1. a) Jehová Diosca imata rurashpapash ¿imashinata ruran? b) Angelcunapash gentecunapash cushilla causachunga ¿imatata Jehová Diosca ruran?

JEHOVÁ DIOSCA imata rurashpapash cushijushpami ruran (Sal. 104:31; Juan 5:17). Paica angelcunapash gentecunapash cushijushpa imatapash rurachun munashpami, paicunamanga imagutapash rurachun mingan. Jesusmanda parlashpaca, Jesustami Jehová Diosca tucuita rurashpa ayudachun agllarca (Colosenses 1:15, 16, liingui). Chaimandami Bibliapica nin, Jesús jahua cielopi cashpaca ‘ali rurajmi’ carca nishpa (Prov. 8:30, NM ).

2. ¿Imashinata yachanchi, Jehová Diosca minishtirishca ruraicunata angelcunaman mingashcata?

² Bibliapica callarimanda tucuricamanmi angelcunaman huaquin ruraicunata Jehová Dios mingashcata villajun. Génesis libropica ninmi, Adán y Eva na cazujpimi Jehová Diosca jardín de Edenmanda llujchishpa cacharca nishpa. Ashtahuangarin ninmi: ‘Causaita cuj yuraman rina ñanda cuidachunmi’ Jehová Diosca ishcai querubín angelcunatapash, muyundi rupajuj espadatapash churarca nishpa (Gén. 3:24). Cutin Apocalipsis 22:6​pica ninmi: ‘Ñalla ima tucunata paita sirvijcunaman ricuchichunmi, Diosca paipa angelta cachamurca’ nishpa.

3. Cai Alpapi cashpaca ¿imashinata Jesusca Jehová Diospa ejemplota catijushcata ricuchirca?

³ Jesús cai Alpapi cashpaca cushijushpami Jehová Dios mingashcataca rurarca. Jehová Diospa ejemplota catishpami Jesusca paipa catijcunamanbash minishtirishca ruraicunata mingarca. Jesusca paipa catijcuna pai mingashcata cushijushpa rurachunmi nirca: ‘Ñucata crijca, ñuca imatalla rurashcacunatami paipash ruranga. Ñuca Taitapaman ñuca rijpica, ñuca rurashcacunamandapash ashtahuan yalitami [paica] ruranga’ nishpa (Juan 14:12). Ashtahuangarin, pai mingashcata uchalla rurachunmi Jesusca nirca: “Punlla cajpillatami, ñucata cachamuj Taita imata rurachun mandashcataca, pactachinapacha cani. Tutayajpica, pipash na imatapash rurai ushanllu” nishpa (Juan 9:4).

4, 5. ¿Imamandata Noepash Moisespash Jehovata cazushcata agradicina capanchi?

⁴ Jehová Diosca, Jesús cai Alpaman nara shamujpillatami gentecunamanbash huaquin ruraicunata mingarca. Jehová Dios mingashcata rurashpaca cushijushcami canman carca. Adán y Eva Jehová Dios mingashcata na pactachijpipash huaquingunaca cushijushpami Jehová mingashcataca pactachirca (Gén. 1:28). Noepa ali ejemplota ricupashun. Jehová Diosca Noepash paipa familiapash Jatun Manllanai Tamiamanda salvarichunmi Noemanga arcata imashina ruranata tucuita villarca. Jehová Diosta Noé tucuipi cazushcamandami ñucanchicunapash causanajunchi (Gén. 6:14-16, 22; 2 Ped. 2:5).

⁵ Moisespash Jehová Dios tucui ima nishcata catishpami Jehovata adorana carpa huasitapash sacerdotecuna imashina sirvinatapash nirca (Éx. 39:32; 40:12-16). Moisés tucuita cazushcamandaca ¿imatata yachajupanchi? Apóstol Pablo nishca shinaca, Jehovata adorana carpa huasipash, sacerdotecunapash ‘jipa punllacunapi Dios aliguta caramunatami ricuchijurca’ (Heb. 9:1-5, 9; 10:1).

