1. Gini bipai du Yekova na ni tipa sunge, na si nasako ko mangi wai?

YEKOVA nga gu bamangisunge nagbia ngbarago rogo gupai ko amangaha. (Tam. 135:6; Yo. 5:17) Yekova ima fu wene sunge fu amaraika gbiati aboro i du na ngbarago na gupai i amangaha. Ni kpiapai, ko adi bambata Wiriko tipa i kusi ahe na ko. (Oni gedi AKorosaio 1:15, 16.) Ziazia Kekeapai nape gupai furani nga ho Yesu adu ni ngbangbaturũ yo, ko adu pati Mbori “wa bangbasia boro sunge.”—Snz. 8:30.

2. Ginihe nayugo na ni nga amaraika aima du na sunge beyo tipa ka mangaha?

² Ziazia Kekeapai na dungu agu akpiapai rogoho nayugo gupai nga Yekova aima digo nifu sunge fu agu awiriko nga atoro. Fuo Adamu na Eva ingipai na Mbori ki do yo kusayo Paradizo yo, ko ‘amoi akeruba ati Edene yo ku uroyo, na basape wa mirãwe si ni sakitihe asaka rogo arago dunduko kirikiri, ka banda gene ngua unga.’ (Bam. P. 3:24) Yugoti 22:6 nafura tipa Yekova nga ko “akedi gako maraika ka yugo pa agu apai naye ka manga mbembedi fu gako amoyambu.”

3. Gini gene Yesu apekefuo gu kpiapai ngbaha nga ga Bako ho ko adu ni auru kpotosende?

³ Ho Yesu adu ni auru kpotosende ane, ko amangi gu sunge Yekova afuhe fuko. Ni mangako sunge na ga Bako kpiapai, ko afu sunge a fu gako abawiriki. Tipa ka sayo i du na ngbarago na gupai si adu nga i nikaa mangaha, ko aya fuyo wẽ: “Mi nagumba ha fu roni, ni rengo, gu ni ka idi pa re, agu apai mi amanga ni mangi he amanga a; ni mangi apai amanga bakere susi gere; bambiko mi nandu koyo du Buba ni.” (Yo. 14:12) Tipa ka nyakasapa gu sunge re, Yesu asakipai ki ya: “Ani mangi agu apai amanga nga ga gu ko nakedi re, kina uru. Rago nabira, ho boro ka manga nga sunge ni ya.”—Yo. 9:4.

4-6. (a) Tipagine du ani ti ni na tambuahe tipa manga aNoa na Moize gu sunge Yekova afuhe fuyo? (b) Gini wiratise du dagba agu asunge Mbori afuhe fu aboro?

⁴ Zavura mbata fu Yesu ye, Mbori aima fu sunge fu aboro i mangihe. Wa vura duhe nga Adamu na Eva aamanganga gupai Mbori aaida i mangihe te, kura aboro kinaho namangipai wa Mbori arugu yo. (Bam. P. 1:28) Mbori afu rugute fu Noa ko mbakadi kurungba tipa ka banda unga aboro na anya ti regbo Ime Akangbii. Ko aima manga gupai Mbori apehe fuko ko mangihe. Ani areme ni ungarani mbikopa mangako pai kuti gipai re!—Bam. P. 6:14-16, 22; 2 Pet. 2:5.

⁵ Mbori arugu Moize ko mbakadi banye na ki mangi mbakadapai tipa aboromotumo ko ki ima mangaha. (Gate 39:32; 40:12-16) Zavura areme, ani nagbia undo agbia ti wai ko adu ni ruruko ka manga gi gako sunge re. Rogo gini gene? Gu mokedi nangia Pauro ape gupai nga, papara Ndiko adu tipa “gu wene apai nikaye.”—Eb. 9:1-5, 9; 10:1.

⁶ Mbori nafu asunge fu gako amoyambu ni bakiakia ringbisihe kuti wai gako ringbisapai amangasunge. Ono wa vura duhe wo, agu asunge ko afuhe fuyo dedede nafu taarimo fuko na kini undo agu aboro du na idapase. Gipai re nabipa gu sunge Yesu amangihe ngbangbaturũ yo na auru kpotosende ane. (Yo. 4:34; 17:4) Teketeke a, gu sunge ko nafuhe furani nafu taarimo fuko. (Mt. 5:16; oni gedi 1 AKorindo 15:58.) Tipagine duhe ti ni wo?

7, 8. (a) Oni sakingo pai tipa gu sunge aKristano amangaha areme. (b) Si naida ani karagapai wai kuti ga Yekova arugapai?

⁷ Kina ngbaro nazera ka bi gupai nga Yekova nayamba aboro ingapai i ye ka mangasunge na ko wa abadiasunge. (1 Kor. 3:9) Agu aboro nadudua agu abambu ani naamanga Kikindigi Adunguratise rogoho, aBambu Kindo, gbiati abe-basunge namanga kina gu ngbatunga sunge Noa amangihe. Singia oni nabungia gaoni Bambu Kindo watadu oni nadua gu rii-basunge nga ga zegino Warwick, New York yo, oni bihe ni nyanyakipa momu. (Oni bi gu sura duti tonatonaha.) Si nga ziazia asunge. Sidu tie, gu nyanyakipa sunge si aida aKristano dunduko mangihe nga gu mehe nga ga toro. Si a tipa ka fu taarimo fu Yekova na ka undo aboro giasangba. (Amo. 13:47-49) Ga Mbori riigbu nafu arugapai dedede tipa wai ka manga gi sunge re wenengai. Gipai re nakoda gbia vovo asunge ti kura aregbo.

