1. Ano ang ginabatyag ni Jehova sa iya pagpangabudlay, kag ano ang ginhimo niya bangod sini?

SI Jehova isa ka manugpangabudlay nga nagakalipay sa iya mga ginahimo. (Sal. 135:6; Juan 5:17) Para maeksperiensiahan man sang iya intelihente nga mga tinuga ang pareho sini nga kalipay kag magbatyag nga may nahimuan, ginhatagan sila ni Jehova sing maayo kag makalilipay nga hilikuton. Halimbawa, ginpabulig niya ang iya panganay nga Anak sa Iya pagpanuga. (Basaha ang Colosas 1:15, 16.) Ang Biblia nagasugid sa aton nga antes nangin tawo si Jesus, yara sia sa tupad sang Dios sa langit subong “pangolo nga manugpangabudlay.”​—Hulu. 8:30.

2. Ano ang nagapakita nga ang espiritu nga mga tinuga pirme may importante kag makalilipay nga hilikuton?

² Halin sa panugod asta sa katapusan, mabasa sa Biblia ang mga halimbawa nga si Jehova may ginhatag nga hilikuton sa iya espiritu nga mga anak. Sa tapos nakasala sanday Adan kag Eva kag ginpalayas sa ila Paraiso nga puluy-an, “ginbutang [sang Dios] sa sidlangan sang katamnan sang Eden ang Querubin, kag ang nagaidlab nga espada nga nagabalabad, sa pagbantay sang dalan sang kahoy sang kabuhi.” (Gen. 3:24) Kag ginpakita sang Bugna 22:6 nga si Jehova “nagpadala sang iya anghel agod ipakita sa iya mga ulipon ang mga butang nga dapat mahanabo sa indi madugay.”

3. Sang yari si Jesus sa duta, paano niya gin-ilog ang halimbawa sang iya Amay?

³ Sang yari si Jesus sa duta subong himpit nga tawo, malipayon niya nga gintuman ang ginpahimo ni Jehova sa iya. Bilang pag-ilog sa halimbawa sang iya Amay, ginhatagan man ni Jesus sing importante nga hilikuton ang iya mga disipulo. Para pukawon ang ila kalangkag sa kon ano ang ila himuon, sia nagsiling: “Sa pagkamatuod nagasiling ako sa inyo, Sia nga nagatuo sa akon, magahimo man sia sang mga buhat nga ginahimo ko; kag magahimo sia sang mga buhat nga daku pa sa sini, bangod magakadto ako sa Amay.” (Juan 14:12) Para ipadaku ang pagkahilingagawon sina nga mga hilikuton, si Jesus nagpaathag: “Dapat naton himuon ang mga buhat sang nagpadala sa akon samtang adlaw pa; magaabot ang gab-i nga wala sing tawo nga makapangabudlay.”​—Juan 9:4.

4-6. (a) Ngaa nagapasalamat gid kita nga gintuman nanday Noe kag Moises ang ila mga asaynment halin kay Jehova? (b) Ano ang pareho sa tanan nga hilikuton nga ginahatag sang Dios sa mga tawo?

⁴ Bisan antes pa sang tion ni Jesus, ginhatagan na ang mga tawo sing makalilipay nga hilikuton. Sanday Adan kag Eva napaslawan sa pagtuman sang ila asaynment, pero ang iban nagtuman sa sugo sang Dios. (Gen. 1:28) Si Noe ginhatagan sing espesipiko nga mga instruksion kon paano tukuron ang arka para maamligan ang kabuhi sa daku nga Baha. Gintuman gid niya ang sugo ni Jehova. Bangod sang iya pagkamatinumanon, buhi kita subong!​—Gen. 6:14-16, 22; 2 Ped. 2:5.

⁵ Si Moises ginhatagan sing espesipiko nga mga instruksion sa pagtukod sang tabernakulo kag sa pag-organisar sang pagkasaserdote. Gintuman gid niya ini sing maayo. (Ex. 39:32; 40:12-16) Asta karon, nagabenepisyo kita sa iya matutom nga pagtuman sa sina nga asaynment. Paano? Si apostol Pablo nagpaathag nga ang mga bahin sang Kasuguan nagalaragway sa “maayong mga butang nga magaabot.”​—Heb. 9:1-5, 9; 10:1.

