SEBRÃ GOM-ZUG SÕSGÃ | A SƲƖTÃAN SƖD BEEME BƖ?
A Sʋɩtãan sɩd beeme bɩ?
Bõn-naadg sẽn be madrid Ɛspayn tẽngã pʋgẽ, n makd a Sʋɩtãan sẽn lʋɩte
Rao a ye yʋʋr sẽn boond t’a Rogelio yeelame: “Mam sẽn wa n yaa yãagã, tõnd zĩnda Salvadoor tẽngã. Mam sã n da kɩɩs m ma noore, a yetame: ‘Sʋɩtãanã na n wa yõka foo!’ M leokdame: ‘A rat bɩ a wa!’ M da miime tɩ Wẽnnaam beeme, la m da pa tẽed t’a Sʋɩtãan beeme ye.”
Yãmb me tẽedame t’a Sʋɩtãan pa be bɩ? Ne yãmba:
Yaa wẽngã sẽn be nebã sũyẽ wã la b sẽn boond t’a Sʋɩtãanã bɩ?
A beeme la a pa kẽed ninsaalbã yɛlẽ bɩ?
Yaa malɛk sẽn tar pãnga, n kẽesd a toog ninsaalbã yɛlẽ bɩ?
Woto fãa yaa nebã sẽn yete. Neb milyõ-rãmb menga. La bʋg la sɩda? Rẽ yĩnga, tara yõod tɩ d bao n bãng sɩdã bɩ? Tags-y n ges-y. Sã n mik t’a Sʋɩtãan pa be, dẽnd neb nins sẽn tẽed t’a beeme wã tudgame. Sã n mik me t’a beeme la a pa kẽed ninsaalbã yɛlẽ, dẽnd neb nins sẽn maand gũusg la b yɛɛsdẽ wã namsda b mens zaalem. La sã n mikame masã t’a Sʋɩtãan tara pãng n belgd nebã, dẽnd yaa wẽnem soaba, tɩ d segd n zoe-a.
Bɩ d ges Wẽnnaam Gomdã sẽn yet bũmb ning a Sʋɩtãan zugu. D na n bãnga a sã n sɩd beeme, bɩ sã n yaa wẽngã sẽn be ned fãa sũurẽ wã la b sẽn boond tɩ Sʋɩtãanã. A sã n beeme, y na n bãnga a sã n tõe n maana yãmb wẽnga, la y sẽn tõe n paam koglg to-to.
