1, 2. Se a te mea ka fakamalosi aka ei a ‵tou loto tali‵tonu me ka fakataunu eiloa ne te Malo a te fuafuaga a te Atua mō tino, kae kaia? (Ke onoono ki te ata i te kamataga.)

E PELĀ me ne Molimau a Ieova, e masani o fai‵pati tatou i te Malo o te Atua ko te faka‵leiga fua e tasi ki ‵tou fakalavelave katoa, kae ma‵nako tatou ke ‵saga mai a tino ki te munatonu tāua tenei mai te Tusi Tapu. E fakamafanafana malosi mai foki a te fakamoemoega telā e tuku mai ne te Malo ki a tatou. E pefea te ‵poko o ‵tou loto tali‵tonu me ka fakataunu eiloa ne te Malo a tena fuafuaga? E fakavae ki te ā te ‵mautakitaki o ‵tou fakatuanaki ki te Malo?—Epe. 11:1.

² A te Malo faka-Mesia se fakatokaga ne fai ne te Atua Malosi Katoatoa ke fakataunu a tena fuafuaga e uiga ki ana mea ne faite. A te saolotoga tonu o Ieova ke pule mai ko te fakavae ‵mautakitaki o te Malo. A vaega tāua o tena Malo—ko tena tupu, ana tupu lagolago, te koga e pule mai i ei—ko oti katoa ne talia mai lalo o te tulafono e auala i feagaiga, ko feagaiga io me ko fakatokaga mai lalo o te tulafono telā e aofia i ei te Atua io me ko tena Tama, ko Iesu Keliso. A te mafaufau ki feagaiga konei ka fakalasi aka i ei ‵tou malamalama i te auala ka fakataunu ei  te fuafuaga a te Atua kae fesoasoani mai ke lavea ne tatou a te tokagamalie o te fakatokaga tenei.—Faitau te Efeso 2:12.

3. Ne a mea ka suke‵suke tatou ki ei i te mataupu tenei mo te suā mataupu?

³ E fakasino atu te Tusi Tapu ki feagaiga tāua e ono kolā e tau atu ki te Malo faka-Mesia mai lalo i a Iesu Keliso. A feagaiga konei ko (1) te feagaiga ki a Apelaamo, (2) te feagaiga o te Tulafono, (3) te feagaiga ki a Tavita, (4) te feagaiga mō se faitaulaga pelā mo Mekisateko, (5) te feagaiga fou, kae ko te (6) te feagaiga o te Malo. Ke suke‵suke tatou ki te auala e tau atu ei a feagaiga takitasi ki te Malo mo te gasolo ki mua o te fakagaluegaga o te fuafuaga a te Atua mō te lalolagi mo tino.—Ke onoono ki te pokisi “ Te Auala ka Fakataunu ei ne te Atua a Tena Fuafuaga.”

4. E pelā mo pati i te Kenese, ne a fakatonuga ne tuku mai ne Ieova ki tino?

⁴ Mai tua o te fakatokaga o ‵tou paneta gali mo ‵nofo a tino i ei, ne tuku mai ne Ieova a fakatonuga e tolu ki tino: Ka faite ne ‵tou Atua te tagata ki tena fakatusa, e ‵tau mo tino o fakaoko atu te Palataiso ki te lalolagi kātoa kae faka‵fonu ki fanau amio‵tonu, mo tino e tapu ma ‵kai ki fuaga mai te lakau telā e iloa ei te ‵lei mo te masei. (Kene. 1:26, 28; 2:16, 17) Ko seai aka se isi mea e manakogina. I te otiga ne faite te tagata, a te mea fua telā e manakogina ke fakataunu te fuafuaga a te Atua ko te faka‵logo ki nisi fakatonuga e lua. Kae ne sae aka pefea a te manakoga ke fai a feagaiga?

