1, 2. Wanem samting bai strongim bilip bilong yumi olsem Kingdom bai kamapim samting em God i bin tingting pinis long mekim long helpim ol manmeri long graun? Bilong wanem? (Lukim piksa long kirap bilong stadi.)

YUMI stap olsem ol Witnes Bilong Jehova, olsem na yumi save tok olsem Kingdom Bilong God tasol em rot bilong stretim olgeta hevi bilong yumi, na yumi save amamas long stiaim tingting bilong ol man i go long dispela bikpela tok i tru bilong Baibel. Na tu, yumi save long ol blesing em Kingdom bai kamapim na dispela i mekim gut bel bilong yumi. Tasol olsem wanem? Yumi bilip tru olsem Kingdom bai kamapim stret samting em God i tingting pinis long mekim? Bilong wanem yumi mas bilip strong long Kingdom?—Hib. 11:1.

² God i Gat Olgeta Strong i bin kamapim Kingdom Bilong Mesaia, na dispela Kingdom bai helpim em long inapim samting em i tingting pinis long mekim long helpim ol manmeri long graun. Jehova i gat olgeta rait long mekim wok bos, olsem na em i kamapim dispela Kingdom. Ol bikpela samting long dispela Kingdom em king bilong en, ol wanwok bilong king, na ol bai bosim wanem hap. God na Pikinini bilong em, Jisas Krais, i bin wokim kontrak wantaim ol arapela, na ol dispela kontrak i strongim ol bikpela samting bilong Kingdom. Taim yumi tingim tingim ol dispela kontrak,  dispela bai helpim yumi long kliagut moa long olsem wanem God bai truim samting em i tingting pinis long mekim, na tu, dispela bai strongim bilip bilong yumi long Kingdom.—Ritim Efesus 2:12.

3. (a) Yumi bai stori long wanem samting long dispela stadi? (b) Yumi bai stori long wanem samting long stadi i kamap bihain long dispela?

³ Baibel i kolim 6-pela bikpela kontrak we i stret long ol wok em Kingdom Bilong Mesaia bai mekim long han bilong Krais Jisas. Ol dispela kontrak em (1) kontrak namel long God na Abraham, (2) kontrak bilong Lo, (3) kontrak namel long God na Devit, (4) kontrak bilong kisim pris olsem Melkisedek, (5) nupela kontrak, na (6) kontrak bilong Kingdom. Yumi ken stori nau long olsem wanem olgeta wan wan kontrak i stret wantaim wok bilong Kingdom, na i opim rot long God inap kamapim samting em i tingting pinis long mekim long graun na long helpim olgeta lain man.—Lukim sat “ God Bai Kamapim Samting Em i Tingting Pinis Long Mekim.”

4. Olsem Buk Stat i stori long en, Jehova i kolim wanem ol bikpela samting?

⁴ Taim Jehova i redim pinis dispela graun long ol man bai sindaun long en, em i kolim 3-pela bikpela samting: God bilong yumi bai wokim ol man i kamap olsem em yet, ol man i mas mekim olgeta hap bilong graun i kamap ples paradais, na ol stretpela man i mas i go sindaun long olgeta hap, na ol man i no ken kaikai prut bilong diwai em God i bin tambuim, em diwai bilong givim save long wanem samting i gutpela na wanem samting i nogut. (Stt. 1:26, 28; 2:16, 17) Bihain long God i wokim man long graun, man i gat wok long bihainim 2-pela narapela samting em God i bin kolim, na long dispela rot God bai inapim samting em i tingting pinis long kamapim. Wanem samting i mekim na ol dispela kontrak i kamap?

5, 6. (a) Olsem wanem Satan i traim long pasim God long kamapim samting em i tingting pinis long mekim? (b) Jehova i mekim wanem taim Satan i sutim tok long em long gaden Iden?

⁵ Satan i laik tru long pasim God long kamapim samting em i tingting pinis long mekim, olsem na em i kirapim pasin bikhet. Em i kirapim man long sakim tok na kalapim lo bilong God. Em i traim Iv, namba 1 meri, na i kirapim em long sakim lo bilong God long diwai bilong givim save long wanem samting i gutpela na wanem samting i nogut. (Stt. 3:1-5; Rev. 12:9) Taim Satan i mekim olsem, em i sutim tok olsem God i no gat rait long bosim ol samting Em i bin wokim. Bihain, Satan i kirapim ol gutpela wokman bilong God long tingim laik bilong ol yet tasol.—Jop 1:9-11; 2:4, 5.

