼ nga ni cusiene versículo  9 riʼ. Biiyaʼ xi nani: «Purtiʼ zieeguʼ libru ca ne guirutiʼ qué zanda ganna xiná ni dede lu ca últimu dxi». Casi bidúʼndanu ca, lu ca últimu dxi ca si nga zanda guiene binni profecía riʼ. Ne guiráʼ ni cayaca yanna riʼ cusihuinni maʼ nabáninu tiempu ca. Zadúʼyanu jma de tema riʼ lu libru ni cadúʼndanu que. *

Ernesto: Zanda gusieʼnuʼ naa profecía riʼ la?

Julio: Guidúʼyanu pa ganda.

Julio: Primeru guidúʼyanu ni guníʼ xcaandaʼ rey Nabucodonosor, ne óraca maʼ guininu xi raca significar ni. Ximodo ruuyuʼ.

Ernesto: Biaʼsi.

Julio: Guníʼ xcaandaʼ Nabucodonosor ti yaga naroʼbaʼ ni yendá dede guibáʼ. Lu bacaandaʼ que binadiágabe guníʼ Dios ugácabe yaga que. Xcu si ni biaana ne ti ndaa yaga que. Óraque gudiʼdiʼ «gadxe tiempu» ne bigaa yaga que sti biaje. * Guca cumplir profecía riʼ primé biaje luguiáʼ Nabucodonosor. Gúcabe ti rey nabé nadipaʼ; beedagácabe casi yaga ni yendá dede guibáʼ que. Peru casi ñaca nugácabe laabe ne bisaanacabe laabe zaqué «gadxe tiempu». Rietenalaʼdxuʼ xi raca significar nga la?

Ernesto: Coʼ, qué rietenaladxediáʼ.

Julio: Biblia ruzeeteʼ guyé xpiaanibe, ne guyuube zaqué gadxe iza o «gadxe tiempu». Pur nga runi bisaana de gácabe rey. Peru ra biluxe tiempu que la? biguetaʼ xpiaanibe ne gúcabe rey sti biaje. *

Ernesto: Biaʼsi, cayeneʼ lii. Peru ni cadi cayeneʼ nga paraa riete de Reinu stiʼ Dios ne iza 1914 lu ni caninu riʼ yaʼ.

Julio: Biaa, profecía riʼ la? maʼ guca cumplir ni chupa biaje. Primé la? dxi maʼ qué ñuni mandar Nabucodonosor casi rey ti tiempu. Ne guiropa la? dxi maʼ que ñuni mandar gobiernu stiʼ Dios. Lu guiropa biaje riʼ nga caniʼni de Reinu stiʼ Dios.

Ernesto: Peru, ximodo nannuʼ guca cumplir ni chupa biaje yaʼ.

Julio: Nannaʼ ni purtiʼ laaca profecía ca cayábini laanu. Daniel 4:17 ruzeeteʼ gucuá profecía riʼ para ganna binni «ni jma nandxóʼ nga runi mandar ca reinu ni nuu ndaaniʼ guidxilayú, ne tu gápabe gana gudiibe ni, rudiibe ni laa». Biiyuʼ diidxaʼ «ca reinu ni nuu ndaaniʼ guidxilayú» ca la?

Ernesto: Biiyaʼ, raríʼ na «ni jma nandxóʼ nga runi mandar ca reinu ni nuu ndaaniʼ guidxilayú».

Julio: Yanna, tuu nga raʼbuʼ «ni jma nandxóʼ» ca yaʼ.

Ernesto: Pue Dios xa, o coʼ la?

Julio: Biaʼsi. Ca diidxaʼ ca rusihuínnicani cadi de Nabucodonosor si nga ruzeeteʼ profecía riʼ, sínuque laaca ruzeeteni de gobiernu stiʼ Dios ni runi mandar «ca reinu ni nuu ndaaniʼ guidxilayú». Pa guidúʼyanu contextu stiʼ profecía riʼ, zuuyaluʼ pabiáʼ jneza modo cusiéneni de ni caninu riʼ.

Ernesto: Biaʼsi, guníʼ cucaadiaʼgaʼ lii.

Julio: Libru stiʼ Daniel nápani ti tema ne stale biaje riete ni lu libru ca: dxi guzulú Reinu stiʼ Dios guni dxiiñaʼ né Jesucristu nga xaíque luni. Ximodo ruuyuʼ pa guidúʼyanu ti ejemplu. Zeedani chupa capítulo ante, lu Daniel 2:44. Zanda gúʼndaluʼ ni la?

