1. Ki pwennvi Zeova lo travay e ki sa i pous li pour fer?

ZEOVA i en travayer ki pran plezir dan sa ki i fer. (Ps. 135:6; Zan 5:17) Pour ki bann imen ek lanz i annan sa menm lazwa ek satisfaksyon ki li, Zeova i donn zot bann travay enteresan e satisfezan pour fer. Par egzanp, i ti les son premye Garson donn li lanmen fer Son travay kreasyon. (Lir Kolosyen 1:15, 16.) Dapre Labib, Zezi ti akote son Papa dan lesyel pe travay konman “en zouvriye abil” avan i ti vin lo later.—Prov. 8:30.

2. Kwa ki montre ki bann lanz in touzour annan bann travay enportan e satisfezan pour fer?

² Depi konmansman Labib ziska son lafen, nou kapab trouv bokou legzanp ki montre ki Zeova in touzour donn son bann garson spirityel travay pour fer. Par egzanp, apre ki Adan ek Ev ti fer pese e ganny pouse dan Paradi kot zot ti reste, Bondye “ti met bann seriben ver les zarden Edenn e en lepe dife ki ti pe kontinyen tournen pour bar sa semen ki anmenn ver pye lavi.” (Zen. 3:24) Revelasyon 22:6 i fer vwar osi ki Zeova ti “anvoy son lanz pour montre son bann serviter sa ki devre arive byento.”

3. Ler Zezi ti lo later, ki mannyer i ti swiv legzanp son Papa?

³ Kan Zezi ti lo later konman en imen parfe, i ti kontan pour akonplir travay ki Zeova ti’n donn li pour fer. Pour swiv legzanp son Papa, Zezi ti osi donn son bann disip bann travay enportan pour fer. Vi ki Zezi ti oule ki zot eksite pour fer sa travay, i ti dir: “An verite, an verite, mon pe dir zot, sa ki krwar mwan, i ava fer bann menm kalite travay ki mon’n fer, e menm i pou fer travay pli enportan, akoz mon pe al kot mon Papa.” (Zan 14:12) Pour montre ki i ti irzan pour fer sa bann travay, Zezi ti eksplike: “Nou devre fer louvraz sa enn ki’n anvoy mwan, letan i ankor lizour, aswar pe byento arive, ler personn pa pou kapab travay.”—Zan 9:4.

4-6. (a) Akoz nou devret apresye ki Moiz ek Noe ti akonplir travay ki Zeova ti donn zot? (b) Ki i annan an komen avek tou travay ki Bondye i donn imen pour fer?

⁴ Menm avan ki Zezi ti vin lo later, Zeova ti donn imen bann travay satisfezan pour fer. Kantmenm Adan ek Ev pa ti reisi akonpli sa travay ki zot ti gannyen pour fer, lezot imen ti fer egzakteman sa ki Bondye ti’n demann zot pour fer. (Zen. 1:28) Noe ti ganny bann lenstriksyon spesifik lo ki mannyer pour konstri en lars pour sov son lavi ek lavi son fanmir. I ti fer egzakteman sa ki Zeova ti demann li. Granmersi Noe, sansan nou pa ti pou la ozordi!—Zen. 6:14-16, 22; 2 Pyer 2:5.

⁵ Moiz ti swiv egzakteman bann lenstriksyon spesifik ki Zeova ti donn li pour konstri tabernak e organiz bann ki ti pou servi konman pret. (Egz. 39:32; 40:12-16) Ozordi osi nou benefisye avek fidelite Moiz pour akonpli sa travay. Ki mannyer? Zapot Pol ti eksplike ki sa bann laspe dan Lalwa ti reprezant “bann bon keksoz ki pe vini.”—Ebr. 9:1-5, 9; 10:1.

⁶ Tanzantan Bondye i donn son bann serviter diferan travay pour fer dapre lafason ki son plan pe ganny akonplir. Kantmenm sa, travay ki zot in gannyen pour fer i touzour onor Zeova e benefisye bann imen. Sa i aplik pour bann keksoz ki Zezi ti akonpli dan lesyel e ler i ti lo later. (Zan 4:34; 17:4) Pareyman, sa travay ki nou’n gannyen ozordi i onor Zeova. (Mat. 5:16; lir 1 Korentyen 15:58.) Akoz nou kapab dir sa?

7, 8. (a) Dekrir travay ki bann Kretyen i annan sa privilez pour fer denozour. (b) Ki mannyer nou devret azir anver gidans Zeova?