⁶ Samtang nagakatuman ang katuyuan sang Dios, ang iya mga alagad nagabaton sing lainlain nga asaynment. Pero ang hilikuton nga ginhatag sa ila pirme nagahimaya kay Jehova kag nagahatag sing benepisyo sa nagatuo nga katawhan. Naaplikar gid ini sa mga ginhimo ni Jesus, sa tion sang iya kabuhi sa langit kag sang ulihi sa duta. (Juan 4:34; 17:4) Sa karon, ang ginhatag nga hilikuton sa aton nagahimaya man kay Jehova. (Mat. 5:16; basaha ang 1 Corinto 15:58.) Paano?

7, 8. (a) Ano nga hilikuton ang pribilehiyo gid nga himuon sang mga Cristiano karon? (b) Ano dapat ang aton reaksion sa panuytoy ni Jehova?

⁷ Magaugyon ka nga dalayawon gid nga ginhatagan ni Jehova ang indi himpit nga mga tawo sing kadungganan sa pag-alagad subong iya mga masigkamanugpangabudlay. (1 Cor. 3:9) Ang mga nagaboluntaryo sa pagpatindog sang mga Assembly Hall, Kingdom Hall, kag mga pasilidad sang sanga nagapakigbahin sa pisikal nga pagpanukod, pareho sang ginhimo nanday Noe kag Moises. Nagaboluntaryo ka man sa pagkay-o sang inyo Kingdom Hall ukon sa pagpatindog sang aton ulong talatapan sa Warwick, New York, pabalori ang imo pribilehiyo nga makaalagad sa sini nga paagi. (Tan-awa ang drowing sa umpisa sini nga artikulo.) Sagrado ini nga pag-alagad. Pero sa kabilugan, ang mga Cristiano nagapakigbahin sa espirituwal nga pagpanukod. Ginahimo man ini para mahimaya si Jehova kag makabenepisyo ang matinumanon nga katawhan. (Binu. 13:47-49) Ang nagakaigo nga panuytoy para mahimo ini sing maayo gin-aman paagi sa organisasyon sang Dios. Kon kaisa, nagapahangop ini sa paghatag sa aton sang bag-o nga mga asaynment.

⁸ Ang matutom nga mga alagad ni Jehova pirme nalangkag sa pagpasakop sa teokratiko nga panuytoy. (Basaha ang Hebreo 13:7, 17.) Mahimo nga sa primero wala naton nahangpan sing bug-os ang mga rason sang espesipiko nga pamaagi sa pagtuman sang ginhatag sa aton nga hilikuton. Apang nahibaluan  gid naton ang mga benepisyo sa pagkooperar kay Jehova sa mga pagbag-o nga nakita niya nga nagakaigo himuon.

9. Ano nga halimbawa parte sa hilikuton ang ginpahamtang sang mga gulang para sa kongregasyon?

⁹ Ang mabaskog nga handum sa pagtuman sang kabubut-on ni Jehova makita sa kon paano ginapangunahan sang mga gulang ang kongregasyon. (2 Cor. 1:24; 1 Tes. 5:12, 13) Ginapakita nila ang kinabubut-on nga pagpangabudlay kag nagapasibu sa nagabag-o nga mga kahimtangan. Nalangkag sila sa pagsunod sa bag-o nga mga pamaagi sa pagtuman sang aton pagbantala parte sa natukod na nga Ginharian sang Dios. Bisan pa sang primero mahimo nga nagapangalag-ag ang pila sa pag-organisar sang pagpanaksi sa telepono, pantalan, ukon sa publiko, nakita nila sang ulihi ang maayo nga mga resulta sini. Halimbawa, ang apat ka payunir sa Germany nagdesisyon nga magpanaksi sa duog sang negosyo nga madugay na nga wala nabantalaan. Si Michael nagreport: “Wala namon mahimo ini nga porma sang pag-alagad sa pila ka tuig, gani nagakubakuba ang amon dughan. Nahibaluan gid ini ni Jehova, kay ginhatagan niya kami sing maayo gid nga pag-alagad sina nga aga. Nalipay gid kami kay ginsunod namon ang panuytoy sang Ang Aton Ministeryo sa Ginharian kag nagsalig sa bulig ni Jehova!” Nalangkag ka bala nga tilawan ang bag-o nga pamaagi sang pagpanaksi nga puede sa inyo teritoryo?

