1. Jehova utiva njani ngekusebenta, futsi loko kumenta kutsi enteni?

JEHOVA uyajabula ngemsebenti lawentako. (Hla. 135:6; Joh. 5:17) Kute ente tidalwa takhe letihlakaniphile titfole injabulo lefanako futsi tibe nemuva wekwenetiseka ngaloko letikufezile, Jehova utinike umsebenti lojabulisako nalowenetisako. Sibonelo saloko kutsi wasebenta neNdvodzana yakhe lelitibulo ngesikhatsi adala. (Fundza Kholose 1:15, 16.) LiBhayibheli lisitjela kutsi ngesikhatsi asengaketi emhlabeni, Jesu abeseceleni kwaNkulunkulu ezulwini “njengengcweti yekwakha.”—Taga 8:30.

2. Yini lekhombisa kutsi tidalwa temoya betisolo tenta umsebenti lobalulekile nalojabulisako?

² Kusukela ekucaleni kuze kube sekugcineni, liBhayibheli linetibonelo letikhombisa kutsi Jehova abesolo aniketa emadvodzana akhe langumoya umsebenti. Ngemuva kwekutsi Adamu na-Eva bone futsi bacoshwe ekhaya labo leliliPharadisi, “ngasemphumalanga nensimi yase-Edeni [Nkulunkulu] wabeka emakherubhi kanye nenkemba lenelilangabi lephendvuphendvukako ilindze indlela leya esihlahleni sekuphila.” (Gen. 3:24) Sembulo 22:6 siveta kutsi Jehova ‘watfuma ingilosi yakhe kutsi ibonise tinceku takhe tintfo letitawukwenteka ngekushesha.’

3. Ngesikhatsi asemhlabeni, Jesu wasilandzela njani sibonelo saBabe wakhe?

³ Ngesikhatsi asemhlabeni njengemuntfu lote sono, Jesu wakujabulela kwenta imisebenti letsite lebekayinikwe nguJehova. Alandzela sibonelo saBabe wakhe, Jesu waniketa bafundzi bakhe umsebenti lobalulekile. Kuze abente bawulangatelele umsebenti lebebatawenta, watsi: “Ngicinisile, ngicinisile ngitsi kini: Loyo lokholwa ngimi utawukwenta lemisebenti lengiyentako, futsi utawukwenta imisebenti lemikhulu kunalena, ngobe mine ngiyahamba ngiya kuBabe.” (Joh. 14:12) Kuze agcizelele kubaluleka kwalomsebenti, Jesu wachaza watsi: “Kufanele sente loko lokwemukelwa nguloyo longitfumile, kusesemini; ngobe busuku buyeta lapho kutawubate umuntfu longakhona kusebenta.”—Joh. 9:4.

4-6. (a) Yini lesenta sijabule ngekutsi Nowa naMosi batifeza tabelo tabo labatinikwa nguJehova? (b) Ifanana ngani yonkhe imisebenti Nkulunkulu layinikete bantfu?

⁴ Ngisho nangaphambi kwekutsi Jesu ete emhlabeni, bantfu baniketwa umsebenti lowenetisako. Nanobe Adamu na-Eva behluleka kwenta umsebenti lebebanikwe wona, labanye benta njengobe Nkulunkulu abeshito. (Gen. 1:28) Nowa wanikwa ticondziso leticacile tendlela yekwakha umkhumbi kute asindzise kuphila ngesikhatsi saZamcolo. Wakwenta ngekucophelela loko Jehova labemtjele kona. Siyaphila lamuhla ngesizatfu sekutsi watilalela ticondziso taJehova!—Gen. 6:14-16, 22; 2 Phet. 2:5.

⁵ Mosi wanikwa ticondziso leticacile tekwakha lithende lekukhontela nekuhlela baphristi, futsi watilandzela ngekucophelela. (Eks. 39:32; 40:12-16) Nalamuhla, siyazuza ngekwetsembeka kwakhe ekufezeni lowo msebenti lanikwa wona. Sizuza njani? Umphostoli Pawula wachaza kutsi tincenye talowo Mtsetfo betisitfunti ‘setintfo letinhle lebetiseta.’—Heb. 9:1-5, 9; 10:1.

