Maromak nia Reinu mak governu ida iha lalehan neʼebé sei ukun rai. Tuir loloos, la iha ema nia governu ida iha rai neʼebé bele halakon violénsia, moras, ka situasaun neʼebé laiha justisa. Tan neʼe, Jesus hanorin ninia dixípulu sira atu harohan Reinu neʼe “toʼo mai ami”, tanba liuhusi Maromak nia governu deʼit mak bele halakon ema nia susar hotu no haraik dame ba ema iha rai. Maromak Jeová hili ona ninia Oan Jesus atu sai Liurai ba governu neʼe. Maromak mós hili ona Jesus nia dixípulu sira balu atu ukun hamutuk ho Jesus iha lalehan.—Lee Lucas 11:2; 22:28-30.

Lakleur tan, Maromak nia Reinu sei halakon inimigu hotu neʼebé kontra hasoru Ninia ukun. Tan neʼe, ita harohan: “Halo Ita-nia Reinu toʼo mai ami”, neʼe katak ita husu Maromak nia governu atu troka ema nia governu hotu iha rai.—Lee Daniel 7:13, 14; Apokalipse 11:15, 18.

Jesus mak Liurai neʼebé diʼak tebes tanba nia hadomi no hanoin ema. Nuʼudar Maromak nia Oan, nia mós iha kbiit boot atu ajuda ema hotu neʼebé halerik hodi husu Maromak nia ajuda.—Lee Salmo (Mazmur) 72:8, 12-14.

Maromak nia ukun sei lori bensaun barak ba ema hotu neʼebé ho laran harohan atu Reinu neʼe toʼo mai no hakaʼas an moris tuir Maromak nia hakarak. Ami konvida Ita-Boot atu buka-hatene Bíblia nia hanorin kona-ba Maromak nia Reinu, tanba ida-neʼe sei lori haksolok ba Ita-nia moris.—Lee Lucas 18:16, 17; João 4:23.