1, 2. (a) Wetin sɔm edman dɛn pan Gɔd biznɛs bin want fɔ no? Aw Pita bin ansa dɛn? (Luk di pikchɔ nia dis atikul in taytul.) (b) Wetin bin mek Pita nɔ fred we i de bifo dɛn Ju edman dɛn?

JƆS afta Jizɔs day, di apɔsul Pita bin gɛt fɔ tɔk to sɔm bad man dɛn. Dɛn man ya na bin di pawaful Ju edman dɛn pan Gɔd biznɛs ɛn na dɛn bin plan fɔ lɛ dɛn kil Jizɔs. Pita bin dɔn mɛn wan man we bin kripul frɔm we dɛn bɔn am, so dɛn bin want fɔ no udat gi Pita pawa fɔ du dis ɔ udat in nem Pita bin yuz fɔ du dis. Dɛn man ya se lɛ Pita ɛksplen. Di apɔsul Pita nɔ bin fred atɔl fɔ tɔk se: “Na Jizɔs Krays we kɔmɔt Nazarɛt, we una bin kil pan stik, bɔt we Gɔd gi layf bak, na in nem a yuz fɔ mek dis man tinap bifo una so wɛl wɛl wan.”—Akt 4:5-10.

² Bifo dis tɛm, Pita bin dɔn dinay Jizɔs tri tɛm. (Mak 14:66-72) So, wetin mek Pita nɔ bin fred fɔ tɔk we i bin de bifo dɛn Ju edman ya? Na bikɔs di oli spirit bin ɛp am ɛn i bin rili biliv se Jizɔs dɔn gɛt layf bak. Wetin mek Pita bin rili shɔ se Jizɔs dɔn gɛt layf bak? Ɛn wetin mek wisɛf fɔ biliv se Jizɔs bin gɛt layf bak?

3, 4. (a) Udat dɛn bin gɛt layf bak bifo di apɔsul dɛn tɛm? (b) Udat dɛn Jizɔs bin gi layf bak?

³ Jizɔs in apɔsul dɛn bin no se i pɔsibul fɔ lɛ pɔsin we dɔn day gɛt layf bak; sɔm pipul dɛn we bin dɔn day bifo di  apɔsul dɛn tɛm bin gɛt layf bak. Dɛn bin no se Gɔd bin gi pawa to Ilayja ɛn Ilaysha fɔ gi layf bak to di wan dɛn we dɔn day. (1 Kiŋ 17:17-24; 2 Kiŋ 4:32-37) We dɛn bin trowe wan dayman in bɔdi insay Ilaysha in grev, di man gɛt layf bak we in bɔdi tɔch Ilaysha in bon bon dɛn. (2 Kiŋ 13:20, 21) Di Kristian dɛn we bin de trade trade bin biliv dis, jɔs lɛk aw wisɛf biliv se Gɔd in Wɔd na tru.

⁴ Wi go mɔs dɔn gladi we wi rid say dɛn na di Baybul usay Jizɔs gi layf bak to pipul dɛn we dɔn day. Wan tɛm, Jizɔs bin gi layf bak to wan uman in wangren pikin. Dis uman in man bin dɔn day, so i go mɔs dɔn gladi pasmak we Jizɔs du dis. (Lyuk 7:11-15) Wan ɔda tɛm, Jizɔs bin gi layf bak to wan gyal pikin we bin ol 12 ia. Di gyal pikin in mama ɛn papa go mɔs dɔn gladi ɛn wɔnda we Jizɔs gi layf bak to dɛn pikin. (Lyuk 8:49-56) Ɛn di pipul dɛn we bin de luk we Jizɔs de gi layf bak to Lazarɔs go dɔn gladi we dɛn si Lazarɔs de kɔmɔt na di grev in wɛl wɛl wan!—Jɔn 11:38-44.

