Mfumo wa Xikwembu i hulumendhe ya le tilweni. Yesu u byele valandzeri vakwe leswaku va wu khongelela leswaku wu ta hikuva wu ta vuyetela ku lulama ni ku rhula emisaveni. Ku hava hulumendhe ya vanhu leyi nga ma herisaka hi ku helela madzolonga, ku kala ku lulama kumbe mavabyi, kambe i Mfumo wa Xikwembu ntsena lowu nga swi herisaka naswona wu ta swi herisa hakunene. Xikwembu xi hlawule N’wana wa xona, Yesu, leswaku a va Hosi ya Mfumo lowu. Yehovha u tlhele a hlawula ntlawa va valandzeri va Yesu leswaku va va vafumi-kulobye na Yesu eMfun’weni.—Hlaya Luka 11:2; 22:28-30.

Ku nga ri khale, Mfumo wa Xikwembu wu ta herisa vanhu hinkwavo lava lwisanaka ni vulawuri bya Xikwembu. Kutani xikhongelo xa leswaku Mfumo wa Xikwembu wu ta i xikombelo xa leswaku hulumendhe ya Xikwembu yi ta siva tihulumendhe hinkwato ta vanhu.—Hlaya Daniyele 7:13, 14; Nhlavutelo 11:15, 18.

Yesu i Hosi leyinene hikuva u ni ntwela-vusiwana. Tanihi N’wana wa Xikwembu, u tlhela a va ni matimba yo pfuna hinkwavo lava kombelaka Xikwembu leswaku xi va pfuna.—Hlaya Pisalema 72:8, 12-14.

Mfumo wa Xikwembu wu ta vuyerisa hinkwavo lava wu khongelelaka hi timbilu ta vona hinkwato leswaku wu ta ni lava va hanyaka hi ku pfumelelana ni ku rhandza ka Xikwembu. A wu nge pfuki u tisorile hikwalaho ko dyondza hileswi Bibele yi swi vulaka malunghana ni Mfumo wa Xikwembu.—Hlaya Luka 18:16, 17; Yohane 4:23.