1. ¿Imaynatá Jehová trabajota qhawan, chantá imatá runasman cielopi kajkunaman ima qorqa?

JEHOVAQA trabajaspa mayta kusikun (Sal. 135:6; Juan 5:17). Munantaj ángeles, runas ima llankʼaspa pay jina kusikunankuta. Chayraykutaj kusiyta tarinankupaj jina ruwaykunata qon. Sutʼincharinapaj, Jehovaqa tukuy imata ruwashaspa kʼata Churin ruwaysinanta saqerqa (Colosenses 1:15, 16 leey). Chayrayku Bibliaqa Jesús niraj Jallpʼaman jamushaspa cielopi Tatanwan khuska kasqanta niwanchej, uj “yanapaj Maestro jina” (Pro. 8:30, NM).

2. ¿Imaynatá yachanchej, angelesman kusikunankupaj jina ruwaykunata Jehová qosqanta?

² Bibliaqa Génesis libromanta, Apocalipsis librokama, Jehová angelesman ruwaykunata qosqanta rikuchin. Adanwan Evawan juchallikojtinku, Edén huertamanta wijchʼuchikamojtinku ima, Jehovaqa “querubín nisqa angelesta[...] churarqa [...], uj larwashaj espadatawan, muyuyninta muyushajta, amapuni pipis kawsayta qoj sachʼaman qayllaykunampaj” (Gén. 3:24). Chantá Apocalipsis 22:6 versículo rikuchin, Dios “angelninta kacham[usqanta] kamachisninman rikuchinampaj, chay imas usqhayta ruwasqas kananmanta”.

3. ¿Imaynatá Jesús Tatan jina ruwarqa kay Jallpʼapi kashaspa?

³ Jesús kay Jallpʼapi kashaspa Jehová kamachisqanta tukuy sonqo ruwarqa. Tatan jina ruwasqanraykutaj, yachachisqasninman jatuchaj ruwaykunata qorqa. Chayta kusiywan ruwanankupajtaj, pay nerqa: “Noqapi creejqa, paypis noqaj ruwasqayta ruwallanqataj; chaypis astawanraj ruwanqa, imaraykuchus noqaqa Dios Tataman rishani”, nispa (Juan 14:12). Chay ruwayta usqhayllata juntʼananku kasqantataj rikucherqa kayta nispa: “Pʼunchayraj kashajtin, Kachamuwajpa ruwanasninta ruwananchejpuni tiyan; tutaqa chayamushanña, chaypachataj ni pi imatapis ruwayta atenqachu” (Juan 9:4).

4-6. 1) ¿Imaraykú may agradecesqas kashanchej Noé, Moisés ima Jehovaj nisqanman jinapuni ruwasqankumanta? 2) Jehová tukuy ima ruwaykunata qowasqanchejta, ¿imaraykú juntʼananchej tiyan?

⁴ Jehovaqa Jesús niraj Jallpʼaman jamushajtin, runasman kusikunankupaj jina ruwaykunata qorqa. Adanwan Evawan, Jehová ruwaykunata qosqanta mana juntʼajtinkupis, waj runas juntʼarqankupuni (Gén. 1:28). Sutʼincharinapaj, Jehovaqa Noeman imaynatachus arcata ruwananta kamacherqa, pay, familian ima Jatun Parapi mana wañunankupaj. Noetaj, “Dios imaynatachus payman nisqanman jina” ruwarqa. Chayraykutaj noqanchejpis kausashanchej (Gén. 6:14-16, 22; 2 Ped. 2:5).

⁵ Moisespis, “Dioswan Tinkukuna Toldo[ta]” ruwashaspa, sacerdotesta wakichishaspa ima, Jehová kamachisqanman jinapuni ruwarqa (Éxo. 39:32; 40:12-16). ¿Imaynatá yanapawanchej Jehovaj kamachisqanman jina Moisés ruwasqan? Apóstol Pablo sutʼinchasqaman jina Dioswan tinkukuna toldo, llajtapi sacerdotes kasqan imaqa aswan qhepaman sumaj imas jamunanta rikucherqa (Heb. 9:1-5, 9; 10:1).

