1. Fēfē e logonaaga ha Iehova ke he gahua, ti ko e heigoa ne taute e ia hagaao ki ai?

 OLIOLI e Iehova e gahua haana. (Sala. 135:6; Ioane 5:17) Kua manako a ia ke he tau agelu mo e tau tagata ke olioli foki e gahua ha lautolu, ti kotofa e ia ki a lautolu e gahua ne olioli mo e makona. Putoia foki e Iehova haana Tama uluaki ke he gahua tufuga Haana. (Totou Kolose 1:15, 16.) Talahau he Tohi Tapu ki a tautolu ato hau a Iesu ke he lalolagi, ne fakalataha a ia mo e Atua ke he lagi ko e “[“iki gahua,” NW].”​—Fakatai 8:30.

2. Iloa fēfē e tautolu kua moua tumau he tau agelu e gahua aoga mo e makona?

² Mai ia Kenese ki a Fakakiteaga, ne fakamaama he Tohi Tapu kua kotofa tumau e Iehova e gahua ke he tau agelu. He agahala a Atamu mo Eva ti lata ke toka e Parataiso, ne age he Atua ke he tau agelu e kotofaaga. Ia Kenese, totou e tautolu na “fekau atu foki e ia e tau kerupi ke nonofo [“he faahi uta,” NW] he kaina ko Etena, mo e pelu puhopuho, kua tafeliuaki ke leoleo aki e hala ke he akau he moui.” (Kene. 3:24) Ia Fakakiteaga foki, fakaako e tautolu ko Iehova ne “fakafano mai e ia hana agelu ke fakakite ke he hana tau fekafekau e tau mena kua lata ke hohoko  vave mai,” po ke fakakite e vahā anoiha.​—Fakakite. 22:6.

3. He ha ha a Iesu he lalolagi, fifitaki fēfē e ia e Matua haana?

³ He ha ha a Iesu he lalolagi, ne taute fiafia e ia e gahua ne kotofa e Iehova ki a ia. Ti fifitaki a ia ke he Matua haana he kotofa e gahua aoga ke he tau tutaki haana. Ne taute e ia a lautolu ke fiafia e logonaaga ke he kotofaaga ha lautolu he tala age ki ai: “Ko e moli, ko e moli, ke tala atu e au kia mutolu, ko ia ne tua mai kia au, to eke e ia ni e tau gahua ne eke e au; to eke foki e ia e tau mena ke mua ke he tau mena nai, ha ko e mena fano au ke he haku a Matua.” (Ioane 14:12) Ne lagomatai e Iesu e tau tutaki haana ke kitia kua mafiti e gahua ha lautolu he fakamaama ai: “Ko e mena lata ke eke e tautolu e tau gahua hana ne fakafano mai au, he aho; ka hoko ke he po, ti nakai maeke ia taha ke gahua ai.”​—Ioane 9:4.

4-6. (a) Ko e fakaaue he ha a tautolu ha kua taute e Noa mo Mose e mena ne tala age e Iehova ke taute e laua? (e) Ko e heigoa e tau mena ua ne fua mai he tau kotofaaga gahua he Atua ma e tau tagata?

⁴ Leva ato hau a Iesu ke he lalolagi, ne kotofa e Iehova e gahua fiafia ke he tau tagata. Pete he nakai oti e kotofaaga ha Atamu mo Eva he taute, tokologa e tagata ne fakaoti e mena ne tala age he Atua ke taute e lautolu. (Kene. 1:28) Ne age e Iehova e tau takitakiaga pauaki ki a Noa ke he puhala ke tā e vaka ke hao a ia mo e magafaoa haana he Fakapukeaga. Ti taute pihia ni e Noa e mena ne tala age e Iehova. Momoui a tautolu he vahā nei ha kua mumuitua fakamakutu e ia e tau takitakiaga ha Iehova.​—Kene. 6:14-16, 22; 2 Pete. 2:5.

⁵ Ne age e Iehova ki a Mose e tau takitakiaga pauaki ke he puhala ke tā e faituga mo e puhala ke fakatokatoka e tuaga ekepoa. Ti taute pihia ni e Mose e mena ne tala age e Iehova ki a ia ke taute. (Esoto 39:32; 40:12-16) Ko e heigoa ha tautolu kua fakaako he vahā nei mai he gahua malolō mo e omaoma ha Mose? He fakamaama he aposetolo ko Paulo, ko e faituga mo e tuaga ekepoa ne fakamailoga e “tau mena mitaki ne tatali.”​—Hepe. 9:1-5, 9; 10:1.

