1. Ano an inaabat ni Jehova mahitungod ha buruhaton, ngan ano an iya ginbuhat basi maeksperyensyahan ito han iya mga linarang?

HI Jehova nalilipay ha iya mga buruhaton. (Sal. 135:6; Juan 5:17) Karuyag niya nga an mga anghel pati an mga tawo malipay liwat ha ira buruhaton, salit iya hira gintatagan hin makalilipay ngan makapatagbaw nga trabaho. Pananglitan, iya ginpabulig an iya suhag nga Anak ha iya paglarang. (Basaha an Colosas 1:15, 16.) An Biblia nagsusumat ha aton nga antes pa magin tawo hi Jesus, kaupod na hiya han Dios didto ha langit sugad nga maabtik nga parabuhat.—Prob. 8:30.

2. Ano an nagpapakita nga an mga anghel gintatagan pirme hin importante ngan makalilipay nga mga buruhaton?

² Tikang ha Genesis tubtob ha Pahayag, iginpapakita han Biblia nga hi Jehova nagtutoka pirme hin buruhaton ha mga anghel. Han ginpagawas hira Adan ngan Eva ha Paraiso tungod han ira pakasala, an Dios “nagbutang ha may sinirangan han tanaman han Eden hin mga kerubin, ngan laga han usa nga espada nga nagbirikbirik ha tagsa nga agian basi mabantayan han dalan han kahoy han kinabuhi.” (Gen. 3:24) Ngan an Pahayag 22:6 nagsusumat nga hi Jehova “nagsugo han iya anghel basi ipakita ha iya mga uripon an mga butang nga hirani na gud mahitabo.”

3. Han nakanhi pa hi Jesus ha tuna, paonan-o niya ginsubad an iya Amay?

³ Han nakanhi hi Jesus ha tuna sugad nga hingpit nga tawo, malipayon nga ginbuhat niya an buruhaton nga igintoka ha iya ni Jehova. Sugad nga pagsubad ha iya Amay, gintokahan liwat ni Jesus an iya mga disipulo hin importante nga buruhaton. Basi hingyapon gud nira an pagbuhat hini, hi Jesus nagsiring: “Ha pagkamatuod susumatan ko kamo, an nagpapakita hin pagtoo ha akon magbubuhat liwat han akon mga ginbubuhat, ngan labaw pa hini an iya bubuhaton, kay tikadto na ako ha Amay.” (Juan 14:12) Ha pagpabug-at han pagkaapurado hini nga buruhaton, hi Jesus nagsaysay: “Kinahanglan buhaton naton an buruhaton han nagsugo ha akon samtang adlaw pa, kay waray tawo nga makakabuhat hito kon umabot na an kagab-ihon.”—Juan 9:4.

4-6. (a) Kay ano nga mapasalamaton kita nga gintuman nira Noe ngan Moises an mga toka ha ira ni Jehova? (b) Ano an duha nga resulta kon gintutuman han mga tawo an mga toka ha ira han Dios?

⁴ Antes pa hi Jesus kumanhi ha tuna, an mga tawo gintatagan na hin makalilipay nga buruhaton. Kabaliktaran kanda Adan ngan Eva nga waray magbuhat han igintoka ha ira, may pipira nga nagtuman han igintoka ha ira han Dios. (Gen. 1:28) Hi Noe gintagan hin espisipiko nga mga instruksyon kon paonan-o tutukuron an arka basi matalwas an mga tawo ngan mga hayop durante han Baha. Iya gud ginbuhat an ngatanan nga iginsugo ha iya ni Jehova. Mapasalamaton gud kita han iya pagkamasinugtanon, kay tungod hito buhi kita yana!—Gen. 6:14-16, 22; 2 Ped. 2:5.

⁵ Hi Moises gintagan hin espisipiko nga mga instruksyon ha pagtukod han tabernakulo ngan ha pag-organisar han pagkasaserdote. Iya gud ginbuhat an ngatanan nga ginsiring ni Jehova. (Eks. 39:32; 40:12-16) Tubtob yana, nagpapahimulos pa gihapon kita han iya pagkamatinumanon ha pagbuhat hito nga toka. Paonan-o? Sugad han iginsaysay ni apostol Pablo, an tabernakulo ngan an pagkasaserdote nagsisimbolo han “maopay nga mga butang nga maabot.”—Heb. 9:1-5, 9; 10:1.