⁶ Jehovaj munaynin juntʼakusqanman jina, kamachisnenqa waj jina ruwaykunasta japʼinchej. Ruwayninchej waj jina kajtinpis Jehovata jatunchan, cheqa sonqo runastataj yanapan. Chaytaj sutʼi rikukun, Jesús niraj Jallpʼaman jamushaspa imastachus ruwasqanpi, chantá kay Jallpʼapi imastachus ruwasqanpi ima (Juan 4:34; 17:4). Kunanpis Dios ruwaykunasta qowasqanchejta ruwaspa, Diosta jatunchanchej (Mat. 5:16; 1 Corintios 15:58 leey). ¿Imaraykú chayta nisunman?

7, 8. 1) ¿Imastataj Diospa kamachisnin ruwashanku? 2) ¿Imaynatá Diospa nisqasninta qhawana tiyan?

⁷ Jehovaqa juchasapas kajtinchejpis, paywan khuska trabajajta saqewanchej. Chaytaj may sumaj (1 Cor. 3:9). Wakin hermanosqa Noé jina, Moisés jina ruwashanku. Yanapakunkutaj, Tantakuna Wasista, Jatun Tantakuna Wasista, sucursalesta ruwaypi. Noqanchejpis ichá Tantakuna Wasista allinchaypi, chayri Jehovaj testigosninpa centralninkuta (Warwick, Nueva York) ruwaypi yanapakushanchej (23 paginapi dibujota qhawariy). Chay ruwaytataj may jatunpaj qhawana, imaraykuchus chayqa Jehovata jatunchan. Chantapis kay tiempopeqa uj jatun ruwaypi yanapakuyta atillanchejtaj. Chaytaj Diosmanta runasman willamuy kashan. Chantapis chay ruwayqa Jehovata jatunchan, kasukoj runastapis yanapan (Hech. 13:47-49). Chay ruwayta sumajta juntʼanapajtaj Diospa llajtan yanapawanchej. Chayraykutaj wakin kutisqa waj ruwaykunata qowanchej.

⁸ Jehovaj cheqa sonqo kamachisnenqa, kusiywan Jehovaj nisqanman jina ruwanku  (Hebreos 13:7, 17 leey). Ichá qallariypeqa mana entiendesunchu imaraykuchus imatapis waj jinamanta ruwana kasqanta. Jinapis yachanchej, Jehovaj kamachisqanman jinapuni ruwayqa allinninchejpaj kasqanta.

9. ¿Imastá ancianos ruwanku qotuchakuyta yanapanankupaj?

⁹ Ancianos qotuchakuy ruwananpaj jina ruwasqankoqa, Diospa munayninta ruwayta munasqankuta rikuchin (2 Cor. 1:24; 1 Tes. 5:12, 13). Paykunaqa Diospaj mayta llankʼayta munanku, chantapis usqhayllata waj jinasmanta willayta yachakunku. Wakenqa ichá telefononejta, barcos sayanku chaynejpi, ashkha runas kanku chaypi ima willakunanpaj wakichiyta iskayrayarqanku. Chay lugaresman willaj rispataj allin risqanta rikorqanku. Sutʼincharinapaj, Alemaniamanta tawa precursoresqa, ashkha watastaña mana willakorqachu chay negociosman willaj rerqanku. Paykunamanta ujnintaj Michael karqa. Pay nin: “Ashkha watastaña chay negosciospi Reinomanta mana willarqaykuchu, chayraykutaj manchachikusharqayku. Jehovaj yanapayninwantaj chay paqarinpi willayta atillarqayku. May kusisqas kasharqayku Jehovapi atienekusqaykumanta, Reinomanta Willayninchej hojitapi yuyaychakusqanman jina ruwasqaykumanta ima”, nispa. ¿Noqanchejpis chay hermanos jinachu waj jinasmanta willamunapaj kallpachakushanchej?

10. ¿Imastataj Diospa llajtan kay qhepa wataspi ruwashan?

