1. Ngua ngera osengel a Jehovah el kirel a ureor, e tiang ngrullii el mo mekerang?

 A JEHOVAH a dmeu a rengul el oureor. (Psa. 135:6; Jn. 5:17) Ngdirrek el soal a rechanghel me a rechad a bo loldeu a rengrir er a urerir, me ngmesterir a ungil el urerir. A Jehovah a uluusbech er ngike el kot el Ngelekel el Sechal el olengeseu er ngii er a lomeob a rokui el tekoi. (Monguiu er a Kolose 1:15, 16.) A Biblia a ouchais el kmo a Jesus er a uchei er a lemei er a chutem, e ngulebengkel a Dios el ngar er a eanged “el di ua chad er omelib el blai.”​—Osi. 8:30.

2. Kede mekerang e medengei el kmo a rechanghel a moterekokl er tir a meklou a ultutelel el ureor el uchul a deuil a rengrir?

² Ngar er a Genesis el mo er a Ocholt, e a Biblia a mesaod el kmo a Jehovah a blechoel el omesterir a urerir a rechanghel. Me a Adam me a Eva er sera lerebet er a klengit me lemodik er a Baradis, e a Dios a milsterir a rechanghel a ngerechelir. Ngar er a Genesis, e kede menguiu el kirel a Dios el kmo, ng “millecha er ongos er a sers er a Eden a re kerubim ma tal kmard a ngau er ngii el saider el obebelbult el bedul a bek el uchul a eolt er ngiil sers, el mengkar er sel kerrekar er a klengar.” (Gen. 3:24) E ngar er a Ocholt, e kede suubii el kmo a Jehovah a “ulderchii a anghel er ngii el mo olecholt er a re mesiungel a ikel kmedu el mor ngii.”​—Och. 22:6.

3. Ngmilekerang a Jesus e oukerebai er a Demal er a lengar er a chutem?

³ A Jesus er a lengar er a chutem, e ngmle dmeu a rengul el meruul er a ureor el lebilsang a Jehovah. Ngdirrek el uluukerebai er a Demal er a lebesterir a redisaiplo er ngii a klou a ultutelel el ureor. Ngrirelleterir el mo semeriar el meruul a urerir er a ledu el kmo: “A kulekoi er ngii er kemiu a meral tekoi. Ngikel oumera er ngak a mo meruul a ikel kuruul; ng bai mo meruul a kuk meklou er a ikang, ele ngak a merael el mor a Chedam.” (Jn. 14:12) Ngdirrek el mileketeklii el mo er a redisaiplo er ngii el kmo a urerir a orechudel er a ledu el kmo: “Chelechal dirk le mellomes e ng kired el meruul a urerel ngikel ulderchak; ele bo le klebesei, e ng mo diak a chad el sebechel el oureor.”​—Jn. 9:4.

4-6. (a) Ngera uchul me kede mereng a saul e le Noah me a Moses a riruul aike el tekoi el ledilu er tir a Jehovah? (b) Ngera el eru el tekoi a meketmokl el okiu a ureor el Dios a omesterir a rechad?

⁴ A kemanget el taem er a uchei er a lemei er a chutem a Jesus, e a Jehovah a milsterir a rechad a ungil el ureor. Me alta e a Adam me a Eva a dimlak lerekir a urerir, engdi a rebetok el chad a rirekui a urerir el lebilsterir a Dios. (Gen. 1:28) A Jehovah a milsang a Noah a bleketakl el ulekrael er a rolel a bo loleketek er a arhe me ngii me a telungalek er ngii bo lesobel er a Ieleb. Me a Noah a riruul a rokui el tekoi el ledilu er ngii a Jehovah. Kid a ngar er chelechang e le ngii el mle kerekikl el oltirakl a ulekrael er a Jehovah.​—Gen. 6:14-16, 22; 2 Pe. 2:5.

⁵ A Jehovah a milsang a Moses a bleketakl el ulekrael er a rolel a bo loleketek er a chedaol Tento me a rolel a bo longetmokl er tirke el mo er a deruchall er a kleprist. Me a Moses a riruul aike el rokui el ledilu er ngii a Jehovah. (Exo. 39:32; 40:12-16) Ngera kede suubii er chelechang er a meringel el urerel a Moses me a blekongesenges er ngii? A apostol el Paulus a milsaod el kmo, a chedaol Tento me a deruchall er a kleprist a okesiu el kirel a ungil el tekoi el mo er ngii.​—Heb. 9:1-5, 9; 10:1.

