1, 2. a) Bõe la tũudmã taoor dãmb kẽer bao n na n bãnge, la wãn to la a Pɩɛɛr leok-ba? (Ges-y fotã sẽn be yĩngrã.) b) Bõe n sõng a Pɩɛɛr t’a gom ne raoodo?

RASEM a wãn a Zezi kũumã poore, tʋm-tʋmd a Pɩɛɛr goma nin-toos taoor ne raoodo. Ra yaa zʋɩf-rãmbã tũudmã taoor dãmba. Bãmb n kɩt tɩ b kʋ a Zezi. B sũur da yika ne a Pɩɛɛre, bala a maana yel-solemde, tɩ ned sẽn da yaa põor yik n kẽne. B ra rat n bãnga a Pɩɛɛr sẽn maan dẽ to-to. B sok-a-la woto: “Yaa ne bõe pãng la ne ãnda yʋʋr la yãmb maand bõn-kãnga?” T’a Pɩɛɛr tall raoodo, n leoke: “Yaa ne Nazarɛt dao a Zezi Kirist yʋʋre, yãmb sẽn ka a soab kũum [“da-luka,” MN] zugã la Wẽnnaam sẽn vʋʋg-bã, yaa bãmb maasem yĩng la rao-kãngã paam a meng n yas yãmb taoor ka.”—Tʋʋ. 4:5-10.

² Sẽn deng rẽ, a Pɩɛɛr kɩɩsa naoor a tãab t’a pa mi a Zezi ye. (Mark 14:66-72) La a sẽn wa n be tũudmã taoor dãmb taoorã, bõe n sõng-a t’a tõog n leok ne raood woto? Yaa vʋʋsem sõngã. La a sẽn da tẽed ne a sũur fãa t’a Zezi vʋʋgame wã me sõng-a lame. Bõe n kɩt t’a ra kɩs sɩd t’a Zezi vʋʋgame? La bõe n tõe n sõng tõnd me tɩ d kɩs sɩd ne rẽ?

3, 4. a) Kiba-bʋs n wilgd tɩ b vʋʋga neb nand t’a Zezi karen-biisã roge? b) Ãnd dãmb la a Zezi vʋʋg-yã?

 ³ A Zezi tʋm-tʋmdbã ra miime tɩ ned sã n ki, a tõe n vʋʋgame. Bala, nand tɩ b roge, Wẽnnaam kõo no-rɛɛs a Eli la no-rɛɛs a Eliize tõog tɩ b vʋʋg neb sẽn ki. (1 Rĩm 17:17-24; 2 Rĩm 4:32-37) Vugr menga, ned n ki tɩ b sagl-a a Eliize yaoogẽ wã. La a sẽn sɩɩs a Eliize kõabã, a vʋʋgame. (2 Rĩm 13:20, 21) Pipi kiris-nebã ra tẽeda kiba-kãense, wa tõnd me sẽn tẽed tɩ Wẽnnaam Gomdã yaa sɩdã.

⁴ Sãmbg sẽn kae, d sã n karemd kibay nins sẽn gomd a Zezi sẽn vʋʋg neb yellã, noom-d lame. A sẽn wa n vʋʋg pʋg-kõorã bi-yendã, pagã sũur yɩɩ noog wʋsgo. (Luk 7:11-15) Daar a to me, a vʋʋga bi-pugl sẽn da tar yʋʋm 12. Mams-y roagdbã sũur sẽn da sãamã sẽn tiig n lebg sũ-noog zĩig pʋgẽ, b sẽn wa n yã tɩ b biigã vʋʋgame wã. (Luk 8:49-56) La a sẽn wa n vʋʋg a Lazaarã yẽ? Mams-y neb nins sẽn zĩnd be wã sũur sẽn yɩ noog to-to, b sẽn wa n yã a Lazaar t’a yit yaoogẽ wã.—Zã 11:38-44.