Ernesto: Zanda pue, ná ni: «Ne dxi stiʼ ca rey que la? Dios ni nuu guibáʼ zucuí ti reinu ni qué ziuu dxi guinitilú. Ne reinu riʼ qué zadiʼdiʼ ni lu náʼ sti guidxi. Zunideni ne zunduuxeni guiráʼ ca reinu riʼ, ne laani ziaana ni ne qué ziuu dxi guiluxe ni».

Julio: Xquíxepeʼ lii. Yanna, ñee de Reinu stiʼ Dios nga caníʼ versículo riʼ la?

Ernesto: Mmm... Qué ganna diaʼ.

 Julio: Versículo riʼ ruzeeteʼ «qué ziuu dxi guiluxe» reinu riʼ, o qué ziuu dxi gusaana de guni mandarni. Tu laa raʼbuʼ zanda gapa ti reinu ni guindaa xadxí pa cadi Dios yaʼ.

Ernesto: Guirutiʼ xa.

Julio: Guirutiʼ pue. Guyúbinu sti profecía ni caníʼ de Reinu stiʼ Dios. Zeedani lu Daniel 7:13, 14 ne cuzeeteni de ti binni ni gueedagaca rey. Biiyaʼ xi nani: «Ne gucuaabe guendaruni mandar ne guendarisaca ne reinu, para guni guiráʼ ca guidxi ca, ca guidxi roʼ ne guiráʼ diidxaʼ ni nabe. Guendaruni mandar stibe nga ti guendaruni mandar ni qué zaluxe diʼ ne ni qué zadiʼdiʼ, ne reinu stibe tobi ni qué zanitilú». Lu ca versículo riʼ cayeeteʼ ti cosa de ni maca gúninu.

Ernesto: Dxandíʼ, sti biaje ca rieeteʼ de ti reinu.

Julio: Zacá ni. Ne cadi intiica si reinu. Pa bidiiluʼ cuenta la? racá rieeteʼ nápani derechu guni mandar ni «ca guidxi ca, ca guidxi roʼ ne guiráʼ diidxaʼ». Zanda guininu cayuni mandarni lu guidubi Guidxilayú.

Ernesto: Biaa, nin qué nudieeʼ cuenta, peru biaʼsi ni naluʼ ca. Racá rieeteʼ ni.

Julio: Biiyaʼ xi ná raríʼ sti biaje: «Guendaruni mandar stibe nga ti guendaruni mandar ni qué zaluxe diʼ ne ni qué zadiʼdiʼ, ne reinu stibe tobi ni qué zanitilú». Cadi dxandíʼ cásica ni bidúʼndanu lu Daniel 2:44 que nga zeeda lu versículo riʼ la?

Ernesto: Dxandíʼ, ruluíʼ laca laani nga.

Julio: Yanna, guietenaláʼdxinu caadxi de cani maʼ gúninu ca. Profecía ni zeeda lu capítulo 4 stiʼ Daniel que gucuani para ganna binni «ni jma nandxóʼ nga runi mandar ca reinu ni nuu ndaaniʼ guidxilayú». Ca diidxaʼ riʼ rusihuinni cani zaca cumplir profecía riʼ luguiáʼ sti binni jma risaca qué Nabucodonosor. Ne lu guidubi libru stiʼ Daniel ridxélanu profecía ni caníʼ de laani: dxi guzulú Reinu stiʼ Dios guni dxiiñaʼ né Jesucristu nga xaíque luni. Guiráʼ ndiʼ rusihuinni de Reinu stiʼ Dios nga caníʼ profecía zeeda lu capítulo 4 stiʼ Daniel, cadi dxandíʼ la?

Ernesto: Dxandíʼ, biaʼsi nuuni. Peru de yanna cadi cayeneʼ paraa rieeteʼ iza 1914 luni.

Julio: Bueno, guininu de Nabucodonosor sti biaje. Bizéʼtenu ra guca cumplir profecía que primé la? laabe nga yaga que. Bisaana de guni mandarbe dxi bigácabe yaga que ne gudiʼdiʼ gadxe tiempu luguiabe. Guyé xpiaaniʼ Nabucodonosor, peru gudiʼdiʼ si tiempu que la? biguetaʼ xpiaanibe ne biguetaʼ gúcabe rey sti biaje. Guiropa biaje gucaʼ cumplir profecía riʼ nga, dxi maʼ qué ñuni mandar gobiernu stiʼ Dios, peru cadi pur biʼniʼ Dios xiixa cosa malu.

Ernesto: Ximodo nga yaʼ. Cadi cayeneʼ lii.

