Beibel ta bisa bon kla ku Hesus a lanta hende for di morto. E relatonan ei ta real pasobra nan a sosodé na lugánan ku ta eksistí i na tempunan spesífiko; nan no ta mito. Por ehèmpel, durante e zomer di aña 31 di promé siglo, un gran kantidat di hende a biaha di Kapernaum pa Nain huntu ku Hesus. Ora nan a yega ei, nan a topa un otro grupo basta grandi di hende ku tabata bai dera un mucha hòmber di e stat, i Hesus a resusit’é. Nos por konfia ku di bèrdat e resurekshon akí a tuma lugá, no solamente pasobra e ta skirbí den Beibel, sino tambe pasobra el a tuma lugá dilanti di tur e hendenan ei presente.—Lesa Lukas 7:11-15.

Tambe Hesus a lanta su amigu Lázaro, kende ya tabatin kuater dia morto. Bo por kere e relato di loke Hesus a hasi e dia ei pasobra esaki tambe a sosodé dilanti di hopi hende.—Lesa Huan 11:39-45.

Kompashon a konmové Hesus pa lanta hende for di morto. El a hasi esaki tambe pa mustra ku su Tata, e Kreador di bida, a dun’é poder riba morto.—Lesa Huan 5:21, 28, 29.

E resurekshonnan ku Hesus a hasi ta duna nos e konfiansa ku tur su promesanan lo kumpli. Lo e lanta masha hopi hende for di morto, asta hende inhustu ku no tabata sa nada di e Dios berdadero. Nan lo haña un chèns pa siña konosé Yehova Dios i stim’é.—Lesa Echonan 24:15.