1, 2. (a) Saida mak halo ita fiar katak liuhusi Maromak nia Ukun, nia sei halo ninia hakarak hotu sai loos? (b) Tuir Éfeso 2:12 uluk ita-nia moris falta saida? (Haree dezeñu iha leten.)

 NUʼUDAR Testemuña ba Jeová, ita haklaken ho laran-manas hodi fó-hatene ema katak só Maromak nia Ukun deʼit mak bele rezolve problema hotu. Maibé ita rasik fiar katak Maromak nia Ukun neʼe iha duni ka lae, no Maromak bele halo ninia hakarak hotu sai loos liuhusi Ukun neʼe ka lae? Oinsá mak ita bele tau fiar tomak ba Ukun neʼe?—Ebreu 11:1.

² Liuhusi Mesias nia Ukun neʼe, Jeová sei halo ninia hakarak hotu sai loos. Jeová nia direitu hodi ukun sai hanesan fundasaun hodi ita bele fiar katak Ukun neʼe sei hamriik ba nafatin. Sé mak Ukun neʼe nia Liurai? Sé tan mak sei ukun hamutuk ho Liurai neʼe? Maromak fó autoridade saida ba sira? Jeová uza aliansa oioin hodi legaliza Ukun neʼe. Aliansa sira-neʼe mak hanesan kontratu legál neʼebé Jeová ka Jesus halo. Hodi estuda didiʼak aliansa sira-neʼe, sei ajuda ita hatene tansá mak Jeová nia hakarak sira sei sai susesu no tanbasá mak ita bele fiar Ukun neʼe sei hamriik metin hanesan foho ida.—Lee Éfeso 2:12.

3. Ita sei estuda kona-ba saida iha lisaun ida-neʼe no ida seluk tuirmai neʼe?

 ³ Bíblia koʼalia kona-ba aliansa neen neʼebé liga ho Jesus Kristu kaer Ukun nuʼudar Mesias. Aliansa sira mak neʼe: (1) aliansa ho Abraão nian, (2) aliansa Ukun-Fuan nian, (3) aliansa ho David nian, (4) aliansa atu sai amlulik hanesan Melkizedek, (5) aliansa foun, no (6) aliansa Ukun nian. Mai ita haree oinsá mak aliansa ida-idak iha relasaun ho Maromak nia Ukun no oinsá mak liuhusi aliansa sira-neʼe Maromak halo ninia hakarak ba ema no rai sai loos.—Haree “ Dalan Maromak atu kumpre ninia hakarak.”

4. Hanesan hakerek iha Gênesis, Jeová foti desizaun saida kona-ba ema?

⁴ Bainhira Jeová prepara didiʼak tiha buat hotu iha mundu ba ema hodi bele hela, hafoin mak nia foti desizaun tolu. (1) Nia hakarak kria ema tuir ninia ilas. (2) Ema sei halo mundu tomak sai paraízu ida no halo mundu nakonu ho sira-nia oan. (3) Ema la bele han husi ai-hun koñesimentu kona-ba diʼak no aat nian. (Gênesis [Kejadian] 1:26, 28; 2:16, 17) Desizaun tolu neʼe sai hanesan estrutura ba Maromak nia planu hotu kona-ba ema no mundu. Entaun, tanbasá mak Maromak presiza halo tan aliansa bara-barak?

5, 6. (a) Satanás halo saida hodi koko hapara Maromak nia hakarak sai loos? (b) Jeová halo saida bainhira Satanás kontra ninia Ukun iha Eden?

⁵ Satanás tenta Eva hodi han ai-fuan husi ai koñesimentu kona-ba diʼak no aat nian. Tan neʼe mak Satanás sai autór ba sira neʼebé kontra Maromak no Ninia hakarak. (Gênesis [Kejadian] 3:1-5; Apokalipse 12:9) Ninia hahalok neʼe hatudu katak nia hakarak hadau Maromak nia direitu hodi ukun Maromak nia kriatura hotu. Tuirmai, iha Maromak nia oin nia duun katak tuir loloos ema adora Maromak iha liʼur deʼit, laʼós husi laran.—Jó (Ayub) 1:9-11; 2:4, 5.