5. Aw di layf we Jizɔs bin gɛt bak difrɛn frɔm di layf we ɔda pipul dɛn bin gɛt bak?

⁵ Di apɔsul dɛn bin no se di layf we Jizɔs bin gɛt bak bin difrɛn frɔm di layf we ɔda pipul dɛn bin gɛt bak. Pipul dɛn we bin gɛt layf bak bin kam wit mɔtalman bɔdi ɛn leta, dɛn bin day bak. Bɔt we Jizɔs in bin gɛt layf bak, na spirit bɔdi Gɔd bin gi am ɛn dis kayn bɔdi nɔ de ɛva day. (Rid Di Apɔsul Dɛn Wok [Akt] 13:34.) Pita bin rayt se “dɛn kil [Jizɔs] we in na bin mɔtalman bɔt i gɛt layf bak as spirit pɔsin.” Pantap dat, “i sidɔm na Gɔd in rayt an, ɛn Gɔd mek di enjɛl dɛn ɛn ɔl di wan dɛn we gɛt pawa, de ɔnda am.” (1 Pit. 3:18-22) I rili wɔndaful we pipul dɛn bin de gɛt layf bak, bɔt Jizɔs in yon layf we i gɛt bak, bin wɔndaful pas ɔl.

6. We Jizɔs gɛt layf bak, aw dat bin ɛp in disaypul dɛn?

⁶ Di layf we Jizɔs bin gɛt bak bin rili ɛp in disaypul dɛn difrɛn difrɛn we dɛn. Jizɔs nɔto bin dayman igen as in ɛnimi dɛn bin de tink. Jizɔs bin gɛt layf as pawaful spirit pɔsin we no mɔtalman nɔ go ebul fɔ du bad. We Jizɔs gɛt layf bak, i sho se in na Gɔd in Pikin fɔ tru, ɛn dis bin mek in disaypul dɛn gladi pasmak. Apat frɔm dat, i bin mek di disaypul dɛn lɛf fɔ fred. If Jizɔs nɔ bin fɔ dɔn gɛt layf bak, wetin Jiova want nɔ bin fɔ dɔn bi ɛn di gud nyus we wi de prich nɔ bin fɔ gɛt ɛni yus.

7. Wetin Jizɔs de du naw? Us kwɛstyɔn dɛn wi gɛt fɔ ansa?

⁷ Wi we na Jiova in savant dɛn, no se Jizɔs nɔto bin jɔs wan pawaful man we bin de trade. Bɔt i de liv tide ɛn na in de sho wi aw wi fɔ prich di gud nyus ɔlsay na di wɔl. I nɔ go tu te igen, Jizɔs Krays we na di Kiŋ na Gɔd in Kiŋdɔm na ɛvin go pul ɔl di bad bad tin dɛn we de apin na dis wɔl ɛn mek di wɔl bi Paradays usay pipul dɛn go de sote go. (Lyuk 23:43) If Jizɔs nɔ bin gɛt layf bak, ɔl dis nɔ bin fɔ apin. So, us rizin dɛn wi gɛt fɔ biliv se i bin gɛt layf bak? Aw di layf we Jizɔs gɛt bak go ɛp wi?

8, 9. (a) Wetin mek di Ju edman dɛn bin aks fɔ lɛ dɛn put wachman dɛn na Jizɔs in grev? (b) Wetin apin we uman dɛn go na di grev?

⁸ Afta we dɛn kil Jizɔs, di edman fɔ di prist dɛn ɛn sɔm Faresi dɛn bin go to  Paylet ɛn tɛl am se: “Wi mɛmba wetin da layman bin tɔk bifo i day. I bin se: ‘Afta tri dez a go grap bak.’ So, mek lɛ dɛn gayd di grev te di tri dez pas, so dat in disaypul dɛn nɔ go kam tif am ɛn tɛl di pipul dɛn se, ‘I dɔn gɛt layf bak!’ Da tɛm de, dis las lay go wɔs pas di fɔs wan. Paylet tɛl dɛn se: ‘Una kin go gayd am. Una go gayd am di we aw una want.’” So na dat dɛn bin du.—Mat. 27:62-66.

⁹ Dɛn bin put Jizɔs in bɔdi insay wan grev we dɛn mek insay wan big rɔk ɛn we bin gɛt wan big ston na di domɔt. Na insay dis grev di Ju edman dɛn bin want lɛ Jizɔs de sote go. Bɔt nɔto dat Jiova in bin want atɔl. We Meri Magdalin ɛn di ɔda Meri go na di grev di de we mek tri, dɛn si se di ston nɔ de na di domɔt igen ɛn wan enjɛl bin sidɔm pan am. Di enjɛl bin tɛl di uman dɛn se Jizɔs “nɔ de ya, i dɔn gɛt layf bak.” Ɛn i tɛl dɛn fɔ luk insay di grev fɔ dɛnsɛf so dat dɛn go si se wetin i de tɔk na tru. (Mat. 28:1-6) Jizɔs bin dɔn gɛt layf bak!

