TU YARI na fesi, mi nanga mi zendeling patna Evelyn Trabert klari a di fu fo klas fu a Waktitoren Bijbelskoro Gilead. Na a ten dati a skoro ben de krosibei fu Ithaca, New York. Ma fosi mi go doro fu fruteri fa den 29 yari leki zendeling ben de, meki mi taigi yu fu san ede mi bosroiti fu bigin nanga a wroko dati.

Mi papa nanga mi mama, John nanga Eva Olson, ben e libi na ini Spokane, na Washington, Amerkankondre. Mi gebore na ini 1923. Den ben de fu a Luther Kerki, ma fu di den ben e bribi na ini wan Gado fu lobi, meki den no ben man agri nanga a kerkileri di e taki fu helfaya (1 Yoh. 4:8). Mi papa ben e wroko na wan presi pe den e baka brede. Wan neti wan fu den wrokoman drape taigi en taki Bijbel no e leri taki hel na wan presi pe sma e pina. Syatu baka dati mi papa nanga mama bigin studeri Bijbel nanga Yehovah Kotoigi. Den leri san Bijbel e taki trutru fu san e pasa nanga wan sma baka te a dede.

Mi ben abi soso neigi yari, ma mi sabi ete taki mi ben e arki fa mi papa nanga mama ben e taki fayafaya fu den nyun sani di den ben e leri fu Bijbel. Di den kon leri sabi a nen fu a tru Gado Yehovah èn di den leri taki Gado a no dri sma na ini  wán, den kon de nanga moro faya srefi. Mi srefi ben kon de fayafaya tu fu leri den moi sani disi fu Bijbel èn mi kon si taki te wan sma ’sabi san tru, dan dati e meki a kon fri’ (Yoh. 8:32). Dati meki mi ben lobi studeri Gado Wortu. Noiti a ben soi gi mi. Aladi mi ben e syen, toku mi ben e go preiki nanga mi papa nanga mama. Den teki dopu na ini 1934. Na ini 1939, di mi ben abi 16 yari, mi tron wan dopu futuboi fu Yehovah tu.

Na ini yuli 1940, mi papa nanga mama seri na oso fu den èn wi ala dri bigin a furuten diniwroko leki pionier na ini Coeur d’Alene, na Idaho. Wi yuru wan oso na tapusei fu wan presi pe sma ben e kon meki den wagi. Na oso fu wi ben de wan konmakandra presi tu. Na a ten dati, wan tu gemeente nomo ben abi wan Kownukondre zaal. Dati meki den ben e kon makandra na ini sma oso noso na ini kamra di den ben e yuru.

Na ini 1941, mi nanga mi papa nanga mama go na a kongres na ini Sint Louis, Missouri. Sonde ben de „Kinderendag” (A dei fu den pikin) èn ala den pikin na mindri 5 nanga 18 yari ben e sidon na fesi a podium. Na ini a lezing di Brada Joseph F. Rutherford hori, a taigi wi leki yonguwan: „Un pikin . . . di wani gi yesi na Gado nanga a Kownu di a poti, grantangi opo tanapu!” Wi alamala opo tanapu. Baka dati Brada Rutherford taki: „Luku, moro leki 15.000 nyun kotoigi gi a Kownukondre!” A sani dati yepi mi fu teki a bosroiti fu du a pionierwroko mi heri libi langa.

Wan tu mun baka a kongres fu Sint Louis, na osofamiri fu wi froisi go na a zuidsei fu Kalifornia. Drape, na ini a foto Oxnard, wi kisi a grani fu opo wan gemeente. Wi ben libi na ini wan wagi di ben de leki wan oso. Wán bedi nomo ben de na ini. Ibri neti mi ben meki mi bedi na tapu a nyanyan-tafra fu wi. Disi ben de wan heri tra sani leki san mi ben gwenti di mi ben abi mi eigi sribikamra!

Leti fosi wi doro na Kalifornia, a legre fu Yapan trowe bom na tapu Pearl Harbor na Hawaii tapu 7 december 1941. A dei na en baka Amerkankondre go na ini a Di Fu Tu Grontapufeti tu. Lanti ben taigi sma fu kiri ala faya na neti èn na dati wi ben e du tu. Efu ala sani ben dungru, dan den boto fu Yapan di ben e waka na ondro a watra na fesi a syoro fu Kalifornia, no ben man si pe den ben musu sutu bom go.

Wan tu mun baka dati, na ini september 1942, wi go na a Theocratische Nieuwe-Wereldcongres (Theokrasia nyun grontapu Kongres) na Cleveland, Ohio. Drape wi arki fa Brada Nathan H. Knorr hori a lezing di nen „Freide man tan fu ala ten?” Brada Knorr taki fu Openbaring kapitel 17 pe wi e leisi fu wan „ogri meti”. Na ogri meti disi „ben de kaba, ma a no de moro èn toku a de fu opo komoto na ini a dipi peti di no abi gron” (Openb. 17:8, 11). Brada Knorr sori taki „na ogri meti” ben de a Volkenbond di ben de teleki 1939. Soleki fa Bijbel sori, dan wan tra sani ben o kon na ini a presi fu a Volkenbond èn freide ben o de wan pisi ten. Na dati pasa tu na ini 1945 di a Di Fu Tu Grontapufeti kaba. Baka dati na „ogri meti” kon baka leki den Verenigde Naties. Na a ten dati, Yehovah Kotoigi bigin preiki na moro presi na grontapu èn na so fasi moro sma kon na ini a tru anbegi.

