Julio: Tio Ernesto, cada semana quiquinhuan Bibliamanda parlaj shamushpaca ninandami cushijupani. * ¿Alillachu capashcangui?

Ernesto: Ari, alillami capashcani.

Julio: Cainanillami quiquinhuan parlanajuparcanchi, testigo de Jehovacunaca imamandata ninchi 1914 huatapimi Diospa Reinoca mandai callarirca nishpa. * Chaita intindingapaca Daniel capítulo 4​pimi huauqui textocunata liiparcanchi. ¿Chai textocunapi imata nijushcata yaripanguichu?

Ernesto: Ari, rey Nabucodonosorpa muscuimandami parlajurca.

Julio: Shinami can. Rey Nabucodonosorca jahua cielocaman chayajta viñashca quirutami muscurca. Chai muscuipica Taita Diospa shuj ángel quiruta cuchushpa shitaichi nijtami uyarca. Cuchushpa shitajpica sapihuanlla troncohuanllami quedarca. ‘Canchis huatacuna’ yalishca jipami chai troncoca cutin viñai callarirca. * Imashinami ricuparcanchi, profeta Danielpa shimicunaca ishcai viajemi pactarirca. ¿Callaripi imashina pactarishcata yaripanguichu?

Ernesto: ¿Nachu rey Nabucodonosorca loco tucushpa, 7 huatacunata shinalla pararca.

Julio: Ari. Loco tucushcamandami Nabucodonosorca 7 huatacunata ñana mandarca. Shinallata Dios agllashca reycuna cai Alpata mandanata saquijpimi profeta Danielpa shimicunaca cutin pactarirca. Jesús shamungapaj 607 huatacuna faltajuj punllacunapi, Jerusalén llactata llaquichijpimi canchis tiempocunaca callarirca. Chai punllamandapachami Dios agllashca reycunaca ñana mandanajurca. Canchis tiempocuna tucurijpica, Jehová Diosca jahua cielopi mandachunmi shuj reyta agllana carca. Shinaca canchis tiempocuna tucurijpimi Diospa Reinoca jahua cielopi mandai callarina carca. Cunangamanga ima huatapi canchis tiempocuna callarishcatami ricushcanchi. Shinapash Diospa Reino ima huatapi mandai callarishcata yachangapaca, canchis tiempocuna mashna huatacunata parashcatami ricuna capanchi. Tio Ernesto, ¿intindijupanguichu?

Ernesto: Ari, cainanilla parlashcatami cutin yarijupani.

Julio: ¡Alipacha! Shinaca, canchis tiempocuna mashna huatacunata parashcata ricupashun. Caita parlangapaca cutin cutinmi aliguta repasajuparcani. Ñuca ushashcaguta intindichipasha.

Ernesto: Shinaca ricupashun.

Julio: Canchis tiempocuna rey Nabucodonosorpi pactarishpaca 7 huatacunatallami pararca. Cutin Diospa Reinopi pactarishpaca ashtaca ashtaca huatacunatami pararca.

Ernesto: Chaitaca ¿imashinata yachapangui?

Julio: Cutin yaripashun. Jesús shamungapaj 607 huatacuna faltajuj punllacunapi, Jerusalén llactata llaquichijpimi canchis tiempocunaca callarirca. Chai huatamanda 7 huatacunata cuentajpica 600 huatacamanllami chayanchi. Shinapash chai huatapica na imapash pasarcachu. Ashtahuangarin, imashinami ña ricuparcanchi ashtaca huatacuna jipa Jesús cai Alpaman shamushpaca canchis tiempocunaca nara tucurishcachu nircami.

Ernesto: Ah, ñami yaripani.

Julio: Shinaca, Diospa Reinomanda parlashpaca canchis tiempocunaca na 7 huatacunallachu can. Ashtaca ashtaca huatacunami cana can.

Ernesto: ¿Mashna tiempopachashi can?

Julio: Apocalipsis libropi shuj profeciaca, profeta Daniel parlashca canchis tiempocuna mashna huatacunata paranatami intindichijun. Apocalipsis libropica ricuchinmi, quimsa huata chaupica 1.260 punllacuna cashcata. * Shinaca canchis tiempocunaca 2.520 punllacunami can. ¿Intindirijupanllu?

