Maj senkis titakuaujtamatikan itech Tekiuajyot
“Kuak titakuautamatij iuan Dios, ijkuakon timoyekmatiltiaj ya ke se tonal tikselijtiue nochi ne ten axkan tikyolikachixtokke.” (HEB. 11:1)
1, 2. 1) ¿Keyej uelis tikyekmatiskej ke Tekiuajyot senkis kichiuas itanejnekilis Dios tein kinpialia taltikpakneminij? 2) Ika tein kijtoua Efesios 2:12, ¿keyej netenkaualismej kichikaua totakuaujtamatilis itech Tekiuajyot? (Xikonita taixkopin ipeujyan tamachtilis.)
TIITAIXPANTIJKAUAN Jiova nochipa tikijtouaj uan titetapouiaj ke sayoj iTekiuajyo Dios uelis kiyektalis kuejmolmej tein tikpanouaj. Nejon nechialis techyolseuia. Sayoj ke, ¿tikyekneltokaj ke iTekiuajyo Dios yekmelauj moajsi uan ke kichiuas itanejnekilis yejuatsin? ¿Toni techpaleuia maj senkis titakuaujtamatikan itech Tekiuajyot? (Heb. 11:1.)
2 Jiova kiixtalij Tekiuajyot tein moajsi imako Mesías, uan ika nejon kichiuas itanejnekilis tein kinpialia taltikpakneminij. Dios uelik kiixtalij nejin Tekiuajyot porin sayoj yejua kinamiki taixyekanas, yejua ika amo uelis uejueliuis. Nochi tein motelneki kipias Tekiuajyot, tein kijtosneki, akoni iTekiuaj, akonimej iuan tekiuajtiskej uan akonimej kinixyekanaskej, moixtalij ika netenkaualismej, kampa semej akin motenkaua yejua Jiova oso iKonetsin, Jesucristo. Yejua ika, komo titanemiliaj itech nejon netenkaualismej okachi tikneltokaskej ke mochiuas itanejnekilis Dios uan ke Tekiuajyot amo uejueliuis (xikonixtajtolti Efesios 2:12).
3. ¿Toni tikitaskej itech nejin uan okse tamachtilis?
3 Biblia ika tajtoua chikuasen netenkaualismej tein tayekantokej tein mouikaj ika iTekiuajyo Dios tein moajsi imako Jesucristo. Nejin yejua 1) netenkaualis iuan Abrahán, 2) netenkaualis ika Tanauatil, 3) netenkaualis iuan David, 4) netenkaualis tein kichiua maj moajsi se tiopixkat kemej Melquisedec, 5) yankuik netenkaualis uan 6) netenkaualis ika Tekiuajyot. Maj tikitakan keniuj sejsemej mouikaj ika Tekiuajyot uan keniuj tapaleuiaj maj mochiua itanejnekilis Dios tein kipialia taltikpak uan taltikpakneminij (xikonita recuadro “ Keniuj Dios kichiuas itanejnekilis”).
SE TAMAN TEIN DIOS MOTENKAUAK KINEXTIA KENIUJ MOCHIUAS ITANEJNEKILIS
4. Kemej kijtoua Génesis, ¿toni eyi taman kiixtalij Jiova tein mouika iniuan taltikpakneminij?
4 Satepan ke Jiova kichijchiuak nejin kualtsin taltikpak kampa taltikpaknenkej nemiskia, kiixtalij eyi taman tein mouika iniuan taltikpakneminij. Yekinika, kiixtalij ke kinchijchiuaskia kemej yejuatsin tamati. Ojpatika, nochi taltikpak mochiuaskia se xochital uan momoyauaskiaj ininkoneuan akin yolmelaujkej. Uan expatika, amo ueliskiaj kikuaskej itakilo kouit tein kiixnextia taixmatilis ika tein kuali uan tein amo kuali (Gén. 1:26, 28; 2:16, 17). Amo monekia okse tamanok. Satepan ke kichijchiuak taltikpaknenkej, sayoj monekia mochiuas okseki ome taman tein kiixtalijka uan ijkon mochiuaskia itanejnekilis Dios. Komo ijkon, ¿keyej peuak moneki maj mochiua netenkaualismej?