¹⁰ Wakin kutisqa Diospa llajtan waj jinasmanta imatapis ruwanan kanqa. Kay qhepa watasllapi ashkha sucursales ujchaykukorqanku. Chayta ruwakusqanrayku, chay sucursalespi llankʼaj hermanosqa, waj jinamantañataj Diospaj llankʼanankupaj kallpachakorqanku. Ajinata ruwakusqan allinpaj kasqantaj, pisi tiemponman sutʼi rikukorqa (Ecl. 7:8). Kay tiempopi Diospa llajtanpi chay hermanos jina kusiywan yanapakoyqa, ¡may sumajpuni!

11-13. ¿Imastataj wakin hermanos ruwarqanku Diospaj llajtan waj jinasmanta imatapis ruwasqanrayku?

¹¹ Sucursales ujchaykukusqankurayku wakin hermanos kausayninkuta tijrachisqankumanta mayta yachakusunman. Ashkha hermanos chay sucursalespi watasta llankʼarqanku. Sutʼincharinapaj, uj juchʼuy Betelpi llankʼaj qhariwarmita, Mexicopi kaj sucursalman ripunanta nerqanku. Ñaupajta llankʼarqanku chay sucursalmanta nisqaqa, Mexicopi kaj sucursal aswan jatun karqa. Rogelio nin: “Familiaykumanta, amigosniykumanta ima, mana tʼaqakuyta atillarqaykuchu”, nispa. Juantapis Mexicopi kaj sucursalman ripunanta nerqanku. Pay nin: “Tukuy imata watejmanta yachakunay karqa. Waj ususman, waj laya yuyayman ima”, nispa.

¹² Europapi sucursales ujchaykukusqanrayku, ashkha betelitas Alemania suyupi kaj sucursalman ripunanku karqa. Paykunataj mana yachaykukuyta atillarqankuchu, imaraykuchus waj llajtaman ripuspaqa, llajtanchejta faltachanchejpuni. Sutʼincharinapaj Suiza Betelmanta Alemania sucursalman ripojkunaqa, Alpes orqosta qhawayta faltacharqanku. Austria Betelmanta ripojkunataj, Autriapi pisi betelitaslla kasqankuta faltacharqanku.

¹³ Waj suyupi kaj sucursalman ripojkunaqa, waj wasipi tiyakuyman, mana rejsisqanku hermanoswan llankʼayman, waj llankʼaykunata ruwayman ima yachakunanku karqa. Chantapis waj qotuchakuyman, uj mosoj territoriopi willayman ima yachakunallankutaj karqa. Wakinkunataj ichapis waj qalluta parlayta yachakunanku karqa. Chaykunata ruway mana atikullajtinpis, ashkha betelitas chayta ruwarqanku. ¿Imaraykutaj?

14, 15. 1) Jehovawan khuska llankʼayta jatunpaj qhawasqankuta, ¿imaynatá ashkha hermanos rikuchinku? 2) ¿Imaynatá paykuna jina ruwasunman?

 ¹⁴ Grethel sutiyoj hermano nin: “Jehovata munakusqayrayku waj suyupi kaj sucursalman llankʼaj riporqani. Noqaqa mana uj suyutachu, uj wasitachu, chayri uj llankʼaytachu munakuni, manaqa Jehovata”, nispa. Dayska sutiyoj hermana nin: “Jehová wajyarishawarqa, chayraykutaj mana iskayrayaspa riporqani”, nispa. Andrewan Gabrielawanqa waj sucursalman ripuymanta kikillantataj yuyanku. Chayrayku ninku: “Ajinamanta Diospaj llankʼayta kausayniykupi astawan ñaupajman churanaykuta repararqayku”, nispa. Paykunaqa Diospa llajtan imallatapis waj jinamanta ruwajtin, kusiywan yanapakuna kasqanta yuyanku.