⁷ Ou pou dakor ki i etonan ki Zeova in envit bann imen enparfe pour ganny loner konman bann dimoun ki travay avek li. (2 Kor. 6:1) Bann dimoun ki partisip dan konstriksyon Lasal lasanble, Lasal Rwayonm ek bann biro brans pe pran par dan en progranm konstriksyon parey Moiz ek Noe. Ki swa ou pe travay pour renovasyon en Lasal Rwayonm oubyen pour konstri nou biro prensipal Temwen Zeova, Warwick, New York, apresye ou privilez pour servi dan sa fason. (Vwar portre lo paz 23.) I en servis sakre. Me laplipar ditan, bann Kretyen i ganny ankouraze pour partisip dan en travay konstriksyon spirityel. Sa i osi ganny fer pour onor Zeova e anmenn byenfe pour bann imen obeisan. (Akt 13:47-49) Nou ganny bann bon gidans atraver lorganizasyon Bondye lo ki mannyer pour fer sa travay pli byen. Petet par ler sa i vedir ki nou pou ganny en nouvo servis dan nou travay pour Zeova.

 ⁸ Bann serviter fidel Zeova in touzour pare pour soumet avek son gidans. (Lir Ebre 13:7, 17.) Petet o konmansman nou pa vreman konpran akoz nou ganny demande pour fer en travay dan en serten fason. Me, nou konn tre byen bann byenfe ki nou gannyen ler nou aksepte bann azisteman ki Zeova i vwar apropriye pour fer.

9. Ki legzanp bann ansyen i kite pour kongregasyon an rapor avek travay?

⁹ Bann ansyen i montre ki zot annan en gran dezir pour akonplir lavolonte Zeova par lafason ki zot desarz zot responsabilite dan kongregasyon. (2 Kor. 1:24; 1 Tesa. 5:12, 13) Zot demontre ki zot pare pour travay dir e adapte avek bann sanzman. Zot pare pour fer bann azisteman ler i annan bann nouvo metod predikasyon. Kantmenm premye kou serten in kapab ezite pour fer temwannyaz par telefonn, lo por oubyen an piblik me pa bokou letan apre zot ti vwar bann bon rezilta. Par egzanp, kat pionye Lalmanny ti deside pour travay dan en teritwar biznes ki pa ti’n ganny fer pour en pe letan. Michael i dir: “Nou pa ti’n fer sa kalite form servis pour plizyer lannen, alor nou leker ti pe bat dan nou lipye. Zeova ti’n bezwen konn sa, akoz nou ti byen pase sa zour bomaten dan predikasyon e nou pa pou zanmen oubliy sa. Pa nou ti kontan ki nou ti swiv gidans dan Nou Minister Rwayonm e depan lo Zeova!” Eski ou pare pour esey bann nouvo metod predikasyon dan ou teritwar?

10. Ki azisteman lorganizasyon Zeova in fer tou resaman?

¹⁰ Par ler, i annan bann azisteman ki bezwen ganny fer dan lorganizasyon Zeova. Resaman, detrwa biro brans in zwenn ansanm. Malgre sa bann sanzman in fer bann frer ek ser ki ti pe servi dan sa bann biro brans fer bann azisteman, zot pa ti tarde pour vwar bann lavantaz. (Ekle. 7:8) Pa i en lazwa pour bann serviter ki pare pour zwe zot rol dan listwar pep Zeova dan nou letan!

11-13. Ki defi serten in fer fas avek akoz bann sanzman dan lorganizasyon Zeova?

¹¹ Nou kapab aprann bann leson enportan atraver bann ki ti enplike direkteman pour fer sa bann biro brans zwenn ansanm. Serten ti’n servi dan bann Betel pour plizyer dizenn lannen. En koup ki ti servi dan en pti Betel Sant Lanmerik ti ganny demande pour al dan en lot Betel Meksiko kot ti annan apepre 30 fwa plis lakantite Betelit. Rogelio ti dir: “I ti vreman difisil pour kit mon fanmir ek zanmi.” Juan, en lot frer ki ti ganny demande pour al servi Meksiko i dir: “I konmsi ou pe rekonmans en nouvo lavi kot ou bezwen fer nouvo zanmi. Ou bezwen adapte avek en nouvo kiltir ek en nouvo fason panse.”

¹² Bann Betelit dan lezot pei Lerop ki ti ganny demande pour al servi biro brans Lalmanny ti osi fer fas avek bann defi. Bann Betelit ki ti reste Laswis ti bezwen vreman apresye zot lanvironnman kot i annan bann zoli montanny, alor nou kapab konpran ki i ti difisil pour zot al viv dan en lot landrwa. Nou kapab osi mazin bann Betelit ki ti sorti Lotris ki ti pli konfortab avek lavi dan en pti Betel.

¹³ Bann ki ti pe al servi dan en lot pei ti bezwen adapte avek zot nouvo landrwa reste, travay avek bann frer ek ser ki zot pa konnen e petet aprann en diferan kalite travay. Zot ti osi bezwen adapte avek en nouvo kongregasyon, pres dan en nouvo teritwar, petet menm dan en lot langaz. I kapab difisil pour fer sa bann sanzman. Me en kantite Betelit in aksepte sa defi. Kwa ki’n fer zot fer sa?