5, 6. (a) Se a te auala ne taumafai ei a Satani o fakamavale te fuafuaga a te Atua? (e) Ne saga atu pefea a Ieova ki te ‵teke mai o Satani i Etena?

⁵ I se taumafaiga masei ke fakamavale te fuafuaga a te Atua, ne kamata ne Satani te Tiapolo se ‵tekeatuga. Ne fai ne ia mai te saga tonu atu ki te fakatonuga telā e manakogina i ei te fakalogo o te tagata—se fakatonuga telā e faigofie o fakamalosi aka ne ia. Ne fakaosooso ne Satani te fafine muamua, ko Eva, ke sē fakalogo ki te fakatonuga ke tapu ma ‵kai ki te fuaga o te lakau telā e iloa ei te ‵lei mo te masei. (Kene. 3:1-5; Faka. 12:9) I te faiga tenā, ko ‵teke atu a Satani ki te saolotoga o te Atua o pule atu ki Ana mea ne faite. Fakamuli ifo, ne ‵losi foki ne Satani a kilokiloga kaimanako ki tavini a‵lofa fakamaoni o te Atua.—Iopu 1:9-11; 2:4, 5.

⁶ Ne saga atu pefea a Ieova ki te ‵teke mai o Satani i Etena? E mautinoa me kafai e fakaseai a tino ‵teke, ko gata atu ei te ‵tekeatuga. Kae i te suā feitu, a te fuafuaga a te Atua ke faka‵fonu te lalolagi ki tamaliki faka‵logo a Atamu mo Eva ko sē taunu. Tela la, i lō te fakaseai atu o tino ‵teke i te taimi eiloa tenā, ne fai ne te Mafuaga poto se valoaga e agai atu ei ki te ‵tekeatuga tenā—te tautoga i Etena—ke fakamautinoa aka me e taunu eiloa ana pati katoa e fai.—Faitau te Kenese 3:15.

7. Se a te mea e fakatalitonu mai i te tautoga ne fai i Etena e uiga ki te gata mo tena fanau?

⁷ E auala i te tautoga ne fai i Etena, ne fakaoko atu ne Ieova te fakamasinoga ki te gata mo tena fanau kolā e sui mai ne Satani te Tiapolo mo tino katoa kolā e ‵kau ki a ia i te kinauga e uiga ki te pulega a te Atua. Ne tuku atu ne te Atua tonu ki te fanau a te fafine a te malosi ke fakaseai a Satani. Tela la, a te tautoga ne fai i Etena e se faka‵mafa mai fua i ei me i te tino ne māfua mai i ei te ‵tekeatuga i te fatoaga o Etena mo ikuga ma‵sei katoa o tena mea ne fai ka fakaseai atu, kae e fakaasi mai foki i ei te auala ka fakataunu ei a te mea tenei.

8. Ne a mea e mafai o tali‵tonu tatou ki ei e uiga ki te fafine mo tena fanau?

⁸ Ko oi la te fanau a te fafine? Ona ko te fanau e ‵tau o tuki palapala ne ia te ulu o te  gata, telā ko te “fakaseai atu” o te tino faka-te-agaga ko Satani te Tiapolo, e ‵tau o fai te fanau mo fai se tino faka-te-agaga. (Epe. 2:14) Tela la, a te fafine telā e fanau mai ne ia te fanau e ‵tau foki se fafine faka-te-agaga. Toeitiiti kae kātoa te 4,000 tausaga mai tua o te tautoga ne fai ne Ieova i Etena, ne tumau eiloa o fai te fanau mo te fafine pelā me se mea ‵funa faitalia te gasolo aka o tokouke te fanau a te gata. I te taimi tenā, ne fai ne Ieova a nāi feagaiga e fakasino atu ki te fanau kae fakatalitonu atu ki Ana tavini me i te fanau ko te auala ka fakaseai ei ne te Atua a fakalavelave kolā ne aumai ne Satani ki luga i te kaukāiga o tino.