⁶ Umsebenti Nkulunkulu lawunika tinceku takhe uyashiyashiyana kuye ngendlela injongo yakhe lechubeka ifezeka ngayo. Nanobe kunjalo, umsebenti letinikwa wona bewuhlale udvumisa Jehova futsi uzuzisa bantfu labalalelako. Loku kuliciniso nasemsebentini lowafezwa nguJesu ngesikhatsi asengakaphili emhlabeni nangesikhatsi asasemhlabeni. (Joh. 4:34; 17:4) Ngendlela lefanako, umsebenti lesinikwe wona lamuhla udvumisa Jehova. (Mat. 5:16; fundza 1 Khorinte 15:58.) Kungani kunjalo?

7, 8. (a) Chaza umsebenti emaKhristu lamuhla lanelilungelo lekuwenta. (b) Yini lokufanele siyente ngeticondziso letivela kuJehova?

⁷ Utawuvuma kutsi kuyajabulisa kutsi Jehova unikete bantfu labanesono lilungelo lekukhonta njengetisebenti letikanye naye. (1 Khor. 3:9) Labo labasebenta ekwakhiweni kwemaHholwa eMhlangano, emaHholwa eMbuso kanye netakhiwo teligatja benta umsebenti wekwakha lofanako naloyo lowentiwa nguNowa naMosi. Ngisho nobe uvusetela liHholwa leMbuso lasendzaweni yakini nobe unencenye ekwakhiweni kwendlunkhulu yetfu leseWarwick, eNew York, litsatse njengeligugu lelilungelo lekukhonta ngalendlela. (Buka sitfombe lesidvwetjiwe lesisekucaleni kwalesihloko.) Lona ngumsebenti longcwele. Nanobe kunjalo, onkhe emaKhristu amenywa kutsi abe nencenye ekusiteni bantfu kutsi babe nebuhlobo naNkulunkulu. Lomsebenti wentelwe kutsi udvumise Jehova futsi kuzuze bantfu labalalelako. (Imis. 13:47-49) Inhlangano yaNkulunkulu isinika ticondziso tekuwenta kahle lomsebenti. Ngalesinye sikhatsi loko kungase kusho kunikwa tabelo letinsha.

⁸ Tinceku taJehova letetsembekile betisolo titimisele kulalela ticondziso letivela kuye. (Fundza Hebheru 13:7, 17.) Ekucaleni, singahle singaticondzi kahle tizatfu tekwenta tabelo tetfu ngendlela lesitjelwa  ngayo. Nanobe kunjalo, sitati kahle tinzuzo tekubambisana naJehova kunobe nguluphi lushintjo lalubona luluhle kutsi lwentiwe.

9. Ngusiphi sibonelo lesimayelana nemsebenti bazalwane labangulabadzala labasibekako ebandleni?

⁹ Sifiso lesijulile sekufeza injongo yaJehova sibonakala endleleni bazalwane labangulabadzala labahola ngayo ebandleni. (2 Khor. 1:24; 1 Thes. 5:12, 13) Bayakhombisa kutsi batimisele kusebenta kamatima nekuhambisana netimo letishintjako. Bativumelanisa netindlela letinsha lokufanele wentiwe ngato umsebenti wetfu wekushumayela ngeMbuso waNkulunkulu. Nanobe labanye ekucaleni bebesaba kushumayela ngelucingo, kushumayela etikhumulweni temikhumbi nobe kushumayela etindzaweni letiphitsitelako, kodvwa ngekushesha batfola imiphumela lemihle. Nasi sibonelo: Emahlahlandlela lamane eJalimane akhetsa kusebenta insimi yemabhizinisi lebeyingasasetjentwa. Michael utsi: “Besekuphele iminyaka leminyenti singayisebenti lensimi, ngako besesaba kakhulu. Kufanele kube Jehova wakubona loko ngobe wasisita kutsi siyijabulele kakhulu insimi ngalelo langa. Sajabula kakhulu ngekutsi satilandzela ticondziso lebetiphume ku-Msebenti Wetfu WeMbuso futsi setsembela kuJehova kuze asisite!” Utimisele yini kwetama tindlela letinsha tekushumayela endzaweni yangakini?