10. Aw Pɔl sho se Jizɔs bin gɛt layf bak?

¹⁰ Di tin dɛn we apin 40 dez afta Jizɔs day sho wi klia wan se i bin gɛt layf bak. Di apɔsul Pɔl bin rayt to di Kristian dɛn na Kɔrint se: “Wan pan di fɔs tin dɛn we a tɛl una na in dɛn bin tɛl misɛf, dat Krays day fɔ wi sin dɛn jɔs lɛk aw di Skripchɔ dɛn se; ɛn dɛn bin bɛr am, ɛn i bin gɛt layf bak di de we mek tri jɔs lɛk aw di Skripchɔ dɛn se; ɛn i apia to Sifas, ɛn to di twɛlv apɔsul dɛn. Wan tɛm, i apia to pas 500 brɔda dɛn, bɔku pan dɛn stil de wit wi, bɔt sɔm dɔn day. Afta dat, i apia to Jems, dɔn i apia to ɔl di apɔsul dɛn. Bɔt na mi las i apia to. I apia to mi lɛk pɔsin we dɛn bɔn primachɔ wan.”—1 Kɔr. 15:3-8.

11. Wetin mek wi go se Jizɔs bin gɛt layf bak “jɔs lɛk aw di Skripchɔ dɛn se”?

¹¹ Di fɔs rizin we mek wi no se Jizɔs bin gɛt layf bak na bikɔs i bin gɛt layf bak “jɔs lɛk aw di Skripchɔ dɛn se.” Gɔd in Wɔd bin dɔn tɔk se Jizɔs go gɛt layf bak. Fɔ ɛgzampul, Devid bin dɔn rayt se di men pɔsin we “fetful” to Gɔd nɔ go lɛf na di Grev. (Rid Sam 16:10.) Insay Pɛntikɔst 33, di apɔsul Pita bin ɛksplen se da vas de bin de tɔk bɔt Jizɔs. I bin se: “[Devid] bin dɔn no bifo tɛm ɛn i bin tɔk bɔt di layf we Krays gɛt bak, i se Gɔd nɔ bin lɛf am na di Grev ɛn i nɔ bin alaw in bɔdi fɔ rɔtin.”—Akt 2:23-27, 31.

12. Udat dɛn bin si Jizɔs we i gɛt layf bak?

¹² Di sɛkɔn rizin we mek wi no se Jizɔs bin gɛt layf bak na bikɔs bɔku pipul dɛn bin si am we i gɛt layf bak. We Jizɔs gɛt layf bak, i tek 40 dez na di wɔl. Insay da tɛm de, i bin apia to in disaypul dɛn na di gadin usay in grev bin de, na di rod we de go Ɛmeɔs, ɛn ɔdasay dɛn. (Lyuk 24:13-15) Insay dɛn tɛm dɛn de, i tɔk to difrɛn pipul dɛn wan bay wan. I tɔk to Pita ɛn to bɔku pipul dɛn. Wan tɛm, Jizɔs bin apia to bɔku pipul dɛn we pas 500! So bikɔs bɔku pipul dɛn bin si Jizɔs we i gɛt layf bak, wi nɔ go ebul fɔ dinay se i nɔ bin gɛt layf bak.

13. Aw di zil we di disaypul dɛn bin gɛt sho se dɛn bin rili biliv se Jizɔs dɔn gɛt layf bak?

¹³ Di tɔd rizin we mek wi no se Jizɔs bin gɛt layf bak na di zil we in disaypul dɛn bin gɛt fɔ tɔk bɔt di gi we Gɔd bin gi am layf bak. Bikɔs di disaypul dɛn bin de tɔk wit zil se Jizɔs dɔn gɛt layf bak, pipul dɛn bin de du dɛn bad, mek dɛn sɔfa, ɛn ivin kil dɛn. If Jizɔs nɔ bin gɛt  layf bak, yu tink se Pita bin fɔ put in layf pan denja fɔ tɛl di Ju edman dɛn se Jizɔs dɔn gɛt layf bak, mɔ we i no se di Ju edman dɛn bin et Jizɔs ɛn na dɛn bin mek dɛn kil am? Pita ɛn di ɔda disaypul dɛn bin rili biliv se Jizɔs dɔn gɛt layf bak, ɛn dɛn bin biliv se i de sho dɛn aw dɛn fɔ du di wok we Gɔd want lɛ dɛn du. Apat frɔm dat, di layf we Jizɔs gɛt bak bin mek in disaypul dɛn shɔ se dɛnsɛf go gɛt layf bak we dɛn day. Fɔ ɛgzampul, we Stivin bin de day, i bin biliv se Gɔd go gi layf bak to di wan dɛn we dɔn day.—Akt 7:55-60.

