Anihein abahüdaguni tidan Bíbülia hawagu gürigia ha meha láguyuguagüdübaña Hesusu. Mama úraga abahüdaguni ligía; ariñawagúati halía lan lasusereda luma ídabuga lan. Kei hénpulu, lidan irumu 31 lidan wadaani, aweiyasuhati Hesusu hama fiú gürigia Kafarünaúmugiñe lidoun aban uburugu gíriti Naín. Dan le lachülürün, aba ladunragun hama ábunahatiña, hóudiña ábuna aban nibureinti. Aba láguyuguagüdüni Hesusu ñein. Gayarati wachoururuni susere lan milaguru ligía, mámarügü ladüga ariñaga tani Bíbülia, gayarati wafiñerun ladüga gibe hamá arihiti. (Aliiha huméi Lúkasi 7:11-15.)

Dan lárigiñe, saragüda lumuti giñe Hesusu Lásaru, le lumada, le meha barühalibei gádürü weyu lúmagiñe lounwen. Ani gíbetiña giñe gürigia arihiti milaguru ligía. Chóuruti lubeiti luagu susere lan giñe águyuguni ligía. (Aliiha huméi Huan 11:39-45.)

Águyuguagüda lumutiña meha ladüga lugudemehabu. Adüga lumuti meha giñe lun larufuduni luagu ru lan Lúguchi, le íchugubalin ibagari, ubafu lun luagu óunweni. (Aliiha huméi Huan 5:21, 28, 29.)

Águyuguni burí le meha ladügübei Hesusu ruti ichouruni woun luagu lagunfulirubei lan sun le füramase lubéi lubá ámuñegü. Láguyuguagüdüba saragu míñunu gürigia, íbini ha meha masubudirunbalin Bungiu. Gayarabei hasubudiruni ani hínsiñe ligíame houn. (Aliiha huméi Adügaü 24:15.)