⁶ Entaun, saida mak Jeová atu halo ba sira neʼebé kontra nia? Tuir loloos nia bele oho kedas sira hotu. Maibé se nia halo hanesan neʼe ba sira, ninia hakarak ba Adão no Eva atu halo mundu nakonu ho sira-nia oan sei la susesu ona. Duké oho sira, Jeová fó sai profesia ida neʼebé bolu nuʼudar promesa Eden nian. Promesa neʼe fó garantia katak buat hotu neʼebé Maromak planu atu halo ba ema no rai sei sai loos.—Lee Gênesis (Kejadian) 3:15. a

7. Promesa Eden nian dehan saida mak sei akontese ba samea ho ninia bei-oan sira?

⁷ Liuhusi promesa Eden nian, Maromak hakotu katak samea ka Diabu Satanás ho ninia bei-oan, ka sira neʼebé apoia nia hodi kontra Maromak nia ukun, sei mate. Maromak autoriza feto nia bei-oan mak atu halakon hotu sira neʼebé kontra Nia. Husi promesa Eden nian ita bele haree oinsá mak Maromak sei halakon Satanás no oinsá mak Nia atu hadiʼa fali buat aat hotu neʼebé Satanás kria.

8. Esplika toʼok sé mak feto no ninia bei-oan.

⁸ Sé mak feto nia bei-oan? Tanba ita ema la bele haree Satanás, tan neʼe bei-oan ida neʼebé atu halakon Satanás mós laʼós ema ida, maibé kriatura espíritu ida. (Ebreu 2:14) Entaun, feto neʼe mós laʼós ema ida. Durante tinan 4.000 nia laran, husi tempu neʼebé Jeová halo promete iha Eden, maski samea nia bei-oan aumenta barak ba beibeik, maibé la iha ema ida hatene feto no ninia bei-oan mak sé. Iha tinan sira-neʼe mak Jeová halo aliansa balu  neʼebé esplika sé mak feto nia bei-oan no oinsá mak Maromak sei hadiʼa fali buat aat sira neʼebé Satanás kria.

9. Saida mak aliansa ho Abraão? No bainhira mak aliansa neʼe komesa laʼo?

⁹ Maizumenus tinan 2.000 liutiha husi tempu Jeová halo promesa Eden nian, nia haruka Abraão sai husi Ur hodi bá rai-Kanaán. (Apóstolu 7:2, 3) Maromak hatete ba nia: “Sai husi ó-nia rai no husi ó-nia família no husi ó-nia aman nia umakain hodi bá rai neʼebé haʼu sei hatudu ba ó. Haʼu sei halo ó sai nasaun boot ida, no haʼu sei haraik bensaun ba ó, no haʼu sei halo ó-nia naran sai boot, no ó sei sai bensaun ida. Haʼu sei haraik bensaun ba sira neʼebé fó bensaun ba ó, no haʼu sei fó malisan ba ema neʼebé hotar ó, no família hotu iha rai sei hetan bensaun liuhusi ó.” (Gênesis [Kejadian] 12:1-3) Promete neʼe mak bolu nuʼudar aliansa ho Abraão. Ita la hatene bainhira loos mak Jeová halo promete neʼe ba Abraão, maibé ita hatene katak promesa neʼe komesa laʼo iha tinan 1943 molok Kristu bainhira Abraão tinan 75, iha tempu neʼebé nia sai husi rai-Haran hodi hakat bá Mota Eufrates nia sorin.

10. (a) Abraão halo saida hodi hatudu katak nia fiar tebes ba Maromak nia promesa sira? (b) Informasaun saida deʼit mak Jeová fó sai neineik-neineik kona-ba feto nia bei-oan?

