David: Daut freit mie, die wada to seenen, John. Ekj jleich daut emma sea, daut wie ons eemol de Wäakj kjennen von de Schreft unjahoolen. * Woo jeit die daut?

John: Goot jenuach.

David: Daut es goot. Latst, aus ekj hia wia, räd wie doavon, wuarom Jehova siene Zeijen sajen, daut Gott sien Kjennichrikj aune 1914 aunfunk to rejieren. * Eenen Bewies doafäa hab wie latst en daut Bibelbuak Daniel, en daut 4. Kapitel, jeseenen. Denkjt die daut noch, waut doa stunt?

John: Jo, daut wia von Kjennich Nebukadnezar sienen Droom von eenen grooten Boom.

David: Jo, krakjt. En sienen Droom sach Nebukadnezar eenen grooten Boom, waut bat aum Himmel rieekjt. Un dan hieed hee Gott sienen Enjel sajen, daut dän Boom sull aufjehakt, oba de Stobben un de Wartlen sullen doa enne Ieed bliewen. Un no eene Tiet von “säwen Joa”, wudd dis Boom wada aunfangen to waussen. * Wie haben uk jeseenen, daut dise Profezeiunk twee Erfellungen haft. Weetst du noch, woo dee sikj toom ieeschte Mol erfeld?

John: Daut wia irjentwaut, waut met Nebukadnezar selfst to doonen haud, nich soo? Aus hee fa säwen Joa onkluak wort em Kopp.

David: Krakjt. Nebukadnezar wort fa eene Tiet onkluak em Kopp un dan kunn hee fa een Stootje nich rejieren. Oba en de tweede Erfellunk jeit daut om Gott siene Rejierunk, waut fa eene Tiet von säwen Joa wudd opphieren. Soo aus wie sagen, funk dise Tiet von säwen Joa aun, aus Jerusalem aune 607 v. Chr. venicht wort. Von dan aun jeef daut äwa Gott sien Volkj oppe Ieed kjeene Kjennichs mea, waut Jehova siene Rejierunk väastalden. Oba aum Enj von dise säwen Joa, wudd Gott eenen nieen Harscha ensaten äwa sien Volkj, un dee wudd em Himmel sennen. Soo, aum Enj von de Tiet von de säwen Joa, wudd Gott sien himlischet Kjennichrikj aunfangen to rejieren. Un wie haben je aul jeseenen, wanea de Tiet von de säwen Joa aunfunk. Un wan wie utfinjen kjennen, woo lang dise Tiet dieren wudd, dan woa wie kjennen weeten, wanea Gott sien Kjennichrikj aunfunk to rejieren. Kjemst noch met?

John: Jo, nu denkjt mie daut wada kloara, von waut wie latst räden.

David: Sea goot. Dan well wie nu mol doavon räden, woo lang dise Tiet von säwen Joa dieet. Ekj hab daut selfst nochmol must aules derchläsen un noforschen toom daut aules kloara haben. Ekj woa vesieekjen, die daut soo goot aus mäajlich uttolajen.

John: Ok.

David: Bie de ieeschte Erfellunk jinkj daut om Nebukadnezar un daut wieren dan werkjlich säwen Joa. Oba en de tweede Erfellunk äwa Gott sien Kjennichrikj mott dise Tiet lenja dieren aus bloos säwen Joa.

John: Woo weetst du daut?

David: Denkj doaraun, daut de Tiet von de säwen Joa aune 607 v. Chr. aunfunk to talen, aus Jerusalem venicht wort. Wan wie von doa säwen Joa talen, dan kom wie bat daut Joa 600 v. Chr., oba en daut Joa passieed nuscht wichtjet, waut met Gott siene Rejierunk to doonen haud. Un dan noch: Soo aus wie latst säden, jeef Jesus hundade Joaren lota, aus hee oppe Ieed wia, auntovestonen, daut dise Tiet von säwen Joa, dan noch nich to Enj wia.

John: Oh jo, nu felt mie daut wada bie.

David: Soo, de Tiet von säwen Joa, kaun nich säwen werkjelje Joa bedieden, daut mott eene väl lenjre Tiet sennen.

John: Na, woo lang?