⁶ Me a cherengel a taem el loureor a Dios el oltaut er a moktek er ngii, e a remesiungel a ngmai a kakerous el ngerechelir. Me alta e ngmengodech a ngerechelir, engdi ngii el ureor a blechoel el mengebkall er a Jehovah e mo uchul a klungiolir a rechad. E tiang a mle uaisei el kirel a ureor el lurruul er ngii a Jesus er a uchei er a lemei er a chutem me sera lengar er a chutem. (Jn. 4:34; 17:4) Me chelechang e sel doruul a ngerecheled el lomeskid a Jehovah, e a urered a mengebkall er ngii. (Mt. 5:16; monguiu er a 1 Korinth 15:58.) Ngera uchul me ngsebeched el melekoi el uaisei?

7, 8. (a) Mosaod er a ileakl el techall el lobang a Rekristiano er chelechang. (b) Ngkired el mekerang sel denguu a ulekrael er a Jehovah?

⁷ A Jehovah a mesterir a rediak lemecherrungel el chad a ileakl el techall el mo kldemel er a ureor. (1 Ko. 3:9) A rebebil el Kristiano a ngar er ngii a techellir el mo meruul a ureor el ua lurruul a Noah me a Moses. A rebebil er tir a olengeseu el omekedechor a meklou me a mekekerei el Blil a Ongdibel me a branch office. Me a omomekbeches er a Blil a Ongdibel er a beluam me a lechub e ke olengeseu el omekedechor er sel klou el obis er kid el ngar er a Warwick, New York, e bo mongreos er tia el techellem! (Momes er a sunga er a uchelel a suobel.) Tia el ureor a mengebkall er a Dios. Me alta e te di mekesai a teloi er a ureor er a okedecherul a blai engdi a rokui el Kristiano a teloi er a ureor er a berkel a klumech, el ngii a kobkellii a Jehovah e dirrek el mo uchul a klungiolir a rechad. (Rel. 13:47-49) A cheldebechelel a Dios a omekrael er a ureor er a berkel a klumech. Me a lebebil er a taem e ngmoterekokl er kid a beches el ureor.

⁸ A reblak a rengrir el mesiungel a Jehovah a blechoel el semeriar el oltirakl a ulekrael er ngii. (Monguiu er a Hebru 13:7, 17.) A lebebil er a  taem e ngdiak dodengelii a uchul me ngmoterekokl er kid a beches el ureor me a lechub e kede nguu a beches el ulekrael. Engdi kede melemolem el olengesenges er a Jehovah e le kede medengei el kmo tia el omelodech a mla er ngii el mei me ngmo uchul a klungioled.

9. Ngera el ungil el kerebai a lolecholt a remechuodel?

⁹ A omerellir a remechuodel er a ongdibel a ochotii el kmo ngkmal sorir el meruul a soal a Jehovah. (2 Ko. 1:24; 1 Th. 5:12, 13) Te semeriar el meruul a ngerechelir e oltirakl a ulekrael, e dirrek el oltaut aike el beches el omeldechel a ureor el kirel a berkel a klumech. A betok el ungil el tekoi a sebechel el duubech el okiu sel lomekrael er a rechad er a ongdibel el mo ousioning el ousbech a dengua, e lousioning a olekerodel me a lechub e lousioning er a buai, alta e a rebebil a kora rrau a rengrir el kirel a rolel a loruul aika el tekoi. El ua tiang, a reteua el pioneer er a beluu er a Dois a tilbir el mo omerk er a klumech el ngar a basio er a siobai el meketeketang el dirkak a odingel el mo er ngii. A ta er tir el Michael a dilu el kmo te mle bekikl e le ngmeketeketang el diak loruul er tia el ureor. Ngdilechelii el kmo: “A Jehovah a locha mle medengelii tiang e ulemekrael a tekoi me ngkmal mlo ungil a odingel er kemam er sel tutau. Ngkmal dmeu a rengmam e le ki uleltirakl a ulekrael el mla er a Omesiunged el Kirel a Renged e mle ultuil er a Jehovah el kirel a ngeso!” Me kau ke semeriar el mo melasem a beches el rolel a dousioning el ngar er a basio el momerk er a klumech er ngii?

