TIʼ U YÁAX TÁAN JUʼUNIL | ¿TU JAAJIL WA YAAN LE KʼAASILBAʼALOʼ?
¿Kuxaʼan wa le Kʼaasilbaʼaloʼ?
Estatua ku chíikbesik le Kʼaasilbaʼal bey juntúul ángel lubaʼaneʼ (Madrid, España)
«Tin chichnileʼ kin creertik Dios, baʼaleʼ maʼ tin creertik wa yaan le Kʼaasilbaʼaloʼ. Wa maʼ tin wuʼuyik tʼaaneʼ in maamaeʼ suuk u yaʼalikten: ‹Yaan u taal u chʼaʼech le Kʼaasilbaʼaloʼ›. Teneʼ kin núukik: ‹Chaʼa u taal, baʼax in kʼáajtiʼ›.» (ROGELIO, KAJAʼAN EL SALVADOR)
Techeʼ ¿baʼax ka tuklik yoʼolal le Kʼaasilbaʼaloʼ? Tiʼ le óoxpʼéel baʼaloʼobaʼ, ¿máakalmáak ka creertik techiʼ?
-
Kʼaasilbaʼaleʼ maʼ kuxaʼaniʼ; chéen bey u yaʼalaʼal tiʼ le baʼaloʼob kʼaastakoʼ.
-
Kʼaasilbaʼaleʼ tu jaajil yaan, baʼaleʼ maʼ tu beetik mix baʼal tiʼ máak.
-
Kʼaasilbaʼaleʼ jach yaan u páajtalil yéetel ku túulchʼintik wíinik u beet baʼaloʼob kʼaastak.
Jejeláas baʼax ku creertaʼal yoʼolal le Kʼaasilbaʼaloʼ. Baʼaleʼ ¿máakalmáak u jaajiliʼ? Koʼox tuklik lelaʼ. Wa jaaj minaʼan le Kʼaasilbaʼaloʼ, chéen tusaʼan le máaxoʼob tuklik yanoʼ. Wa jaaj yaan u Kʼaasilbaʼal baʼaleʼ maʼ tu beetik mix baʼal tiʼ máakeʼ, chéen kunel u chʼaʼabal saajkil tiʼ. Baʼaleʼ wa le Kʼaasilbaʼal ku tuus yéetel ku kʼaskúuntik u tuukul máakeʼ, u kʼáat u yaʼaleʼ kʼaʼabéet k-kanáantikba tiʼ.
¿Baʼax le Kʼaasilbaʼaloʼ? ¿Chéen letiʼe baʼax kʼaasoʼ, wa juntúul máak maʼ tu yilaʼal? Wa juntúul máakeʼ, ¿bix jeʼel a kanáantkaba tiʼeʼ? Koʼox ilik baʼax ku yaʼalik le Bibliaoʼ.