¹⁰ Jeová repete ninia promete neʼe ba Abraão laʼós dala ida deʼit. Iha tempu ida-idak neʼebé nia repete ninia promesa neʼe, nia sempre esplika klaru liután kona-ba ninia promesa neʼe. (Gênesis [Kejadian] 13:15-17; 17:1-8, 16) Abraão fiar tebes ba Maromak nia promesa sira toʼo nia ho ninia hakarak rasik fó ninia oan-mane mesak ba Jeová. Tanba ninia fiar neʼe, Jeová  promete ba nia hodi fó garantia katak aliansa neʼebé nia halo ho Abraão sei sai loos. (Lee Gênesis [Kejadian] 22:15-18; b Ebreu 11:17, 18.) Bainhira aliansa ho Abraão nian komesa laʼo ona, neineik-neineik Jeová mós fó sai informasaun importante ida-idak kona-ba feto nia bei-oan. Bei-oan neʼe sei mai husi Abraão nia umakain. Bei-oan neʼe laʼós ema ida deʼit. Sira sei ukun nuʼudar liurai. Sira sei halakon Maromak nia inimigu hotu, no ema barak sei hetan bensaun liuhusi sira.

11, 12. Tuir eskritura sira, parte prinsipál husi aliansa Abraão nian mak sé? No oinsá mak aliansa neʼe iha relasaun ho ita-nia moris?

¹¹ Promesa ba aliansa Abraão nian sai loos bainhira Abraão nia bei-oan sira tama ona iha rai promete nian. Maibé, Bíblia hatete katak aliansa neʼe sei sai loos iha dalan seluk tan. (Galásia 4:22-25) Apóstolu Paulo esplika katak parte prinsipál husi Abraão nia bei-oan mak Jesus Kristu, parte segundu mak ema kose-mina naʼin-144.000. (Galásia 3:16, 29; Apokalipse 5:9, 10; 14:1, 4) Feto mak Maromak nia organizasaun parte lalehan nian, kriatura espíritu sira neʼebé laran-metin deʼit mak iha laran. Feto neʼe bolu mós nuʼudar “Jeruzalein lalehan nian”. (Galásia 4:26, 31) Iha aliansa Abraão nian promete katak feto nia bei-oan neʼe sei lori bensaun ba ema toʼo tempu neʼebé la bele sura.

¹² Aliansa ho Abraão nian mak fó garantia katak Maromak nia Ukun sei harii iha lalehan no loke dalan ba Liurai ho ema naʼin-144.000 atu simu Maromak nia Ukun. (Ebreu 6:13-18) Aliansa neʼe sei laʼo toʼo bainhira? Eskritura iha Gênesis (Kejadian) 17:7 hatete katak aliansa neʼe mak “aliansa ba nafatin”. Aliansa neʼe sei laʼo toʼo bainhira Ukun lalehan nian halakon Maromak nia inimigu hotu mak aliansa neʼe foin ramata. Maibé bensaun sira neʼebé ema hotu iha rai atu hetan husi aliansa neʼe mak iha ba nafatin. (1 Korinto 15:23-26) Husi aliansa Abraão nian ita bele haree Jeová hakotu tiha ona katak ninia hakarak sei susesu hodi halo mundu nakonu ho ema laran-moos sira.—Gênesis (Kejadian) 1:28.

13, 14. Aliansa ho David fó garantia saida kona-ba Mesias nia Ukun?

¹³ Husi promesa Eden nian no aliansa ho Abraão nian, ita bele aprende katak Jeová sempre ukun iha dalan neʼebé moos no loos. Hanesan neʼe mós ho Mesias nia Ukun neʼebé Nia harii sei ukun iha dalan neʼebé moos no loos. (Salmo [Mazmur] 89:14) Nuneʼe mak Jeová halo aliansa ida tan hodi fó garantia katak Ukun neʼe sei la iha korrupsaun no sei hamriik ba nafatin.