⁸ Ga Mbori amoyambu dedede nidu na nyemu ka mangapai ringbisihe na ga Yekova arugute. (Oni gedi AEbere 13:7, 17.) Ti kura aregbo, ani arengbanga ka rugatirani na ndu gupai ani amanga sunge ti ni  ngba gu gene ani amangaha re te. Ono wa vura duhe wo, ani ima ino gu undo du ti mangapai kuti gu vovo ariapai Yekova aida ani mangipai kutini.

9. Gini kpiapai abaakumba amaaha fu awirina rogo dungurati nibipa sunge tungusapai?

⁹ Ani nabi wai abi du abaakumba na bakere nyemu ka manga gupai Yekova akpinyemuhe wa i angbembatayo rogo apai rogo dungurati. (2 Kor. 1:24; 1 Tesa. 5:12, 13) I na nyemu ka mangasunge kakaka na kini pekefuo gu vovo arugapai nakura. I a na nyemu ka wirika gu vovo agene tungusapai nakura tipa ga Mbori Kindo. Wa vura duhe nga aguyo aaidanga na pa tungusapai rogo terefuni, watadu bangiri agene ti tonatonaha te, fuoho aturongo te i ki bi wene surungbaha. Ni kpiapai, abazakigene biama Germani yo adiberã tipa ka tungusapai rogo gu babagaahe aboro anaaidanga ka tungusapai rogoho ya. Guko nga Michael aya: “Si aima dia dungu agarã zanga ani mangi ngbatunga gi tungusapai re, sidu, ani aima du na bakere gunde. Si nawira wa Yekova aima ino gipai re ku rogo rani yo, ono ko aima fu maku kurii gu sunge ani amangihe rogo gu wiso re. Ani adu na ngbarago ka pekafuo gu rugapai naadu rogo Gaani Sunge Nga ga Kindo na ki kido kuti Yekova.” Ya mo mo nidu na ngbarago ka asada gu ngbatunga gene tungusapai aboro amangaha rogo gaoni dagbarago?

10. Gini ariapai riigbu namangihe barambeda?

¹⁰ Ti gu kura aregbo, si niidi riigbu mangi ariapai amanga. Vuru agu agarã susi barambeda, dungu abe-basunge i nakodihe na agu akuraha. Wa vura duhe nga gi ngbatunga ariapai re naida na gupai nga agu awirina namangasunge rogo agu abe-basunge re mangi ariapai rogo gayo raka, si nadia regbo adia tipa i bi gu undo du ti ni. (Batu. 7:8) Agi awirina re na ngbarago ka manga gu sunge du tipa gu pangbanga nga ga ga Yekova aboro ti gi gaani regbo re.

11-13. Gini ngbatunga akpakarapai kura awirina agbiatiyo na ni mbiko agu aʹariapai riigbu amangaha?

¹¹ Ani ima rengba ka wirikapai be agu aboro gi ariapai re amangi rogo gayo abe-basunge. Dunguyo mangisunge rogo gayo abe-basunge tipa dungu agarã. I asana arogotise mangisunge tipa dungu agarã Central America yo rogo tooni Betere i ndu ku rogo gu bakerehe du Mekisiko yo. Rigelio aya: “Si aima kpakara furani ani mbu agumerani gbiati abakurearani.” Wirina nga Juan naadu dagba agu aboro na ga ku Mekisiko yo aya: “Si adu wa i batika boro berewe ni uehe; si naida mo tona inido tiro berewe na aboro, mo mangi ariapai rogo gamo sino mangapai gbiati berãpai yo.”

¹² Si aima mbu a fu agu Aboro Betere naadu rogo agu aringara du Putu yo i ga ku rogo gu be-basunge du Germani yo. Aguyo naadu Switzerland yo, si aima kpakara fuyo i aguari pati gu gayo wenewene agangara i anaabihe. Na si adu ni kpakarapai a fu aguyo naadu Austria yo i mbu gu wene raka i anaarakaha yo.

¹³ Agu aboro naguari rogo gayo ringara ka ga ku rogo gu kuraha, i atona raka rogo agu abambu i ainidonga tiyo na ni ya, ka mangasunge na agu awirina i abingo yo mbata ya, na ka wirika manga gu kura ngbatunga asunge kia ti gu i anaamangaha. Na i atona ndu ku rogo vovo adungurati, vovo dagbarago tungusapai, singia wirika vovo fugo a. Taatapai ngaha ka manga ngbatunga aʹariapai wa gure te. Wa si vura duwo, dungu Aboro Betere aidi ka manga gipai re. Tipagine i amangihe ti ni wo?

