1. UJehova uzwa njani nxa esenza umsebenzi wakhe, njalo kuyini okutshengisa ukuthi ufuna lezidalwa zakhe zithokoze njengaye?

 UJEHOVA uyathokoza kakhulu nxa esenza umsebenzi wakhe. (Hubo. 135:6; Joh. 5:17) Unika abantu kanye lezingilosi imisebenzi ethokozisayo njalo esuthisayo ngoba ufuna izidalwa lezi zithokoze njengaye njalo zibone ukuthi kaziginqeli ize nje. Ngokwesibonelo, wasebenza leNdodana yakhe lapho edala izinto zonke. (Bala uKholose 1:15, 16.) IBhayibhili lisitshela ukuthi uJesu engakabuyi emhlabeni ‘wayengumbumbi eceleni’ kukaYise.—Zaga. 8:30.

2. Kuyini okutshengisa ukuthi izingilosi bezilokhu ziphiwa umsebenzi oqakathekileyo njalo osuthisayo?

² EBhayibhilini kugcwele izibonelo ezitshengisa ukuthi uJehova ubelokhu enika izingilosi zakhe imisebenzi okumele ziyenze. U-Adamu lo-Eva bathi sebenze isono uNkulunkulu wasebaxotsha ePharadayisi, “wamisa ngempumalanga kweSivande sase-Edeni amakherubhi kanye lenkemba ebhebhayo, iphazima isiyale lale ukulinda indlela eya esihlahleni sokuphila.” (Gen. 3:24) Kanti njalo iSambulo 22:6 sithi uJehova “wathuma ingilosi yakhe ukuba itshengise izinceku zakhe izinto okumele zenzakale masinyane.”

3. UJesu wasilingisela njani isibonelo sikaYise?

³ Lapho esasemhlabeni uJesu wakukholisa kakhulu ukwenza umsebenzi ayewuphiwe nguJehova. Walingisela isibonelo sikaYise ngokunika abalandeli bakhe umsebenzi oqakathekileyo. Wabanika lamadlabuzane okwenza umsebenzi lo lapho ebatshela esithi: “Ngiqinisile ukuthi lowo okholwayo kimi uzakwenza lokho ebengikade ngikwenza. Uzakwenza izinto ezinkulu kulalezi ngokuba ngiya kuBaba.” (Joh. 14:12) Waphinda wabatshengisa lokuthi umsebenzi lo kwakumele wenziwe masinyane, wathi: “Nxa kulokhu kusemini kumele siwenze umsebenzi wakhe ongithumileyo. Ubusuku buyeza lapho kungelamuntu ongasebenza khona.”—Joh. 9:4.

4-6. (a) Kungani kumele sibonge ukuthi uNowa loMosi bayenza imisebenzi ababeyinikwe nguJehova? (b) Yonke imisebenzi uNkulunkulu ayinika abantu inceda ngani?

⁴ Langesikhathi uJesu engakabuyi emhlabeni abantu babenikwa imisebenzi ethokozisayo njalo esuthisayo. Lanxa u-Adamu lo-Eva behluleka ukwenza umsebenzi ababewuphiwe, abanye abantu bakwenza lokho uNkulunkulu ayebathume khona. (Gen. 1:28) UNowa wanikwa imilayezo ecacileyo ephathelane lokuthi kwakumele awakhe njani umkhumbi owawuzalondoloza ukuphila lapho kufika uZamcolo. Wakwenza njengoba kunjalo lokho ayekutshelwe nguJehova. Yikho-ke siyaphila ngenxa yokuthi uNowa wakwenza konke ayekuthunyiwe.—Gen. 6:14-16, 22; 2 Phet. 2:5.

⁵ UMosi laye wanikwa imilayezo ecacileyo ephathelane lokwakha ithabanikeli kanye lokuhlela umsebenzi wobuphristi, njalo wayilandela njengoba injalo. (Eks. 39:32; 40:12-16) Ukuzimisela kwakhe ukwenza imisebenzi le kuyasinceda lathi lamuhla ngoba umphostoli uPhawuli wachaza ukuthi ithabanikeli kanye lobuphristi kwakuyisithunzi nje sezinto ezinhle ezizayo.—Heb. 9:1-5, 9; 10:1.

