Kala u na eitavelo ihali tengauka mOuhamba
“Eitavelo olo elineekelo la pama okulineekela osho tashi teelelwa.” — HEB. 11:1.
1, 2. Oshike tashi ke tu kwafela tu kale twa tomhwa filufilu kutya Ouhamba otau ka wanifa po elalakano laKalunga li na sha novanhu, nomolwashike? (Tala efano pehovelo loshitukulwa.)
TU LI Eendombwedi daJehova, luhapu ohatu ti kutya Ouhamba waKalunga oo auke u li ekandulepo lomaupyakadi etu aeshe, nohatu kala twa halelela okuyukifa elitulemo lovanhu koshili yopamishangwa oyo ya fimanenena. Ohatu hekelekwa yo neenghono keteelelo lOuhamba. Ndele mbela otwa tomhwa shi fike peni kutya Ouhamba ou li oshinima sholela notau ka wanifa po elalakano lao lopehovelo? Omolwashike tu na okukala tu na eitavelo ihali tengauka mOuhamba? — Heb. 11:1.
2 Ouhamba wopaMessias ou li elongekido olo la dikwa po kOmunaenghono adishe opo a wanife po elalakano laye li na sha neshito laye. Ouhamba oo owa kanghamena kekanghameno la pamenenena, olo kutya Jehova oku na filufilu oufemba wokupangela. Oinima ya fimana i na sha nOuhamba oo, ngaashi ohamba yao, ovapangeli pamwe nayo nonokutya otava ka pangela oolyelye oya tulwa po nale paveta okupitila momahangano, ile tu tye, omaudafanotwokumwe opaveta oo a ningwa kuKalunga ile kOmona Jesus Kristus. Okudilonga komahangano oo otaku ka hapupalifa eudeko letu li na sha nanghee elalakano laKalunga tali ka wanifwa notashi ke tu kwafela tu mone kutya elongekido olo oli shii okulineekelwa shi fike peni. — Lesha Ovaefeso 2:12.
3. Oshike hatu ka konakona moshitukulwa eshi nomwaashi tashi landula?
3 Ombibeli oya popya kombinga yomahangano a-6 a fimana e na sha nOuhamba wopaMessias oo u li momake aKristus Jesus. Omahangano oo ngaha (1) ehangano olo la ningwa naAbraham, (2) ehangano lOmhango, (3) ehangano olo la ningwa naDavid, (4) ehangano lokuninga omupristeri panghedi yaMelkisedek, (5) ehangano lipe nosho yo (6) ehangano lOuhamba. Natu ka konakoneni nghee ehangano keshe la pambafana nOuhamba notali xumifa komesho okuwanifwa kwelalakano laKalunga li na sha nedu nosho yo ovanhu. — Tala oshimhungu, “ Nghee Kalunga ta ka wanifa po elalakano laye.”
EUDANEKO OLO TALI HOLOLA NGHEE ELALAKANO LAKALUNGA TALI KA WANIFWA
4. Ngaashi sha ulikwa muGenesis, omaufomhango elipi Jehova a li a yandja e na sha novanhu?
4 Konima eshi Jehova a longekida opulaneta yetu iwa opo ku dule okukalwa kovanhu, okwa li a ninga omaufomhango atatu e na sha novanhu, aa kutya: Kalunga ketu okwa li ta ka shita ovanhu oshifeka shaye, ovanhu ova li tava ka tamununa mo Oparadisa fiyo ya mana ko edu nokuyadifa edu noludalo lavo liyuki, novanhu ova li va kelelwa vaha lye komuti wokushiiva ouwa nowii. (Gen. 1:26, 28; 2:16, 17) Omaufomhango oo okwa li a holola pauyadi elalakano laKalunga. Konima eshi omunhu a shitwa, okwa li ashike a pumbwa okuliufa komaufomhango makwao avali opo elalakano laKalunga li wanifwe. Ndele omolwashike Kalunga a li e na okuninga omahangano?
5, 6. (a) Ongahelipi Satana a li a kendabala okuya moshipala elalakano laKalunga? (b) Jehova okwa li e linyenga ngahelipi keshongo laSatana muEden?
5 Satana Ondiaboli okwa li a xwaxwameka ounashibofa opo a kendabale okuya moshipala elalakano laKalunga. Osho okwe shi ninga mokuyandja elitulemo keufomhango laJehova olo la li tali pula omunhu a dulike. Okwa li a yeleka omukainhu wotete, Eva, aha dulike kelombwelo li na sha nokuhalya komuti wokushiiva ouwa nowii. (Gen. 3:1-5; Eh. 12:9) Mokuninga ngaho, Satana okwa shonga oufemba waKalunga wokupangela eshito laYe. Lwanima, Satana okwa ka popya oipupulu kutya ovapiya vaKalunga ovadiinini ohave mu longele ashike omolwomalalakano okuliholamwene. — Job 1:9-11; 2:4, 5.
