Baebol i talemaot klia se Jisas i mekem ol man we oli ded, oli laef bakegen. Hemia i no ol stori we man i jes mekemap, be hem i ol tru stori we oli hapen long wan ples, long stret taem. Yu traem tingbaot, long stat blong hot taem long yia 31. I gat plante man we oli biaen long Jisas long Kapaneam, blong go long taon ya Naen. Taem oli kasem taon ya, oli luk plante man long ples ya. Bambae yu trastem stori we i kamaot biaen, we i tokbaot wan dedman i laef bakegen, from we oli raetem stori ya long Baebol. Mo tu, i gat plante man we oli stap long taem ya, mo oli luk samting we i hapen.—Ridim Luk 7:11-15

Mo tu, Jisas i mekem fren blong hem Lasaros, we i ded fo dei finis, i laef bakegen.Yu save bilivim stori blong samting we Jisas i mekem long dei ya, from we i gat plante man we oli stap long taem ya, mo oli luk samting we i hapen.—Ridim Jon 11:39-45.

Jisas i mekem ol dedman oli laef bakegen, from we hem i gat sore long ol man we oli harem nogud. Mo tu, hem i mekem samting ya blong soemaot se Papa blong hem, Man ya we i mekem yumi, i givim paoa finis long hem blong mekem ol dedman, oli laef bakegen.—Ridim Jon 5:21, 28, 29

Ol merikel we Jisas i mekem, blong mekem ol dedman oli laef bakegen, i mekem yumi gat strong tingting long ol promes blong hem we bambae oli kamtru long fiuja. Hem bambae i mekem plante dedman, oli laef bakegen. Hemia i minim tu, olgeta we oli mekem i no stret, from we oli no gat save nating long tru God. Olgeta ya, oli gat janis blong lavem Jehova God, mo lanem ol save blong hem.—Ridim Ol Wok 24:15.