⁶ He tupu e finagalo he Atua, ne moua he tau fekafekau haana e tau kotofaaga kehekehe. Ka e pete he liga hiki e tau kotofaaga gahua, ne fakaheke tumau ai a Iehova mo e aoga ke he tau tagata. Mooli e mena nei ke he gahua ne taute e Iesu ato hau a ia ke he lalolagi mo e he nofo haana ke he lalolagi. (Ioane 4:34; 17:4) He vahā nei, ka taute e tautolu e mena ne kotofa e Iehova ki a tautolu, fakaheke he gahua ha tautolu a ia. (Mata. 5:16; totou 1 Korinito 15:58.) Talahau pihia he ha a tautolu?

7, 8. (a) Fakamaama e gahua kua lilifu e tau Kerisiano he vahā nei ke taute. (e) Lata ke tali atu fēfē a tautolu ke he takitakiaga ha Iehova?

⁷ Ko e lilifu ha kua uiina e Iehova e tau tagata nakai mitaki katoatoa ke fekafekau mo ia ko e tau ekegahua haana. (1 Kori. 3:9) Falu Kerisiano ne moua e lilifu ke taute e gahua talaga, tuga a Noa mo Mose. Falu ne lagomatai ke tā e tau Fale he Toloaga, tau Fale he Kautu, mo e tau la ofisa. He fakafoou a mutolu he Fale he Kautu he matakavi po ke tā he fale he matapatu he lalolagi i Warwick, New York, kia tokiofa e lilifu haau! (Kikite ata he kamataaga ne tā he tagata tā fakatino.) Ko e fekafekauaga tapu. He liga tokogahoa ni ne taute e gahua talaga, kua fakalataha e tau Kerisiano oti ke he gahua talaga fakaagaaga. Ko e gahua fakamatala anei, ne fakaheke a Iehova mo e aoga ke he tau tagata. (Gahua 13:47-49) Takitaki he fakatokatokaaga he Atua e gahua fakamatala. Falu mogo kua kakano e mena nei to moua e tautolu e kotofaaga foou.

 ⁸ Kua makai tumau e tau fekafekau fakamooli ha Iehova ke muitua e takitakiaga haana. (Totou Heperu 13:7, 17.) Liga nakai maama e tautolu e tau kakano oti kua moua e tautolu e kotofaaga foou po ke takitakiaga foou. Ka e kaufakalataha a tautolu mo Iehova ha kua iloa e tautolu ko e tau hikiaga mai ia Ia mo e to fua mitaki ai.

9. Ko e heigoa e fakafifitakiaga mitaki ne fakatoka he tau motua ma e fakapotopotoaga?

⁹ Fakakite he tau motua e manako malolō ha lautolu ke taute e finagalo ha Iehova he puhala kua takitaki e lautolu e fakapotopotoaga. (2 Kori. 1:24; 1 Tesa. 5:12, 13) Eketaha e tau motua ke gahua malolō mo e muitua ke he takitakiaga, ti mafiti a lautolu ke fakaako e tau puhala foou he fakamatala. Kitia e lautolu e tau fua mitaki he fakatokatoka e fakamatala he telefoni, he uaafo, po ke toloaga tagata, pete he manamanatu e falu to gahuahua nakai e tau puhala foou nei. Ma e fakatai, tokofā e paionia i Sihamani ne fifili ke fakamatala he matakavi pisinisi ne kua leva e nakaila gahua. Taha ia lautolu ko Michael, ne pehē kua hopoate a lautolu ha kua nakai fakaaoga e lautolu e puhala fekafekau nei ke he loga e tau tau. Lafi e ia: “Liga iloa e Iehova e mena nei, ha kua foaki mai e Ia ki a mautolu e pogipogi mitaki he gahua ne nakai maeke ke nimo. Fiafia mooli a mautolu ha kua muitua e mautolu e takitakiaga ne tuku mai he Ha Tautolu a Fekafekauaga he Kautu mo e falanaki ke he lalagoaga ha Iehova!” Makai nakai a koe ke fakaaoga e tau puhala foou he fakamatala ke he fonua ha mutolu?