5. Bõe n kɩt t’a Zezi vʋʋgrã yɩ toor fasɩ ne vʋʋgr nins sẽn deng rẽ wã?

⁵ Tʋm-tʋmdbã ra miime t’a Zezi vʋʋgrã yɩɩ toor fasɩ ne a taabã. Neb nins b sẽn da vʋʋgã vʋʋgame n ket n yaa ninsaalba, n le wa baas n ki. La a Zezi vʋʋgame n lebg malɛk n pa na n tol n le ki ye. (Karm-y Tʋʋm 13:34.) Tʋm-tʋmd a Poll wilgame tɩ b muma Kiristã ne yĩng sẽn yaa “dũniyã yĩnga,” la t’a vʋʋga ne “sɩɩg yĩnga.” (1 Kor. 15:42-50) Sẽn paase, a kẽnga saasẽ n “tɩ be Wẽnnaam dɩtgo, la malɛk-rãmbã ne pãn-soaadbã la pãens rãmbã sakda bãmba.” (1 Pɩɛ. 3:19-22) Baa neb a taabã vʋʋgr sẽn yɩ yel-soalmã, a Zezi vʋʋgrã yɩɩ yel-solemd sẽn pa tar mak-n-taaga.

6. Wãn to la a Zezi vʋʋgrã naf a karen-biisã?

⁶ A Zezi vʋʋgrã nafa a karen-biisã sõma. A bɛɛbã ra tagsdame t’a sẽn ki wã, saame. La a vʋʋgame n yaa malɛk sẽn tar pãnga, tɩ ned kae n tõe n maan-a wẽng ye. A Zezi vʋʋgrã wilgame t’a yaa Wẽnnaam Biiga, la kɩt t’a karen-biisã sũ-sãangã lebg sũ-noogo. Sẽn paase, kõ-b-la raood tɩ b pa le zoet rabeem ye. A Zezi vʋʋgrã ra tara yõod wʋsg Wẽnnaam daabã pidsg pʋgẽ. Leb n da tara yõod ne koe-noogã a karen-biisã sẽn da moond ne yẽesem zĩig fãa wã.

7. Bõe la a Zezi maand rũndã-rũndã, la rẽ wata ne sogsg bʋse?

⁷ D miime t’a Zezi pa yɩ nin-kãseng sẽn ka to bal ye. Rũndã-rũndã a vɩɩme. Leb n yaa yẽ n get koɛɛgã mooneg yell dũniyã gill zugu. A Zezi n yaa Wẽnnaam Rĩungã Rĩma. Ka la bilfu, a na n kɩtame tɩ wẽnemã fãa sa, la a maneg tẽngã tɩ lebg arzãn tɩ neb vɩɩmd a zug wakat sẽn kõn sa. (Luk 23:43, MN) A Zezi sã n da pa vʋʋge, bõn-kãensã baa a ye pa na n tõog n yɩ ye. La bõe n kɩt tɩ d tõe n kɩs sɩd t’a Zezi vʋʋgame? Wãn to la a vʋʋgrã tõe n naf tõndo?

8, 9. a) Bõe yĩng tɩ zʋɩf-rãmbã tũudmã taoor-dãmb ra rat tɩ b gũ a Zezi yaoogã? b) Pagbã sẽn wa n wa yaoogẽ wã, bõe n maane?

⁸ A Zezi kʋʋbã poore, maan-kʋʋdbã kãsem-dãmbã ne Fariziẽ-rãmbã kẽnga a Pɩlat nengẽ n tɩ yeel-a woto: “Zu-soaba, tõnd tẽegame tɩ bɛlgd- kãngã ra yeela b sẽn ket n vɩ wakate: ‘Dasem a tãab sã n looge, mam na n vʋʋgame.’ Woto yĩnga, bɩ y kɩt tɩ b gũ yaoogã hal tɩ ta da-tãt-n-daare, tɩ bãmb karen-biisã ra wa ne yʋng n zuk kũumã n yeel nebã tɩ bãmb vʋʋgame ye. Yaoolem belg-kãng na n yɩɩga pipi soabã.” A Pɩlat leok-b-la woto: “Yãmb tara gũudba, bɩ y kẽng n tɩ gũ yaoogã wa yãmb sẽn datã.” B sɩd maana woto.—Mat. 27:62-66.