⁶ Iba-iba nga toka an iginhahatag han Dios ha iya mga surugoon, depende ha kon ano an ginkikinahanglan basi matuman an iya katuyoan. Kondi ito nga mga toka naghihimaya pirme kan Jehova ngan nagpapahimulos hito an mga tawo nga may pagtoo. Ito an resulta ha mga ginbuhat ni Jesus antes pa hiya magin tawo ngan han nakanhi na hiya ha tuna. (Juan 4:34; 17:4) An buruhaton nga igintoka ha aton yana naghihimaya liwat kan Jehova. (Mat. 5:16; basaha an 1 Corinto 15:58.) Kay ano nga nakasiring kita hito?

7, 8. (a) Isaysay an buruhaton nga nakakapribilehiyo hito an mga Kristiano yana. (b) Paonan-o kita sadang gumios ha mga instruksyon ni Jehova?

⁷ Daku gud nga pribilehiyo nga gin-iimbitar ni Jehova an diri hingpit nga mga tawo nga magin iya mga igkasi-magburuhat. (1 Cor. 3:9) Adton kaapi ha pagpanukod hin Assembly Hall, Kingdom Hall, ngan mga pasilidad han mga sanga nga opisina nakikigbahin ha literal nga pagpanukod sugad han ginbuhat nira Noe ngan Moises. Nakikigbahin ka man ha pag-ayad hin Kingdom Hall o ha pagtukod han aton headquarters ha Warwick, New York, pabilhi an imo pribilehiyo. (Kitaa an retrato ha tinikangan hini nga artikulo nga ginhimo hin pintor.) Sagrado ito nga pag-alagad. Kondi bisan kon bangin pipira la an nakikigbahin ha literal nga pagpanukod, an ngatanan nga Kristiano nakikigbahin ha usa nga espirituwal nga pagpanukod. Ito an pagsangyaw nga buruhaton, nga nagdadayaw kan Jehova ngan nagpapahimulos hito an masinugtanon nga katawohan. (Buh. 13:47-49) An organisasyon han Dios nagtatagana hin angayan nga mga instruksyon basi mahimo an pinakamaopay para hini nga buruhaton.  Usahay bangin mangahulogan ini hin paghatag hin bag-o nga mga toka.

⁸ An matinumanon nga mga surugoon ni Jehova pirme andam sumunod ha iya mga instruksyon. (Basaha an Hebreo 13:7, 17.) Ha tinikangan, bangin diri naton bug-os nga nasasabtan kon kay ano nga ginbag-o an aton toka. Bisan pa hito, ginsusunod naton ito kay maaram kita nga tikang ito kan Jehova ngan magkakaada ito mag-opay nga resulta.

9. Ano nga maopay nga ehemplo an iginpapakita han mga tigurang ha kongregasyon?

⁹ Makikita ha paagi han pagpanguna han mga tigurang ha kongregasyon nga karuyag gud nira sundon an kaburut-on ni Jehova. (2 Cor. 1:24; 1 Tes. 5:12, 13) Iginpapakita nira nga maduruto hira ngan padayon nga nadungan ha mga pagbag-o. Ginsusunod gud nira an mga pagbag-o ha pamaagi han pagsangyaw mahitungod han naestablisar nga Ginhadian han Dios. Bisan kon ha tinikangan, bangin nag-alang an pipira ha pagsangyaw pinaagi han telepono, pagsangyaw ha pantalan, o pagsangyaw ha publiko, ha urhi, nakita nira an mag-opay nga resulta hito. Pananglitan, upat nga payunir ha Germany an nagsangyaw ha mga lugar han negosyo nga maiha na nga waray masangyawi. Hi Michael nagsiring: “Pipira ka tuig na nga waray kami makigbahin ha sugad hini nga pamaagi han pagministeryo, salit ginkulba gud kami. Sigurado nga maaram hini hi Jehova, kay ginbuligan niya kami nga maglampos ha amon pagsangyaw hito nga aga. Malipayon gud kami nga ginsunod namon an instruksyon ha Aton Ministeryo ha Ginhadian ngan sinarig kami han bulig ni Jehova!” Andam ka ba makigbahin ha bag-o nga mga pamaagi han pagsangyaw ha iyo teritoryo?