6. Jehová Diospa tucui rurashcacunaca ¿imapata can?

⁶ Jehová Diosca paipa munaita pactachishpa catingapami paipa sirvijcunamanga shuj shuj ruraicunata mingan. Shuj shuj ruraicunata mingajpipash tucui rurashcacunami Jehová Diosta jatunyachingapaj, Diosta sirvijcuna cushijuchunbash can. Jesusca jahua pachapi cashpapash, cai Alpapi cashpapash siempremi paipa Taita mingashcata rurashpa, paipa Taitata jatunyachirca, cushijurcapash (Juan 4:34; 17:4). Cunan punllacunapipash Jehová mingashcata rurashpami Jehovata jatunyachinajunchi (Mat. 5:16; 1 Corintios 15:58, liingui). ¿Imamandata shina ninchi?

7, 8. a) Cunan punllacunapi Jehovata sirvijcunaca ¿ima mingashcatata pactachi ushapanchi? b) Imapash ruraicunata Jehová Dios mingajpica ¿imatata yarina capanchi?

⁷ Jehová Diosca gentecuna juchayu cajpipash paita ayudachun munashpami huaquin ruraicunata paicunaman mingashca (1 Cor. 3:9). Huaquin huauquicunaca Noé cuenda, Moisés cuendami Jatun Tandanajui Huasicunata, Tandanajui Huasicunata o Betel huasicunata rurashpa ayudanajun. Cutin shujcunaca Tandanajui Huasicunata arreglashpa o Warwick Nueva York llactapi ñucanchicunapa ashtahuan jatun Betel huasita rurashpami ayudanajun. (Callari dibujota ricupangui.) Huaquingunalla huasichishpa ayudanajujpipash tucui testigo de Jehovacunami ali villaicunata villachishpa huasichinshna ayudanajunchi. Chai ruraicunahuanmi Jehová Diosta jatunyachinchi, ñucanchillatapash cushijunchi (Hech. 13:47-49). Aliguta villachichunga Jehovapa organizacionmi ñucanchitaca ricuriajun. Chaimandami huaquinbica shuj shuj mushuj ruraicunapi ayudachun mingan.

⁸ Jehovata ali sirvijcunaca siempremi Jehová  Diospa organización imata rurachun mandashcata cushijushpa catinajunchi (Hebreos 13:7, 17, liingui). Huaquinbica callaripica yanchipashchari, imamandashi caita o chaita rurana canchi nishpa. Shina yashpapash Jehovapa mingashcata rurashpaca ñucanchipa alipallatami canga.

9. Ancianocunaca ¿ima ali ejemplotata huauquipanicunamanga ricuchin?

⁹ Congregacionbi ancianocunapash Jehovapa munaita pundapi churashpami congregacionman ali ejemplota ricuchinajun (2 Cor. 1:24; 1 Tes. 5:12, 13). Paicunaca tucui shunguhuan empeñarishpa, tucui instrucciongunata catishpami shuj shuj laya villachinacunapi participanajun. Huaquingunaca telefonopi cayashpa, callecunapi, parquecunapi, paradacunapi, plazacunapi villachina ali canataca na crinllu carca. Alemania llactamanda chuscu precursorcunapa ejemplota ricupashun. Chai chuscundicunamandaca Michaelca ancianomi carca. Michaelca ninmi, “chuscundicuna parlarishpami nircanchi, negocio pushtucunapica unaitami na villachishcanchi nishpa. Villachinataca manllanajurcanchimi. Shinapash Jehová Diosca ñucanchicuna imashina sintirijujta ricushpami chai punllaca alipacha villachichun ayudarca. Jehová Diospi confiashpa villachimanda, shinallata Diosmanda Villashunchi hojapi sugerenciacunata catishcamandaca ninandami cushijurcanchi” nishpa. ¿Ñucanchipash paicunashna nita ushapanchimanllu? ¿Ñucanchicunapash shuj shuj laya villachinacunapi participangapaj munanchimanllu?

