1, 2. Ngera oterekeklii a rengud el kmo a Dios a mo otutii a moktek er ngii el okiu a Renged? E ngera uchul? (Momes er a siasing er a uchelel a suobel.)

 KID a Resioning er a Jehovah a blak a rengud el ouchais er a rechad el kmo a Rengedel a Dios a di ta el tekoi el sebechel el sumechokl a mondai er a klechad. Me kid kede mesisiich el oumerang el kmo, a Renged a mera el tekoi, e a Dios a mo ousbech er ngii el otutii a moktek er Ngii? Ngera sel uchetemel a klaumerang er kid el kirel a Renged?​—Heb. 11:1.

² A Jehovah a mo ousbech er a Rengedel a Mesias el mo otutii a moktek er ngii el kirel a klechad. Me sel llemeltel a Jehovah el mengedereder a mesisiich el uchetemel tia el Renged. Ngtechang a King er tia el Renged? Te rua techang a mo mengedereder el obengkel? Te mo mengedereder a ngerang? A Jehovah a mla oterekokl aika el meklou a ultutelel el tekoi el okiu a telbiil el bla leruul. Me aikang a mesisiich el telbiil el leriruul a Jehovah me a Ngelekel el Jesus Kristus. Me bo dosaod aika el telbiil me bo dungil medengelii a rolel e a Jehovah a mo otutii a moktek er ngii me sel uchul me a Rengedel a ulterekokl el mo er ngii.​—Monguiu er a Efesus 2:12.

3. Ngera kede mo mesuub er tia el suobel me sel ongingil?

³ A Biblia a mesaod el kirel a elolem el meklou a ultutelel el  telbiil el ngar er ngii a lerellii er a Rengedel a Mesias el longedereder er ngii a Kristus Jesus. Me aikang a (1) telbilel a Jehovah el mo er a Abraham, (2) Llach er a telbiil, (3) telbilel a Jehovah el mo er a David, (4) telbilel a Jehovah el kirel a prist el ua Melkisedek, (5) beches el telbiil, me a (6) telbiil el kirel a Renged. Me bo dosuub er a rolel e aika el telbiil a ngar er ngii a lerellii el kirel a Renged me a rolel e a moktek er a Dios el kirel tia el chutem me a rechad a mo tmaut.​—Momes er a chart el “ A Rolel e a Dios a Mo Otutii a Moktek er Ngii.”

4. Ngerang dilung a Jehovah el kirir a rechad el ngar er a babier er a Genesis?

⁴ A Jehovah a kiltmeklii tia el chutem me bo el sebechir a rechad el kiei er ngii. E sola e dilu aika el tekoi: (1) Ngmo omeob er a rechad el okesiul. (2) A rechad a mo rullii a beluulechad el rokir el mo baradis el mui er a remelemalt el ngelekir. (3) A rechad a dimlak el kirir el menga redechel a kerrekar er a mo medengei a ungil me a mekngit. (Gen. 1:26, 28; 2:16, 17) Aika el tekoi a ungil el mesaod er a moktek er a Dios el kirel tia el chutem me a rechad. Engdi ngera uchul me ngmle kirel el meruul a telbiil?

5, 6. (a) Ngmilekerang a Satan e melasem el merrob er a moktek er a Dios? (b) Ngmilekerang a Jehovah er a uriul er a ultok el mla er a Eden?

⁵ A Satan a miluchelii a ultok el mo er a Dios me sel moktek er ngii. Ngmle soal el rulleterir a rechad el mo diak lolengesenges er a Dios me ngmilengesuseu er a Eva el mo menga redechel a kerrekar er a mo medengei a ungil me a mekngit. (Gen. 3:1-5; Och. 12:9) Me ngokiu tia el tekoi, e a Satan a mlo omtok er a llemeltel a Dios el mo mengedereder er a reblebelel. Me a uriul e a Satan a dirrek el dilu el kmo a rechad a di mengull er a Dios e le ngar er ngii a lengai er ngii.​—Job 1:9-11; 2:4, 5.

⁶ Me ngmilekerang a Jehovah? Ngmle sebechel el mekodeterir tirke el ulemtok el chad. Engdi a loruul el uaisei, e sel moktek er ngii el soal a rengelekel a Adam me a Eva el mo omekeek er a beluulechad a diak bo letaut. Me ngdimlak lokodeterir er seikid el taem, e ngbai dillii a dmolech a belkul el ulaoch, el ngii sel ulaoch el medung er a Eden. Tia el ulaoch a ulterekeklii el kmo a moktek er a Dios el kirel tia el chutem me a rechad a mo tmaut.​—Monguiu er a Genesis 3:15.

