Cameron: Sangalele kuti lelo tusimenesoni. Ngusasangala kulijiganya Baibulo yalumo ni wawojo. * Nambo umi ukwenda uli?

Jon: Une amwene ndili chenene, kwali wawo ali uli?

Cameron: Unesoni ndili chenene nditu. Wiki jipite twakambilene ligongo lyakwe ŵa Mboni sya Yehofa akusasala kuti Uchimwene wa Mlungu watandite kulamulila mu 1914. * Soni twapatile umboni mu yakulochesya yayikusimanikwa mu chaputala 4 cha buku ja Daniele. Ana akukumbuchila yachikusasalaga chaputala chelechi?

Jon: Yili yakwamba sagamisi sya Mwenye Nebukadinesa sya chitela chekulungwa.

Cameron: Ni mmomo. Mu sagamisisyo Nebukadinesa ŵachiweni chitela chekulungwa chele nyambi syakwe syayiche kwinani. Kenako ŵapikene utenga wakutyochela kwa Mlungu wakuti agwisye chitelacho, nambo agambe kuleka chisichi ni michiga jakwe mwitaka. Mkumala “yaka msano ni yiŵili,” chitelo chichisipukasoni. * Twakambilenesoni kuti yakulochesyayi yana kwanilichikwa kuŵili. Ana akukumbuchila kukwanilichikwa kwandanda?

Jon: Naga ngukumbuchila chenene, twayiweni kuti kwanilichikwa kwandanda kwakwayiye yayamtendechele Nebukadinesa. Jwalakwe jwawutwiche masoka kwa yaka msano ni yiŵili.

Cameron: Yisyene yeleyo. Jwalakwe jwatesile masoka kwa yaka yeleyo, mwamti ulamusi wakwe wasokonechele. Nambo pakukwanilichikwa kwaŵili, nombe nawo ulamusi wa Mlungu wasokonechelesoni kwa ndaŵi ja yaka msano ni yiŵili. Mpela mwatayiwonele, yaka msano ni yiŵiliyi yatandite msinda wa Yelusalemu ali awujonasile mu 607 B.C.E. Kutandila pandaŵiji paliji pangali mwenye pachilambo chapasi juŵajimilaga Yehofa Mlungu pakwalamulila ŵandu ŵakwe. Nambo kumbesi kwa yaka msano ni yiŵili Mlungu jwasagwile Jwakulamulila jwine kuti ŵalamulileje ŵandu ŵakwe. Nambo jwakulamulilaju jwasagulidwe kwinani. Pelepa mpaka tujile kuti ulamusi wa Mlungu watandite kulamulila pajamasile ndaŵi ja yaka msano ni yiŵili. Nambo naga akukumbuchila twakambilenesoni kuti yaka msano ni yiŵiliyi yatandite chakachi. Twasasilesoni kuti naga tukumanyilila ulewu wa yaka msano ni yiŵili, nikutisoni chiyiŵe yangasawusya kumanyilila kuti Uchimwene wa Mlungu watandite chakachi kulamulila. Ngati akuyipikanichisya yanguŵechetayi?

Jon: Ngwapikanichisya nditu, mwamti yeleyi yingumbwisye yatwakambilene yila.

Comeron: Sikomo kwejinji. Apano tukusaka tutande kambilana kuti ana yaka msano yeleyi yaliji ndaŵi jelewu mwamtuli? Mwamti ngambile kuŵalanga kwene ngani jeleji kuti ngumbuchilesoni mfundo syekulungwakulungwa. Ni chilinje kulondesya mwakupikanika chenene.

Jon: Chambone.

Cameron: Mu kukwanilichikwa kwandanda kwa chakulochesyachi, yaka msano ni yiŵili yaliji yaka yisyesyene yatukuyimanyililayi. Nambo mu kukwanilichikwa kwaŵili yaka msano ni yiŵiliyi yaliji yelewu mnope.

Jon: Ligongo chichi akuŵecheta myoyo?

Cameron: Naga akukumbuchila yaka msano ni yiŵiliyi yatandite msinda ŵa Yelusalemu ali awujonasile mu 607 B.C.E. Ni kutyochela mchakachi, naga tukutyochesya yaka msano ni yiŵiliyi, yaka yisyesyene yatukuyimanyililayi, nikuti yikutuyikasya m’chaka cha 600 B.C.E. . Pangali chindu chilichose chakusosekwa chachatendekwe mwakamulana ni ulamusi wa Mlungu. Nambosoni akumbuchile yatukambilene kala kuti Yesu ali pachilambo chapasi jwalosisye kuti yaka msano ni yiŵili yaliji mkaniyimale mundaŵi jakwejo.

Jon: Elo ngukumbuchila.

Cameron: Myoyo yakayi ngaŵa kuti yili yaka yisyesyene yatuyimanyiyi, nambo yajimilaga yakutendekwa yandaŵi jelewu.

Jon: Ndaŵi jelewu mwamtuli?

