Diospa Munaychakuyninqa huk Gobiernom chayqa hanaq pachapim kachkan. Jesusmi qatiqninkunata yachachirqa chay Gobierno kay Pachapi munaychakunanpaq mañakuyta, chay Gobiernon allin kawsakuytawan hawkayayta apamunqa. Manamá runakunapa gobiernonkunaqa wañuchinakuyta, mana allin ruwayta nitaq onqoykunatapas chinkachiytaqa atinchu, Diospa Gobiernonmi ichaqa atin hinaspapas chinkachinqam. Jehova Diosmi chay Munaychakuyninpi kamachimunanpaq churin Jesucristota churarun hinaspapas achka cristianokunatam akllarun Jesuswan kuska kamachimunankupaq. (Leey Lucas 11:2; 22:28-30.)

Manapas unaymantam chay Gobiernoqa Diospa enemigonkunata chinkachinqa. Munaychakuynin hamunanpaq mañakuspaqa nichkanchik chay Gobiernoña kunan punchaw gobiernokunapa rantinpi kamachimunanpaqmi. (Leey Daniel 7:13, 14; Apocalipsis 11:15, 18.)

Jesusqa runakunata kuyapayasqanraykum allin kamachiq kanqa. Diospa Churin kasqanraykum yanapananpaq atiyniyoq. (Leey Salmo 72:8, 12-14.)

Diospa Kamachikuyninkunaman hina kawsaqkuna hinaspa Munaychakuynin hamunanpaq sonqomanta mañakuqkunaqa achka bendicionkunatam chaskinqaku. Chay Gobiernomanta Bibliapa nisqanta yachaspaykiqa manam haykapipas ñakakunkichu. (Leey Lucas 18:16, 17; Juan 4:23.)