10. Ha naglabay la nga mga tuig, ano an ginhimo nga mga pagbag-o ha kahikayan han organisasyon?

¹⁰ Usahay, ginkikinahanglan an mga pagbag-o ha kahikayan han organisasyon. Pananglitan, ha naglabay la nga mga tuig, may mga sanga nga opisina nga gintarampo. Bisan kon naapektohan hini nga pagbag-o an kabugtoan nga nag-aalagad hini nga mga sanga nga opisina, ha urhi, nakita nira an mag-opay nga resulta hito. (Ekles. 7:8) Daku gud an kalipay hinin kabugtoan nga andam sumunod tungod kay bahin hira ha kasaysayan han mga Saksi ni Jehova ha moderno nga panahon!

11-13. Ano nga mga ayat an gin-atubang han pipira tungod han mga pagbag-o ha kahikayan han organisasyon?

¹¹ May hibabaroan kita nga importante nga mga leksyon tikang ha kabugtoan nga naapektohan ha gintarampo nga mga sanga nga opisina. May pipira nga nag-alagad hin bug-os-panahon ha Bethel ha sulod hin mga dekada na. Usa nga mag-asawa nga nag-alagad ha gutiay nga pamilya han Bethel ha Central America an ginhangyo nga bumalhin ha pamilya han Bethel ha Mexico nga mas damu hin haros 30 ka beses. “Makuri gud an pagbaya ha pamilya ngan kasangkayan,” siring ni Rogelio. Inabat ni Juan, nga usa pa nga Bethelite nga ginpabalhin ha Mexico, nga baga hin nabag-o gud an iya kinabuhi. Hiya nagsiring: “Kinahanglan mo magkaada bag-o nga kasangkayan. Kinahanglan mo magpahiuyon ha bag-o nga kustomre ngan kultura.”

¹² An mga Bethelite nga tikang ha iba-iba nga nasud han Europe nga ginpabalhin ha sanga nga opisina ha Germany inatubang liwat hin mga ayat. Adton mahilig ha makaruruyag nga mga kiritaon ha bukid nakurian pagbaya ha Switzerland diin may-ada ito mag-opay nga Alps nga kabukiran. Ngan adton tikang ha Austria namingaw ha ira mas relaks nga kinabuhi didto.

¹³ Adton bumalhin ha iba nga nasud kinahanglan mag-adjust ha ira bag-o nga urukyan, mga katrabaho nga kabugtoan nga diri nira kilala, ngan posible ha ira bag-o nga toka. Kinahanglan liwat nira mag-adjust ha ira bag-o nga kongregasyon, bag-o nga teritoryo, ngan bangin hin bag-o pa ngani nga yinaknan. Mahimo ini magin makuri. Bisan pa hito, ginkarawat nira an toka ha ira. Kay ano?

14, 15. (a) Paonan-o iginpakita han damu nga kabugtoan nga ira ginpapabilhan an pribilehiyo nga magbuhat kaupod ni Jehova, anoman ito nga buruhaton? (b) Paonan-o naton hira masusubad?

 ¹⁴ Hi Grethel nagsiring: “Ginkarawat ko an imbitasyon tungod kay usa ito nga paagi basi maipakita ko nga mas importante an akon gugma kan Jehova kay ha usa nga nasud, bilding, o pribilehiyo.” Hi Dayska nagsiring: “Han ginhunahuna ko nga an imbitasyon tikang kan Jehova, malipayon nga ginkarawat ko ito.” Hira André ngan Gabriela nagsiring: “Nakita namon nga mas makakag-alagad kami kan Jehova kon diri namon uunahon an amon personal nga mga karuyag.” Natoo hira nga kon may pagbag-o nga ginhihimo an organisasyon ni Jehova, mas maopay nga malipayon nga karawaton ito imbes nga diri ito sundon.

