MIISAMBO YA MBANGILO | SATANA MMUNTU A BINYIBINYI?
Satana e kwanka su?
Kifuatulo kia mu Madrid mu Espanye akilesha Satana bu muikeyilu ebubi mupone
“Nemukudile mwiumbo dya El Salvador, nsaa inaadi napele kukokyela mama, baadi angamba shi: ‘Ngyawa Diabulu akufwila!’ Ami namu shi: ‘Oolo afikye!’ Naadi na lukumiino mwi Efile Mukulu kushi mwi Satana.”—ROGELIO.
Okumiina akyamba uno nsongwalume Rogelio? Mmweneno kinyi a ku ino ayilondo omono bu mulombane?
-
Satana ta mmuntu a binyibinyi nya; nyi mpenda kimfwanyi kya myanda i bubi.
-
Satana e kwanka, kadi t’atwelakanaa mu myanda ya bantu.
-
Satana nyi nkipangwa kya mu kikudi ki na bukome akitumaa bantu mu kukita myanda ibubi.
Mweneno eese ena bantu bamukumiine, pangi midiyo ya bantu. Kadi bi na muulo bwa kuuka mweneno mulombane? Oolo, su Satana te kwanka, baaba abakumina mwadi be mu kilubilo. Su Satana e kwanka kadi tatwelakanaa mu myanda ya bantu, bantu bebungi abakimbi bya kumudimukila sunga kumutshina tabe na kabingilo nya. Kadi su Satana nyi muntu adimbishena, byabya e masaku ngofu kukila abipwandjikisha bantu bebungi.
Kadi tubande kutaluula mushindo awaluula Bifundwe biselele ino nkonko: Satana nnanyi sunga shi nkinyi—nyi mpenda kinfwanyi kya myanda ibubi sunga shi mmuntu a mu kikudi? Su Satana nyi muntu, e kwikala masaku koodi? Su mbyabya, mushindo kinyi oodi mulombene kwilama?