⁶ Olsem wanem Jehova bai bekim tok em Satan i bin kamapim long gaden Iden? Sapos God i bagarapim ol bikhetlain, dispela bai pinisim pasin bikhet bilong ol. Tasol dispela bai pasim God long kamapim samting em i tokaut pinis long en. Olsem: Em i laik bai ol tumbuna pikinini bilong Adam na Iv i bihainim tok bilong Em na i go sindaun long olgeta hap bilong graun. God i bin wokim yumi na em i gat gutpela tingting, olsem na em i no hariap long pinisim laip bilong ol dispela bikhetlain, nogat. Em i mekim wanpela bikpela tok profet—tok promis bilong Iden—na dispela i makim olsem olgeta tok bilong em bai kamap tru.—Ritim Stat 3:15. *

7. Olsem God i kolim long tok promis bilong Iden, wanem samting bai painim snek na pikinini bilong en?

⁷ Taim Jehova i mekim tok promis long gaden Iden, em i kolim strafe bai painim snek na pikinini bilong en—dispela i makim Satan na olgeta man husat i stap long sait bilong Satan na sutim tok long wok bos bilong God. God i givim namba long pikinini bilong meri long heven, na dispela pikinini bai bagarapim Satan. Olsem na tok promis bilong gaden Iden i soim klia tru olsem  God bai pinisim man i kirapim pasin bikhet long gaden Iden wantaim olgeta hevi em i bin kamapim, na tu, dispela tok promis i tokaut long olsem wanem God bai mekim ol dispela samting.

8. Yumi kisim wanem save long meri na pikinini?

⁸ Pikinini bilong meri i makim husat? Dispela pikinini bai krungutim het bilong snek, olsem em bai “bagarapim” Satan, na Satan em i wanpela spirit, olsem na pikinini em i wanpela spirit. (Hib. 2:14) Dispela i makim olsem meri husat i karim dispela pikinini, em tu i spirit. Planti man i stap olsem pikinini bilong snek, tasol inap olsem 4 tausen yia bihain long Jehova i mekim tok promis long gaden Iden, ol man i no save long husat tru em i dispela narapela pikinini na husat tru em i meri. Insait long dispela haptaim, Jehova i mekim ol kontrak we i kamapim klia husat em i dispela pikinini, na ol dispela kontrak i helpim ol wokman bilong God long save olsem God bai yusim dispela pikinini long pinisim ol hevi em Satan i kamapim long ol lain man.

9. Kontrak namel long God na Abraham i bin kamap long wanem taim?

⁹ Inap olsem 2 tausen yia bihain long Jehova i kolim strafe bai painim Satan, em i tokim bilipman Abraham long lusim ples bilong em long Ur long Mesopotemia, na i go long graun bilong Kenan. (Apo. 7:2, 3) Jehova i tokim em: “Yu lusim graun bilong yu na ol brata bilong yu, na ol lain bilong papa bilong yu, na yu go long wanpela graun bai mi soim yu long en. Bai mi mekim ol lain tumbuna bilong yu i kamap bikpela lain tru. Na bai mi mekim gut long yu na mekim yu i gat biknem tru. Olsem na taim ol manmeri i laik mekim gutpela tok long ol arapela man, ol bai i tokim ol olsem, ‘God i ken mekim gut long yu, olsem em i bin mekim long Abram.’ Bai mi mekim gut long ol man i save mekim gutpela pasin long yu. Tasol bai mi yet mi bagarapim ol man i tok long bagarapim yu. Na long yu, bai mi mekim gut long olgeta lain manmeri bilong graun.” (Stt. 12:1-3) Dispela em namba 1 taim Baibel i kolim  kontrak namel long God na Abraham. Yumi no save long wanem taim stret Jehova i mekim dispela kontrak wantaim Abraham. Tasol yumi save olsem long 1943 B.C.E., taim Abraham i gat 75 krismas, em i lusim Haran na i go brukim wara Yufretis na i go long hapsait.

10. (a) Olsem wanem Abraham i soim olsem em i bilip strong long ol tok promis bilong God? (b) Wanem ol bikpela samting bai kamap long pikinini bilong meri?

