Ombimbiliya ipopia nokuayandyuluka nawa okuti Jesus watutilisile ine wapindulile ovanthu ankho vankhia. Otyo otyili haunkhembi; ehipululo olio liapopia alo umwe omuvo no nomphangu mbatyo. Mongeleka, ponkhalula menima 31 P.K., ovanthu ovanyingi valingile oungendi na Jesus okutunda ko Kafarnau okuenda noko Naim. Etyi vehika, avavasi vali ovanthu ovakuavo ovanyingi. Ove upondola okuyumba onthumbi mehipululo lietutilo Jesus alingile mokonda liahonekwa Mondaka ya Huku, Ombimbiliya, iya tupu tyalingilwe otyo ovanthu vetyiete.—Tanga Lucas. 7:11-15.

Jesus tupu watutilisile Lasalu, ankho wankhia palambale ononthiki ononkhuana. Ove upondola okutyitavela mokonda Jesus wetyilingile pokati kovanthu ovanyingi.—Tanga João 11:39- 45.

Jesus watutilisile ovanthu mokonda yokankhenda. Tupu ankho opala alekese okuti Tate yae, Omutungi womuenyo, oe wemuavela epondolo liokututilisa ovanthu.—Tanga João 5:21, 28, 29.

Etyi Jesus ekahi pano pohi watutilisile ovanthu, otyo tyituavela onthumbi momilao viae viokomutwe. Makatutilisa ovanthu ovanyingi muakutikinya ovanthu vehevaviuki, veheivile natyike konthele ya Huku yotyotyili. Ovo mavakakala nomphitilo yokunoñgonoka Jeova Huku nokukala noluembia nae.—Tanga Atos 24:15.