Vo Bayibolo Limuka
Nchifukwa wuli tikhumbika kuromba kuti Ufumu waku Chiuta uzi?
Kumbi mungayanja kuziŵa vinandi vakukwaskana ndi Ufumu waku Chiuta ndipuso vo wazamuchita?
Ufumu waku Chiuta ung’anamuwa boma laki lakuchanya. Yesu wangukambiya akusambira ŵaki kuti arombengi kuti Ufumu wo uzi chifukwa ndiwu wazamuchitiska kuti pacharu chapasi paje urunji ndipuso chimangu. Palivi boma la ŵanthu lo lingatuzgiyapu limu viwawa, vinthu vambula urunji pamwenga matenda. Ndi Ufumu waku Chiuta pe wo wazamuchita ivi. Chiuta wasankha Mwana waki Yesu kuti waje Fumu ya Ufumu waki. Yehova wasankha so akusambira aku Yesu kuti akawusiyi nayu limoza mu Ufumu waki.—Ŵerengani Luka 11:2; 22:28-30.
Pambula kuswera yapa, Ufumu waku Chiuta utuzgengepu ndi ŵanthu wosi wo asuska muwusu waki. Mwaviyo, asani tiromba kuti Ufumu waku Chiuta uzi ndikuti tipempha kuti boma laki lituzgepu maboma ngosi nga ŵanthu.—Ŵerengani Danyele 7:13, 14; Chivumbuzi 11:15, 18.
Nchifukwa wuli Ufumu waku Chiuta wazamuwovya ŵanthu?
Yesu ngwakwenere kuja Fumu chifukwa wavwiya ŵanthu lisungu. Kweniso, nge Mwana waku Chiuta, we ndi nthazi zakuwovye wosi wo apempha chovyu kwaku Chiuta.—Ŵerengani Sumu 72:8, 12-14.
Ufumu waku Chiuta wazamuwovya wosi wo aromba mwakutuliya pasi pamtima kuti Ufumu wo uzi ndipuso wosi wo achita vinthu mwakukoliyana ndi khumbu laku Chiuta. Mungakondwa ukongwa asani mungaziŵa vo Bayibolo likamba vakukwaskana ndi Ufumu waku Chiuta.—Ŵerengani Luka 18:16, 17; Yohane 4:23.