9. Se a te feagaiga ki a Apelaamo, kae ne kamata anafea o fakagalue?

⁹ I se lua afe tausaga mai tua o te fakaokoatuga o te fakasalaga ki a Satani, ne fakatonu atu a Ieova ki te toeaina matua ko Apelaamo ke tiakina a tena fale i Ulo i Mesopotamia kae fano ki te fenua o Kanana. (Galu. 7:2, 3) Ne fai atu a Ieova ki tou tagata: “Tiaki tou fenua, ou kāiga mo te fale o tou tamana, kae fano ki te fenua tenei ka fakasino atu ne au. Ka fakatokouke ne au tou gafa kae ka fai mo Malo lasi. Ka fakamanuia ne au a koe, ka ko tou igoa ka takutakua, kae ka manuia a tino i a koe. Ka fakamanuia ne au a latou kolā e fakamanuia atu ki a koe. Kae fakamalaia ne au a latou kolā e fakamalaia atu ki a koe. Ka fakamanuia ne au a malo e auala i a koe.” (Kene. 12:1-3) Tenei eiloa te taimi muamua ne tusi ei ki lalo a te tala e uiga ki te feagaiga ki a Apelaamo—te feagaiga telā ne fai ne Ieova te Atua mo Apelaamo. E se iloa ne tatou a te taimi tonu ne fai ei ne Ieova a te feagaiga ki a Apelaamo. E ui i ei, ne kamata o fakagalue a te feagaiga tenā i te 1943 T.L.M., i te taimi ne tiakina ei ne Apelaamo telā ko 75 tausaga te matua a Halana kae fano ki te suā feitu o te Vaitafe ko te Eufilate.

10. (a) Ne fakaasi mai pefea ne Apelaamo a te ‵mautakitaki o tena fakatuanaki ki tautoga a te Atua? (e) Ne a fakamatalaga ne fakaasi malielie atu ne Ieova e uiga ki te fanau a te fafine?

 ¹⁰ Ne toe fakafokifoki atu ne Ieova a tena tautoga ki a Apelaamo i se fia o taimi, kae fakaopoopo atu ki ei a fakamatalaga. (Kene. 13:15-17; 17:1-8, 16) Kae i te taimi ne fakaasi atu ei ne Apelaamo te ‵mautakitaki o tena fakatuanaki ki tautoga a te Atua mai te fakaasiatuga o tena loto fiafia o ofo atu tena tama e tokotasi, ne toe fakamalosi aka ne Ieova a te feagaiga e auala i se tautoga mautinoa. (Faitau te Kenese 22:15-18; Epelu 11:17, 18.) I te otiga ne kamata o fakagalue te feagaiga ki a Apelaamo, ne fakaasi malielie atu ne Ieova a fakamatalaga e uiga ki te fanau a te fafine. Ka vau te fanau mai te gafa o Apelaamo, ka tokouke latou, ka isi se galuega fakatupu, ka fakaseai ne ia a fili katoa, kae ka fai mo fakamanuiaga ki tino katoa.

11, 12. Se a te auala e fakaasi mai ei i te Tusi Tapu i te feagaiga ki a Apelaamo e isi sena fakataunuga lasi, kae se a te uiga o te mea tenā ki a tatou?

¹¹ E ui eiloa e isi se fakataunuga tonu o te feagaiga ki a Apelaamo mō ana fanau i te taimi ne ‵nofo ei latou i te Fenua o te Folafolaga, e fai mai te Tusi Tapu me i fakanofoga o te feagaiga tenā e fakaasi mai i ei me e isi foki se fakataunuga faka-te-agaga. (Kala. 4:22-25) I te fakataunuga lasi tenei, ne fakamatala mai ne te apositolo ko Paulo i te vaega muamua o te fanau a Apelaamo ko Keliso kae ko te lua o vaega e fakasino atu ki te toko 144,000 Kelisiano kolā ne fakaekegina ki te agaga tapu. (Kala. 3:16, 29; Faka. 5:9, 10; 14:1, 4) A te fafine telā ne māfua mai i ei te fanau ko te “Ielusalema i luga”—te vaega faka-te-lagi o te fakapotopotoga saukātoa a te Atua, telā e aofia i ei a tino faka-te-agaga. (Kala. 4:26, 31) E pelā mo te tautoga e uiga ki te feagaiga ki a Apelaamo, ka fai te fanau a te fafine mo fakamanuiaga ki tino katoa.