6 Jehova okwe linyenga ngahelipi keshongo laSatana lomuEden? Oshoshili kutya ngeno Jehova okwa hanaunine po ovanashibofa ovo, ngeno okwa xulifa po ounashibofa wavo. Ashike ngeno okwa ningile ngaho, elalakano laye li na sha nokuyadifa edu noludalo laAdam naEva liduliki, ngeno inali wanifwa. Ponhele yokuhanauna po ovanashibofa ovo, Omushiti omunaendunge okwa xunganeka exunganeko lididilikwedi, eudaneko lomuEden, opo a shilipaleke kutya ondjovo yaye keshe otai ka wanifwa po. — Lesha Genesis 3:15.
7. Eudaneko lomuEden otali tu pe eshilipaleko lilipi kombinga yeyoka noludalo lalo?
7 Okupitila meudaneko lomuEden, Jehova okwa tokola eyoka noludalo lalo, sha hala okutya, Satana Ondiaboli naaveshe ovo va li tave ke mu yambidida momhata i na sha noufemba waKalunga wokupangela. Kalunga kashili okwa pa oludalo lomwalikadi waye wopafaneko womeulu eenghonopangelo dokuhanauna po Satana. Onghee hano, eudaneko lomuEden inali ulika ashike kutya omweetifi wounashibofa moshikunino shaEden ota ka xulifwa po nosho yo oilanduliko yeenghatu daye, ndele ola holola yo kutya osho otashi ka ningwa ngahelipi.
8. Oshike hatu lihongo shi na sha nokuhololwa komwalikadi noludalo laye?
8 Olyelye a li ta ka ninga oludalo lomwalikadi? Molwaashi oludalo olo ola li tali ka nyanyaula omutwe weyoka, sha hala okutya, tali ka ‘hanauna po’ oshishitwa shopamhepo Satana Ondiaboli, ola li li na okukala omunhu wopamhepo. (Heb. 2:14) Onghee hano, omwalikadi oo ta ka dala oludalo olo naye oku na okukala wopamhepo. Ofimbo oludalo leyoka la kala nokuhapupala, oule womido hanga 4 000 okudja eshi Jehova a ninga eudaneko lomuEden inaku kala ku shiivike kutya omwalikadi noludalo laye otava faneke oolyelye. Mokweendela ko kwefimbo, Jehova okwa ka ninga omahangano e lili noku lili oo taa holola kutya oludalo otali ulike kulyelye nokushilipaleka ovapiya vaye kutya ota ka longifa oludalo olo opo a xulife po omaupyakadi oo Satana a etela ovanhu.
EHANGANO OLO LA HOLOLA OLUDALO
9. Jehova okwa ninga ehangano lilipi naAbraham, nola hovela okutulwa moilonga naini?
9 Omido 2 000 konima eshi Jehova a tokola Satana, okwa li a lombwela tatekulululwa Abraham a fiye po eumbo laye muUr shomuMesopotamia nokuya kedu laKanaan. (Oil. 7:2, 3) Jehova okwa li a lombwela Abraham ta ti: “Fikama, dja mo moshilongo sheni nomepata leni nomeumbo laxo, u ye koshilongo eshi handi shi ku ulikile. Ndele Ame ohandi ku ningi oshiwana shinene, ndele handi ku nangeke noupuna ndee handi ku ningile edina linene, ndee ove to ka kala omunangeki noupuna. Ndele Ame ohandi ka nangeka noupuna ava have ku nangeke noupuna, ndee handi ka finga ou te ku fingi. Ndee omapata aeshe kombada yedu otaa nangekwa noupuna muove.” (Gen. 12:1-3) Odo odo eendjovo dotete da shangwa di na sha nehangano olo Jehova a ninga naAbraham. Kaku shiivike kutya onaini Jehova a ninga ehangano naAbraham oshikando shotete. Ashike ehangano olo ola ka hovela okutulwa moilonga mo 1943 K.O.P., eshi Abraham oo a li e na omido 75 a dja muHaran nokwa tauluka Omulonga waEufrat.
10. (a) Abraham okwa li a ulika ngahelipi kutya oku na eitavelo ihali tengauka momaudaneko aKalunga? (b) Ouyelele ulipi Jehova a holola kanini nakanini kombinga yoludalo lomwalikadi?
