MUTWE WA PA NKUPIKO | NANCHI SATANA KO AJI NYI?
Nanchi Satana ko aji Nyi?
Kyo babumba mu Madrid, Spain kibena kumwesha Satana nobe malaika wapona, uji na bujimbijimbi
Nakomejile mu El Salvador. Bamama bañambilanga amba, ‘Diabola usa kwiya akusende’ inge nakana kuba byo bañambila. Ne bakumbulanga amba ‘Usa kuntana!’ Naitabila mwi Lesa, kechi mwi Satana ne.”—ROGELIO.
Nanchi ne anweba mwaitabila byonka byaitabila Rogelio nyi? Ñanyi kishinka kiji pa bino kyaesakana na byo mwayuka?
Satana ufwako ne, ke wa kuyukilakotu kuba’mba kuji bubi.
Satana ko aji, pano bino kechi wata muchima ku bantu ne.
Satana ke kilengwa kya mupashi kiji na bulume bukatampe bwa kongola bantu.
Kampe kuji bantu bavula baketekela mu bino bishinka byonse biji pano. Nanchi pajipo kishinka kya kine pa bino nyi? Umvwe kya kuba Satana ufwako ne, ko kuba’mba aba bayuka amba Satana kya kine ko aji, baya mungi. Kabiji inge Satana ko aji bino kechi wata muchima ku bantu ne, ko kuba’mba aba bamuchiina Satana bamuchiinatu kyatu. Bino nangwa byonkabyo, inge Satana mujimbijimbi, ko kuba’mba mbanzhi kukila ne bilanguluka bantu bavula.
Akimonai Mambo a Lesa byo akumbula ano mepuzho: Nanchi Satana ye ñanyi, wakuyukilakotu amba kuji bubi nyi, inyi kilengwa kya mupashi? Inge Satana muntu, nanchi mu muchiina nyi? Inge byobyo kiji, mwakonsha kwizhikijila byepi?
