1. Ino Jehova ulimvwa buti kujatikizya kubeleka, alimwi ino eeci cimukulwaizya kucita nzi?

JEHOVA ulazikkomanina nzyacita. (Int. 135:6; Joh. 5:17) Kutegwa zilenge zyakwe zisongo azyalo zijane lukkomano akukkutila mbubwenya mbuli nguwe, Jehova wapa zilenge zyakwe mulimo uukkomanisya alimwi uupa kukkutila. Mucikozyanyo, wakamubikkilizya Mwanaakwe mutaanzi mumulimo wakulenga zintu. (Amubale Bakolose 1:15, 16.) Ibbaibbele litwaambila kuti katanaboola anyika, Jesu wakabeleka a Leza kujulu kali “mubelesi uucibwene.” (NW)—Tus. 8:30.

2. Ncinzi citondezya kuti zilenge zyamuuya lyoonse zyalikubeleka mulimo uuyandika kapati alimwi uupa kukkutila?

² Kuzwa kumatalikilo kusikila kumamanino, Ibbaibbele lilijisi zikozyanyo izitondezya kuti Jehova lyoonse wali kupa bana bakwe bakumuuya mulimo wakubeleka. Ciindi ba Adamu a Eva nobakabisya Leza wakabatanda mumunzi wabo wa Paradaiso, mpoonya “kulubazu lwakujwe lwa-Edeni wakabika baangelo bakerebimu apanga lyamabekabeka ilyakali kuyumbana koonse koonse kusinkila inzila yamusamu wabuumi.” (Matl. 3:24) Alimwi lugwalo lwa Ciyubunuzyo 22:6 luyubununa kuti Jehova “wakatuma mungelo wakwe kuti atondezye bazike bakwe zyintu izyeelede kucitika lino-lino.”

3. Naakali anyika, mbuti Jesu mbwaakatobela cikozyanyo ca Bausyi?

³ Naakacili anyika kali muntu uulondokede, Jesu wakali kuukkomanina mulimo Jehova ngwaakamupede kuti aubeleke. Kwiinda mukwiiya cikozyanyo ca Bausyi, Jesu alimwi wakapa basikwiiya bakwe mulimo uuyandika kapati. Kayanda kuti babe aabulangizi bwazintu nzyobakali kuyakucita, wakati: “Ncobeni ndimwaambila kuti, Ooyo uundisyoma awalo uyoocita milimo njondicita; alimwi uyoocita milimo mipati kwiinda yeeyi, nkaambo mebo nduunka kuli Taata.” (Joh. 14:12) Kutegwa akankaizye ncoyakeelede kubelekwa cakubinda milimo iili boobu, Jesu wakati: “Tweelede kubeleka milimo yayooyo wakandituma nolicili syikati; ibusiku bulaboola muntu uuli woonse natakonzyi kubeleka.”—Joh. 9:4.

4-6. (a) Nkaambo nzi ncotweelede kulumba akaambo kakuti Nowa a Musa bakaibeleka milimo njobakapegwa a Jehova? (b) Ino ikozyenye buti milimo yoonse Leza njapa bantu kuti babeleke?

⁴ Nociba ciindi Jesu katanaboola anyika, bantu bakali kupegwa mulimo wakubeleka iwakali kubapa kukkutila. Nokuba kuti ba Adamu a Eva bakaalilwa kuubeleka mulimo ngobakapedwe, bamwi bakacikonzya kweelana ambwaakabalailila Leza. (Matl. 1:28) Nowa wakapegwa malailile aacigaminina aajatikizya mbwaakeelede kuyaka bwato kutegwa zintu zipona zifwutulwe lya Zambangulwe. Wakaatobela kabotu-kabotu malailile ngaakaambilwa a Jehova. Tulamulumba kapati kuti wakabikkila maano kuubeleka mulimo ngwaakapedwe, calo icakapa kuti katupona mazuba aano!—Matl. 6:14-16, 22; 2 Pe. 2:5.

⁵ Musa wakapegwa malailile aacigaminina aajatikizya mbwaakeelede kuyaka tente alimwi akweendelezya mulimo wabupaizi, malailile aaya wakaabikkila kapati maano. (Kul. 39:32; 40:12-16) Naaba mazuba aano, tulagwasyigwa akaambo kakusyomeka kwakwe mukubeleka mulimo ngwaakapedwe. Munzila nzi? Mwaapostolo Paulo wakapandulula kuti zibeela eezyi zya Mulawo zyakali kwiiminina ‘zintu zibotu izyakali kuboola’ kumbele.—Heb. 9:1-5, 9; 10:1.