10. Ngera el tekoi a mla mengodech er a chelsel a cheldebechelel a Dios er aika el mereko el rak?

¹⁰ A lebebil er a taem e ngmengodech a rolel a ureor er a Bethel. El ua tiang, telkib el taem er a uchei, e a bebil el mekekerei el branch office a mlechesimer e te ngilukl a urerir el mo er a meklou el branch office. Me tirke el mesiou el ngar er aika el obis a mle kirir el melodech a bebil er a tekoi el loruul, engdi a uriul e te miles a klungiolel aika el omelodech. (Oli. 7:8) Tirka el blak a rengrir el chad a dmeu a rengrir el teloi er a ureor el loruul er ngii a rechedal a Jehovah er chelechang!

11-13. Ngera el omelsemai a blo lechelebangel a rebebil e le tir el uleltirakl a omelodech el mla er a cheldebechel el mei?

¹¹ Ngsebeched el suub a meklou a ultutelel el tekoi er tirke el milsiou el ngar er aike el branch office el mlo uldak. A rebetok er tir a milsiou el ngar er aika el obis el betok el rak. A ta el odam el Rogelio me a bechil el milsiou el ngar er a kekerei el Bethel a lullengit er tir me lolukl el mo er a Bethel er a Mexico, el ngii a bekord el 30 el taem el chachisois a ildisir a rechad er ngii. Ngika el odam a kmo: “Ngkmal mle meringel er kemam el mo cheroid er a rechad er a blimam me a resechelimam.” A Juan a dirrek el milsiou er a Bethel, e te ullengit er ngii me lolukl el mo er a Mexico. Ngulemelechesiu er ngii el ua lomuchel er a beches el klengar er ngii, e le ngmle kirel omak a beches el deleuill er ngii, e omeksau er ngii er a beches el siukang me a rolel a lomdasu a rechad.

¹² Sel taem er a bo luldak a bebil er a branch el ngar er a Europe, e a ongit a mlo er a rebetok el chedal a telungalek er a Bethel me lolukl el mo er sel branch office el ngar er a Dois. Te dirrek el mlo chelebangel a omelsemai e le ngdiak lebeot a detobed er a beluad e bo dekiei er a cheroid el beluu. A rebebil el millukl er a beluu er a Switzerland a dirk mo oureng aike el klebokel el rois er a belurir el Alps, e a rebebil el millukl er a beluu er a Austria a kuk mo oureng er sel kekerei el telungalek er tir er a Bethel.

¹³ A rudam me a rudos el millukl el mo er a branch el ngar er a ta er a beluu a mle kirir el omeksau er tir er a beches el blirir, e mo teloi er a rekuk ngodech el chad, e locha mo kirir el meruul a kuk ngodech el ureor. Ngdirrek el mle kirir el omeksau er tir er a beches el ongdibel, me a basio el loldingel er ngii, e a rebebil a mle kirir el mesuub a ngodech el omelekoi. Ngmle sebechel el mo meringel er tir el meruul aika el  tekoi engdi a rebetok er tirka el ngar er a Bethel a mle dmeu a rengrir el kongei aika el omelodech. E ngera uchul? Ka me bo dosaod a bebil el tekingir.

14, 15. (a) Te milekerang a rebetok e ochotii el kmo te mengreos er a techellir el oureor el obengkel a Jehovah? (b) Te mekerang e ungil el kerebai el kired?

¹⁴ A Grethel a kmo: “Ak kilengei er a okedong e le tia mle rolel e a kuchotii el kmo a bltkil a renguk el mo er a Jehovah a kuk klou er a beluak, blai, me a lechub a techall er a ureor.” A Dayska a kmo: “Sel kulatk el kmo a okedong a mla er a Jehovah el mei, e ngmle dmeu a renguk el nguu.” A André me a Gabriela a kmo: “Aki miltebengii el kmo tiang a kuk ta er a techall el mo mesiou er a Jehovah e mo mechei aike el somam el meruul.” Te oumerang el kmo a cheldebechelel a Jehovah sel lolodech a tekoi, e ngungil a bo doltirakl er a bai bo doltngakl er ngii.

