TUMU MANAKO I TE KAPI MUA | E TIKA TIKAI AINEI A SATANI?
E Tika Tikai Ainei a Satani?
Tetai tiki i Madrid, i Paniora, e akatutu maira ia Satani ei angera kino
“Kua maata mai au i El Salvador. Me akarongo kore au ki toku mama, ka karanga mai aia e, ‘Ka opukinaia koe e te Tiaporo!’ Ka pau au e, ‘Karangaia ra kia aere mai!’ Kua irinaki au e e Atua tetai, kare ra au e irinaki ana ia Satani.”—ROGELIO.
Te āriki ra ainei koe i te manako o Rogelio? Ko teea i teia au manako te mea tau kia koe?
-
Kare a Satani i te mea tika tikai; te akatutu ua ra i te tu kino.
-
Te ora ra a Satani, kare ra ona manako no te tangata.
-
E vaerua ririnui a Satani tei akanauru i te tangata.
Te āriki ra tetai aronga i teia au manako, penei e mirioni ua atu ia ratou. Tera ra, e puapinga ainei kia kite e ko teea te manako tika tikai? Me kare a Satani i vai ana, kua akavareia te aronga e āriki ra e e tika tikai aia. Me te ora ra a Satani e kare e manako maira i te tangata, kare e tumu no te tangata kia matakite me kore kia mataku. Inara, me e vaerua akavare a Satani, e kino pakari tikai aia i ta te tangata e manako ra.
Ka akara ana tatou e akapeea te au Tuatua Tapu i te pau anga i teia au uianga: Koai a Satani—e akatutuanga ainei no te kino me e vaerua ora? Me e vaerua ora aia, ka riro ainei a Satani ei mea kino noou? Me koia ïa, akapeea koe me paruru ia koe uaorai?