⁶ Mulimo Leza ngwapa babelesi bakwe ulainda-indana ciindi aciindi kweelana ambwaayabuzuzikizyigwa makanze aakwe. Nokuba boobo, lyoonse mulimo ngobali kupegwa wali kutembaula Jehova akugwasya bantu basyoma. Mbocibede oobu kujatikizya zintu nzyaakacita Jesu katanaboola anyika alimwi aciindi naakali anyika. (Joh. 4:34; 17:4) Mbubwenya buyo, mulimo ngotupedwe mazuba aano utembaula Jehova. (Mt. 5:16; amubale 1 Bakolinto 15:58.) Nkaambo nzi ncocili boobo?

7, 8. (a) Amuupandulule mulimo ngobapedwe Banakristo mazuba aano. (b) Ino tweelede kucita buti ciindi Jehova natupa malailile?

⁷ Cakutadooneka, mulazumina kuti cilagambya kuti Jehova watamba bantu batalondokede kuti babe acoolwe cakubeleka kabali basimilimonyina anguwe. (1 Kor. 3:9) Aabo ibatola lubazu mukuyaka Maanda Aakucitila Miswaangano Mipati, Maanda aa Bwami, alimwi amaofesi aamitabi batola lubazu mumulimo wini wakuyaka, mbubwenya mbwaakacita Nowa a Musa. Tacikwe makani naa mubeleka mulimo wakubambulula Ŋanda ya Bwami iili kubusena nkomukkala naa muyaka maofesi eesu mapati ku Warwick, mu New York, amucikkomanine coolwe ncomujisi cakubeleka munzila eeyi. (Amubone cifwanikiso icili kumatalikilo aacibalo icitondezya mbwaayakuboneka maofesi aakumana kuyakwa.) Ooyu mulimo uusetekene. Nokuba boobo, mulimo uuyandika kapati ngobapedwe Banakristo boonse mulimo wakuyaka kumuuya. Awalo mulimo ooyu ubambilidwe kutembaula Jehova akugwasya bantu bamvwida. (Mil. 13:47-49) Malailile aayelede aajatikizya mboweelede kubelekwa kabotu mulimo ooyu alapegwa kwiinda mumbunga ya Leza. Zimwi ziindi eeci caamba kupegwa milimo iimbi mipya.

⁸ Babelesi ba Jehova basyomeka lyoonse bali kuyandisisya kulibombya kubusolozi bwa Leza. (Amubale Bahebulayo 13:7, 17.) Kumatalikilo inga katutamvwisyi cakumaninina ikaambo ncotubelekela  munzila imwi mulimo ngotwapegwa. Nokuba boobo, tulizyi kabotu-kabotu kuti kuli bubotu mbotujana kwiinda mukutobela kucinca kulikoonse Jehova nkwabona kuti kuleelela kucitwa.

9. Ncikozyanyo nzi ncobapa baalu mumbungano kujatikizya kubeleka milimo?

⁹ Luyandisisyo lwakuzuzikizya ncayanda Jehova lulalibonya kwiinda munzila baalu mobasololela mumbungano. (2 Kor. 1:24; 1 Te. 5:12, 13) Balatondezya luyandisisyo lwakubeleka canguzu akweendela antoomwe akucinca kuli koonse ikucitika. Balayandisisya kucinca kweelana anzila zipya zyakukambauka Bwami bwa Leza ibwakatalika kulela. Nokuba kuti bamwi kumatalikilo bakali kuwayawaya kubikka bubambe bwakukambauka kwiinda mukubelesya fooni, kukambaukila kucito, naa bukambausi bwakubuleya, bajana kuti nzila zili boobu zyabukambausi zilagwasya. Mucikozyanyo, bapainiya bone mucisi ca Germany bakasala kuti bakambaukile mumasena aacitilwa makwebo mobatakali kukambaukila kwaciindi cilamfwu. Ba Michael bakaamba kuti: “Twakali kulibilika kapati nkaambo kwakaindide myaka minji katutaibelesyi nzila eeyi yabukambausi. Kweelede kuti Jehova wakalizyi, nkaambo bukambausi mbotwakacita mafwumofwumo bwakali kukkomanisya cakunga tatukalubi. Eelo kaka twakakkomana kapati kuti twakaatobela malailile ngotwakapegwa mu Mulimo Wesu wa Bwami akuti twakasyoma Jehova kuti atugwasye!” Sena mulayandisisya kubelesya nzila zyabukambausi zipya izikonzya kubeleka mucilawo canu?