¹⁰ Bihain, Jehova i kolim gen promis em i bin mekim long Abraham, na em i kolim sampela tok moa. (Stt. 13:15-17; 17:1-8, 16) Taim Abraham i soim olsem em i bilip strong long ol tok promis bilong God na i redi tru long givim pikinini bilong em olsem ofa, Jehova i mekim wanpela tok promis bilong strongim gen kontrak em i bin mekim wantaim Abraham. (Ritim Stat 22:15-18; Hibru 11:17, 18.) Bihain long Jehova i mekim kontrak wantaim Abraham, isi isi em i tokaut long ol bikpela samting bai kamap long pikinini bilong meri. Dispela pikinini bai kamap long lain tumbuna pikinini bilong Abraham, na planti lain bai stap olsem dispela pikinini, na dispela pikinini bai mekim wok king, na em bai bagarapim olgeta birua, na kamapim blesing long planti arapela manmeri.

11, 12. (a) Olsem wanem tok i stap long Buk Bilong God i soim olsem i gat bikpela truim long kontrak namel long God na Abraham? (b) Dispela kontrak bai helpim yumi olsem wanem?

¹¹ Kontrak namel long God na Abraham i bin kamap tru taim ol tumbuna pikinini bilong Abraham i kisim Graun Bilong Promis, tasol tok i stap long Buk Bilong God i soim olsem dispela kontrak i gat bikpela truim bilong en. (Gal. 4:22-25) Long bikpela truim, holi spirit i kirapim aposel Pol long tok olsem Krais em nambawan hap bilong pikinini bilong Abraham, na nambatu hap em lain 144,000 Kristen em God i makim ol long holi spirit. (Gal. 3:16, 29; Rev. 5:9, 10; 14:1, 4) Meri i kamapim dispela pikinini em “Jerusalem bilong antap”—em hap bilong oganaisesen bilong God long heven, na ol ensel i insait long en. (Gal. 4:26, 31) Long kontrak namel long God na Abraham, God i tok promis olsem pikinini bilong meri bai kamapim blesing long olgeta lain man.

¹² Kontrak namel long God na Abraham i stori long King na ol wanwok bilong em long Kingdom Bilong God, na dispela i soim klia olsem dispela Kingdom bai kamap long heven. (Hib. 6:13-18) Dispela kontrak bai pinis long wanem taim? Stat 17:7 i tok: “Dispela kontrak bai i stap oltaim oltaim.” Dispela kontrak bai stap i go inap long Kingdom Bilong Mesaia i bagarapim ol birua bilong God, na olgeta manmeri long graun i kisim blesing. (1 Kor. 15:23-26) Long dispela taim, ol manmeri husat i stap long graun, ol bai kisim blesing bilong oltaim oltaim. Kontrak namel long God na Abraham i soim olsem Jehova i tingting strong long inapim samting em i tingting pinis long mekim, olsem ol stretpela man i mas “kamap planti na i go sindaun long olgeta hap bilong graun”!—Stt. 1:28.

13, 14. Kontrak namel long God na Devit i givim wanem save long yumi long wok king bilong Mesaia?

¹³ Tok promis bilong Iden na kontrak namel long God na Abraham i kamapim klia wanpela bikpela samting, olsem: God i gat ol stretpela lo, na ol dispela lo i mekim na God i kamapim Kingdom Bilong Mesaia, na dispela Kingdom i soim olsem Jehova em i nambawan bos. (Sng. 89:14) Yu ting bihain gavman long han bilong Mesaia bai i gat pasin korapsen long en na God bai pinisim dispela gavman? God i mekim narapela kontrak we i soim klia olsem dispela samting i no inap tru long kamap.

¹⁴ Tingim tok promis em Jehova i bin mekim long King Devit bilong Israel long bipo long rot bilong kontrak namel long God na Devit. (Ritim 2 Samuel 7:12, 16.) Jehova i mekim dispela kontrak wantaim Devit taim Devit i stap king long Jerusalem, na em i tok promis olsem Mesaia bai kamap long lain tumbuna pikinini bilong Devit. (Luk 1:30-33) Long dispela rot, Jehova i tokaut long lain famili em pikinini bai kamap long en,  na em i tokaut olsem wanpela long lain bilong Devit bai “i gat rait long kisim” wok King long Kingdom Bilong Mesaia. (Ese. 21:25-27, NW) Long rot bilong Jisas, i olsem Devit i stap king oltaim oltaim. Dispela pikinini i kamap long lain bilong Devit bai “i stap oltaim” na wok king bilong em bai i stap “longtaim tru inap olsem san i stap.” (Sng. 89:34-37) Yes, wok king bilong Mesaia bai i no gat pasin korapsen long en, na em bai mekim ol gutpela wok we bai stap inap oltaim oltaim!