10. Ano nga mga pagbag-o sa organisasyon ang ginhimo sining karon lang?

¹⁰ Kon kaisa, kinahanglan himuon ang mga pagbag-o sa organisasyon. Sining karon lang, gintingob ang pila ka sanga talatapan. Bisan pa ini nga mga pagbag-o nagapakita nga kinahanglan magpahisuno ang mga kauturan nga nagaalagad sa sini nga mga sanga, wala madugay nangin maathag sa ila tanan ang mga bentaha sina nga mga pagbag-o. (Man. 7:8) Malipayon gid ining kinabubut-on nga mga manugpangabudlay nga may bahin sila sa nagapadayon nga kasaysayan sang katawhan ni Jehova!

11-13. Ano nga mga kabudlayan ang gin-atubang sang iban bangod sang mga pagbag-o sa organisasyon?

¹¹ Makatuon kita sing mapuslanon nga mga leksion sa mga direkta nga naapektuhan sang pagtingob sang mga sanga. Ang pila dinekada na nga nag-alagad sing bug-os tion sa ila puluy-an Bethel. Ang mag-asawa nga nag-alagad sa gamay nga pamilya Bethel sa Sentral Amerika ginpangabay nga magbuylog sa pamilya Bethel sa Mexico nga halos 30 ka pilo ang kadamuon. “Mabudlay gid ang pagbiya sa pamilya kag mga abyan,” siling ni Rogelio. Si Juan, nga isa pa ka utod nga ginpangabay nga masaylo sa Mexico, nagsiling: “Daw natawo ako liwat; kinahanglan ko naman nga makig-abyan. Nagakinahanglan ini sang pagpahisuno sa lain nga mga kustombre kag panghunahuna.”

¹² May mga kabudlayan man ang mga Bethelite sa pila ka pungsod sa Europa nga ginpangabay nga magsaylo sa sanga talatapan sa Germany. Ang bisan sin-o nga nanamian sang talan-awon sa kabukiran mahimo makahangop kon daw ano kabudlay para sa mga mahalin sa Switzerland nga biyaan ang ila matahom nga kabukiran sa palibot. Kag ang mga taga-Austria nahidlaw man sang primero sa mas relaks nila nga pagkabuhi.

¹³ Para sa mga nagsaylo sa iban nga pungsod, nagapahangop ini nga magpahisuno sila sa bag-o nga mga ilistaran, manghikot upod sa mga kauturan nga indi nila kilala, kag ayhan magtuon sing lain nga trabaho. Nagapahangop man ini sang pagpahisuno sa bag-o nga kongregasyon kag pagbantala sa bag-o nga teritoryo, ayhan sa iban nga lenguahe pa gani. Mahimo nga mabudlay ina nga mga pagbag-o. Pero madamo nga Bethelite ang nagbaton sini. Ngaa?

14, 15. (a) Paano ginpakita sang madamo nga ginapabaloran nila ang ila pribilehiyo nga magpangabudlay upod kay Jehova sa bisan ano nga hilikuton? (b) Paano sila nangin maayo nga halimbawa sa aton tanan?

¹⁴ Si Grethel nagsiling: “Ginbaton ko ang imbitasyon bangod amo ini ang akon paagi  para ipakita kay Jehova nga ang akon gugma sa iya wala nagadepende sa pungsod, bilding, ukon pribilehiyo.” Si Dayska nagsiling: “Sang gindumdom ko nga imbitasyon ini ni Jehova, ginbaton ko ini sing malipayon.” Sanday André kag Gabriela nagaugyon sa sini, nga nagasiling: “Makita namon sa sini ang dugang pa nga kahigayunan sa pag-alagad kay Jehova paagi sa pagpaiway sang amon personal nga mga handum. Nagsiling kami sa amon kaugalingon, ‘Kon bag-uhon ni Jehova ang huyop sang hangin, mas maayo nga ipauyon mo ang mga layag imbes nga maghimo sing mga panagang.’”