5, 6. 1) ¿Keniuj Satanás kitemoj kitsakuilis itanejnekilis Dios? 2) ¿Keniuj tanankilij Jiova ika itaixnamikilis Satanás tein kipeualtij Edén?
5 Satanás kinextij ke amo yolkuali katka keman kitemoj kitsakuilis itanejnekilis Dios uan taolinij maj kiixnamikinij yejuatsin. Yejua ika, kitemoj kiixnamikis se taman tein Jiova kiixtalijka tein okachi amo kiouijmakaskia kiuejuelos: tein kijtouaya ke taltikpakneminij monekia tatakamatiskej. Kitemoj kichiualtis yekinika siuat, Eva, maj kikuani takilot tein Dios kiniluijka maj amo kikuaskiaj (Gén. 3:1-5; Apoc. 12:9). Ijkon taomeyolotij ox Dios kinamiki kiixyekanas nochi tein kichijchiuak. Satepan, Amokuali no kinijtouilij taltikpakneminij ke kitekitiliaj Jiova sayoj porin kinekij kiseliskej tein kuali (Job 1:9-11; 2:4, 5).
6 ¿Keniuj tanankilij Jiova ika nejon itaixnamikilis Satanás? Ueliskia kinixpoloskia taixnamikinij, sayoj ke amo momoyauaskiaj itech taltikpak ininkoneuan Adán uan Eva ijkon kemej Dios kinekia. Yejua ika, amo kinixpolojtiuetsik taixnamikinij, ta toTachijchiujkauj akin tel tamatkej kijtoj se taman tein motelneki tein kinextiaya toni panoskia satepan: tein motenkauak itech xochital Edén. Ika nejon kiyeknextij ke itajtol senkis mochiuaskia (xikonixtajtolti Génesis 3:15).
7. Ika tein Dios motenkauak itech xochital Edén, ¿toni kiyeknextia ke kipanoskia kouat uan ikoneuan?
7 Ika tein Jiova motenkauak itech xochital Edén, kinextij tatsakuiltilis tein kiseliskia kouat uan ikoneuan, tein kijtosneki, Satanás uan nochin itatojtokakauan akin no kiixnamikiskiaj itaixyekanalis Dios tein sayoj yejuatsin kinamiki kipias. Uan no, kimakak tanauatil ikonetsin siuat maj kiixpolo Satanás. Kemej tikitaj, ika nejon tein Dios motenkauak, kiyeknextij ke kiixpoloskia akin taolinij maj taixnamikinij uan kitamis tein amo kuali tein kiualkuini nejon taixnamikilis. Uan amo sayoj nejon, no kijtoj keniuj mochiuaskia.
8. ¿Toni uelis tikijtoskej ika siuat uan ikonetsin?
8 ¿Akoni yeskia ikonetsin siuat? Kemej monekia kikuaxamanis kouat oso kiixpolos ángel tein moixmati kemej Satanás, nejon konetsin no monekia yeski se ángel (Heb. 2:14). Yejua ika, siuat akin kiyolitia konetsin no moajsiskia iluikak. Ikoneuan kouat motelitaya keniuj momiakilijtiayaj, sayoj ke kemej itech naui mil xiujmej amo momatia akoni katka ikonetsin siuat. Itech nejon xiujmej, Jiova kichiuak seki netenkaualismej tein kinextijkej akoni yeskia konetsin. No kiyeknextiaj ke yejua konetsin akin Dios kikuiskia maj kitami nochi tein amo kuali tein Satanás kinualkuiliani taltikpakneminij.