¹⁵ Sucursales wisqʼakushasqanrayku, wakin betelitasqa precursores jina llankʼanankupaj wajyarisqas karqanku. Ajinapi rikukorqanku Dinamarcamanta, Noruegamanta, Sueciamanta wakin betelitas. Imaraykuchus chay sucursales ujllaman ujchaykukorqanku. Kunantaj chayta Escandinavia sutiwan rejsikun. Chay betelitasmanta iskaytaj Florian, Anja ima sutikunku. Paykuna nerqanku: “Noqaykoqa kay mosoj llankʼayniykuta may kusiywan qhawayku. Jehová, paypaj llankʼajta saqewasqanchejqa, ¡may sumajpuni! Chayraykutaj ashkha bendicionesta japʼisqaykuta niyku”, nispa. Ichapis noqanchejqa ni jaykʼaj paykuna jinachu ruwana kanqa. Chaywanpis, chay hermanos jina Diospa Reinonta ñaupajman churanapaj kallpachakuyta atinchej, ¿icharí? (Isa. 6:8.) Jehovaqa may allinpaj qhawan, bendecin ima, paypaj mayllapipis llankʼayta munajkunata.

16. 1) ¿Imatataj Gálatas 6:4, 5 yuyaychawanchej? 2) ¿Imatataj ni jaykʼaj qonqanachu tiyan?

¹⁶ Pantaj runas kasqanchejrayku, wajkunawan kikinchakuyta yachanchej. Diospa Palabrantaj ruwasqanchejwan sonqo juntʼasqa kanata yuyaychawanchej (Gálatas 6:4, 5 leey). Mana tukuyninchejchu  qotuchakuypi ñaupajta apajkuna kanchej. Nillataj tukuychu precursores, misioneros, betelitas ima kayta atinchej. Chaywanpis ni jaykʼaj qonqanachu tukuypis Jehovawan khuska llankʼayta atisqanchejta, nisunman runasman Diosmanta willamuyta atisqanchejta. Chay ruwayqa may sumajpuni, ¿icharí?

17. Satanaspa sajra pachanpi tiyakusqanchejrayku, ¿imastá mana ruwayta atillasunchu? ¿Imaraykutaj chay mana llakichinawanchejchu tiyan?

¹⁷ Satanaspa sajra pachanpeqa ichapis mana tukuy ima munasqanchejtachu Jehovapaj ruwasunchej. Chaytaj mana llakikunapajchu. Ichá familiapi ruwanasninchejta juntʼananchej kasqanrayku, onqosqa kasqanchejrayku Diospaj mana llankʼayta atillasunchu. Jinapis tukuy tiempo Dioswan khuska llankʼasunman, sutinta, Reinonmanta ima tukuy runasman rejsichispa. Chay ruwaytataj may jatunpaj qhawana. Tukuy atisqanchejta Diospaj ruwayqa, ¡may sumaj! Chantapis Diospaj astawan llankʼayta atej hermanospaj mañapuna. Yuyarikunataj, Jehovaj sutinta jatunchajkunaqa, Jehovaj ñaupaqenpi may sumajpaj qhawasqa kasqankuta.

18. ¿Imaraykutaj munayninchejta ruwanapaj mosoj pachata suyakuna tiyan?

¹⁸ Pantaj runas kajtinchejpis, Jehovaqa mayta kusikun paywan khuska trabajashasqanchejmanta. Kay qhepa pʼunchaykunapi Dioswan khuska llankʼayta, ¿jatunpajchu qhawanchej? Chantapis munayninchejta ruwanapaj, ¿mosoj pachatachu suyakuyta munashanchej? Chay pʼunchay chayamojtenqa cheqamanta wiñaypaj, kusisqastaj kausakusunchej (1 Tim. 6:18, 19).

19. ¿Imastataj mosoj pachapi japʼisun?

¹⁹ Mosoj pachaqa qayllapiña kashan. Chayrayku imatachus Moisés israelitasman niraj Sumaj Jallpʼaman yaykushajtinku nisqanpi tʼukurina. Pay nerqa: “Diosqa qhapajyachisonqachej tukuy ruwasqasniykichejpi”, nispa (Deu. 30:9). Jehovaqa Armagedón pasayta paywan khuska trabajajkunaman kay Jallpʼata qowasun. Chaypitaj uj mosoj llankʼayta japʼisun. Chay llankʼaytaj kay Jallpʼata uj paraisoman tukuchiy kanqa.