¹² A te feagaiga ki a Apelaamo e fakasino atu ki te Tupu mo ana pule lagolago i te Malo o te Atua, kae fakatoka i ei se fakavae mai lalo o te tulafono mō te Malo i te lagi. (Epe. 6:13-18) Ka pefea te leva e fakagalue ei te feagaiga tenei? E fai mai te Kenese 17:7 me se “feagaiga ki te se gata mai.” Ka tumau eiloa i te fakagalue ke oko ki te taimi e fakaseai ei ne te Malo faka-Mesia a fili o te Atua kae fakamanuia a kāiga katoa i te lalolagi. (1 Koli. 15:23-26) A te tonuga loa, ka maua ne latou kolā e ola i te lalolagi i te taimi tenā a mea aoga i se auala telā e tumau ki te se-gata-mai. E fakaasi mai i te feagaiga a te Atua ki a Apelaamo me i a Ieova e manako o fakataunu tena fuafuaga ke faka‵fonu “te lalolagi” ki tino amiotonu!—Kene. 1:28.

13, 14. Se a te mea e fakatalitonu mai ne te feagaiga ki a Tavita e uiga ki te pulega a te Mesia?

¹³ Ne fakamautinoa aka ne te tautoga i Etena mo te feagaiga ki a Apelaamo i te pulega a Ieova e auala i te Malo faka-Mesia e fakavae tonu ki tulaga amio‵tonu o te Atua. (Sala. 89:14) E mata, ka mafai o sē fakamaoni te malo faka-Mesia kae ‵tau o fakaseai atu? E fakatalitonu mai i te suā feagaiga mai lalo o te tulafono me ka sē tupu lele a te mea tenei.

¹⁴ Ke mafaufau ki te mea ne tauto atu Ieova ki te tupu o Isalaelu ko Tavita e auala i te feagaiga ki a Tavita. (Faitau te 2 Samuelu 7:12, 16.) Ne fai ne Ieova te feagaiga tenei ki a Tavita i te taimi ne pule ei Tavita i Ielusalema, mai te tauto atu i te Mesia ka tupu mai i a ia. (Luka 1:30-33) Tela la, ne fakatapulā ne Ieova a te vauga o te gafa o te fanau kae fakatalitonu mai me ka maua ne se sui o Tavita telā “ko oti ne fili” aka a te nofogaaliki o te Malo faka-Mesia. (Eseki.  21:25-27) E auala i a Iesu, “ka tumau” eiloa te pulega fakatupu o Tavita. E tonu, te fanau a Tavita ka “pelā eiloa mo te tumau o te mainaga o te la.” (Sala. 89:34-37) Ao, ka sē mafai lele o sē fakamaoni te pulega faka-Mesia, kae ko ana mea e fai ka tumau ki te se-gata-mai!

15-17. E ‵tusa mo te feagaiga mō se faitaulaga pelā mo Mekisateko, se a te suā tulaga ka tavini i ei a te fanau, kae kaia?

