KAVEINGA TEFITO | KO HA TOKOTAHA MOʻONI ʻA SĒTANE?
ʻOku ʻi Ai Moʻoni ʻa Sētane?
Ko ha maka fakamanatu ʻi Madrid, Sipeini, ʻoku hā ai ʻa Sētane ko ha ʻāngelo naʻe hinga mo kākā
“Naʻá ku tupu hake ʻi El Salvador. ʻI he taimi naʻá ku talangataʻa aí, naʻe pehē mai heʻeku faʻeé, ‘Ko e Tēvoló ena ʻe haʻu ʻo maʻu koe!’ Pea naʻá ku tali ange, ‘Tuku ke haʻu!’ ʻOku ou tui au ki he ʻOtuá, kae ʻikai ko Sētane.”—ROGELIO.
ʻOkú ke loto-tatau mo Rogelio? Ko fē ʻi he ngaahi fakakaukau ko ení ʻe ngalingali ʻuhinga lelei kiate koé?
-
Ko Sētané ʻoku ʻikai ko ha tokotaha moʻoni ia; ko ha tuʻunga pē ia ʻo e koví.
-
ʻOku ʻi ai moʻoni ʻa Sētane, ka ʻoku ʻikai te ne fuʻu mahuʻingaʻia ʻi he faʻahinga ʻo e tangatá.
-
Ko Sētané ko ha meʻamoʻui laumālie mālohi ʻokú ne feinga ke tākiekina mālohi ʻa e faʻahinga ʻo e tangatá.
Ko e ngaahi fakakaukau taki taha ko ení ʻoku ʻi ai hono kau poupou, ngalingali ko e laui miliona ʻo kinautolu. Ka ʻoku mahuʻinga moʻoni ʻa e fakakaukau ʻoku totonú? Sai, kapau ʻoku ʻikai ke ʻi ai moʻoni ʻa Sētane, ko e faʻahinga ʻoku nau tali ia ko ha tokotaha moʻoní ʻoku takihalaʻi kinautolu. Kapau ʻoku ʻi ai moʻoni ʻa Sētane ka ʻoku ʻikai mahuʻingaʻia ʻi he faʻahinga ʻo e tangatá, ʻoku hohaʻa ʻa e tokolahi pea aʻu ʻo nau manavahē taʻeʻuhinga. Kae kehe, kapau ko Sētané ko ha tokotaha faʻufaʻu kākā, ta ʻokú ne toe fakatuʻutāmaki ange ia ʻi he meʻa ʻoku fakakaukau atu ki ai ʻa e kakai tokolahi.
Tau sivisiviʻi angé ʻa e founga hono tali ʻe he Folofola Māʻoniʻoní ʻa e ngaahi fehuʻi ko ení: Ko hai ʻa Sētane—ko ha tuʻunga pē ia ʻo e koví pe ko ha tokotaha laumālie? Kapau ko ha tokotaha ia, ʻoku fakatuʻutāmaki ʻa Sētane kiate koe? Kapau ko ia, ʻe lava fēfē ke ke maluʻi koe?
