Diosan Reinopajj alajjpachankir mä gobiernowa. Jesusajj uka Reino aka Oraqer jutañapatakiw mayipjjäta sasaw arkirinakapar yatichäna, cheqas uka gobiernow taqe kunsa cheqapar lurasiñapataki, sumankañ utjañapatak yanaptʼani. Janiw kuna kasta gobiernos jan walinaka, ina chʼusat tʼaqhesiñanaka, usuntañanak chhaqtaykaspati, Diosan gobiernopakiw tukjaspa, cheqas tukjaniwa. Diosajj uka Reinon apnaqañapatakejj Jesús yoqaparuw uttʼayi ukat jupamp chika apnaqañapatakejj mä qawqha cristianonakaruw ajlliraki. (Lucas 11:2, NM ukat 22:28-30 liytʼäta.)

Uka Reinojja, Diosan uñisirinakaparojj niyaw tukj-jjani. Cheqas Reinomajj jutpan sasin Diosar mayistan ukhajj taqe gobiernonak lanti Juman gobiernom apnaqjjpan sasaw mayisktanjja. (Daniel 7:13, 14 ukat Apocalipsis 11:15, 18 liytʼäta.)

Jesusajj jaqenakat khuyaptʼayasiriwa, ukhamajja jupajj suma reyipunïniwa. Niyakejjay Diosan Yoqapächejja, Awkipar yanaptʼa mayipki ukanakar yanaptʼañatakejj chʼamanirakïwa. (Salmo 72:8, 12-14 liytʼäta.)

Diosan leyinakaparjam sarnaqapki ukat Reinop taqe chuyma mayipki ukanakajj walja bendicionanak katoqapjjani. Kuntï Bibliajj uka gobiernot yatichki uk yatjjatam. Uk luratamatjja janipuniw amtaskätati. (Lucas 18:16, 17 ukat Juan 4:23 liytʼäta.)