10. Ko e heigoa e tau hikihikiaga he fakatokatokaaga kua taute he tau tau e kua mole?

¹⁰ Falu magaaho ne taute e tau hikiaga he Peteli. Ma e fakatai, he tau tau e kua mole, falu la ofisa ikiiki ne pā ti kua hiki e gahua ha lautolu ke he tau la ofisa lalahi. Lauia ai a lautolu ne fekafekau ke he tau la ofisa nei. Maeke ia lautolu ke taute e tau hikihikiaga, ka kua kitia e lautolu he mogo fakamui e tau aoga. (Fakama. 7:8) Ko e tau tagata gahua fakamakai nei kua fiafia ke fai vala he fakamauaga foou he tau tagata ha Iehova!

11-13. Ko e heigoa e tau paleko ne fehagai he falu ha ko e tau hikiaga he fakatokatokaaga?

¹¹ Maeke ia tautolu ke iloa falu fakaakoaga aoga mai ia lautolu ne fekafekau he tau la ofisa ne lafi fakalataha. Tokologa he tau matakainaga nei ne fekafekau he tau la ofisa nei ke loga e tau tau. Taha e hoa ne fekafekau he Peteli tote ne ole ke hiki atu ki Mesikō, ne ha ha i ai teitei fakalahi 30 e tokologa he tau tagata he Peteli ia. Ko e taane ko Rogelio ne ui: “Uka lahi ke toka e magafaoa mo e tau kapitiga.” Ko Juan, ko e taha tagata he Peteli ne ole ke hiki ki Mesikō ne logona hifo kua liu a ia ke kamata e moui haana. Pehē a ia: “Kua lata a koe ke fakatū e tau fakafetuiaga foou. Manako ai ke hiki ke he tau aga mo e tau puhala manamanatu foou.”

¹² He magaaho ne lafi e falu la ofisa i Europa, tokologa he tau tagata he Peteli ne ole ke hiki ke he la ofisa ne toka i Sihamani. Ne fehagai foki a lautolu mo e tau paleko, ha ko e mena nakai mukamuka tumau ke toka e motu haana. Falu ne hiki mai i Switzerland ne misi e tau Mouga fulufuluola, mo e falu ne hiki mai i Austria ne misi e magafaoa tote he Peteli.

¹³ Ko e tau matakainaga ne hiki ke he la ofisa he taha motu ne loga e tau hikiaga kua taute. Lata ia lautolu ke mahani ke he kaina foou, tau kapitiga gahua foou, ti liga pihia mo e kotofaaga gahua foou. Lata foki ia lautolu ke mahani ke he fakapotopotoaga foou, matakavi foou, pihia foki mo e vagahau foou. Ko e taute e tau hikiaga nei kua liga uka, ka e tokologa e tagata he Peteli ne taute fiafia ai. Ko e ha? Kia fanogonogo la ke he falu ia lautolu.

14, 15. (a) Fakakite fēfē he tokologa kua tokiofa e lautolu e kotofaaga he gahua mo Iehova? (e) Eke fēfē a lautolu mo fakafifitakiaga mitaki ma tautolu?

 ¹⁴ Pehē a Grethel: “Talia e au e uiina ha ko e puhala a ia haaku ke fakakite ki a Iehova haaku a fakaalofa ki a ia kua molea atu he motu, he fale, po ke matagahua pauaki.” Pehē a Dayska: “Mogo ne manatu e au kua mai ia Iehova e uiina, ne talia fiafia ai e au.” Ko André mo Gabriela ne talia, he pehē: “Ko e mena nei kua kitia e maua e falu puhala foki he fekafekau ki a Iehova he tuku e tau manako fakatagata ke he mafoa.” Logona hifo e laua he taute he fakatokatokaaga ha Iehova e tau hikiaga, kua mitaki ke muitua fiafia ki ai ka e nakai totoko ai.