A profeititori dati yepi mi fu kon sabi san o pasa na ini a ten di e kon. Di den meki bekènti taki a Gileadskoro ben o bigin a yari na en baka, mi ben  sabi taki mi ben wani tron wan zendeling. Na ini 1943, mi kisi a wroko fu go pionier na ini Portland, na Oregon. Na a ten dati, wi ben e gebroiki wan gramofon fu drai lezing te wi ben e tanapu na sma mofodoro. Baka dati wi ben e gi den sma disi buku di ben e taki fu Gado Kownukondre. A heri yari dati mi tan denki a zendelingwroko.

Na ini 1944, mi ben breiti fu kisi wan kari fu go na a Gileadskoro nanga mi mati Evelyn Trabert. Feifi mun langa, den leriman fu a skoro sori wi taki a kan de wan prisiri sani fu studeri Bijbel. A sakafasi fu den naki wi ati. Son leisi te wi ben e nyan, den brada dati ben e yepi fu prati a nyanyan. Tapu 22 yanuari 1945 wi klari a skoro.

Den seni mi nanga Evelyn, makandra nanga Leo nanga Esther Mahan, go na El Salvador. Wi doro drape na ini yuni 1946. Wi kon si taki furu wroko ben de fu du drape, iya, ’a nyanyan ben lepi kaba fu koti’ (Yoh. 4:35). A sani di mi fruteri na a bigin e sori fa den kerki fesiman ben de nanga bigi atibron. Wan wiki na fesi, wi ben hori wi fosi kring konmakandra na Santa Ana. Na ala sei wi ben e meki bekènti taki wan lezing ben o hori èn wi ben e prisiri srefisrefi di sowan 500 sma kon arki. Na presi fu meki den kerki fesiman frede wi so taki wi gowe libi a foto, wi bosroiti fu tan drape fu yepi reti-ati sma. Aladi den kerki fesiman warskow sma fu no leisi Bijbel èn aladi wan tu sma nomo ben man bai den eigi Bijbel, toku furu fu den ben wani sabi moro. Den ben breiti fu si a muiti di wi ben e du fu leri taki Spanyorotongo so taki wi ben kan leri den moro fu a tru Gado Yehovah èn fu a moi pramisi fu en taki grontapu o tron wan paradijs baka.

Rosa Ascencio ben de wan fu den fosi sma di mi studeri Bijbel nanga en. Baka di a bigin studeri, a prati fu a man di ben e libi nanga en. Baka dati a man bigin studeri Bijbel tu. En nanga Rosa trow, den teki dopu èn baka dati den tron fayafaya Kotoigi fu Yehovah. Rosa ben de a fosi pionier fu Santa Ana.

Rosa ben abi wan pikin wenkri. Te a ben e go na ini a preikiwroko, dan a ben e tapu a wenkri fu en fu di a ben abi a frutrow taki Yehovah ben o sorgu gi en. Te a ben e komoto na a preikiwroko baka wan tu yuru èn a ben opo a wenkri, dan furu sma ben de drape fu kon bai sani. Na so Rosa ben man si taki Mateyus 6:33 tru. A tan dini Yehovah teleki a dede.

Wan leisi, wan priester go na wan man di ben yuru wan oso gi siksi fu wi di ben de zendeling. A warskow en taki efu a ben o tan yuru na oso gi wi, dan a ben o yagi en nanga en wefi puru na ini a kerki. A man di ben abi na oso ben de wan gudu bisnisman èn a ben e fuga kaba nanga a fasi fa den kerki fesiman ben e tyari densrefi. Dati meki a no du san a priester taki. A taigi a priester srefi taki a no ben o span efu den yagi en puru na ini a kerki. Baka dati a taigi wi taki wi ben mag tan drape solanga wi wani.

Na ini a mamafoto San Salvador, wan zendeling ben e studeri Bijbel nanga a wefi fu wan koniman di ben sabi meki oso. A ben nen Baltasar Perla. A bun-ati man dati lasi bribi na ini Gado baka di a si fa kerki fesiman e hoigri. Di a ten doro fu bow wan bijkantoro, Baltasar di no ben de wan Kotoigi ete, aksi den fu yepi den nanga a bowtekening èn fu yepi den bow a bijkantoro sondro fu kisi pai gi dati.