10. Nguluphi lushintjo lolwenteke enhlanganweni eminyakeni lembalwa leyendlulile?

¹⁰ Ngalesinye sikhatsi, kuye kudzingeke kutsi kwentiwe lushintjo enhlanganweni. Eminyakeni lembalwa lendlulile, emahhovisi eligatja latsite ahlanganiswa nalamanye. Nanobe lolushintjo lwadzinga kutsi bazalwane nabodzadze labakhonta kulamagatja bente tingucuko letitsite, batibona tinzuzo tekwenta njalo kungakapheli nesikhatsi lesidze. (Shu. 7:8) Letisebenti letitimisele tijabula kakhulu ngekuba nencenye emlandvweni lochubekako webantfu baJehova!

11-13. Ngutiphi tinsayeya labanye labahlangabetene nato ngenca yelushintjo lolwenteka enhlanganweni?

¹¹ Singafundza tifundvo letibalulekile kulabo lebebatsintseke ngalokucondzile ngesikhatsi kuhlanganiswa emagatja. Labanye babo bese bakhonte emashumi eminyaka eBethel. Labanye labashadene lebebakhonta emndenini lomncane waseBethel emaveni Lasekhatsi neMelika bacelwa kutsi bayokhonta eBethel leseMexico, lebeyinebantfu labaphindvwe kangu-30 kuleyo lebebasuka kuyo. Rogelio utsi: “Kushiya umndeni nebangani bekumatima kakhulu.” Lomunye umzalwane lokutsiwa nguJuan, lowacelwa kutsi atfutsele eMexico, utsi: “Kuba shengatsi ucala kuphila kwakho kabusha; kudzingeka uphindze wakhe bangani labasha. Kuphindze kudzingeke kutsi wetayele emasiko lamasha netindlela letinsha tekucabanga.”

¹² Tikhonti taseBethel letisuka emaveni aseYurophu letacelwa kutsi titfutsele ehhovisini leligatja laseJalimane nato tahlangabetana nebumatima. Nobe ngubani lotsandza kubuka tintsaba letinhle angavuma kutsi bekumatima ngalabo lebebasuka eSwitzerland kutsi bashiye tintsaba letiphakeme tase-Alps. Ekucaleni, labo lebebasuka e-Austria bayikhumbula imphilo yakhona lekhululekile.

¹³ Labo labatfutsela kulelinye live kwadzingeka betayele tindzawo letinsha tekuhlala, basebente nebazalwane nabodzadze labangabati, futsi mhlawumbe kwaze kwadzingeka kutsi bafundze lolunye luhlobo lwemsebenti. Kwadzingeka betayele libandla lelisha, insimu lensha, ngisho nalolunye lulwimi. Kwenta lushintjo lolunjalo kungaba matima. Kodvwa tikhonti letinyenti taseBethel tikujabulele kukwenta loko. Kungani tente njalo?

14, 15. (a) Labanyenti bakhombise njani kutsi balitsatsa njengeligugu lilungelo lekusebenta naJehova kunobe ngumuphi umsebenti labawentako? (b) Basibonelo lesihle kitsi ngayiphi indlela?

¹⁴ Grethel utsi: “Ngasemukela lesabelo ngobe bekuyindlela yekukhombisa Jehova  kutsi lutsandvo lwami ngaye aluyi ngekutsi ngikuliphi live, ngikusiphi sakhiwo nobe kutsi nginaliphi lilungelo.” Dayska utsi: “Ngesikhatsi ngikhumbula kutsi lesabelo besivela kuJehova ngasemukela ngenjabulo.” André naGabriela bayavuma batsi: “Loko kwasenta sabona lelinye litfuba lebesinalo lekukhonta Jehova ngekutsi sitibekele eceleni tintfo letitsandvwa ngitsi. Naku lesatitjela kona: ‘Nangabe Jehova enta lushintjo, kuncono kuhambisana nalo kunekutsi uphikisane nalo.’”