¹⁵ He magaaho ne lafi e tau la ofisa, ne liu falu tagata he Peteli ke kotofa ke fekafekau ko e tau paionia. Tupu e mena nei ke he tokologa he tau tagata he Peteli he mogo ne lafi e tau la ofisa i Denmark, Norway, mo Sweden ke fakatū e la ofisa i Scandinavia. Ko e hoa ne higoa ko Florian mo Anja ne pehē: “Onoono a maua ke he kotofaaga foou ha maua ko e paleko ofoofogia. Ma maua, ko e mena ofoofogia ke fakaaoga e Iehova pete ne matakavi kua fekafekau a maua i ai. Maeke a maua ke talahau fakamooli kua logona e maua e monuina lahi!” Pete ne laulahi ia tautolu ne nakai ha ha he tuaga nei, maeke a tautolu ke fifitaki e aga makai he tau matakainaga nei ti tuku fakamua e tau mena he Kautu. (Isaia 6:8) Iloa tonu e tautolu to fakamonuina tumau e Iehova a lautolu kua tokiofa e kotofaaga ha lautolu he gahua mo ia, ke he matakavi fe ni.

16. (a) Ko e heigoa he Kalatia 6:4 kua talahau ki a tautolu ke taute? (e) Ko e heigoa e kotofaaga mua ue atu ka moua e tautolu?

¹⁶ Ha kua nakai mitaki katoatoa a tautolu, fa fakatatai e tautolu a tautolu ke he falu. Ka e talahau he Kupu he Atua ki a tautolu ke hagaaki ke he tau mena kua maeke ia tautolu takitokotaha ke taute. (Totou Kalatia 6:4.) Nakai eke oti a tautolu mo tau  motua, tau paionia, tau misionare, po ke tau tagata he Peteli. Ko e tau kotofaaga mitaki oti anei, ka e taha e kotofaaga mua ue atu ne kua moua e tautolu oti. Ke eke mo tagata fakailoa he tala mitaki, ko e ekegahua mo Iehova. Kia tokiofa e tautolu e kotofaaga nei!

17. He fakatokaaga nei, ko e heigoa ne tupu mooli? Ka ko e ha kua nakai lata a tautolu ke loto lolelole?

¹⁷ He fakatokaaga nei, liga nakai maeke ia tautolu ke fekafekau ki a Iehova he puhala kua loto a tautolu ki ai. Liga ha ha ia tautolu e tau tuaga ne nakai maeke ia tautolu ke taofi, tuga e tau matagahua he magafaoa po ke tau lekua malolō tino. Ka e nakai lata ia tautolu ke loto lolelole. Pete ni ko e heigoa e tau lekua ha tautolu, maeke tumau a tautolu ke fakamatala hagaao ke he higoa ha Iehova mo e Kautu. Ko e mena aoga lahi ke taute e tautolu e tau mena oti kua maeke ma Iehova, he liogi a tautolu to lagomatai e ia a lautolu kua lahi e mena kua maeke ke taute mai ia tautolu. Manatu, ko e tau tagata oti kua fakaheke e higoa ha Iehova kua uho ke he fofoga haana!

18. Ko e heigoa ka onoono atu a tautolu ki ai he vahā i mua, ka ko e heigoa e kotofaaga ne mua kua fitā he moua e tautolu?

¹⁸ Fakaatā e Iehova a tautolu ke eke mo tau ekegahua haana pete ne nakai mitaki katoatoa a tautolu. Ko e kotofaaga mua ue atu mooli ke gahua mo e Atua ha tautolu he tau aho fakamui nei! Onoono atu a tautolu ke he vahā i mua ke he “moui tukulagi,” ka maeke ia tautolu ke olioli e moui ne nakai maeke ia tautolu mogonei. Nakai leva he lalolagi foou ha Iehova, to fakamonuina e ia a tautolu aki e moui tukulagi kua fiafia mo e mafola.​—1 Timo. 6:18, 19.

19. Ko e heigoa e vahā fiafia i mua kua mavehe e Iehova ki a tautolu?

¹⁹ To hoko mafiti mai e lalolagi foou ne mavehe he Atua. Manamanatu a tautolu ke he mena ne tala age e Mose ke he tau Isaraela ato huhū a lautolu ke he Motu he Maveheaga: “To fakalahi ai e Iehova hau a Atua a koe ke he tau gahua oti he hau a tau lima.” (Teu. 30:9) Mole a Amaketo, to foaki e Iehova e lalolagi ki a lautolu kua gahua mo ia, tuga ni he mavehe e ia. Ti, ko e kotofaaga foou ha tautolu ke taute e lalolagi mo parataiso fulufuluola!