⁶ Imisebenzi uNkulunkulu ayinika izinceku zakhe iyantshintshantshintsha ngokuya kwesikhathi ukuze ihambelane lokugcwaliseka kwenjongo yakhe. Lanxa kunjalo yonke imisebenzi le ibilokhu imdumisa uJehova njalo inceda labantu abalokholo. Lokhu kugoqela lezinto uJesu azenza esasezulwini kanye lakho konke akwenza eselapha emhlabeni. (Joh. 4:34; 17:4) Lathi imisebenzi esiyinikwayo idumisa uJehova. (Mat. 5:16; bala u-1 Khorinte 15:58.) Kungani sisitsho njalo?

7, 8. (a) Yiwuphi umsebenzi ophiwe amaKhristu lamuhla? (b) Kumele senzeni nxa siphiwa imilayezo evela kuJehova?

⁷ Kuyamangalisa ukuthi lanxa singabantu abazalwa belesono, uJehova usinika isibusiso sokuba yizisebenzi kanye laye. (1 Khor. 3:9) Bonke abasemsebenzini wokwakha amaWolu eMihlangano eMikhulu, amaWolu oMbuso kanye lamahofisi amagatsha benza umsebenzi wokwakha njengoMosi loNowa. Kukholise okwenzayo kungelani lokuthi wakha iWolu loMbuso endaweni yakini, kumbe usebenza eWarwick edolobheni leNew York lapho okwakhiwa khona amahofisi ethu amakhulu. (Khangela umfanekiso osekuqaliseni.) Phela wenza inkonzo engcwele. Kodwa umsebenzi oqakatheke kakhulu ophiwe amaKhristu yikutshumayela. Nxa sitshumayela siyabe sidumisa uJehova njalo sisiza abantu abalalelayo. (ImiSeb. 13:47-49) Inhlanganiso kaNkulunkulu isinika imilayezo okumele siyisebenzise ukuze siphumelele nxa sisemsebenzini lo. Yikho kwezinye izikhathi siphiwa eminye imisebenzi emitsha.

⁸ Izinceku zikaJehova ezithembekileyo zihlezi ziyilalela yonke imilayezo evela enhlanganisweni yakhe. (Bala uHebheru 13:7, 17.) Ekuqaliseni singabe singakuzwisisi ukuthi kungani sekumele sintshintshe indlela ebesisenza ngayo umsebenzi esiwuphiweyo. Lanxa kunjalo, siyakwazi ukuthi kuyasinceda  ukwamukela loba yiluphi untshintsho uJehova afuna silwenze.

9. Kuyini okwenziwa ngabadala emabandleni okumele sikulingisele?

⁹ Okwenziwa ngabadala emabandleni kutshengisa ukuthi bayafisa sibili ukuthi intando kaJehova iphumelele. (2 Khor. 1:24; 1 Thes. 5:12, 13) Kuyakhanya ukuthi bazimisele ukusebenza gadalala kanye lokwamukela loba yiluphi untshintsho olwenziwayo. Ngokwesibonelo, nxa sinikwa amacebo amatsha okutshumayela ngoMbuso kaNkulunkulu abathikazi ukuwasebenzisa. Lanxa abanye baqalisa bethikaza ukutshumayela besebenzisa ucingo kumbe ukutshumayela obala langezinye izindlela nje, sebakubona ukuthi kuyasebenza. Amanye amaphayona amane ahlala eGermany ahlela ukuyatshumayela ensimini yamabhizimusi eyayisilesikhathi ingatshunyayelwa. Omunye wabo okuthiwa nguMichael uthi: “Sasilovalo ngoba sasesileminyaka eminengi singakaze sikuzame lokhu. Kumele ukuthi uJehova wayekwazi, ngoba wasenza sayikholisa kakhulu inkonzo mhlalokho. Kwasithokozisa kakhulu ukuthi sathemba uJehova saphinda sasebenzisa lomlayezo owawuku-Nkonzo Yethu yoMbuso.” Wena uyake uwazame yini amacebo amatsha eliwanikwayo ensimini yenu?