14, 15. (a) Wai dungu awirina ayuguhe nga i nabipa gayo momu nga ga mangasunge na Yekova na nyanyakipa ha? (b) Wai duhe nga i nga wene kpiapai furani dunduko?

 ¹⁴ Grethel aya: “Mi aidipa gi sunge re ka yugo na ni fu Yekova nga mi ima kpinyemuko kisusi ringara, bambu, na gu kura amomu.” Dayska aya: “Ho mi atingidi gupai ni nga Yekova du naida mi ndu ka manga gu sunge re, mi aidipaha nibasa.” Andre na Gabriala aya: “Gipai re ayugupa gu momu furani nga ga mangasunge fu Yekova zanga peresapa agu apai ngba tirani mbatayo. Ani aya fu tirani wẽ, ‘Ho Yekova amanga ariapai ni, ngbaha angba ka mangapai kutini.’”

¹⁵ Ho i akodi agi abe-basunge re ni, i akedi gu kura Aboro Betere i ndu ni abazakigene. Gipai re namangi tipa dungu Aboro Betere rogo agu abe-basunge naadu Denmark, Norway, na Sweden yo ho i kodihe ni na gu du Scandinavia yo. Florian na Anja du dagba agu aboro naadu yo, i naya: “Ani abi gaani vovo sunge ni gu kpakarapai du ni wenehe. Si adu furani ni wenepai Yekova mangisunge na ani rogo gu ba ko aida ka mangasunge na ani rogoho. Ka pe kina rengo, ani aabihe ni pa maku!” Wa vura duhe nga agurani kinaho ariapai wa gure nikaa manganga rogo gaani raka yo ya, ya mo si aidanga ani wiriki gu sino du ti agi awirina namangasunge Kindo re te? (Yes. 6:8) Dedede, Yekova nafu maku afu fu agu aboro nabi gu gayo momu nga ga mangasunge na ko na nyanyakipa ha, ka i vurangia kina gini sunge vurũ.

16. (a) Ginipai AGaratio 6:4 apehe furani ani mangihe? (b) Gini kikiipa momu duho fu aboro dũ?

¹⁶ Sino kpakpa aboro ningia rigisa aboro na akurayo, ono Fugo Mbori nape gupai furani nga ani moiberãrani kina fuo gupai rengbe ani ka mangaha. (Oni gedi AGaratio 6:4.) Dungu rani na pagbia rogo riigbu te. Na berewe a, anga ani dunduko rengbe ka mangasunge ni abazakigene watadu ni amokedi watadu ni Aboro Betere te. Agi amomu re nga wene amomu. Ono si aidanga bangirani go ti gu bakere momu du berani te. Si nga  gu momu nga kadu ni badiasunge na Yekova rogo sunge tungusapai yo. Gere nga gu momu si aida ani bihe na kikiipaha!

17. Ka Yekova mbu gi ga Satana zegino re ambu, gini apai nikaa ndu kindi ku mbatayo?

¹⁷ Ka Yekova mbu gi ga Satana zegino re ambu, bara gaani momu nga ga tungusapai angbanga te. Apai kinaho ani asovura ka diabehe wa agu akpakarapai du tipa gaani aborokporo, akaza, watadu kura apai. Ono si aidanga ani mbu agi apai re si ba bakere gberãrago tirani te. Ka oni bingo pa gu momu du oni na ni ka mangasunge na Mbori, ka tungusapai pa rimoko, na ka takapandepa gako Kindo ni taataha ya. Gupai ngba gbe nga, oni namangasunge ringbisihe kuti omeroni na oni nakpara fuko tipa ko fu maku fu agu awirinaroni du na ome tiyo tipa ka mangasunge fuko ni bakerehe. Oni tingidi gupai nga, agu aboro dunduko nataasarimo Yekova, payo ni nyanyakihe bangiriko!

18. Ginipai si aidanga ani merefuo ho ya, na tipagine?

¹⁸ Wa vura duhe nga ani nga kpakpa aboro du na arungbura tirani, Yekova kindi na nyemu ka mangasunge na ani ni gako abadiasunge. Nairiwo wai si aida ani bi gi momu nga ka mangasunge na Mbori rogo gi yangara areme re na kikiipaha! Sidu, ani mbu merafuo agu ahe ani akpinyemuhe tipa tirani, na ki ini gupai nga, rogo vovo zegino, Yekova nika fu “gu unga nga ndikidi unga” nga nyenye unga, ngbarago na zereda furani.—1 Tim. 6:18, 19.

19. Ginipai Yekova nika mangaha furani ku mbatayo?

¹⁹ Gu vovo zegino Mbori nakidopaha nika da barambeda, sidu, si naida ani berẽkurii gupai Moize apehe fu aYisaraere mbata fu i rimi ku rogo Ringara Mokido ki ya: ‘Yekova nika zugasi roni ni dungu he rogo gu sunge nga ga beroni.’ (Pa Rug. 30:9) Fuo susa Aramegido, agu aboro nadigi nimangisunge na Yekova nika diakumbo gu ringara ko nakidopaha fuyo. Fuani, ani nika gbe berãrani kuti gu vovo sunge nga ka sa kpotosende ni Paradizo.