Bible chuan Isua’n mitthite a kaitho tih chiang takin a sawi a. Chûng thuziakte chu thawnthu phuahchawp mai a ni lo; a thlenna hmun leh hun chu chiang taka târ lan a ni. Entîr nân, C.E. 31 nipui laiin, Isua chu Kapernaum aṭanga Nain khuaa a zinna kawngah mipui tam takin an zui a. An va thlen dâwn chuan mipui tam tak dang an tâwk a. A hnua mitthi kaihthawhna chanchin chu Pathian Thu, Bible-a chhinchhiah a nih vâng leh hretu mipui tam tak hmaa thilthleng a nih avângin, i ring thei a ni.​—⁠Luka 7:​11-15 chhiar rawh.

Isua chuan ni li lai thi tawh a ṭhian Lazara pawh a kaitho bawk a. Chu mi nîa Isua thiltih chu hretu tam tak hmaa tih a nih bawk avângin kan ring thei a ni.​—⁠Johana 11:​39-45 chhiar rawh.

Isua’n mitthite a kaihthawh chhan chu khawngaihnain a tur vâng a ni a. Nunna siamtu, a Pain thihna chunga thu neihna a pêkzia târ lan nân a kaitho bawk a ni.​—⁠Johana 5:​21, 28, 29 chhiar rawh.

Isua’n mitthite a kaihthawhna chuan nakin hun atâna a thutiamte a hlen ngei ang tih rin nghehna min neihtîr a. Ani chuan Pathian dik chungchâng engmah la hre lo mi fel lote pawh tiamin, mitthi tam tak a kaitho vang. Anni chu Pathian Jehova hriat theihna leh hmangaih theihna hun remchâng pêk an ni ang.​—⁠Tirhkohte 24:15 chhiar rawh. (w14-E 11/01)