10. Yiluphi untshintsho olwenziwe enhlanganisweni?

¹⁰ Kwezinye izikhathi kulontshintsho olwenziwayo enhlanganisweni. Eminyakeni esanda kwedlula kuvalwe amanye amahofisi amagatsha. Umsebenzi obusenziwa emagatsheni la ususenziwa emagatsheni amakhulu okuyabe kuthuthelwe kuwo. Nxa lokhu kusenzakala kuyabe sekumele abafowethu labodadewethu ababesebenza emagatsheni la benze untshintsho. Kodwa akuthathi isikhathi ukuthi bananzelele ukuthi untshintsho lolu luyanceda. (UmTshu. 7:8) Akuthandabuzwa ukuthi izisebenzi lezi ezikhutheleyo ziyathokoza ngokwenza okunengi emsebenzini ophiwe abantu bakaJehova.

11-13. Yibuphi ubunzima obubakhona kwabanye nxa kube lontshintsho oluthile enhlanganisweni?

¹¹ Kunengi okuhle esingakufunda kubafowethu labodadewethu ababesemagatsheni ayevalwa. Abanye babo basebeleminyaka eminengi kakhulu besebenza emaBhetheli emazweni akibo. Enye imuli eyayisebenza eBhetheli eCosta Rica yatshelwa ukuthi iyesebenzela egatsheni elikhulu kakhulu laseMexico. URogelio uthi, “Kwakunzima kakhulu ukutshiya izihlobo labangane.” Omunye umzalwane okuthiwa nguJuan ngomunye futhi owantshintshelwa eMexico. Uthi: “Kufanana lokuthi impilo yakho yonke iyabe isintshintshile. Kuyabe sekumele uqalise kutsha ukudinga abangane, ujayele amasiko amatsha njalo untshintshe lendlela ocabanga ngayo.”

¹² Emazweni ase-Europe abanye ababesebenza emaBhetheli bahlangana lobunzima obuthile lapho bentshintshelwa egatsheni laseGermany. Nxa uthanda ukubuka izintaba ungakuzwisisa ukuthi kungani kwakungalula ukuthi ababesebenza eBhetheli yeSwitzerland batshiye izintaba ezinhle kakhulu eziselizweni lakibo. Kanti njalo lababese-Austria baqalisa beyikhanuka kakhulu impilo ababeyiphila elizweni lakibo.

¹³ Abantshintshela kwamanye amazwe kwasekumele bajayele ukuhlala lapho ababethuthele khona, basebenze labafowethu labodadewethu ababengabazi mhlawumbe bafunde lokwenza imisebenzi emitsha. Kanti njalo kwasekumele bayengena emabandleni amatsha, batshumayele ensimini entsha, mhlawumbe kudingeke lokuthi bafunde olunye ulimi. Konke lokhu kungabanzima. Kodwa kungani inengi labantu abasemaBhetheli likwamukela lokhu?

14, 15. (a) Abanye bakutshengisa njani ukuthi bayasiqakathekisa kakhulu isibusiso abalaso sokusebenza loJehova kungelani lokuthi benza wuphi umsebenzi? (b) Kungani singathi bayisibonelo esihle kithi sonke?

¹⁴ Udadewethu okuthiwa nguGrethel uthi: “Ngakwamukela lokhu ngoba  ngakubona kuyindlela engingatshengisa ngayo uJehova ukuthi ngiyamthanda ukwedlula ilizwe lakithi, isakhiwo esithile kumbe umsebenzi ebengiwenza.” Omunye njalo udadewethu okuthiwa nguDayska uthi: “Ngathi ngikhumbula ukuthi untshintsho lolu luvela kuJehova ngalwamukela ngithabile.” U-André loGabriela bathi: “Lokhu kwasenza safuqela izifiso zethu emsamo ngoba sasesithole omunye umsebenzi ovela kuJehova. Sazitshela ukuthi, ‘Nxa uJehova entshintsha izinto, kunjengomoya ovunguza usuqonde kwenye indawo, kungcono ukuwulandela kulokuphikisana lawo.’ ”