14. Wetin mek yu biliv se Jizɔs dɔn gɛt layf bak?

¹⁴ Di nɔmba 4 rizin we mek wi no se Jizɔs dɔn gɛt layf bak na bikɔs wi gɛt bɔku tin dɛn we de sho wi se i de rul naw as Kiŋ ɛn in na di Edman na di kɔngrigeshɔn. Na dis mek di prichin wok de go bifo. Yu tink se dis fɔ dɔn apin if Jizɔs nɔ bin fɔ dɔn gɛt layf bak? Infakt, wi nɔ fɔ dɔn ɛva yɛri bɔt Jizɔs if i nɔ bin gɛt layf bak. Bɔt wi gɛt gud rizin fɔ biliv se Jizɔs dɔn gɛt layf bak ɛn i de gayd wi ɛn sho wi aw fɔ prich di gud nyus ɔlsay na di wɔl.

15. Wetin mek di layf we Jizɔs dɔn gɛt bak de gi wi maynd fɔ prich?

¹⁵ Bikɔs Krays dɔn gɛt layf bak, dat de gi wi maynd fɔ prich. Fɔ lɛk 2,000 ia so, Gɔd in ɛnimi dɛn dɔn du ɔlkayn tin fɔ stɔp di prichin wok. Dɛn kin provok wi, atak wi, stɔp di prichin wok na sɔm say dɛn, du ɔlkayn wikɛd tin to wi, ɛn ivin kil wi. Ɛn sɔm pipul dɛn we dɔn tɔn dɛn bak pan Jiova kin bigin tich lay lay tin dɛn. Bɔt pan ɔl we dɛn dɔn du dɛn tin ya, dɛn stil nɔ ebul fɔ stɔp di prichin wok. (Ayz. 54:17) Wi nɔ de fred Setan in slev dɛn. Jizɔs de wit wi, ɛn i de ɛp wi jɔs lɛk aw i bin dɔn prɔmis se i go du. (Mat. 28:20) Wi gɛt gud rizin nɔ fɔ fred atɔl bikɔs no mata wetin wi ɛnimi dɛn du, dɛn nɔ go ebul fɔ stɔp wi!

16, 17. (a) Aw di gɛt we Jizɔs gɛt layf bak sho se ɔl wetin i bin de tich na tru? (b) Insay Jɔn 11:25, us pawa Gɔd dɔn gi Jizɔs?

¹⁶ Bikɔs Jizɔs gɛt layf bak, dat sho se ɔl wetin i bin de tich na tru. Pɔl bin rayt se if Jizɔs nɔ bin fɔ dɔn gɛt layf bak, di tin dɛn we Kristian dɛn biliv ɛn di prich we dɛn de prich bin fɔ dɔn bi fɔ natin. Wan man we stɔdi di Baybul gud gud wan bin rayt se if Jizɔs nɔ bin fɔ dɔn gɛt layf bak, i min se Kristian dɛn na pipul dɛn we ful ɛn we biliv sɔntin we na lay. If Jizɔs nɔ bin gɛt layf bak, i min bak se di tin dɛn we Matyu, Mak, Lyuk, ɛn Jɔn rayt, na sɔri stori bɔt wan gud man we gɛt sɛns, bɔt we in ɛnimi dɛn kil. Bɔt Krays bin gɛt layf bak. Ɛn dis ɛp wi fɔ no se ɔl wetin i bin de tich na tru.—Rid Fɔs Lɛta Fɔ Kɔrint 15:14, 15, 20.