14, 15. (a) Ki mannyer bokou frer ek ser in montre ki zot apresye sa privilez pour travay avek Zeova dan nenport ki travay ki zot fer? (b) Ki mannyer zot en bon legzanp pour nou tou?

 ¹⁴ Grethel i dir: “Mon ti aksepte sa lenvitasyon akoz i ti mon fason pour montre Zeova ki en pei, batiman oubyen serten privilez i pa sa ki pli enportan pour mwan.” Dayska i dir: “Ler mon ti mazinen ki sa lenvitasyon ti sorti kot Zeova, mon ti aksepte avek lazwa.” André ek Gabriela i dakor pour dir: “Nou ti vwar en lot loportinite pour servi Zeova par met sa ki nou nou ti anvi dekote.” Zot krwar ki ler lorganizasyon Zeova i fer bann sanzman, i pli byen pour aksepte zot avek tou zot leker dan plas reziste zot.

¹⁵ Lefet ki bann biro brans in zwenn ansanm, serten Betelit in ganny anvoye dan servis pionye. Sa ti leka pour plizyer Betelit ler biro brans Danmark, Lanorvez ek Laswed ti zwenn ansanm pour form biro brans Scandinavia. De parmi zot, Florian ek Anja ti dir: “Nou vwar nou nouvo servis konman en defi ki eksitan. Pour nou, i ekstraordiner pour ganny servi par Zeova nenport ki landrwa ki i anvoy nou. Nou kapab dir fransman ki nou santi ki nou ganny en kantite benediksyon!” Menm si petet laplipar nou pa pou zanmen bezwen fer sa bann sanzman, eski nou kapab imit sa leta lespri pour servi volonterman parey sa bann frer ek ser e met Rwayonm Bondye premye? (Iza. 6:8) Zeova i toultan beni bann ki apresye zot privilez pour travay avek li, nenport landrwa ki zot servi.

16. (a) Ki Galat 6:4 i demann nou pour fer? (b) Ki sa pli gran privilez ki en imen i kapab annan?

¹⁶ Bann imen enparfe i annan sa tandans pour konpare, me Parol Bondye i demann nou pour konsantre lo sa ki nou nou kapab fer. (Lir Galat 6:4.) Laplipar nou napa okenn gro responsabilite pour desarze dan lorganizasyon. Pa nou tou ki kapab vin pionye, misyonner oubyen Betelit. I  vre sa i bann privilez, me nou pa devret zanmen oubliye ki sa pli gran privilez ki okenn imen i kapab annan i sa enn ki nou tou nou partisip ladan. Sa se pour travay ansanm avek Zeova dan predikasyon. Pa sa i en privilez ki nou devret apresye!

17. Kwa ki pou kontinyen osi lontan ki Satan i egziste, me akoz sa pa devret dekouraz nou?

¹⁷ Osi lontan ki lemonn Satan i egziste, i kapab difisil pour nou servi Zeova parey nou ti a kontan. I kapab arive ki nou napa kontrol lo sirkonstans dan nou fanmir, swa lo lasante oubyen lezot sityasyon ki kapab leve. Me sa pa devret fer nou dekouraze. Pa zanmen souzestim abilite ki ou annan pour travay avek Bondye pour anons son non e fer konnen konsernan son Rwayonm sak loportinite ki ou gannyen. Pli enportan ankor se ki ou pe fer otan ki ou kapab pour Zeova e ou pe priye pour ki i beni ou bann frer ek ser ki kapab fer plis ki ou. Pa bliye, sak dimoun ki loue non Zeova i presye dan son lizye!

18. Ki nou devret pare pour aret tay deryer e akoz?

¹⁸ Malgre nou febles ek lenperfeksyon, Zeova i kontan pour travay ansanm avek nou. Pa nou apresye nou privilez pour travay avek Bondye dan sa bann dernyen zour! Alor, nou devret pare pour aret tay deryer bann keksoz ki pour nou prop lentere e anvoy zot pour pli tar akoz nou konnen ki dan nouvo lemonn Zeova pour permet nou rezouir “vre lavi,” setadir lavi eternel kot nou pou zwaye e dan lape.—1 Tim. 6:18, 19.

19. Ki Zeova in anmase pour lavenir?

¹⁹ Vi ki nou pros pour antre dan sa nouvo lemonn, rapel sa ki Moiz ti dir bann Izraelit pa bokou letan avan zot antre dan Later Promiz: “Zeova ou Bondye pou fer ou vreman prospere dan tou travay ki ou fer.” (Det. 30:9) Apre Amargedon, bann ki pou’n reste okipe par travay ansanm avek Bondye pou ganny sa later ki i’n promet zot. Apre sa nou pou annan en lot travay pour fer, sa i transform later pour li vin en zoli paradi.