¹⁵ Bangod gintingob ang mga sanga, ang pila ka Bethelite gin-asayn subong payunir. Amo ini ang natabo sa pila ka Bethelite sang ang sanga sa Denmark, Norway, kag Sweden gintingob agod mangin sanga talatapan sa Scandinavia. Lakip sa ila amo sanday Florian kag Anja, nga nagsiling: “Ginatamod namon nga makakulunyag ang amon bag-o nga asaynment. Para sa amon, dalayawon gid nga gamiton ni Jehova bisan diin man kami mag-alagad. Makasiling gid kami nga ginpakamaayo kami sing bugana!” Mahimo ang kalabanan sa aton indi kinahanglan nga maghimo sini nga mga pagbag-o, pero mailog bala naton ang kahanda sini nga mga kauturan sa pag-una sa mga intereses sang Ginharian? (Isa. 6:8) Pirme ginapakamaayo ni Jehova ang mga nagapabalor sa ila pribilehiyo nga magpangabudlay kaupod niya, sa diin man ini nga hilikuton.

16. (a) Suno sa Galacia 6:4, ano ang dapat naton himuon? (b) Ano ang pinakadaku nga pribilehiyo nga matigayon sang mga tawo?

¹⁶ Ang indi himpit nga mga tawo may huyog nga magpaanggid, pero ginasilingan kita sang Pulong sang Dios nga magkonsentrar sa aton masarangan. (Basaha ang Galacia 6:4.) Kalabanan sa aton wala sing katungdanan sa sulod sang organisasyon. Subong man, indi tanan makapayunir, mangin mga misyonero, ukon makaalagad sa Bethel. Maayo gid ini nga mga pribilehiyo! Pero indi gid naton pagkalimtan nga makapakigbahin kita tanan sa pinakadaku nga pribilehiyo nga matigayon sang mga tawo. Ini amo ang mangin masigkamanugpangabudlay ni Jehova sa Cristianong  ministeryo. Pribilehiyo gid ini nga kinahanglan pabaloran!

17. Ano nga kamatuoran ang nagapadayon samtang nagaluntad pa ang kalibutan ni Satanas, pero ngaa indi ini dapat magpaluya sa aton?

¹⁷ Samtang nagaluntad pa ang kalibutan ni Satanas, mahimo nga malimitahan ang aton pag-alagad kay Jehova. Mahimo nga wala kita sing kontrol sa aton mga responsibilidad sa pamilya, kapagros, ukon sa iban pa nga kahimtangan. Pero indi ina dapat magpaluya sa aton. Indi pagpakadiutaya ang imo ikasarang sa pagpangabudlay kaupod sang Dios paagi sa pagpanaksi sa iya ngalan kag sa pagpahibalo sang iya Ginharian sa tagsa ka kahigayunan. Labaw sa tanan, nagapangabudlay ka kaupod niya sa bug-os mo nga masarangan kag nagapangamuyo ka nga pakamaayuhon niya ang mga kauturan nga mas madamo sing mahimo sangsa imo. Dumduma nga ang tagsa ka tawo nga nagadayaw sa ngalan ni Jehova hamili sa iya!

18. Ano dapat ang handa naton nga ipaiway, kag ngaa?

¹⁸ Bisan pa sa aton mga kaluyahon kag di-kahimpitan, nalipay si Jehova nga gamiton kita subong iya mga masigkamanugpangabudlay. Ginapabaloran gid naton ang aton pribilehiyo nga magpangabudlay kaupod sang aton Dios sa sining katapusan nga mga adlaw! Gani, dapat handa naton nga ipaiway ang madamo naton nga personal nga interes, nga nakahibalo nga sa iya bag-o nga kalibutan, tugutan kita ni Jehova nga magkalipay sa “matuod nga kabuhi”​—ang kabuhi nga wala sing katapusan sa malipayon kag malinong nga kahimtangan.​—1 Tim. 6:18, 19.

19. Ano nga palaabuton ang gintigana ni Jehova sa aton?

¹⁹ Samtang ara na kita sa ganhaan sang bag-o nga kalibutan, dumduma ang ginsiling ni Moises sa mga Israelinhon antes sila nagsulod sa Ginsaad nga Duta: “Ang GINOO nga imo Dios magapabugana sa imo sa tanan nga binuhatan sang imo kamut.” (Deut. 30:9) Kon matapos na ang Armagedon, ang mga masako sa pagpangabudlay kaupod sang Dios magapanag-iya sa duta nga iya ginsaad sa ila. Dayon, sugdan naton ang aton bag-o nga asaynment​—ang paghimo sa duta nga mangin matahom nga paraiso!