¹⁷ Jizɔs bin se: “Na mi de gi layf bak to di wan dɛn we dɔn day, ɛn na mi na di layf. Ɛnibɔdi we sho se i biliv pan mi, go gɛt layf bak, ilɛksɛf i day.” (Jɔn 11:25) Wetin Jizɔs tɔk na ya go mɔs kam tru. Jiova dɔn gi Jizɔs pawa fɔ gi layf bak to di wan dɛn we gɛt fɔ de na ɛvin as spirit ɛn to bɔku bɔku ɔda pipul dɛn we go gɛt di chans fɔ liv sote go na dis wɔl. Di day we Jizɔs day ɛn di layf we i gɛt bak sho se day nɔ go de igen. Dis fɔ ɛp wi fɔ bia ɛnitin we go mit wi, ilɛksɛf wi gɛt fɔ day.

18. We Jizɔs gɛt layf bak, wetin dat ɛp wi fɔ no?

¹⁸ Di gɛt we Jizɔs gɛt layf bak ɛp wi fɔ no se i go jɔj di wan dɛn we go de na dis  wɔl di we aw Jiova want. We Pɔl bin de tɔk to sɔm man ɛn uman dɛn na Atɛns, i bin se: “[Gɔd] dɔn pik wan de we i go jɔj di wan ol wɔl di rayt we. I dɔn pik wan man fɔ du dis, ɛn i dɔn mek ɔlman shɔ se dis go bi bay we i gi am layf bak.” (Akt 17:31) Na Jizɔs na di pɔsin we Jiova dɔn pik fɔ jɔj mɔtalman, ɛn wi shɔ se Jizɔs go du so fia wan ɛn i go sho wi se i lɛk wi.—Rid Ayzaya 11:2-4.

19. Aw di biliv we wi biliv se Krays dɔn gɛt layf bak, de ɛp wi?

¹⁹ Di biliv we wi biliv se Jizɔs gɛt layf bak de mek wi du wetin Gɔd want. If Jizɔs nɔ bin fɔ day ɛn gɛt layf bak, mɔtalman bin fɔ de sin ɛn day sote go. (Rom 5:12; 6:23) If Jizɔs nɔ bin gɛt layf bak, wi fɔ dɔn de tɔk se: “Lɛ wi it ɛn drink, bikɔs tumara wi go day.” (1 Kɔr. 15:32) Bɔt wi nɔ de put wi atɛnshɔn pan ɛnjɔymɛnt. Bifo dat, wi gladi fɔ no se we wi day, wi go gɛt layf bak, ɛn wi gɛt gud rizin fɔ du ɔl wetin Jiova de tɛl wi fɔ du.

20. Aw di layf we Jizɔs gɛt bak sho se Gɔd pawaful?

²⁰ We Krays gɛt layf bak, dat sho klia wan se Jiova na pawaful Gɔd we de “blɛs di wan dɛn we de tray tranga wan fɔ no am.” (Ibru 11:6) Nɔto pikin pawa ɛn sɛns Jiova yuz fɔ gi layf bak to Jizɔs as spirit pɔsin ɛn mek i go na ɛvin! Pantap dat, Gɔd sho se i ebul fɔ du ɔl di tin dɛn we I dɔn prɔmis. Jiova bin dɔn prɔmis se wan spɛshal “pikin” go kam we go du wan impɔtant tin fɔ sho udat gɛt di rayt fɔ rul. Fɔ mek dis bi, Jizɔs bin nid fɔ day ɛn gɛt layf bak.—Jɛn. 3:15.

21. Aw layf go tan lɛk we yu gɛt layf bak?

²¹ Yu nɔ gladi we Jiova gi wi di op fɔ gɛt layf bak? Di Baybul prɔmis wi se: “Gɔd in tɛnt de wit mɔtalman, Gɔd go de wit dɛn, ɛn dɛn go bi in pipul dɛn. Ɛn Gɔd insɛf go de wit dɛn. Ɛn i go wep ɔl di kray wata we de na dɛn yay, day nɔ go de igen, munin nɔ go de igen, kray nɔ go de igen, ɛn pen nɔ go de igen. Di tin dɛn we bin de trade nɔ go de igen.” Na di apɔsul Jɔn Jizɔs bin tɛl dɛn wɔndaful tin ya. I bin tɛl am bak se: “Rayt, bikɔs dɛn wɔd ya na tru ɛn dɛn go mɔs bi.” Jizɔs Krays bin tɛl Jɔn dɛn wɔndaful tin ya we I gɛt layf bak.—Rɛv. 1:1; 21:3-5.