Tau Hūhū Tohi Tapu kua Tali
Ko e ha ne liogi ke hoko mai e Kautu he Atua?
Manako nakai a koe ke iloa atu foki ke he Kautu he Atua mo e tau mena ka taute ai?
Ko e Kautu he Atua ko e fakatufono he lagi. Tala age a Iesu ke he tau tutaki haana ke liogi ke hoko mai ai ha ko e Kautu ka liuaki mai e tututonu mo e mafola ke he lalolagi. Nakai fai fakatufono e tagata ka utakehe katoatoa e favale, nakai fakafili tonu, po ke gagao, ka e maeke mo e to taute pihia he Kautu he Atua. Kua fifili he Atua e haana Tama ko Iesu, ke eke mo Patuiki he Kautu. Fifili foki e Iehova e matakau he tau tutaki ha Iesu ke pule fakalataha mo Iesu he Kautu.—Totou Luka 11:2; 22:28-30.
Nakai leva, to utakehe he Kautu he Atua e tau tagata oti ne totoko ke he pule he Atua. Ti ko e liogi ke hoko mai e Kautu he Atua ko e ole ma e fakatufono he Atua ke hukui e tau fakatufono oti he tagata.—Totou Tanielu 7:13, 14; Fakakiteaga 11:15, 18.
To aoga he ha e Kautu he Atua ke he tau tagata?
Latatonu a Iesu ke Patuiki ha kua fakaalofa hofihofi a ia. Ha ko e Tama he Atua, kua ha ha foki ia ia e malolō ke lagomatai a lautolu oti kua ole ke he lagomatai he Atua.—Totou Salamo 72:8, 12-14.
To aoga e Kautu he Atua ke he tau tagata oti kua liogi ke hoko mai ai mo lautolu kua fakalautatai e tau momoui mo e finagalo he Atua. Ti nakai tokihala a koe he fakaako ke he talahauaga he Tohi Tapu hagaao ke he Kautu he Atua.—Totou Luka 18:16, 17; Ioane 4:23.