10 Jehova okwa kala ta endulula lwoikando eudaneko olo a li a udanekela Abraham, nokuyandja ouyelele wa wedwa po. (Gen. 13:15-17; 17:1-8, 16) Abraham okwa li e na eitavelo ihali tengauka momaudaneko aKalunga, nokwa li nokuli a hala okuyamba po omona waye nehalo liwa. Onghee hano, Jehova okwa li e linyengifwa a pameke ehangano olo mokushilipaleka kutya eudaneko laye otali ka wanifwa po. (Lesha Genesis 22:15-18; Ovaheberi 11:17, 18.) Eshi ehangano olo Jehova a ninga naAbraham la hovela okutulwa moilonga, Jehova okwa enda ta holola kanini nakanini ouyelele wa fimana kombinga yoludalo lomwalikadi. Oludalo olo ola li tali ka dja mepata laAbraham, la li tali ka kala lihapu, tali ka pangela, tali ka hanauna po ovatondi aveshe notali ka kala enangekonoupuna kuvahapu.
Abraham okwa li a ulika kutya oku na eitavelo ihali tengauka momaudaneko aKalunga (Tala okatendo 10)
11, 12. Omishangwa otadi ulike ngahelipi kutya ehangano olo la ningwa naAbraham oli na ewanifo linene, naasho otashi ti shike kufye?
11 Nonande ehangano olo la ningwa naAbraham ola li la wanifilwa oludalo laAbraham meityo lolela eshi la fyuulula Edu lEudaneko, Omishangwa otadi ulike kutya oiteelelwa yehangano olo oi na yo okuwanifwa meityo lopamhepo. (Gal. 4:22-25) Mewanifo olo linene, omuyapostoli Paulus okwa li a nwefwa mo a yelife kutya Kristus oye oshitukulwa shotete sholudalo laAbraham, noshitukulwa oshitivali, Ovakriste ovavaekwa nomhepo ovo ve li 144 000. (Gal. 3:16, 29; Eh. 5:9, 10; 14:1, 4) Omwalikadi oo a dala oludalo olo ‘oJerusalem shopombada,’ oshitukulwa shehangano laKalunga shomeulu, osho sha fikama po moishitwa yopamhepo idiinini. (Gal. 4:26, 31) Ngaashi sha udanekwa okupitila mehangano olo la ningwa naAbraham, oludalo lomwalikadi otali ka etela ovanhu omanangekonoupuna.
12 Ehangano olo la ningwa naAbraham ola palela ondjila Ohamba novapangeli pamwe nayo yoku ka pangela mOuhamba waKalunga nola dika po ekanghameno lopaveta lOuhamba oo womeulu. (Heb. 6:13-18) Ehangano olo otali kala po oule wefimbo li fike peni? Genesis 17:7 okwa ti kutya “ehangano laalushe.” Otali kala po fiyo osheshi Ouhamba wopaMessias wa hanauna po ovatondi vaKalunga nofiyo osheshi omapata aeshe kombada yedu a nangekwa noupuna. (1 Kor. 15:23-26) Nopehe na omalimbililo, ehangano olo otali ka etela ovo tava ka kala kombada yedu omauwa taa kalelele. Ehangano olo la ningwa naAbraham itali ulike tuu kutya Jehova okwa tokola okuwanifa po elalakano laye li na sha ‘nokuyadifa edu’ novanhu ovayuki! — Gen. 1:28.
EHANGANO OLO TALI KOLEKE KUTYA OUHAMBA OTAU KA KALELELA
13, 14. Ehangano olo la ningwa naDavid otali tu pe eshilipaleko lilipi shi na sha nokupangela kwaMessias?
13 Eudaneko lomuEden nehangano olo la ningwa naAbraham otali tu shilipaleke kutya ounamapangelo waJehova owa kanghamena filufilu komifikamhango douyuki ngaashi sha ulikwa okupitila mOuhamba wopaMessias. (Eps. 89:15) Ndele mbela epangelo lopaMessias otali ka kala li na oulingilingi nolwanima tali ka hanaunwa po? Ope na ehangano limwe vali lopaveta olo tali tu shilipaleke kutya osho kashi na fiku shi ningwe.
14 Diladila kwaasho Jehova a li a udanekela ohamba David yomuIsrael shonale okupitila mehangano olo a ninga naDavid. (Lesha 2 Samuel 7:12, 16.) Jehova okwa ninga ehangano olo naDavid pefimbo lepangelo laDavid muJerusalem, e mu udanekela kutya Messias ota ka dja moludalo laye. (Luk. 1:30-33) Kungaho, Jehova okwa li a yandja ouyelele wa wedwa po wokondadalunde u na sha nepata omo tamu ka dja oludalo nokwa udaneka kutya umwe womoludalo laDavid ota ka kala “a wana” okukala kolukalwapangelo lOuhamba wopaMessias. (Hes. 21:25-27) Okupitila muJesus, ouhamba waDavid otau ka ‘kala po alushe.’ Kungaho, oludalo laDavid otali ka ‘kala po alushe nolukalwapangelo laye otali faafana netango.’ (Eps. 89:35-38) Natu kale nelineekelo kutya epangelo laMessias ka li na fiku li kale li na oulingilingi notali ka etifa omauwa taa kalelele.