¹⁵ Me sel bo lemodak a branch, e a rebebil el chedal a Bethel a metutk el mo mesiou el pioneer. E tia dilubech el mo er a rebetok er sel taem el ike el branch er a Denmark, Norway, me a Sweden a mlo modak el rullii a branch er a Scandinavia. A ta el obekel el Florian me a Anja a kmo: “Aki kmal semeriar er tia el beches el ureram. Ngkmal ungil a rengmam e le Jehovah a sebechel el ousbech er kemam el mesiou er ngii, e tia el deurreng a diak lultuil er a beluu el ki mngar er ngii. Me aki mera el ngeltengat!” Me alta e a ruumesingd er kid a diak dengar tia el blekeradel, engdi ngsebeched el oukerebai er tirka el rudam me a rudos el ngiluu a tekoi er a Renged el mo kot. (Isa. 6:⁠8) Ngsebechel el mo ulterekokl a rengud el kmo, a Jehovah a mo omekngeltengat er tirke el mengreos er a techellir el oureor el obengkel er a ngii di el ker el lengar er ngii.

16. (a) A doltirakl er a Galatia 6:4 e ngkired el mekerang? (b) Ngera sel kot el klou el techall el sebechel a chad el mo obang?

¹⁶ Kid a diak demecherrungel me kede blechoel el omekesiu er kid er a rebebil. Engdi a Tekingel a Dios a melisiich er kid el mo omes aike el tekoi el kid a sebeched el meruul. (Monguiu er a Galatia 6:4.) Ngdiak el kid el rokui a sebeched el mo ta er a remechuodel er a ongdibel,  pioneer, missionari, me a lechub e ngchedal a Bethel. Aikang a ileakl el rolel a omesiou, engdi sel kot el klou el techall el kid el rokui a sebeched el mo nguu a mo kldemel a Jehovah el omerk er a ungil chais. Mada me bo dongreos er tia el ileakl el techall el dobang!

17. Kede chelebangel a ua ngera el blekeradel er chelechang? E ngera uchul me ngdiak el kirel el mo mechitechut a rengud?

¹⁷ Ngar er a chelsel tia el beluulechad er a Satan, e nglocha diak el sebeched el mesiou er a Jehovah el ngar er sel rolel el soad. Nglocha diak el sebeched el melodech a bebil el tekoi er a chelsel a klengar er kid, el ua ngerecheled el kirel a telungalek er kid, me a chelitechetul a bedenged. Engdi ngdiak el kirel el mo mechitechut a rengud. Me alta ngbetok a mondai er kid engdi ngdirk sebeched el ouchais er a rechad el kirel a ngklel a Jehovah me a Rengedel. Me a kot el klou a ultutelel el tekoi a kmo, doruul aike el sebeched el kirel a Jehovah e doluluuch me lengesuterir tirke el sebechir el kuk remuul a lmuut el betok er a omesiungir. Lak mobes, a rebek el chad el oldanges er a ngklel a Jehovah a mekreos er a osengel!

18. Ngsebeched el omes el bedul uchei el kirel a ngerang, engdi ngera el klou el techall a dobang er chelechang?

¹⁸ A Jehovah a kongei er kid me kede mo kldemel er a ureor alta ngdiak demecherrungel. Ngkmal klou el techall a dobang el oureor el obengkel a Dios er kid er chelecha el uriul sils! Kede omes el bedul uchei el kirel a mera el klengar el mo sebeched el oldeu a rengud el meruul a betok el tekoi el diak el sebeched el meruul er chelechang. Me ngdi kmedung, e a Jehovah a mo meskid a diak a ulebengelel el klengar el ngar sel beches el beluulechad er ngii el mui er a deurreng me a budech.​—Tit. 1:2.

19. Ngera el ungil el tekoi a bla letibir a Jehovah el kirel a ngar medad el klebesei?

¹⁹ Ngdi kmedung e kede mo soiseb er a beches el beluulechad. Kede melatk a tekingel a Moses el mo er a rechad er a Israel er a uchei er a bo lesiseb er a Beluu er a Nglat el kmo: “A RUBAK a mo rullemiu el di mo ungil er a rokui el cho moruul.” (Dut. 30:⁠9) Me a uriul er a Armakedon, e a Jehovah a nguu tia el chutem el mesterir tirke el kldemel er a ureor el ua letilbir. E seikid, e kede mo meruul er a beches el urered el mo mengetmokl er a beluulechad el mo klebokel el baradis!