Ernesto: Ari, pero imamanda 1914​pi Diospa Reino mandai callarishcataca nara aliguta intindipanichu.

Julio: Shinaca ashtahuan ricushpa catipashun. Bibliapa huaquin profeciacunapica, shuj punllataca shuj huatata shinami cuentan. * Shinallata canchis tiempocunamanda parlashpaca, 2.520 punllacunaca 2.520 huatacunami can. Canchis tiempocunaca Jesús shamungapaj 607 huatacuna faltajuj punllacunapimi callarirca. Shinaca 607 huatamanda 2.520 huatacunata cuentajpica 1914 huatamanmi chayanchi. * Chaimandami ñucanchica nipanchi, 1914 huatapi canchis tiempocuna tucurijpimi Jesusca Diospa Reinopi mandai callarirca nishpa. Ashtahuangarin Bibliapica tucuri punllacunapi ima llaquicunalla ricurinatapashmi parlajurca. Chai llaquicunaca 1914​pimi ricuri callarirca.

Ernesto: ¿Ima llaquicunallata ricurina carca?

Julio: Jahua cielopi mandai callarijpi ima llaquicunalla ricurinata parlashpami Jesusca Mateo 24:7​pica nirca: “Shuj llactapi mandajcunahuan, chaishuj llactapi mandajcunahuanmi macanajunga. Llactacunata jatun mandajpuracunapash macanajungami. Shinallata jatun ungüicunapash, ninan yarjaipash, alpa mama cuyushpa tucuchijuipash, shuj shuj llactacunapimi tianga” nishpa. Ricupai, Jesusca nircami ninan yarjaipash, alpa mama cuyushpa tucuchijuipash tiangami nishpa. ¿Nachu chai llaquicunaca 1914 huatamandapacha tiashca?

Ernesto: Ari, ciertomi can.

Julio: Jesusca macanajuicuna tianatapashmi parlarca. Apocalipsis libropica, huaquin llactacunapilla macanajuicuna tianataca na parlajunllu, mundo enterota llaquichij macanajuicuna tianatami parlajun. * Quiquinga ¿ima huatapi Primera Guerra Mundial tiashcata yachapanguichu?

Ernesto: 1914 huatapi. Ah, ali cuenta japijpica, quiquinguna nishca shinami chai huatapillata Jesusca Diospa Reinopi mandai callarishca.

 Julio: Ari... aliguta cuenta japijpica canchis tiempocunamanda parlaj profeciapash, tucuri punllacunamanda parlaj profeciapash tucuimi pactarin. Chaimandami testigo de Jehovacunaca 1914 huatapi Diospa Reinopi Jesús mandai callarishcata, chai huatamandapacha tucuri punllacunapi causanajushcatapash seguro canchi. *

Ernesto: Cai tucuita aliguta intindinaca na facilchu cashca.

Julio: Ñucamanbash shinallatami yachachirca. Pero jipamanmi asha asha intindishpa catircani. Shinapash, 1914 huata Bibliapi na ricurijpipash chai huatapi Jesús mandai callarishcata quiquin intindichunmi huaquin yuyaicunata ricuchipashcani. Ashtahuangarin, imashinami ricupashcangui imata yachachishpapash Bibliapimi ricuchipanchi.

Ernesto: Ari. Testigocuna shina rurajtami ñucaca siempre alicachishcani. Ñuca imata tapuchijpipash, “Ñucaca crinimi” o “Ñuca yuyanimi” nijunapa randica, Bibliapimi ricuchihuashcangui. Pero, 1914 huatapi Jesús mandai callarishcata intindinaca ¿imamandashi shinlli can? ¿Imamandashi Taita Diosca na Bibliapillata escribichirca Jesusca 1914 huatapimi mandai callaringa nishpa?

Julio: Chaica alimi canman carca. Bibliapica shuj cosascunamanda parlashpapash imapacha cashcataca na ninllu. Chaicunata intindingapaca ¿imamandashi ninanda esforzarina capanchi? Chai yuyaimanda caya semana parlagapaj shamuchun ¿munapanguimanllu?

Ernesto: Ari, shamupanguilla.