Baibolo wamba kuba’mba Yesu wasangwile bantu bafwile. Ano mashimikila kechi bishimitu ne, bino a kine mambo batongola mapunzha ne kimye kyo byamwekelenga. Kya kumwenako, mu kisalo mu mwaka wa 31 C.E., jibumba jikatampe jalondejilenga Yesu kufuma ku Kapenama kuya ku Naina. Byo bafikile, bataine jibumba jikwabo. Mwakonsha kuketekela jishimikila jaamba pa lusanguko lwaubiwe pa kikye kimye mambo lwanembwa mu Mambo a Lesa, Baibolo, kabiji lwaubiwe pa mvula bantu.—Tangai Luka 7:11-15.

Yesu wasangwile ne mulunda nanji aye Lazalasa, wafwile saka papita ne moba ana. Mwafwainwa kuketekela byaubile Yesu pa jo ja juba mambo bantu bavula bamweneko.—Tangai Yoano 11:39-45.

Yesu wasangwile bantu mambo wajinga na lusa. Waubile bino kumwesha kuba’mba Shanji, aye Mpanyi wa bumi wamupeele bulume bwa kusangula bafwa.—Tangai Yoano 5:21, 28, 29.

Bantu Yesu bo abushishenga betulengela kuketekela mu milaye ya kulutwe. Ukasangula bantu bavula kuvwangakotu ne babula koloka babujile kuyuka Lesa wa kine. Bakebapa jishuko ja kufunda pe Yehoba Lesa ne kumwesha kuba’mba bamutemwa.—Tangai Byubilo 24:15.