¹⁵ E tigā eiloa e fakatalitonu mai i te feagaiga ki a Apelaamo mo te feagaiga ki a Tavita me e isi se galuega fakatupu a te fanau a te fafine, e se lava fua i te galuega tenā ke aumai i ei a fakamanuiaga ki tino o atufenua katoa. Ko te mea ke maua tonu ne latou a fakamanuiaga, e ‵tau o fakasaoloto latou mai te lotou tulaga agasala kae aumai ki loto i te kāiga o Ieova i te lagi mo te lalolagi. Ke fakataunu a te mea tenei, e manakogina ke galue foki a te fanau e pelā me se faitaulaga. Ne fakatoka ne te Mafuaga poto a te mea tenei e auala i te suā fakatokaga mai lalo i te tulafono, te feagaiga mō se faitaulaga pelā mo Mekisateko.

¹⁶ Ne fakaasi mai ne Ieova e auala i te tupu ko Tavita me ka fai ne Ia se feagaiga totino mo Iesu mō pogai tāua e lua: ke fakasagasaga a ia i te “feitu fakaatamai” o te Atua ke oko ki te taimi e pule atu ei a ia ki ana fili kae ke fai mo “faitaulaga ki te se-gata-mai” e pelā mo “Mekisateko.” (Faitau te Salamo 110:1, 2, 4.) Kaia e fai ei pelā mo “Mekisateko”? Me i se taimi leva mai mua o ‵nofo a fanau a Apelaamo i te Fenua o te Folafolaga, a te tupu o Salema ko Mekisateko, ne tavini pelā me se “faitaulaga a te Atua Tafasili i te Maluga.” (Epe. 7:1-3) Ne filifili eiloa a ia ne Ieova ke fai penā. Ko ia fua tokotasi ne taku mai i Tusitusiga Faka-Epelu me ne tavini e pelā me se tupu mo se faitaulaga. E se gata i ei, ona la me seai se fakamatalaga me ne sui ne ia se tino io me ne sui a ia ne se tino, e mafai o taku a ia “se faitaulaga ki te se-gata-mai.”

¹⁷ Ne filifili eiloa a Iesu e pelā me se faitaulaga e auala i te feagaiga totino tenei ne fai ne Ieova mo ia, kae ka fai a ia mo fai se “faitaulaga ki te se-gata-mai e pelā eiloa mo Mekisateko.” (Epe. 5:4-6) E fakaasi manino mai i te mea tenei me ka fakaaoga ne Ieova a te Malo faka-Mesia ke fakataunu a tena fuafuaga muamua e uiga ki tino i te lalolagi.

18, 19. (a) Ne a mea e fakaasi mai i feagaiga kolā ne sau‵tala tatou ki ei e uiga ki te Malo? (e) Se a te fesili koi ‵toe ke sau‵tala ki ei?

¹⁸ Kafai e ‵kilo tatou ki feagaiga kolā ne sau‵tala tatou ki ei, e matea ne tatou te auala e tau atu ei ki te Malo faka-Mesia mo te auala e fakavae katoatoa ei te fakatokaga o te Malo ki feagaiga mai lalo o te tulafono. E fai ne te tautoga ne fai i Etena ke fakataunu ne Ieova a tena fuafuaga e uiga ki te lalolagi mo tino e auala i te fanau a te fafine. Ko oi la te fanau, kae se a tena galuega? E tuku mai i te feagaiga ki a Apelaamo a te ata kātoa o te mea tenei.

¹⁹ E fakatapulā foki i te feagaiga ki a Tavita a te vauga o te gafa o te vaega muamua o te fanau kae tuku atu ki a ia te saolotoga o pule ki luga i te lalolagi ko te mea ke tumau ki te se-gata-mai a mea kolā ka fakataunu ne te Malo. E fai a te feagaiga mō se faitaulaga pelā mo Mekisateko mo fai se fakavae e tavini ei te fanau e pelā me se faitaulaga. Tela la, e se galue tokotasi a Iesu i te avakaga o tino ki te tulaga ‵lei katoatoa. E isi foki ne nisi tino kolā ne fakaekegina ke tavini pelā me ne tupu mo faitaulaga. Ka o‵mai latou mai fea? Ka sau‵tala tatou ki te mea tenā i te suā mataupu.