Di Baltasar kisi na okasi fu de nanga a pipel fu Yehovah na a bow-wroko, a kon si krin taki a feni a tru bribi. A teki dopu tapu 22 yuli 1955 èn syatu baka dati en wefi Paulina teki dopu tu. Ala tu pikin fu den e dini Yehovah fayafaya. En boi di nen Baltasar tu, e dini na Brooklyn Betel 49 yari kaba. Drape a e horibaka gi a preikiwroko na heri grontapu, di e go na fesi dei fu dei. Now a e dini na ini a Bijkantoro Komte fu Amerkankondre.

Di wi bigin hori kongres na ini San Salvador, Brada Perla yepi wi fu feni wan bigi sporthal. Na a bigin, wi no ben gebroiki ala den sturu. Ma fu di Yehovah blesi wi, meki ibri yari a grupu fu wi ben e kon moro bigi teleki wi furu a heri sporthal. Te fu kaba presi no ben de srefi moro. Na den prisiri konmakandra disi mi ben man si den sma di mi ben studeri Bijbel nanga den. Yu kan frustan fa mi ben e firi te den sma disi ben e sori mi den Bijbelstudie fu den di teki dopu na den konmakandra dati.

Na wan fu den kongres, wan brada kon na mi, dan a taigi mi taki a musu fruteri mi wan sani. Mi no ben sabi suma na en èn mi ben aksi misrefi san a ben abi fu taki. A taki: „Mi ben de wan fu den boi di ben trowe ston na yu tapu na Santa Ana.” Now wi ala tu ben e dini Yehovah. Mi ben e prisiri srefisrefi. A sani di a brada taigi mi a dei dati, sori mi krin taki a furuten diniwroko na a moro moi wroko di wan sma kan du.

Sowan 29 yari langa mi du a zendelingwroko na El Salvador. Fosi, mi ben de na ini a foto Santa Ana, dan mi go na Sonsonate, baka dati na Santa Tecla èn te fu kaba na San Salvador. Na ini 1975, mi bosroiti fu tapu nanga a zendelingwroko. Mi begi furu fu a tori dati fosi mi bosroiti fu du dati.  Fu di mi papa nanga mama di ben e tan dini Yehovah ben e kon owru, meki mi drai go baka na Spokane fu go yepi den.

Baka di mi papa dede na ini 1979, mi sorgu gi mi mama di ben e go na baka dei fu dei èn di no ben man yepi ensrefi moro. Aiti yari baka dati, a dede di a ben abi 94 yari. A ten dati ben muilek gi mi èn mi ben firi swaki fu di mi ben weri srefisrefi. Fu di a ben hebi gi mi, meki mi kisi wan siki di den e kari gordelroos. A siki disi gi mi furu skin-ati. Ma fu di mi begi èn fu di Yehovah horibaka gi mi na wan lobi-ati fasi, meki mi ben man horidoro. Yehovah taki: ’Awinsi yu ede-wiwiri kon weti, mi o du wan sani fu horibaka gi yu èn fu tyari yu, so taki yu kan kisi frulusu.’—Yes. 46:4.

Na ini 1990, mi froisi go na Omak, na ini Washington. Drape mi go dini na ini wan Spanyorotongo gemeente èn mi kisi a firi baka taki sma abi mi fanowdu. Furu Bijbelstudenti fu mi teki dopu. Na ini november 2007, mi no ben man sorgu moro gi na oso fu mi na ini Omak. Dati meki mi froisi go na wan moro pikin oso krosibei fu a foto Chelan, na ini Washington. A Spanyorotongo gemeente drape e sorgu bun gi mi èn mi breiti nanga dati. Fu di mi na a wan-enkri owru Kotoigi drape, meki den brada nanga sisa e si mi leki den granmama.

Fu man du moro na ini a diniwroko ’sondro taki sani puru mi prakseri’, mi teki a bosroiti fu no trow èn fu no abi mi eigi osofamiri. Toku mi ben man yepi furu sma fu tron anbegiman fu Yehovah èn mi e si den leki mi pikin. Mi e taki na misrefi taki nownowde mi no man abi ala san mi wani (1 Kor. 7:34, 35). Sobun, a moro prenspari sani na ini mi libi na taki mi e du ala san mi man fu dini Yehovah nanga mi heri ati. Na ini a nyun grontapu, nofo ten o de fu du ala sortu prisiri sani. A tekst di mi lobi na Psalm 145:16 di e gi wi a dyaranti taki Yehovah o „gi ala libisani san den e angri fu kisi”.

Now mi abi 91 yari èn mi gosontu ete. Sobun, mi kan tan pionier. A pionierwroko yepi mi fu tan firi yongu èn mi sabi taki mi e du wan bun sani nanga mi libi. Di mi doro na El Salvador, a preikiwroko no ben bigin so langa ete. Aladi Satan e tan gens a wroko, toku yu abi now moro leki 39.000 preikiman na ini a kondre. A sani disi tranga a bribi fu mi trutru. A de krin taki a santa yeye fu Yehovah e tan horibaka gi a muiti di a pipel fu en e du.