¹⁵ Ngesizatfu sekuhlanganiswa kwemagatja, letinye tikhonti taseBethel tabelwa kutsi tiyewukhonta njengemahlahlandlela. Nguloko lokwenteka etikhontini letinyenti taseBethel ngesikhatsi emagatja aseDenmark, eNorway naseSweden ahlanganiswa kuze kwakhiwe lihhovisi leligatja laseScandinavia. Labanye labatsintseka kuloku bekunguFlorian na-Anja, futsi batsi: “Sabelo setfu lesisha sisitsatsa njengemsebenti lojabulisako. Kusijabulisa kakhulu kusetjentiswa nguJehova ngisho nobe senta muphi umsebenti. Singalisho ligcwale umlomo kutsi sitiva sibusiseke kakhulu!” Ngisho nobe linyenti letfu kungeke kudzingeke lente tingucuko letinjengaleti, kodvwa ngeke yini sikulingise kutimisela kwalabazalwane nabodzadze ngekutsi sibeke tintfo teMbuso kucala ekuphileni? (Isa. 6:8) Jehova uhlale ababusisa labo labalitsatsa njengeligugu lilungelo labo lekusebenta naye, ngisho nobe bakuphi nendzawo.

16. (a) Galathiya 6:4 usitjela kutsi senteni? (b) Nguliphi lilungelo lelikhulu kakhulu umuntfu langaba nalo?

¹⁶ Bantfu labanesono bavame kuticatsanisa nalabanye, kodvwa liVi laNkulunkulu lisitjela kutsi sinake kakhulu loko lesikhona kukwenta. (Fundza Galathiya 6:4.) Linyenti letfu lite ligunya lelitsite enhlanganweni. Ngetulu kwaloko, akusitsi sonkhe lesingakhona kuba ngemahlahlandlela, titfunywa telivangeli nobe sikhonte eBethel. Asingabati kutsi lawa ngemalungelo lamahle sibili! Kodvwa kufanele sihlale sikhumbula kutsi lilungelo lelikhulu kakhulu ngulelo sonkhe lesinalo. Lilungelo lekuba  sisebenti lesikanye naJehova emsebentini webuKhristu. Lelilungelo kufanele silitsatse njengalelo leliligugu!

17. Yini letawuchubeka yenteka njengobe sisaphila kulelive laSathane, kodvwa kungani loko kungakafaneli kusicedze emandla?

¹⁷ Njengobe sisaphila kulelive laSathane, singase singakhoni kwenta konkhe lesingafisa kukwenta emsebentini waJehova. Singase singakhoni kwenta lutfo ngemitfwalo yemndeni lesinayo, ngemphilo yetfu nobe letinye timo. Kodvwa loko akukafaneli kusicedze emandla. Ungakubukeli phansi loko longakwenta ekusebenteni naNkulunkulu, ngekutsi usebentise onkhe ematfuba lowatfolako kuze ufakaze ngelibito lakhe futsi uwente watiwe uMbuso wakhe. Intfo lebaluleke kakhulu kutsi wente konkhe lokusemandleni akho ekusebenteni naye futsi uthantazele kutsi ababusise labo labakhona kwenta lokunyenti kunawe. Khumbula kutsi wonkhe umuntfu lodvumisa libito laJehova uligugu kuye!

18. Yini lokufanele sitimisele kuyibekela eceleni, futsi leni?

¹⁸ Ngisho nobe sinebutsakatsaka kanye nesono, Jehova uyakujabulela kusebenta natsi. Silitsatsa njengeligugu lilungelo letfu lekusebenta naNkulunkulu kulamalanga ekugcina! Ngako-ke, kufanele sitimisele kutibekela eceleni tintfo letitsandvwa ngitsi, futsi sati kutsi emhlabeni lomusha Jehova utawenta kutsi sijabulele “kuphila lokungukonakona”—lokukuphila lokuphakadze emhlabeni lonekuthula nenjabulo.—1 Thim. 6:18, 19.

19. Nguliphi litsemba Jehova lasibekele lona esikhatsini lesitako?

¹⁹ Njengobe umhlaba lomusha usedvute, cabanga ngaloko Mosi lakutjela ema-Israyeli ngaphambi nje kwekutsi angene eVeni Lesetsembiso. Watsi: “Simakadze Nkulunkulu wenu uyawube sewuyaniphumelelisa kuko konkhe lenikwentako ngetandla tenu.” (Dut. 30:9) Naseyendlulile i-Amagedoni, labo lebebamatasatasa basebenta naNkulunkulu batawuphila emhlabeni labetsenjiswe wona. Ngemuva kwaloko, sitawenta umsebenti lomusha—lokukwenta umhlaba ube lipharadisi lelihle!