7. A ulaoch el medung er a Eden ngera ngochotii el kirel a bersoech me a ruldidellel a rsechel?

⁷ Sera ledelii a ulaoch el medung er a Eden, e a Dios a uluukerrekeriil er a bersoech me a ruldidellel a rsechel, el omtechei er a Satan el Diabelong me tirke el mo obengkel el omtok er a llemeltel a Dios el mengedereder. A Dios a milsa uldidellel a rsechel a redil a llemeltel el mo okngemedeterir tirka el ulemtok. Me tia el ulaoch el medung er a Eden a ulechotii el kmo a Satan me a mekngit el tekoi el mlo er ngii el okiu a utekengel a mo nguemed. Ngdirrek el ulechotii a rolel e a Dios a mo meruul er tia el tekoi.

8. Ngera kede suubii el kirel ngika el redil me a uldidellel a rsechel?

⁸ E techang a uldidellel a rsechel a redil? Ngkirel el diak lemoues el anghel. E ngera uchul? E le ngikang a mo “tomellii a Diabelong,” el ngii a dirrek el diak lemoues el anghel. (Heb. 2:14) Me ngbelkul a kmo ngika el redil el mo mechellii a uldidellel a rasech a dirrek el diak lemoues. Me ngar er a chelsel aike el bekord el 4,000 el rak er a uriul er a lemedung a ulaoch el ngar er a Eden, e a ruldidellel a rsechel a bersoech a mle mereched el mo betok, engdi ngdimlak lebleketakl el kmo ngtechang ngika el redil me a uldidellel a rsechel. Me nguaisei,  engdi cherengel a taem e a Jehovah a mirruul a telbiil el ulechotii el kmo ngtechang ngika el uldidellel a rasech, me a rolel e a Dios a mo sumecheklii a tellemall el mlo er ngii el okiu a utekengel a Satan.

9. Ngoingerang e a telbilel a Jehovah el mo er a Abraham a ulemuchel el oureor?

⁹ A bekord el 2,000 el rak er a uriul er a lemedung a ulaoch el ngar er a Eden, e a Jehovah a dilu er a Abraham me letobed er a belual er a Ur e lorael el mo er a beluu er a Kanaan. (Rel. 7:2, 3) A Dios a dilu er ngii el kmo: “Mtobed er a beluam, ma delongelir a re chedam, ma belual a demam, e morael el mor sel beluu el bo kuchotii er kau. Ak mo meskau a betok el uldidellel a rsechem el belurir a mo merael chisel. E ngak a mo omekngeltengat er kau, e mo rullii a ngklem el mo chetengakl, me te mo ousbech er ngii a lomekngeltengat. Ak mo omekngeltengat er tirkel mo omekngeltengat er kau, e ngdi kmo melebeakl er tirkel mo melebeakl er kau. A rokui el beluu er a beluulchad a mo olengit er ngak el mo omekngeltengat er tir el ua bla kumekngeltengat er kau.” (Gen. 12:1-3) Tia el telbiil a okedongall el telbilel a Jehovah el mo er a Abraham. Ngdiak dodengei el kmo, ngoingerang e a Jehovah a mle kot el dulii tia el telbiil el mo er a Abraham. Engdi kede medengei el kmo, tia el telbiil a ulemuchel el oureor er a rak er a 1943 er a uchei er a Kristus er sel taem el 75 a rekil el Abraham a tilobed er a Haran e mlo imuul er a Omoachel er a Eufrates.

10. (a) Ngmilekerang a Abraham e ochotii a klaumerang er ngii er a telbilel a Dios? (b) A Jehovah ngmilekekokil el ochotii a ngerang el kirel a uldidellel a rsechel a redil?