David: Wan wie daut Bibelbuak Openboarunk läsen, kaun ons daut halpen, daut Buak Daniel bäta to vestonen un uttofinjen, woo lang de Tiet von de säwen Joa es. En de Openboarunk rät daut von eene Tiet von dree un een haulf Joa, un daut sajcht doa, daut sent 1 260 Doag. * Soo, de Tiet von säwen Joa es je twee Mol soo väl, aus de Tiet von dree un een haulf Joa. Soo, daut jeft dan 2 520 Doag. Kjemst noch emma met?

John: Jo, ekj kom noch met. Oba ekj kaun nich vestonen, wuarom daut bewiesen saul, daut Gott sien Kjennichrikj aune 1914 aunfunk to rejieren.

David: Ok, well wie mol seenen. Eenjemol stalt en de biblische Profezeiungen een Dach een Joa väa. * Wan een Dach een Joa väastalt, dan wudd aulsoo de Tiet von säwen Joa 2 520 Joa väastalen. Un wan wie von daut Joa 607 v. Chr. 2 520 Joa wiedatalen, dan kom wie bat daut Joa 1914. Daut es, woo wie opp daut Joa 1914 komen. Daut Joa, wua de Tiet von de säwen Joa to Enj kjeem un Jesus aunfunk, aus Kjennich en Gott sien Kjennichrikj to rejieren. Un wie kjennen uk seenen, daut sikj von 1914 aun daut erfelt, waut de Schreft von de latste Tiet verutsajcht.

John: Biejlikj soo aus waut?

David: Well wie mol seenen, waut Jesus äwa dee Tiet verutsäd, wua hee em Himmel wudd aunfangen to rejieren. Hia en Matäus 24:7 (PB) säd Jesus: “Een Volkj woat jäajen daut aundre oppstonen, un een Kjennichrikj jäajen daut aundre. Un doa woaren opp veschiedne Städen … Hungaschnoot un Ieedbäben sennen”. Kjikj, Jesus säd verut, daut doa wudd Hungaschnoot un Ieedbäben sennen to dee Tiet. Un es daut nich krakjt daut, waut wie nu en onse Tiet sea foaken seenen?

John: Jo.

David: Un Jesus säd en disen Varsch uk verut, daut doa wudd väl Kjrich sennen, wan hee ieescht wudd Kjennich en Gott sien Kjennichrikj sennen. Un daut Bibelbuak Openboarunk sajcht uk noch verut, daut et en de latste Tiet soone groote Kjriej jäwen wudd, waut de gaunze Welt toosaten wudden. * Weetst du, woon Joa de Ieeschta Weltkjrich aunfunk?

John: Daut wia aune 1914. Krakjt daut Joa, waut jie sajen, daut Jesus aunfunk to rejieren! Doaräwa hab ekj ea noch kjeenmol nojedocht.

David: Wan wie de Profezeiunk von de säwen Joa met aundre Profezeiungen von de Schreft vejlikjen, waut von daut Enj räden, dan kjenn wie seenen, woo daut aules tooppaust. Wie, Jehova siene Zeijen, sent ons gaunz secha, daut Jesus aune 1914 aunfunk, en Gott sien Kjennichrikj to rejieren, un daut krakjt daut Joa de latste Tiet aunfunk. *

John: Ekj proow noch emma, daut aula to bejriepen.

David: Jo, ekj kaun vestonen. Soo aus ekj ea säd, daut dieed bie mie uk een Stootje, daut aula kloa to haben. Oba ekj hop sea, daut ekj die oppet weinichste hab kunt dietlich moaken, daut wie, Jehova siene Zeijen, daut, waut wie von daut Joa 1914 jleewen, werkjlich oppe Schreft stetten, wan daut Joa aus Zol uk nich enne Schreft väakjemt.

John: Daut jo. Ekj jleich daut emma, daut jie de Schreft brucken toom daut bewiesen, waut jie sajen, daut es nienich bloos june ieejne Meeninj. Oba doch es mie daut nich dietlich: wuarom mott daut soo schwoa sennen to vestonen. Wuarom säd Gott ons daut nich eefach enne Schreft, daut 1914 daut Joa wia, wua Jesus aunfangen wudd, em Himmel to rejieren?

David: Daut es eene sea goode Froag, John. Daut jeft een deel Sachen en de Schreft, wua eena sikj mott sea aunstrenjen toom dee vestonen. Wuarom leet Gott de Schreft dan soo oppschriewen, daut de Menschen sikj sullen aunstrenjen, dee to vestonen? Veleicht kjenn wie daut näakjste Mol doaräwa vetalen.

John: Jo, daut wudd ekj jleichen.