PANGUNANG TOPIKO | TINUOD BA SI SATANAS?
Naa bay Satanas?
Eskultora sa Madrid, Spain, nga naghulagway kang Satanas ingong daotang anghel nga gitambog sa yuta
“Nagdako ko sa El Salvador. Kon magminaldito ko, ingnon ko ni Mama, ‘Kuhaon gyod ka sa Yawa!’ Motubag pod ko, ‘Sige, tawga siya!’ Motuo kog Diyos, pero di ko motuog Satanas.”—ROGELIO.
Mouyon ba ka kang Rogelio? Para nimo, asa niini ang katuohan?
-
Si Satanas dili tinuod; simbolo lang siya sa pagkadaotan.
-
Si Satanas tinuod, pero wa kaayo siyay interes sa mga tawo.
-
Si Satanas maoy gamhanang espiritu nga dakog impluwensiya sa mga tawo.
Daghan ang nagtuo sa matag usa niini nga opinyon, minilyon pa gani. Pero importante ba gyod kon asa niini ang tinuod? Kon wala gyoy Satanas, aw, nalimbongan ang mga nagtuo niya. Kon duna poy Satanas pero dili siya interesado sa mga tawo, daghan ang nag-amping o nahadlok niya sa way hinungdan. Pero kon si Satanas maoy malimbongong tigmaniobra, nan mas peligroso siya kay sa gituohan sa kadaghanan.
Atong susihon kon giunsa pagtubag sa Balaang Kasulatan kining mga pangutanaha: Si Satanas ba simbolo lang sa pagkadaotan o espiritung persona? Kon persona si Satanas, makapameligro ba siya nimo? Kon mao, unsaon nimo pagpanalipod ang imong kaugalingon?