¹⁰ A Jehovah a mle betok el taem el lolekoi er a telbilel el mo er a Abraham, e dilechelii a lmuut el bebil er a omesodel er a bek el taem el ledelii. (Gen. 13:15-17; 17: 1-8, 16) A klaumerang er a Abraham er a telbilel a Dios a kmal mle mesisiich me ngkilengei el tongetengii a ngelekel. Tiaikid a uchul me a Jehovah a ulsiich a tekingel el mo er a Abraham el lmuut el oterekeklii el kmo ngmo tmaut a telbilel. (Monguiu er a Genesis 22:15-18; * Hebru 11:17, 18.) Me a uriul er a lomuchel el oureor tia el telbiil, e a Jehovah a milekekokil el olecholt a lmuut el bebil er a meklou a ultutelel el tekoi el kirel a uldidellel a rsechel a redil. Ngikang a mo chedal a klengelakel er a Abraham, e mo teloi er a rebebil, e mo king, e mo okngemedeterir a recherrouel a Dios, e dirrek el mo uchul e a rebetok el chad a mo mukngeltengat.

11, 12. Ngmekerang a Biblia e ochotii el kmo ngar er ngii a ongeru el otutel a telbilel a Jehovah el mo er a Abraham? E tia ngera belkul el kired?

¹¹ A kot el otutel a telbilel a Jehovah el mo er a Abraham a mlo er ngii er sel taem el rengelekel a Abraham a mlo oudiukes er a Beluu er a Nglat. Engdi a Biblia a meketeklii el kmo tia el telbiil a dirrek el mo uchul a lmuut el betok el klungiaol. (Gal. 4:22-25) A apostol el Paulus a silodii el kmo ngike el kot el klou a ultutelel el chad er a otutel a telbiil el kirel a uldidellel a rsechel a Abraham, a Jesus Kristus. Me tirke el 144,000 a dirrek el uldimukl er a otutel tia el telbiil. (Gal. 3:16, 29; Och. 3:21; 14:1, 4) A redil el losaod er ngii a ulaoch el medung er a Eden a omtechei er a tedebechel a cheldebechelel a Dios el ngar er a eanged. E ngika el redil a okedongall el “Jerusalem el ngar bab,” el ngii a cheldellir a reblak a rengrir el anghel. (Gal. 4:26, 31) Me ngokiu a uldidellel a rsechel a redil e a beluulechad el rokir a mo mukngeltengat, el oltirakl er a telbilel a Jehovah el mo er a Abraham.

¹² A telbilel a Jehovah el mo er a Abraham a oterekeklii el kmo ngmo er ngii a Rengedel a eanged, e ngike el King me tirke el mo mengedereder el obengkel a sebechir el mo oudiukes er ngii. (Heb. 6:13-18) Ngmo merek er oingerang tia el telbiil? A Genesis 17:7 a mesaod er ngii el kmo, “ng diak a ulebengelel telbiil.” Me ngmelemolem el mo lmuut er sel taem el ngii el Renged a okngemedeterir a rokui el cherrouel a Dios, e a rokui el chad er a beluulechad a mo mukngeltengat. (1 Ko. 15:23-26) Engdi a klungiaol el mo er ngii el okiu tia el telbiil a diak a ulebengelel. A telbilel a Jehovah el mo er a Abraham a meketeklii el kmo, ngmo otutii a moktek er ngii el soal a remelemalt el chad a “bo le kiei er ker me ker er a beluulchad.”​—Gen. 1:28.

13, 14. Ngoterekeklii a ngerang a telbilel a Jehovah el mo er a David?

¹³ A ulaoch el medung er a Eden me a telbilel a Jehovah el mo er a Abraham a meketeklii el kmo a omengederederel a Jehovah a blechoel el ultuil er a llemalt. Me a Rengedel a Mesias el bla leteketekii a dirrek el uaisei. (Psa. 89:14) Me tia el Renged, ngar er ngii a techellel el mo mekngit el uchul me ngkirel a Dios el mo mtechir el oba ta er a Renged? Ngdiak. Ngar er ngii a lmuut el ta er a telbiil el oterekeklii el kmo ngdiak el sebechel el mo uaisei.

¹⁴ Tiang a telbilel a Jehovah el mo er a David, el king er a Israel er a irechar. (Monguiu er a 2 Samuel 7:12, 16.) A Jehovah a tilbir el mo er a David el kmo a ta er a chad er a klengelakel er ngii a mo Mesias. (Lk. 1:30-33) Me ngoeak tiang, e a Jehovah a silodii a beches el omesodel a klengelakel er a Mesias. A Jehovah a dilu el kmo, ngika el chad el mei el okiu a klengelakel er a David a “ngikel kirel el oungerachel” er a Rengedel a Mesias. (Ese. 21:25-27) Me a kleking  er a David a mo diak a ulebengelel e le Jesus el ngar er a klengelakel er a David a “di mo blechoel el ngar ngii” er a “klteketel el le diich a sils.” (Psa. 89:34-37) Me ngulterekokl a rengud el kmo a Mesias a kmal diak bo lemekngit el mengedereder me a klungiaol el mei el okiu a omengederederel a melemolem el mo cherechar!