SE NETENKAUALIS TEIN KINEXTIA AKONI KONETSIN
9. 1) ¿Toni Dios motenkauak iuan Abrahán? 2) ¿Kemanian peuak kipia chikaualis nejon netenkaualis?
9 Kemej ome mil xiujmej satepan ke Jiova kijtoj toni tatsakuiltilis kiseliskia Satanás, kinauatij Abrahán maj kikauani ichan tein moajsia Ur uan maj yani itech tal tein pouia Canaán (Hech. 7:2, 3). Jiova kiluij: “Xikisa itech moxolal uan xikinkaua mochankauan uan ichan mopopaj uan xiyouj itech tal tein nimitsnextiliti; uan motechkopa nikchiuas se ueyi altepet uan nimitstiochiuas uan yekmelauj nikchiuas ueyi motokay; uan ximochiua tejua se tatiochiualis. Uan yekmelauj nikintiochiuas akin mitstiochiuaskej, uan akin mitsijtouiliskej maj mitspano tein amo kuali, no ijkon nikinijtouilis maj kinpano tein amo kuali, uan motechkopa yekmelauj kiseliskej tatiochiualis nochin kalyetouanij itech taltikpak” (Gén. 12:1-3). Nejin yejua yekinika tajkuilol tein ika tajtoua netenkaualis iuan Abrahán. Amo tikmatij kemanian Jiova kichiuak nejon netenkaualis iuan. Sayoj ke kemaj tikmatij ke peuak kipia chikaualis itech xiuit 1943 achto itech totonaluan, keman Abrahán, akin kipiaya 75 xiujmej, kisak Harán uan kipanauij ueyiat Éufrates.
10. 1) ¿Keniuj kinextij Abrahán ke senkis takuaujtamatia ke Dios kichiuaskia nochi tein motenkauaya? 2) ¿Toni kimelauak Jiova tein kinextiaya akoni yeskia ikonetsin siuat?
10 Jiova miakpa kiyekiluij Abrahán ke kichiuaskia tein iuan motenkaujka, uan okachi kimelauiliaya keniuj mochiuaskia (Gén. 13:15-17; 17:1-8, 16). Abrahán kinextij ke senkis takuaujtamatia ke Dios kichiuaskia nochi tein motenkauaya keman yaya kitemakati kemej netetayokolil ikonetsin akin sayoj se katka, yejua ika Jiova kichikauak nejon netenkaualis keman kiyeknextij ke kichiuaskia tein kijtojka (xikonixtajtolti Génesis 22:15-18 uan Hebreos 11:17, 18). Satepan ke netenkaualis iuan Abrahán peuak kipia chikaualis, Jiova kisentokak kimelaua seki taman tein motelnekia tein kinextiaya akoni yeskia ikonetsin siuat. Nejon konetsin kisaskia itech ichankauan Abrahán uan amo yeskia sayoj se, ta miakej. Uan yejuan yeskiaj tekiuanij, kinixpoloskiaj nochin akin kiixnamikij Dios uan kinualkuiliskiaj tatiochiualismej taltikpakneminij.
Abrahán kinextij ke senkis takuaujtamatia ke Dios kichiuaskia nochi tein motenkauaya (Xikonita párrafo 10)
11, 12. 1) ¿Keniuj kinextia Biblia ke netenkaualis iuan Abrahán tapaleuiskia maj mochiua se taman tein okachi ueyi? 2) ¿Keniuj techpaleuia tejuan nejon?
11 Maski netenkaualis iuan Abrahán yekinika mochiuak keman ikoneuan kiselijkej Tal tein Dios motenkaujka kinmakas, Biblia kinextia ke nejin netenkaualis tapaleuiskia maj mochiua se taman tein okachi ueyi (Gál. 4:22-25). Tatitanil Pablo kinextij ika ichikaualis Dios ke yekinika konetsin akin ualeua itech ichankauan Abrahán yejua Cristo uan oksekin ikoneuan siuat yejuan 144,000 tokniuan taixpejpenalmej ika espíritu (Gál. 3:16, 29; Apoc. 5:9, 10; 14:1, 4). Siuat yejua “Jerusalén ten poui ne eluiyaktsinko”, inechikol Dios ompa iluikak, tein kijtosneki, ángeles akin amo kikauaj yejuatsin (Gál. 4:26, 31). Ijkon kemej kiyeknextij netenkaualis iuan Abrahán, ikoneuan siuat kinualkuiliskiaj tatiochiualismej taltikpakneminij.