¹⁴ Aliansa neʼe mak naran aliansa ho David nian neʼebé Jeová halo ho liurai David iha tempu Izraél antigu. (Lee 2 Samuel 7:12, 16. c) Iha neʼe Jeová promete ba David katak Mesias sei mai husi ninia bei-oan ida, no nia mak iha direitu legál atu sai Liurai iha Mesias nia Ukun. (Lucas  1:30-33; Ezequiel [Yehezkiel] 21:25-27) Tanba Jesus mak David nia bei-oan, entaun bele dehan katak David nia ukun mós ‘sei hela ba nafatin; ninia kadunan sei metin hanesan loro-matan’. (Salmo [Mazmur] 89:34-37) Ita bele kaer metin liafuan neʼe katak sei la iha korrupsaun iha Mesias nia Ukun, no ninia Ukun sei lori bensaun toʼo tempu neʼebé la bele sura!

15-17. Tuir aliansa atu sai amlulik hanesan Melkizedek nian, bei-oan sei kaer knaar saida tan, no tanbasá?

¹⁵ Aliansa Abraão no David nian fó garantia ba feto nia bei-oan atu sai liurai ida. Maibé, ukun deʼit nuʼudar liurai ida seidauk bele lori bensaun tomak ba ema hotu. Tanba amlulik deʼit mak bele hasaʼe sakrifísiu hodi ema bele sai husi sala no mate no iha fali relasaun diʼak ho Jeová, entaun bei-oan neʼe mós presiza sai nuʼudar amlulik ida. Atu fó garantia katak nia sei halo duni arranju neʼe, Jeová halo aliansa legál ida tan neʼebé bolu naran aliansa atu sai amlulik hanesan Melkizedek.

¹⁶ Liuhusi Liurai David nia liafuan, Maromak fó-hatene katak nia sei halo aliansa ida ho Jesus. Aliansa neʼe sei kumpre buat rua. Primeiru, Jesus sei ‘tuur iha Maromak nia liman-loos’ no simu autoridade hodi halakon Maromak nia inimigu hotu. Segundu, Jesus sei sai “amlulik ba nafatin iha dalan hanesan ho Melkizedek” nian. (Lee Salmo [Mazmur] 110:1, 2, 4. d) Tanbasá mak Jesus tenke sai amlulik ida “iha dalan hanesan ho Melkizedek” nian? Tanba antes Abraão iha bei-oan, Melkizedek mak liurai ba sidade Salém no “amlulik ba Maromak neʼebé Aas Liu Hotu”. (Ebreu 7:1-3) Jeová rasik mak foti Melkizedek hodi sai liurai no amlulik. Toʼo Jesus sai liurai no amlulik ida, la iha ema ida mak iha pozisaun úniku hanesan Melkizedek. Tan neʼe mak Bíblia bolu nia nuʼudar amlulik ba nafatin.

¹⁷ Maromak uza aliansa neʼe hodi foti rasik Jesus sai amlulik ida. Tan neʼe, Jesus sei sai “amlulik ba nafatin tuir dalan Melkizedek nian”. (Ebreu 5:4-6) Liuhusi aliansa atu sai amlulik hanesan Melkizedek nian mak Jeová fó garantia katak nia sei uza Mesias nia Ukun atu kumpre ninia hakarak ba ema no mundu.

18, 19. (a) Oinsá mak aliansa sira iha lisaun neʼe liga ho Mesias nia Ukun? (b) Ita sei koʼalia kona-ba saida iha lisaun tuirmai?

¹⁸ Toʼo iha neʼe ita aprende ona oinsá mak aliansa legál ida-idak liga ho Mesias nia Ukun. Promesa Eden nian fó garantia katak Jeová sei uza feto nia bei-oan hodi halo ninia hakarak ba rai no ema sai susesu. Aliansa ho Abraão nian esplika kona-ba sé mak bei-oan neʼe no nia sei kaer knaar saida.

¹⁹ Aliansa ho David nian esplika Mesias mai husi neʼebé. No aliansa neʼe fó direitu ba Jesus hodi ukun mundu ba nafatin. Aliansa atu sai amlulik hanesan Melkizedek nian fó garantia katak bei-oan neʼe sei sai amlulik ida. Maibé laʼós Jesus mesak deʼit mak sei ajuda ema sai perfeitu fali. Iha mós ema seluk neʼebé atu sai Liurai no amlulik sira. Lisaun tuirmai sei esplika kona-ba ema sira-neʼe mai husi neʼebé.