10. Caina huatacunapica ¿ima cambiocunatata Jehovapa organizacionga rurashca?

¹⁰ Huaquinbica tauca cambiocunami ñucanchi sucursalcunapica tiashca. Huaquin ejemplocunata ricupashun. Caina huatacunapica uchilla sucursalcunata vichashpami chaipi ruraicunataca ashtahuan jatun sucursalcuna ricui callarirca. Chaimandami vicharishca sucursalpi sirvinajuj huauquipanicunapa callaripi huaquin cambiocunata rurana shinlli cajpipash, jipamanga chai cambiocunata rurana ali cashcata cuenta japirca (Ecl. 7:8). Chai huauquipanicunaca ima punllapash na cungaipa ruraipimi Jehovata sirvijcunataca ayudanajun.

11-13. Jehovapa organización cambiocunata rurajpica ¿imamandata ashtaca betelitacunaca paicunapa munaicunata huashaman saquishpa chai cambiocunata chasquishca?

¹¹ Vicharishca sucursalcunapi sirvinajuj huauquipanicunamandaca ¿imatata yachajui ushanchi? Huaquin huauquipanicunaca ashtaca huatacunatami paicunapa llacta sucursalpi sirvinajushca. Shuj cusahuarmica Costa Rica uchilla sucursalmandami México sucursalman rina carca. México sucursalpica ashtaca ashtaca huauquipanicunami sirvinajurca. Chaimandami Rogelioca nin: “Familiacunatapash amigocunatapash saquishpa rinaca shinllipachami carca” nishpa. Juanbash ninmi: “Mexicoman rishpaca cutinmi amigocunata mascana carcani. Chai llacta costumbrecunatapash yachajunami carcani. Paicuna shuj shuj yuyaicunata charishcatapash intindinami carcani” nishpa.

¹² Europa huaquin llactacunapi sirvinajuj betelitacunapapash, paicuna sirvinajushca Betelta saquishpa Alemania Betelman rinaca shinllimi carca. Suiza Betelpi sirvinajujcunaca chai llactapi juyailla urcucunata ricunata saquishpami, Alemania Betelman rina tucurca. Cutin Austria Betelpi sirvinajujcunaca paicunapa llactapi tranquilo causaita saquishpami Alemania Betelman rirca.

¹³ Shuj llacta Betelpi sirvingapaj rishpaca mushuj cuartocunapimi yacharina tucun. Shinallata na rijsishca huauquipanicunahuanmi chai Betelpica trabajana tucun. Chai Betelcunapi shuj shuj trabajocunatapashmi yachajuna can. Ashtahuangarin, shuj mushuj congregacionman rina tucun, shuj mushuj territoriopi villachina tucun, huaquinbicarin shuj mushuj shimitapashmi yachajuna tucun. Chaicunata rurana shinlli cajpipash ¿imamandata  ashtaca betelitacunaca cushijushpa cambiocunata rurashca?

14, 15. a) ¿Imashinata ashtaca huauquipanicunaca maipi cashpapash Jehová mingashcataca alicachishpa pactachishca? b) Paicunapa ejemplota catijushcataca ¿imashinata ricuchita ushapanchi?

¹⁴ Grethel shuti paniguca ninmi: “Jehovapa organización cambiota rurajpica cunanmi Jehovata juyashcata ricuchina cani. Maijan llactapi cashpapash, maijan Betelpi cashpapash, imapi sirvina cajpipash Jehovata juyaimandaca ruranami cani yashpami cambiota chasquircani” nin. Dayska shuti panigupash ninmi: “Jehová Diosmi chaiman invitajuhuan yashpami ari nishpa rircanilla” nin. André paipa huarmi Gabrielapash ninmi: “Ñucanchi munaicunata huashaman saquishpa Jehovata sirvingapaj munajushcata ricuchinami canchi yarcanchimi. Jehovapa organización cambiocunata rurai callarijpica na nijunapa randica cushijushpami uchalla chasquina canchi” nin.