15-17. Olsem i stap long kontrak bilong kisim pris olsem Melkisedek, pikinini bilong meri bai mekim tu wanem narapela wok? Bilong wanem?

¹⁵ Kontrak namel long God na Abraham, na kontrak namel long God na Devit i kamapim klia olsem pikinini bilong meri bai mekim wok king na helpim olgeta lain man long kisim blesing, tasol em i mas mekim narapela wok tu. Ol i mas kamap fri long sin na insait long bikpela lain famili bilong Jehova long heven na graun, na long dispela rot ol bai kisim tru ol blesing. Olsem na dispela pikinini i mas mekim wok pris. God i opim rot long pikinini inap mekim wok pris—God i mekim kontrak bilong kisim pris olsem Melkisedek.

¹⁶ Long rot bilong King Devit, Jehova i kamapim klia olsem Em yet bai mekim kontrak wantaim Jisas. Dispela kontrak bai inapim 2-pela wok. Namba 1: Jisas bai “sindaun long han sut bilong [God]” i go inap long em i daunim ol birua bilong em. Namba 2: Jisas bai kamap “pris olsem Melkisedek.” (Ritim Song 110:1, 2, 4.) Bilong wanem Jisas bai kamap “pris olsem Melkisedek”? Long wanem, paslain yet long ol tumbuna pikinini bilong Abraham i kisim Graun Bilong Promis, Melkisedek i bin stap king bilong Salem, na tu, em i mekim wok olsem “pris bilong God Antap Tru.” (Hib. 7:1-3) Jehova yet i bin makim em long mekim ol dispela wok. Long Ol Skripsa Hibru, em tasol i bin mekim wok king na wok pris long seim taim. Na tu, i no gat narapela man paslain long em o bihain long em i mekim dispela 2-pela wok long seim taim, olsem na Baibel i tok “em i stap pris oltaim oltaim.”

¹⁷ Jehova i mekim kontrak wantaim Jisas na em yet i makim Jisas long mekim wok pris, olsem na Jisas bai “stap pris inap oltaim oltaim, wankain olsem Melkisedek.” (Hib. 5:4-6) Dispela i soim klia olsem Jehova i putim lo olsem em i mas yusim Kingdom Bilong Mesaia long kamapim samting we pastaim yet em i tingting pinis long mekim bilong helpim ol manmeri long graun.

  18, 19. (a) Ol kontrak yumi stori pinis long en i givim wanem save long yumi long Kingdom? (b) Yumi bai skelim wanem askim long neks stadi?

¹⁸ Taim yumi skelim ol kontrak yumi bin stori long en, dispela i givim sampela save long yumi long Kingdom Bilong Mesaia, na tu, ol dispela kontrak i sapotim tru wok bilong Kingdom. Tok promis bilong Iden i strongim tingting bilong Jehova long yusim pikinini bilong meri long kamapim samting em i tingting pinis long mekim long graun na long ol manmeri. Husat i stap olsem dispela pikinini? Dispela pikinini bai mekim wanem wok? Kontrak namel long God na Abraham i kamapim ol bikpela tok bilong bekim ol dispela askim.

¹⁹ Kontrak namel long God na Devit i tokaut klia moa long lain famili em nambawan hap bilong pikinini bai kamap long en, na tu, dispela kontrak i givim strong na namba long dispela pikinini long mekim wok king na bosim graun na bai Kingdom inap mekim ol gutpela wok we bai stap inap oltaim oltaim. Kontrak bilong kisim pris olsem Melkisedek i opim rot long dispela pikinini inap mekim wok pris. Jisas bai helpim ol lain man long kamap gutpela olgeta, na i gat sampela bai stap olsem ol wanwok bilong Jisas. God i makim ol arapela tu long mekim wok olsem ol king na ol pris. Ol bai kam long wanem hap? Stadi i kamap bihain long dispela bai stori long dispela samting.