15-17. A doltirakl er a telbilel a Jehovah el kirel a prist el ua Melkisedek, e ngera lmuut el ta er a deruchall el bo lenguu a uldidellel a rsechel a redil, e ngera uchul?

¹⁵ A telbilel a Jehovah el mo er a Abraham me a mo er a David a oterekeklii el kmo a uldidellel a rsechel a redil a mo mengedereder el king. Engdi a lsekum a uldidellel a rasech a di mo king e merekong, e ngmo diak el sebechel a beluulechad el rokir el mukngeltengat. Ngika el uldidellel a rasech a dirrek el kirel el mo prist. E le te di prist a sebechir el oldars a tenget el mo melubet er a rechad er a kngterir me bo el sebechir el mo chedal a telungalek er a Jehovah el ngar er a eanged me a chutem. Me a Jehovah a rirellii a lmuut el ta er a telbiil el mo oterekeklii el kmo a uldidellel a rasech a mo prist, e tiang a telbilel a Jehovah el kirel a prist el ua Melkisedek.

¹⁶ A Dios a mileketeklii el mo er a King el David el kmo Ngii a mo meruul a telbilel el obengkel a Jesus el uldimukl er ngii a eru el tekoi. A kot, a Jesus a mo ‘dengchokl er a kadekmel’ a Dios el dimerekmo bo lemesisiich er a recherrouel. Me a ongerung, a Jesus a mo “prist el mo cherechar, el ngar a deruchellel a Melkisedek.” (Monguiu er a Psalm 110:1, 2, 4.) Ngera uchul me ngmo prist “el ngar a deruchellel a Melkisedek”? A uchei er a lenguu a Beluu er a Nglat a rengelekel a Abraham, e a Melkisedek a mle king er a mats er a Salem e dirrek el mle “prist er a Kot el Ngarbab el Dios.” (Heb. 7:1-3) A Jehovah a tiltkii a Melkisedek el mo king e prist, e di mle ngii el tang a ullab aika el eru el deruchall er a uchei er a Jesus. Me a lmuut el tang, ngdiak a chad el uleakuchei er a Melkisedek el ullab aika el deruchall e dimlak a mo omtechei er ngii, me ngdi ua le “prist el mo cherechar.”

¹⁷ Ngokiu tia el telbiil, e a Dios a tutkii a Jesus el mo prist. Ngmo “prist el mo cherechar el oltirakl er a deruchellel a Melkisedek.” (Heb. 5:4-6) Me tia el telbiil a meketeklii el kmo a Jehovah a ulterekokl el mo ousbech er a Rengedel a Mesias el mo otutii a moktek er ngii el kirel tia el chutem me a rechad.

18, 19. (a) Ngera kede suubii el kirel a Renged el okiu aika el telbiil el bla desaod? (b) Ngera kede mo mesaod er a ongingil el suobel?

¹⁸ Ngar er tia el suobel e kede mla suubii a rolel e aika el telbiil a ngar er ngii a lerellii el kirel a Rengedel a Mesias, me a rolel e a Renged a meteketek el okiu a telbiil. A ulaoch el medung er a Eden a oterekeklii el kmo a Jehovah a mo ousbech er a uldidellel a rsechel a redil el mo otutii a moktek er ngii el kirel tia el chutem me a rechad. Me a telbilel a Jehovah el mo er a Abraham a smodii el kmo ngtecha ngika el uldidellel a rasech e ngera mo ngerechelel.

¹⁹ A telbilel a Jehovah el mo er a David a ouchais a lmuut el betok el omesodel a klengelakel er a Mesias, e dirrek el msa Jesus a llemeltel el mo mengedereder er a chutem el mo cherechar. A telbilel a Jehovah el kirel a prist el ua Melkisedek a oterekeklii el kmo a uldidellel a rasech a mo prist. Engdi ngdiak di el Jesus a mo ngosuterir a rechad el mo mecherrungel. Te dirrek el ngar er ngii a relmuut el bebil el mla mengilt el mo king e prist. Tirka te mla er ker el mei? Tia el ker a mo monger er a ongingil el suobel.