12 Netenkaualis iuan Abrahán kiyeknextia ke Tekiuajyot ompa iluikak yekmelauj moajsiskia. Uan kichiua maj Tekiuaj uan akin iuan tekiuajtiskej uelikan kiselikan taixyekanalis (Heb. 6:13-18). ¿Kanachi uejkauas nejon netenkaualis? Kisentokas moajsis hasta keman Tekiuajyot tein moajsi imako Mesías kinixpolos akin kiixnamikij Dios uan nochin taltikpakneminij kemej kalyetouanij kiseliskej tatiochiualismej (1 Cor. 15:23-26). Sayoj ke, Génesis 17:7 kijtoua ke nejon “se netenkaualis tein amo keman tamis” oso uejkauas nochipa. ¿Keyej? Porin nochin akin ijkuak nemiskej itech taltikpak kinpaleuis nochipa. Kemej tikitaj, netenkaualis iuan Abrahán kinextia ke Jiova senkis kiixtalia kichiuas maj taltikpakneminij akin yolmelaujkej ‘momoyauakan noyampa taltikpak’ ijkon kemej kinekia (Gén. 1:28).
SE NETENKAUALIS TEIN KIYEKNEXTIA KE TEKIUAJYOT UEJKAUAS
13, 14. ¿Toni kiyeknextia netenkaualis iuan David ika itekiuajyo Mesías?
13 Tein Dios motenkauak itech xochital Edén uan netenkaualis iuan Abrahán kiyeknextiaj se taman tein motelneki: iueyi taixyekanalis Jiova nochipa moyekana ika itanauatiluan Dios tein melaujkej, uan yejua ika iTekiuajyo Mesías tein yejuatsin kiixtalij no moyekana ika nejon tanauatilmej (Sal. 89:14). ¿Kemansa moijtakos uan monekis ixpoliuis? Okse netenkaualis kiyeknextia ke nejon amo keman panos.
14 Ika titajtouaj netenkaualis iuan David (xikonixtajtolti 2 Samuel 7:12, 16). Ika nejon netenkaualis, Jiova kiyekmatiltij David akin tekiuajtik itech xolal Israel ke Mesías yeskia se ichankauj (Luc. 1:30-33). Ijkon okachi kiyeknextij akoni itechkopa ualaskia konetsin. Kijtoj ke semej ikoneuan David “senkis kinamiki[skia]” taixyekanas itech iTekiuajyo Mesías (Ezeq. 21:25-27). Itechkopa Jesús, itekiuajyo David “chikaujkayetos nochipaya”. Tein melauj, “ikonetsin nochipaya yetos, uan itrono [tel] uejkauas kemej tonaltsin” (Sal. 89:34-37). ITekiuajyo Mesías amo keman moijtakos uan tatiochiualismej tein kiualkuis uejkauas nochipaya.
SE NETENKAUALIS KICHIUA MAJ MOAJSI SE TIOPIXKAT TEIN MONEKI
15-17. 1) Ijkon kemej kinextia netenkaualis tein kichiua maj moajsi se tiopixkat kemej Melquisedec, ¿toni tekit no kichiuaskia ikonetsin siuat? 2) ¿Keyej moneki maj no kichiua nejon tekit?