Comeron: Buku ja Chiwunukuko jajikusalondesya yindu mwakulandani ni buku ja Daniele mpaka jitukamuchisye kumanyilila ulewu wa yaka msano ni yiŵiliyi. Buku ja Chiwunukukoji jikusasala kuti masiku gatatu ni hafu gali gakulandana ni masiku 1,260. * Myoyo nikuti masiku gatatu ni hafuga kugatupiya kaŵili, gakutupa masiku msano ni gaŵili (7). Sano pakuŵa masiku gatatu ni half gali gakulandana ni masiku 1,260, nikuti naga masiku 1,260 tukugatupiya kaŵili chigatupe masiku 2,520. Tuli yimpepe ngati?

Jon: Elo, ngwapikanichisya. Nambope ngangukuwona kukamulana kwakuti Uchimwene wa Mlungu watandite kulamulila mu 1914

Cameron: Chambone. Kwende sano tulole kamulana kwakwe. Ndaŵi sine mwakamulana ni yakulochesya ya m’Baibulo, lisiku likusajimilaga chaka. * Nikuti mwakamulana ni mfundo jeleji yaka msano ni yiŵili yili yaka 2,520. Nikuti naga tukuŵalanjila yaka 2,520, kutyochela m’chaka cha 607 B.C.E, yikutuyikasya mchaka cha 1914. * Kaŵalanjile keleka ni kakakusatukamuchisya kumanyilila kuti chaka cha 1914 chili chaka chele masiku msano ni gaŵili gamasile soni kuti Yesu jwatandite kulamulila mpela Mwenye jwa Uchimwene wa Mlungu. Soni konjechesya pelepa, mu 1914 pachilambopa paŵele mkutendekwa yindu yekulungwa yele Baibulo jaliji jili jisasile kala kuti yichitendekwa mmasiku gambesi.

Jon: Yindu yakwe mpela yapi?

Cameron: Kwende tulole yaŵaŵechete Yesu pa Mateyu 24:7. Pakwamba ya ndaŵi jele jwalakwe chachitanda kulamulila, jwasasile kuti, “Mitundu ja ŵandu jakulekanganalekangana tijichimenyana ngondo, soni uchimwene tiwuchijimuchilana ni uchimwene ujakwe. Tikuchiŵa kwana sala ni yisichinya ku malo gakulekanganalekangana.” Apikene yaŵechete Yesu palilembali? Jwalakwe akusala mkanipaŵe kuti kuchiŵa sala soni yisichinya. Mwamti yeleyi ni yayiŵele yili mkutendekwa pachilambopa, ngati myoyo?

Jon: Yisyene yeleyo.

Cameron: Palilembali, Yesu akusalasoni kuti pachachigamba kuŵa Mwenye jwa Uchimwene wa Mlungu, pachilambopa pachiŵa ngondo. Mwamti buku ja Chiwunukuko jasasilesoni mkanipaŵe kuti ngondoji ngaŵa kuti jichigamba kuŵa jachilambo chimpepe, nambo ja pachilambo chosope chapasi. * Ana akukumbuchila kuti ngondo jandanda ja pachilambo chosope jatendekwe chakachi?

Jon: Jatendekwa mu 1914, chaka chakusala kuti Yesu jwatandite kulamulila. Nganimanyililaga yeleyi.

Cameron: Myoyo kuganichisya mfundo syosopesi syasili yakulochesya yakwamba masiku msano ni gaŵili soni yakulochesya yine ya m’Baibulo yakwamba masiku gambesi, nipatukusapikanichisya ngani josopeji. Ni ligongo lyakwe ŵa Mboni sya Yehofa akusakulupilila kuti Yesu jwatandite kulamulila mpela mwenye jwa Uchimwene wa Mlungu mu 1914 soni kuti masiku gambesi gatandite m’chakachi. *

Jon: Chilinjilile kuti nganisi nasipikanichisye chenene.

Cameron: Chambone. Mpela mumbechetele kala, unesoni yanjigalile ndaŵi kuti nayipikanichisye chenene yeleyi. Nambo nguganisya kuti yatukambileneyi yakamuchisye kumanyilila kuti atamose kuti chaka cha 1914 ŵangachisala m’Baibulo, nambope yakusakulupilila ŵa Mboni sya Yehofa pakwamba chakachi yili yakutyochela m’Baibulo.

Jon: Yisyene, sonitu yeleyi ni yayikusasangalasya ni jemanja, ligongo chilichose chakusasala chikusaŵa kuti chikukamulana ni malemba. Ngakusasala ya mumtwe mwawo. Nambope ngujiwona nganiji kuŵa jakusawusya kujipikanichisya. Ana ligongo chichi Mlungu nganagamba kutusalila kuti Yesu chachitanda kulamulila kwinani mu 1914?

Cameron: Awusisye chiwusyo chambone kwabasi. Akusosekwa kumanyilila kuti m’Baibulo mwana yindu yejinji yele nganayilondesya yosope. Nambo ana akuganisya kuti ligongo chichi Mlungu jwalembile Baibulo mulitala lyakuti ŵandu aŵichilejepo mtima kuti ajipikanichisye? Lisiku line tukambilane jele nganiji.

Jon: Mpaka yiŵe chenene kukambilana jele nganiji.