Beibele e bolela ka mo go kwagalago gore Jesu o ile a tsoša bahu. Dipego tšeo ga se dinonwane; di diragetše mafelong a kgonthe dinakong tše itšego. Ka mohlala, selemong sa ngwaga wa 31 C.E., lešaba le legolo le ile la sepela le Jesu go tloga Kaperenaume go ya Naini. Ge ba fihla, ba ile ba kopana le lešaba le lengwe. O ka bota pego ya tsogo yeo e diragetšego ka morago ga moo ka gobane e begilwe ka Lentšung la Modimo, e lego Beibele, le gore e diragetše pele ga dihlatse tšeo ka moka.—Bala Luka 7:11-15.

Le gona Jesu o ile a tsoša mogwera wa gagwe Latsaro, yo a bego a šetše a na le matšatši a mane a hwile. O ka kgolwa pego ya seo Jesu a se dirilego letšatšing leo ka gobane le yona e bonwe ke dihlatse tše dintši.—Bala Johane 11:39-45.

Jesu o tsošitše batho ka gobane o be a tutuetšwa ke kwelobohloko. Le gona o dirile seo go bontšha gore Tatagwe, yena Mmopi wa bophelo, o be a mo neile matla a go fenya lehu.—Bala Johane 5:21, 28, 29.

Go tsoša ga Jesu batho go dira gore re bote dikholofetšo tša gagwe ka bokamoso. O tla tsoša batho ba bantši kudu, go akaretša le ba sa lokago bao ba bego ba sa tsebe selo ka Modimo wa therešo. Ba tla newa sebaka sa go tseba le go rata Jehofa Modimo.—Bala Ditiro 24:15.