10. Nkucinca kuli buti ikwacitika mumbunga mumyaka misyoonto yainda?

¹⁰ Zimwi ziindi inga kwayandika kucinca zintu mumbunga. Mumyaka misyoonto yainda, maofesi aamitabi aali mbwaabede akajalwa akuba cibeela camitabi iimbi. Nokuba kuti kucinca kuli boobu kuyanda kuti bakwesu abacizyi ibabelekela mumitabi eeyi bacince, kakutanainda ciindi cilamfwu bubotu bwakucinca ooku bulalibonya kulibaabo boonse ibajatikizyidwe. (Muk. 7:8) Eelo kaka cilabakkomanisya babelesi ibalisungula bali boobu kutola lubazu mumulimo ngobabeleka bantu ba Jehova mazuba aano!

11-13. Mbuyumuyumu nzi bamwi mbobajana akaambo kakucinca ikwacitika mumbunga?

¹¹ Tulakonzya kwiiya ziiyo zibotu kuli baabo ibakajatikizyigwa akujalwa kwamaanda aa Bbeteli amwi kutegwa abe cibeela camitabi iimbi. Bamwi bakabeleka mulimo waciindi coonse myaka minji mumaofesi aamitabi mobakali kubelekela. Banabukwetene bamwi ibakali kubeleka amukwasyi wa Bbeteli musyoonto mu Central America bakaambilwa kuyakubelekela antoomwe amukwasyi wa Bbeteli ku Mexico, mukwasyi mupati ziindi zili 30 kwiinda mukwasyi wakusaanguna. Ba Rogelio bakaamba kuti: “Cakali ciyumu kusiya mukwasyi abalongwe. Ba Juan, mukwesu uumbi iwakaambilwa kulongela ku Mexico wakaamba kuti: “Cili mbuli kuzyalwa alimwi; weelede kutalika kuba abalongwe bapya. Weelede kucinca kweelana azilengwa zipya alimwi ambobayeeya bantu ibali kubusena ooko.”

¹² Abalo bamukwasyi wa Bbeteli ibakazwa kuzisi zyaku Europe ibakaambilwa kuunka kuofesi yamutabi ku Germany bakajisi buyumuyumu. Muntu uuli woonse uukkomana kubona busena ibujisi malundu-lundu inga wazyiba kuti cakali ciyumu kuli baabo ibakali kulonga kuzwa ku Switzerland kusiya busena ibujisi malundu. Alimwi aabo ibakazwida ku Austria kumatalikilo bakali kuyeeya buumi bubotu bwakulikwaya mbobakali kupona nkobakazwida.

¹³ Kujatikizya baabo ibakalongela kuzisi zimbi, eeci cakali kwaamba kuti bakeelede kuzyibila kukkala mumaanda meenzu, kuzyibila kubeleka antoomwe abakwesu alimwi abacizyi bapya mbobatakazyi, alimwi akwiiya mulimo uumbi mupya. Cakali kwaamba kucinca nobakatalika kuyanzana ambungano mpya akukambauka mucilawo cipya, alimwi ambweni akukambauka kubelesya mwaambo uumbi. Tacili cuuba-uba kucinca munzila eeyi. Nokuba boobo, bamukwasyi wa Bbeteli banji bacikonzya kucinca. Nkaambo nzi ncobacitila boobo?

14, 15. (a) Ino banji batondezya buti kuti balacikkomanina coolwe cakuba basimilimonyina a Jehova kufwumbwa nkobakonzya kubelekela? (b) Muunzila nzi mobali cikozyanyo cibotu kulindiswe toonse?

 ¹⁴ Ba Grethel bakaamba kuti: “Ndakakuzumina kutambwa ooku nkaambo njeyakali nzila mbondakali kukonzya kutondezya kuti ndakali kuyanda Jehova kapati kwiinda cisi, ŋanda, naa mulimo umwi.” Ba Dayska bakaamba kuti: “Ciindi nondakayeeya kuti ndakatambwa a Jehova, ndakakutambula kutambwa ooku calukkomano.” Ba André aba Gabriela bakakazumina kaambo aaka nobakati: “Munzila eeyi twakabona coolwe acimbi cakubelekela Jehova kwiinda mukutazibikkila maano zintu nzyotuyandisisya. Twakaamba kuti: ‘Ciindi Jehova nacinca zintu, inga cainda kubota kulibambila muciindi cakukazya kucinca ooko.’”