EHANGANO LOUPRISTERI
15-17. She likolelela kehangano loupristeri panghedi yaMelkisedek, oludalo otali ka longa vali oshilonga shilipi, nomolwashike?
15 Ehangano olo la ningwa naAbraham nosho yo naDavid otaa ulike kutya oludalo lomwalikadi otali ka pangela, ndele oshilonga osho osho ashike itashi dulu okweetela ovanhu vomoiwana aishe omanangekonoupuna. Opo ovanhu va dule shili okunangekwa noupuna, ova pumbwa okumangululwa monghalo youlunde nokuninga oshitukulwa shoukwaneumbo waJehova womeshito alishe. Opo osho shi wanifwe po, oludalo oli na yo okulonga oshilonga shoupristeri. Omushiti omunaendunge okwa ninga po omalongekido e na sha naasho okupitila melongekido limwe vali lopaveta, ehangano lokuninga omupristeri panghedi yaMelkisedek.
16 Jehova okwa holola okupitila mohamba David kutya ota ka ninga ehangano naJesus pauhandimwe olo li na omalalakano opavali: ota ka “kala omutumba kolulyo” laKalunga fiyo osheshi ta ka pangela mokati kovatondi vaye nokukala “omupristeri fiyo alushe opanghedi yaMelkisedek.” (Lesha Epsalme 110:1, 2, 4.) Omolwashike taku tiwa kutya “opanghedi yaMelkisedek”? Omolwaashi, nale fimbo oludalo laAbraham inali fyuulula Edu lEudaneko, Melkisedek, ohamba yaSalem okwa li “omupristeri waKalunga wokombadambada.” (Heb. 7:1-3) Okwa li a nangekwa po kuJehova odikilila a longe oshilonga osho. Oye aeke a tumbulwa mOmishangwa dOshiheberi a li ohamba nomupristeri pefimbo limwe alike. Shimwe vali, ota ifanwa “omupristeri alushelushe” molwaashi momishangwa inamu popiwa nande oumwe e mu tetekela ile e mu landula a li e na oinakuwanifwa oyo yopavali oshita.
17 Jesus okwa nangekwa po odikilila kuJehova e li omupristeri okupitila mehangano olo Jehova a ninga naye nota ka kala “omupristeri fiyo alushe opanghedi yaMelkisedek.” (Heb. 5:4-6) Osho otashi ulike filufilu kutya Jehova okwa ninga etokolo lopaveta ye mwene mokulongifa Ouhamba wopaMessias opo a wanife po elalakano laye lopehovelo li na sha novanhu kombada yedu.
OMAHANGANO OO TAA ULIKE KUTYA OUHAMBA OU LI PAVETA
18, 19. (a) Omahangano oo twa dja nokukundafana otaa ulike shike shi na sha nOuhamba? (b) Oshike hatu ka kundafana moshitukulwa tashi landula?
18 Ngeenge hatu tale komahangano oo twa dja nokukundafana, ohatu dulu okumona nghee a pambafana nOuhamba wopaMessias nonghee elongekido lOuhamba la kanghamena filufilu komaudafanotwokumwe opaveta. Eudaneko lomuEden otali tu shilipaleke kutya Jehova ota ka wanifa po elalakano laye li na sha nedu nosho yo ovanhu okupitila moludalo lomwalikadi. Oolyelye tava ka kala oludalo lomwalikadi, notava ka longa shike? Ehangano olo la ningwa naAbraham otali tu kwafele moshinima osho.
19 Ehangano olo la ningwa naDavid ole tu kwafela tu mone kutya olyelye ta ka kala oshitukulwa shotete sholudalo lomwalikadi nonokutya okwa pewa oufemba woku ka pangela edu opo omauwa oo taa etifwa kOuhamba a dule okukalelela. Ehangano loupristeri panghedi yaMelkisedek otali ulike kutya oludalo otali ka longa oshilonga shoupristeri. Ashike Jesus haye aeke ta ka kwafela ovanhu va fike mewaneneno. Ope na yo vamwe vali va vaekwa va ka ninge eehamba novapristeri. Ovanhu ovo ova li tava ka dja peni? Osho ohatu ke shi kundafana moshitukulwa tashi landula.