¹⁵ Tungod kay gintarampo an pipira nga sanga nga opisina, may mga Bethelite nga igintoka sugad nga mga payunir. Ito an nahitabo ha pipira nga Bethelite han an sanga nga opisina ha Denmark, Norway, ngan Sweden, gintarampo basi maestablisar an sanga nga opisina ha Scandinavia. Usa hito an mag-asawa nga hira Florian ngan Anja, nga nagsiring: “Ginhunahuna namon an amon bag-o nga toka sugad nga makalilipay bisan kon damu an ayat hito. Para ha amon, pribilehiyo gud nga gamiton kami ni Jehova bisan diin man kami mag-alagad. Inaabat gud namon an hura nga bendisyon!” Bisan kon an kadam-an ha aton bangin diri makaeksperyensya hini, mahimo ba naton subaron an pagin andam hini nga kabugtoan nga unahon an mga buruhaton para ha Ginhadian? (Isa. 6:8) Pirme ginbibendisyonan ni Jehova adton nagpapabili han ira pribilehiyo nga magbuhat kaupod niya, bisan diin man ito nga buruhaton.

16. (a) Sumala ha Galacia 6:4, ano an sadang naton buhaton? (b) Ano an aton gidadakui nga pribilehiyo?

¹⁶ Tungod han aton pagkadiri-hingpit, may tendensya kita nga ikompara an aton kalugaringon ha iba. Kondi an Pulong han Dios nasiring nga sadang kita magpokus ha kon ano an kaya naton himoon. (Basaha an Galacia 6:4.) Diri ngatanan ha aton mahimo magin mga tigurang, payunir, misyonero, o Bethelite. Oo, makalilipay gud ini nga mga pribilehiyo! Kondi diri  gud naton sadang hingalimtan nga nakikigbahin kita ngatanan ha gidadakui nga pribilehiyo—an pagin magwarali han maopay nga sumat, diin igkasi-magburuhat kita ni Jehova. Pribilehiyo gud ini nga sadang naton pabilhan!

17. Ano an reyalidad hini nga kalibotan ni Satanas? Kay ano nga diri kita sadang manluya?

¹⁷ Hinin kalibotan ni Satanas, bangin limitado la an aton mahihimo ha pag-alagad kan Jehova. Bangin may mga butang nga diri naton kontrolado sugad han mga responsabilidad ha pamilya, kahimsog, o iba pa nga kahimtang. Kondi diri kita sadang manluya. Ayaw gud minosa an imo nahihimo ha pagbuhat kaupod han Dios pinaagi ha pagsangyaw mahitungod han iya ngaran ngan ha iya Ginhadian ha tagsa nga higayon. An pinakaimportante, ginbubuhat mo an imo bug-os nga mahihimo para kan Jehova ngan igin-aampo mo nga bendisyonan niya adton kabugtoan nga mas damu an nabubuhat kay ha imo. Hinumdumi, an tagsa nga nagdadayaw han ngaran ni Jehova presyoso ha iya!

18. Sadang kita magin andam nga isakripisyo an ano, ngan kay ano?

¹⁸ Bisan pa han aton mga kaluyahan ngan pagkadiri-hingpit, nalilipay hi Jehova nga magin iya kita mga igkasi-magburuhat. Ginpapabilhan gud naton an aton pribilehiyo nga magbuhat kaupod han aton Dios hinin kataposan nga mga adlaw! Salit sadang gud kita magin andam nga isakripisyo an aton personal nga mga karuyag, tungod kay maaram kita nga ha bag-o nga kalibotan ni Jehova, bibendisyonan kita niya han “totoo nga kinabuhi”—kinabuhi nga waray kataposan ha malipayon ngan mamurayawon nga palibot.—1 Tim. 6:18, 19.

19. Ano nga makalilipay nga tidaraon an iginsasaad ha aton ni Jehova?

¹⁹ Hirani na gud matuman an saad han Dios nga bag-o nga kalibotan. Hunahunaa an ginsiring ni Moises ha mga Israelita han hirani na hira sumulod ha Tuna nga Iginsaad: “Hi Jehova nga imo Dios maghihimo ha imo nga hura han ngatanan nga buhat han imo kamot.” (Deut. 30:9) Katapos han Armagedon, adton nagin okupado ha pagbuhat kaupod han Dios makakapanunod han tuna nga iya iginsaad ha ira. Katapos, magkakaada kita bag-o nga buruhaton—an paghimo ha tuna nga magin maopay nga paraiso!