15 Netenkaualis iuan Abrahán uan netenkaualis iuan David kiyeknextiaj ke ikonetsin siuat monekia tekiuajtis. Sayoj ke, amo sayoj monekia se kuali tekiuajyot uan ijkon taltikpakneminij itech nochi xolalmej yekmelauj kiseliskiaj tatiochiualismej. Kemej monekia maj kinmakixtiskiaj itech tajtakol uan maj ueliskiaj pouiskiaj iniuan ichankauan Jiova akin moajsij iluikak uan taltikpak, monekia maj konetsin no kichiuaskia tekit kemej tiopixkat. ToTachijchiujkauj akin kipia ueyi tamatilis, uelik kichiuak nejin ika okse netenkaualis. Nejin yejua netenkaualis tein kichiua maj moajsi se tiopixkat kemej Melquisedec.
16 Itenkopa tekiuaj David, Jiova kimelauak ke kichiuaskia se netenkaualis iuan Jesús uan ijkon mochiuaskia ome taman: 1) motaliskia ‘iyekmakopa’ hasta keman kinixpolos taixnamikinij, uan 2) yeskia se ‘tiopixkat ijkon kemej Melquisedec nochipaya’ (xikonixtajtolti Salmo 110:1, 2, 4). ¿Keyej se ‘tiopixkat ijkon kemej Melquisedec’? Porin miak xiujmej achto ke ikoneuan Abrahán kiseliskiaj Tal tein Dios motenkaujka kinmakas, Melquisedec, akin tekiuajtia Salem, katka “tiopixkat itenkopaka Totajtsin Dios ten kachi ueyi chiuke” (Heb. 7:1-3). Jiova kiixtalijka kemej tekiuaj uan tiopixkat. Itech Escrituras Hebreas monextia ke sayoj Melquisedec kichiuak nejon ome tekit. Uan no, kemej amo teyi kinextia ke moajsik aksa achto oso satepan akin no kichiuak nejon ome tekit, uelis moijtos ke yejua Jesús “tiopixkat [...] sen nachipa”.
17 Ika nejin netenkaualis, Jiova kiixtalij Jesús kemej tiopixkat. Yejua ika Jesús yeski “tiopixkatsin sen nachipa [...] ijkon keme tekititinemik ne uejkautiopixkat ten monotsa Melquisedec” (Heb. 5:4-6). Nejin netenkaualis kiyeknextia ke Jiova senkis motenkaua kikuis iTekiuajyo Mesías uan ijkon kichiuas itanejnekilis tein kipialia taltikpak uan taltikpakneminij.
TEKIUAJYOT MOIXTALIA IKA NETENKAUALISMEJ
18, 19. 1) ¿Keniuj mouikaj iuan Tekiuajyot eyi netenkaualismej tein tikitakej axkan? 2) ¿Toni tikitaskej itech okse tamachtilis?
18 Netenkaualismej tein tikitakejya techmachtij keniuj mouikaj iuan iTekiuajyo Mesías. No tikitakej ke Tekiuajyot moixtalia ika netenkaualismej. Ika tein Jiova motenkauak itech xochital Edén, kiyeknextij ke itanejnekilis tein kipialia taltikpak uan taltikpakneminij kichiuas itechkopa ikonetsin siuat. Netenkaualis iuan Abrahán kinextij akoni yeskia nejon konetsin uan toni tekit kichiuaskia.
19 Netenkaualis iuan David okachi kiyeknextij akoni itechkopa ualaskia yekinika konetsin, Jesús, uan kimakak tanauatil tein kinamiki maj taixyekana itech taltikpak uan ijkon tatiochiualismej tein kiualkuis Tekiuajyot uejkauas nochipaya. Netenkaualis tein kichiua maj moajsi se tiopixkat kemej Melquisedec kiyeknextia ke konetsin kichiuaskia se tekit kemej tiopixkat. Sayoj ke amo iselti Jesús kinpaleuiskia taltikpakneminij maj amo kipiakanok tajtakol. Oksekin no kinixpejpenaskiaj maj tekitikan kemej tekiuanij uan tiopixkamej. ¿Kani ualeuaskiaj? Tikitaskej itech okse tamachtilis.