¹⁵ Sucursalcuna vicharijpica huaquin betelitacunataca precursorcuna shina sirvichunmi cachan. Shuj ejemplota ricupashun. Dinamarca, Noruega, Suecia sucursalcuna vicharishpami Escandinavia sucursal tucurca. Florian huauquipash paipa huarmi Katherinepash ninmi: “Mushuj cambiota chasquinataca ninandami alicachircanchi. Maipi cashpapash Jehovapa mingashcata ruranaca alimi cashca. Ashtaca bendiciongunatami chasquishcanchi” nin. Ashtacacunaca tal vez na jatun cambiocunata rurashunllu. Shinapash, ¿nachu chai huauquipanicunapa ejemplota catishpa Taita Diospa Reinotaca pundapi churai ushanchiman? (Is. 6:8.) Maipi cashpapash Jehová Diospa ruraita alicachishpa pactachijcunaca ashtaca bendiciongunatami chasquin.

16. a) Gálatas 6:4​pica ¿ima consejotata cun? b) Tucui Testigocunaca ¿ima bendiciondata charipanchi?

¹⁶ Gentecunaca juchayu caimandami ñucanchi rurashcacunataca shujcunapa rurashcacunahuan chimbapurashpa ricunchi. Shinapash Bibliapica consejanmi, cada uno imata rurai ushashcatallami  ricuna canguichi nishpa (Gálatas 6:4, liingui). Ashtacacunaca na ancianocuna, na precursorcuna, na misionerocuna, na betelitacuna cashpapash tucuicunami ali villaicunata villachishpa Jehovata ayudana bendicionda charinchi. ¿Nachu shujcunaman villachinataca ninanda alicachina canchi?

17. a) Diablopa nali mundopi causanajushcamandaca ¿imatata na rurai ushapanchi? b) Shinapash ¿imamandata na desanimarina capanchi?

¹⁷ Jehovata ashtahuan sirvingapaj munajushpapash Diablopa nali mundopi causajuimandaca na ushanchichu. Shinapash na desanimarinachu canchi. Familiata mantinina cashpa, ungushca cashpa o shuj responsabilidadcunata pactachina cashpapash, tucuicunami tiempota aliguta aprovechashpa Taita Diospa shutimanda, Diospa Reinomanda villachita ushanchi. Ashagutalla rurashpapash Jehovatami sirvinajunchi. Ashtahuangarin Jehová Diostaca mañanami canchi, ashtahuan sirvi ushaj huauquipanicunata bendiciapangui nishpa. Yaripashunchi, Jehová Diospa shutita jatunyachij gentecunataca alicachishpami Jehová Diosca ricujun.

18. ¿Imamandata Jehovapa mingashcata pactachingapaj empeñarina capanchi?

¹⁸ Juchayucuna cashpapash Jehovapa mingashcata rurangapaj empeñarijujpica cushijushpami Jehová Diosca ricujun. Cai tucuri punllacunapi Jehová Diosta ayudanaca shuj jatun bendicionmi can. Shamuj punllacunapimi ñucanchi munaicunataca pactachi ushashun. Chai punllacunapimi unai unaicaman tranquilo, cushilla causaita charishun (1 Tim. 6:18, 19).

19. Jipa punllacunapica ¿imashinata Jehová Diosca ñucanchita bendicianga?

¹⁹ Ñallami shuj juyailla paraíso Alpagupi causashun. Israelitacuna Jehová Dios cusha nishca alpacunaman ña yaicugrinajujpica Moisesca nircami: ‘Canda Mandaj Taita Diosca, canba maquihuan tucui imatalla rurashcatapash ashtacatami mirachinga’ nishpa (Deut. 30:9). Armagedón jipaca, paipa nishcata pactachishpami Jehová Diosca cunan punllacunapi paita ayudashcacunamanga pai carasha nishca Alpata cunga. Chai punllacunapipash Jehová mingashcata pactachishpami cai Alpataca shuj juyailla paraisota rurashun.