¹⁵ Akaambo kakujalwa kwamaofesi aamitabi akuba cibeela camitabi iimbi, bamukwasyi wa Bbeteli bamwi bapegwa mulimo wabupainiya. Oobu mbocakabede kubunji bwabaabo ibakali bamukwasyi wa Bbeteli ciindi nowakajalwa mutabi waku Denmark, Norway, alimwi a Sweden akuba cibeela caofesi yamutabi wa Scandinavia. Akati kabo kwakali ba Florian aba Anja, bakaamba kuti: “Nokuba kuti kuli buyumuyumu mumulimo wesu, ulakkomanisya. Kulindiswe, cilatukkomanisya kubelesyegwa a Jehova kufwumbwa nkotubelekela. Kuzwa ansi aamoyo inga twaamba kuti twalongezyegwa kapati!” Nokuba kuti bunji bwandiswe zintu inga tiizyacinca munzila eeyi, tulakonzya kwiiya cikozyanyo cabakwesu abacizyi aaba cakulisungula kubikka ziyandika zya Bwami kumbele. (Is. 6:8) Jehova lyoonse ulabalongezya aabo ibacikkomanina coolwe cakuba basimilimonyina anguwe, kufwumbwa nkobakonzya kubelekela.

16. (a) Ino lugwalo lwa Bagalatiya 6:4 lutwaambila kucita nzi? (b) Ino ncoolwe nzi cipati kwiinda ncakonzya kuba ancico muntu uuli woonse?

¹⁶ Bantu batalondokede inga bayanda kweezyanisya nzyobacita anzyobacita bantu bamwi. Pele Jwi lya Leza, Bbaibbele litwaambila kuti tweelede kubikkila maano kuzintu nzyotukonzya kucita. (Amubale Bagalatiya 6:4.) Bunji bwesu tatujisi mikuli mumbunga. Alimwi toonse tatukonzyi  kuba bapainiya naa bamisyinali naa kubelekela ku Bbeteli. Masimpe, eezyi nzyoolwe zitaliboteli! Pele tatweelede kuluba kuti coolwe cipati kwiinda muntu uuli woonse ncakonzya kuba ancico nciceeco ncotujisi toonse. Ncoolwe cakuba similimonyina a Jehova mumulimo wa Bunakristo. Eeci ncecoolwe ncotweelede kukkomanina!

17. Ncinzi cilangilwa kucitika kufwumbwa kuti nyika ya Saatani kaiciliko, pele nkaambo nzi eeci ncociteelede kututyompya kapati?

¹⁷ Kufwumbwa kuti katucili munyika ya Saatani eeyi, tatukonzyi kubelekela Jehova munzila iili yoonse njotuyanda. Inga katutakonzyi kucinca bukkale bwamukwasyi, buzumi, naa bukkale bumwi. Nokuba boobo, aaka takali kaambo keelede kutupa kuciindizya kulimvwa kutyompwa. Mutanoolitengi kulimvwa kuti tamukonzyi kuba basimilimonyina a Leza kwiinda mukucitila bumboni kuzina lyakwe akwaambilizya Bwami bwakwe kufwumbwa notwajana coolwe cakucita boobo. Iciyandika kapati ncakuti mulabeleka anguwe kusikila mpomugolela akuti mulapaila kulinguwe kuti alongezye bakwesu ibakonzya kucita zinji mumulimo kwiinda nzyomukonzya kucita. Amuyeeye lyoonse kuti muntu uuli woonse uutembaula zina lya Jehova ulayandika kapati kulinguwe!

18. Ncinzi ncotweelede kulisungula kwiindwa lino, alimwi nkaambo nzi?

¹⁸ Nokuba kuti tulalezya alimwi tatulondokede, Jehova ulikkomene kutubelesya katuli basimilimonyina. Eelo kaka tweelede kucikkomanina coolwe ncotujisi cakubeleka a Leza mumazuba aano aamamanino! Aboobo, tweelede kulisungula kwiindwa zintu zitukkomanisya lino, katuzyi kuti munyika mpya, Jehova uyakupa kuti tukkomane ‘abuumi bwini-bwini’—buumi butamani bukkomanisya alimwi bwaluumuno.—1 Ti. 6:18, 19.

19. Ino mbulangizi nzi bwakumbele Jehova mbwaatusyomezya?

¹⁹ Mbwaanga lino tuli afwaafwi kunjila munyika mpya, tweelede kuyeeya Musa nzyaakaambila bana Israyeli kabatananjila mu Nyika Yakasyomezyegwa, wakati: “Jehova Leza wanu uyoomuvuzizya coolwe mumilimo yoonse yamaanza aanu.” (Dt. 30:9) Yaakwiinda Amagedoni, aabo ibakajisi bubi kubeleka a Leza bayakukona nyika njaakasyomezya. Mpoonya tuyakubikkila maano kukubeleka mulimo mupya—kupanga nyika kuti ibe paradaiso yeebeka!