¹⁵ Abanye abasebenza eBhetheli bacelwa ukuthi bayekuba ngamaphayona ngenxa yokuthi amanye amagatsha ayevalwa. Ngokwesibonelo amagatsha aseDenmark, eNorway, laseSweden athi evalwa ukuze ahlanganiswe lehofisi legatsha laseScandinavia, abanengi baphiwa umsebenzi wokuba ngamaphayona. Abanye abaphiwa umsebenzi lo nguFlorian lo-Anja. Bathi: “Umsebenzi wethu omutsha awulula kodwa siwubona umnandi kakhulu. Sikubona kuyisibusiso ukusetshenziswa nguJehova loba ngaphi. Singatsho siphinde sibili ukuthi sithole isibusiso esikhulu.” Lanxa kungelantshintsho oluke lwenzakala kithi, kungaba kuhle nxa lathi singalingisela ukuzinikela kwabafowethu labodadewethu laba, siqakathekise imisebenzi ephathelane loMbuso ukwedlula loba yini. (Isaya. 6:8) UJehova uhlala ebabusisa abantu abaqakathekisa isibusiso abalaso sokusebenza kanye laye kungelani lokuthi benza wuphi umsebenzi.

16. (a) UGalathiya 6:4 usitshelani? (b) Yisiphi isibusiso esikhulu kulazo zonke?

¹⁶ Abantu abazalwa belesono bajayele ukuziqathanisa labanye kodwa iLizwi likaNkulunkulu lisitshela ukuthi sikhangele lokho thina ngokwethu esenelisa ukukwenza. (Bala uGalathiya 6:4.) Kayisibo bonke abangasebenza eBhetheli, abangaba ngabadala, ngamaphayona kumbe ngabanali. Imisebenzi le mihle kakhulu! Kodwa kumele singakhohlwa ukuthi isibusiso esikhulu kulazo zonke ngesokuba yisisebenzi esikanye loJehova ekutshumayeleni izindaba ezinhle, njalo  sitholwa yibo bonke abantu bakhe. Lesi yisibusiso okumele sisiqakathekise sibili.

17. Emhlabeni lo obuswa nguSathane, kuyini esingakuthandabuziyo, kodwa kungani lokhu kungamelanga kusiqede amandla?

¹⁷ Nxa umhlaba obuswa nguSathane ulokhu ukhona, asithandabuzi ukuthi kulezinto ezingasenza singenelisi ukwenza konke esifuna ukukwenzela uJehova. Ngokwesibonelo singabe sigula, sinakekela imuli kumbe kulokunye nje okusibambayo. Kodwa lokhu akumelanga kusiqede amandla. Yikho-ke ungaboni angani ongakwenza akutsho lutho ngoba ungalithola ithuba lokufakaza ngebizo likaNkulunkulu langoMbuso wakhe. Okuqakatheke kakhulu yikuthi wenza konke okusemandleni akho ukuze usebenze kanye loNkulunkulu, lokuthi uthandazela ukuthi aqhubeke ebusisa abafowethu labodadewethu abenelisa ukwenza okunengi. Hlala ukhumbula ukuthi wonke umuntu odumisa ibizo likaJehova uligugu kuye.

18. Kuyini okungamelanga sikwenze, njalo ngani?

¹⁸ UJehova kuyamthokozisa ukuthi siyizisebenzi kanye laye lanxa kwezinye izikhathi simonela njalo silokunye okusihluphayo. Siyasiqakathekisa kakhulu isibusiso esilaso sokusebenza kanye loNkulunkulu wethu ezinsukwini lezi zokucina. Yikho-ke akumelanga siqakathekise kakhulu lokho okufunwa yithi kuphela. Kufanele sikwazi ukuthi emhlabeni wakhe omutsha, uJehova uzasinika ‘ukuphila okuqotho,’ okutsho ukuphila okungapheliyo lapho okuyabe sekugcwele intokozo kanye lokuthula.—1 Tim. 6:18, 19.

19. UJehova usithembisani?

¹⁹ Sekuseduze kakhulu ukuthi singene emhlabeni omutsha, kufanana lokuthi sesisemnyango. Yikho-ke cabanga ngalokho uMosi akutshela abako-Israyeli sebezangena eLizweni ababelithenjisiwe. Wathi: “UJehova uNkulunkulu wenu uzaliphumelelisa kakhulu kuyo yonke imisebenzi yezandla zenu.” (Dute. 30:9) Ngemva kwe-Amagedoni, abantu abasebenza gadalala kanye loNkulunkulu bazathatha ilizwe ayebathembise lona besebephiwa omunye umsebenzi omutsha. Uyakwazi ukuthi yiwuphi? Ngowokwenza umhlaba ube lipharadayisi elihle!