KUUMA NGOTHI-INĨ | HIHI NĨ KŨRĨ SHAITANI?
Hihi nĩ Kũrĩ Shaitani?
Mũcongo ũrĩ taũni-inĩ ya Madrid, Spain, ũronania Shaitani ahaana ta mũraika mũũru
“Rĩrĩa ndaarĩ kahĩĩ kanini tũrĩ El Salvador-rĩ, ndaremera mami aanjĩraga ũũ: ‘Ũkũgĩĩrũo nĩ Shaitani!’ Na niĩ ngamũcokeria atĩrĩ, ‘Reke oke!’ Niĩ njĩtĩkĩtie Ngai no ti Shaitani.”—ROGELIO.
Wee no wĩtĩkanie na Rogelio? Harĩ maũndũ maya marũmĩrĩire-rĩ, nĩ ũrĩkũ wee ũngĩtĩkania naguo?
-
Gũtirĩ Shaitani; maũndũ marĩa moru makoragwo kuo nĩmo Shaitani.
-
Nĩ kũrĩ Shaitani, no ndatindanagĩra na andũ.
-
Shaitani nĩ kĩũmbe kĩrĩ hinya gĩa kĩĩroho, kĩrĩa gĩtũmaga andũ meke maũndũ moru.
O ũmwe wa maũndũ macio nĩ wĩtĩkĩtio nĩ andũ milioni nyingĩ. No hihi-rĩ, nĩ kũramakania nĩ mawoni marĩkũ magĩrĩire? Angĩkorũo gũtirĩ Shaitani-rĩ, arĩa metĩkĩtie arĩ kuo nĩ mahĩtithĩtio. Angĩkorũo Shaitani arĩ kuo no ndatindanagĩra na andũ-rĩ, arĩa mamwĩtigĩrĩte mekaga ũguo hatarĩ gĩtũmi. Angĩkorũo Shaitani nĩ kĩũmbe kĩhĩtithagia andũ na wara-rĩ, no akorũo arĩ ũgwati mũnene gũkĩra ũrĩa andũ aingĩ meciragia.
Reke tũthuthurie ũrĩa Maandĩko Matheru macoketie ciũria ici: Shaitani nĩ kĩĩ kana nũũ, nĩ maũndũ marĩa moru makoragwo kuo-ĩ, kana nĩ kĩũmbe kĩa roho? Angĩkorũo Shaitani nĩ kĩũmbe kĩrĩ muoyo-rĩ, hihi no gĩkorũo kĩrĩ ũgwati harĩ wee? Na angĩkorũo nĩguo-rĩ, ũngĩgitĩra atĩa?