Julio: Biaa, dxiqué la? ca rey guyuu guidxi Israel que guricaʼ «lu trono stiʼ Jiobá». * Nga rusihuinni biquiiñeʼ Dios ca rey que para guni mandar. Modo biʼniʼ mandárcabe que rusihuínnini zaqué nga runi mandar Dios. Peru, ra gudiʼdiʼ tiempu stale de ca rey que bidxiidéchecaʼ laabe ne binni guidxi que yenándacaʼ modo bíʼnicabe que. Pur ni bíʼnicabe que bidii Dios lugar gunitilú Babilonia guidxi Israel iza 607 ante de ca dxi stiʼ  Jesús. De dxiqué nga maʼ qué ñuuruʼ rey ni niquiiñeʼ Jiobá para guni mandar ndaaniʼ guidxi Jerusalén, lugar ra guyuu cani gulibe para guni mandar que. Nga runi casi ñaca gulezadxí gobiernu stiʼ Dios de guni mandar. Biaʼsi cayéneluʼ la?

Ernesto: Biaʼsi, cayeneʼ lii.

Julio: Gadxe tiempu ni bizéʼtenu que bizuluni iza 607 ante de ca dxi stiʼ Jesús. Ne nga nga tiempu ra maʼ qué ñuni mandar gobiernu stiʼ Dios. Peru ra biluxe tiempu que la? gulí Dios sti rey para guni mandar, peru yanna maʼ guibáʼ chichuu ni. Xcaadxi profecía ni bidúʼndanu lu libru stiʼ Daniel laaca guca cumplir cani ra biluxe tiempu que. Peru yanna, padxí biluxe gadxe tiempu que yaʼ. Pa gánnanu padxí biluxe ni la? zánnanu padxí bizulú Reinu stiʼ Dios cayuni dxiiñaʼ.

Ernesto: Guleza naa gabeʼ lii, cadi iza 1914 la?

Julio: Zacá ni, biaʼsi guniuʼ.

Ernesto: Peru, ximodo nánnatu iza ca gúcani yaʼ.

Julio: Dxi beeda Jesús lu Guidxilayú, guníʼ caʼruʼ guiluxe gadxe tiempu que. * Nga rusihuinni zandaa tiempu ca. Gadxe tiempu que bizuluni stale siglu ante gueeda Jesús ne despué de biguetaʼ Jesús guibáʼ bindaaruni stale siglu. Bietenalaʼdxiʼ, guninu dede lu «ca últimu dxi» * nga guiene binni ca profecía stiʼ Daniel. Ne biáʼsipeʼ ra ziluxe siglu XIX, guyuu ti grupu de binni ruundaʼ Biblia biyúbicaʼ guiene chaahuicaʼ profecía riʼ ne xcaadxi casi laani. Chaahuiʼ chaahuiʼ biénecabe zaluxe gadxe tiempu que lu iza 1914. Guiráʼ ni cazaaca lu Guidxilayú riʼ dede dxiqué, cusihuínnicani maʼ cayuni Reinu stiʼ Dios dxiiñaʼ guibáʼ ne dxicá nga bizulú ca últimu dxi, o dxi guiluxe guidxilayú. Naa nannaʼ nagana para guiéneluʼ ni nagasi Ernesto.

Ernesto: ¡Dxandíʼ! Napaʼ xidé guundani sti biaje para guieneʼ ni.

Julio: Rieneʼ lii. Naa laaca cadi casi ziaa diaʼ bieneʼ ni. Peru ribezaʼ ganda gacané cani guninu riʼ lii para gúʼyaluʼ guiráʼ ni laadu, ca testigu stiʼ Jiobá, rinidu de Reinu stiʼ Dios zeedacani lu Biblia.

Ernesto: Rudieeʼ cuenta. Ne nabé ridxagayaa pabiáʼ runi cretu guiráʼ cani zeeda lu Biblia ca.

Julio: Ne cayuuyaʼ lii laaca riuuláʼdxiluʼ guni creluʼ cani. Casi gudxeʼ lii nagasi que, nabé stale ni para guiéneluʼ cani ne nannaʼ nuuruʼ ni qué ñéneluʼ. Purtiʼ guninu bizulú gadxe tiempu que lu iza 607 ante de ca dxi stiʼ Jesús ne laaca riete de Reinu stiʼ Dios luni. Peru, xiñee rinidu biluxe ni iza 1914 yaʼ. *

Ernesto: Dxandíʼ, ngapeʼ nga ni nuaaʼ gannaʼ.

Julio: Laaca Biblia racané laanu gánnanu pabiaʼpeʼ nga zandaa gadxe tiempu ca. Ñuuláʼdxiluʼ nininu de laani sti biaje la? *

Ernesto: Ñuuladxeʼ pue. Cabezaʼ lii.