⁹ B muma a Zezi yaoog b sẽn tu kugr pʋgẽ, n bilim kug-bedr n pag a noorã. Zʋɩf-rãmbã tũudmã taoor-dãmb ra ratame t’a Zezi kell n pa be wakat fãa. La a Zeova sẽn da rata yaa toor fasɩ. Rasem a tãab poore, a Maari sẽn yit Magdala wã ne Maari a to wã kẽnga yaoogẽ wã, n mik tɩ b bilma kugrã n yiis yaoogã noore, tɩ malɛk zao a zugu. Malɛkã yeela pagb a yiibã tɩ b lɩk n ges tɩ yaoogã yaa vɩʋʋgo. A paasame: ‘Bãmb ka be ka ye. Bãmb vʋʋgame.’ (Mat. 28:1-6) A Zezi le vɩɩme yɛsa!

10. Bõe la a Poll yeel tɩ wilgdẽ t’a Zezi sɩd vʋʋgame?

¹⁰ Rẽ poore, rasem 40 pʋgẽ, bũmb toor-toor n maan tɩ wilg vẽeneg t’a Zezi vʋʋgame. Tʋm-tʋmd a Poll yeela Korẽnt kiris-nebã woto: “Sẽn deng bũmb fãa, mam zãmsa yãmb wa mam me sẽn da reegã, tɩ Kirist kii tõnd yel-wẽnã yĩnga, a wa Gʋlsg Sõamyã sẽn yetã. La b muma bãmba, la dasem a tãab raare, bãmb vʋʋga wa Gʋlsg Sõamyã sẽn yeelã. La bãmb vẽnega b meng ne a Sefas n yaool n vẽneg b meng ne piig la a yiibã. Dẽ poore, bãmb vẽnega b meng ne ba-biis sẽn yɩɩd kobs-nu, la sẽn yɩɩd pʋɩ-sʋk ket n vɩɩme, la kẽer kiime. Dẽ poore, bãmb vẽnega b meng ne a Zak n yaool n vẽneg b meng ne tʋm-tʋmdbã fãa. La sẽn pʋgl bãmb fãa, b yaool n vẽnega b meng ne maam wa biig rogem sẽn ka zems a wakate.”—1 Kor. 15:3-8.

11. Bõe yĩng tɩ d tõe n yeel t’a Zezi vʋʋga wa “Gʋlsg Sõamyã sẽn yeelã”?

¹¹ Pipi, a Zezi vʋʋga wa “Gʋlsg Sõamyã sẽn yeelã.” Wẽnnaam Gomdã reng n togsame t’a Zezi na n vʋʋgame. Wala makre, a Davɩɩd yeelame tɩ Wẽnnaam pa na n bas a “nin-nongrã” yaoogẽ wã ye. (Karm-y Yɩɩl Sõamyã 16:10.) Yʋʋmd 33 Pãntekotã daare, tʋm-tʋmd a Pɩɛɛr wilgame tɩ nin-nongr ning yell a Davɩɩd sẽn gomã yaa a Zezi. A yeelame: “A Davɩɩd sẽn yã tɩ bõn-kãng be taoorã, bãmb togsa Kirist kũum vʋʋgr yell n yeel tɩ b ka na n pa kɩɩm-kulg ye, la b yĩngã ka na n põog ye.”—Tʋʋ. 2:23-27, 31.

12. A Zezi vʋʋgrã poore, ãnd dãmb n yã-a?

¹² Yiibu, a Zezi vʋʋgrã poore, neb wʋsg yã-a lame. A vʋʋgrã poore, rasem 40 pʋgẽ, a vẽnega a meng t’a karen-biisã yã-a. Yɩɩ zĩis toor-toore. Wala makre, a vẽnega a meng ne a karen-biisã zĩig sẽn pẽ ne a yaoogã, la Emayus sorã zugu. (Luk 24:13-15) A leb n goma ne neb yembr-yembre, wall ne neb sula. Makre, a goma ne a Pɩɛɛre. Vugr menga, a goma ne neb 500 la zaka. Sẽn mik tɩ yaa neb wʋsg woto n yã a Zezi a vʋʋgrã poorã, d tõe n kɩɩsame t’a pa vʋʋg sɩda?

13. Bõe yĩng t’a Zezi karen-biisã sẽn da moon ne yẽesmã yaa kaset sẽn wilgd tɩ b ra kɩsa sɩd t’a vʋʋgame?

¹³ Tãabo, a karen-biisã moona ne yẽesem, n wilg t’a vʋʋgame. A Zezi  karen-biisã sẽn da yet t’a vʋʋgame wã, kɩtame tɩ b nams-ba, la b kʋ kẽer menga. Yãmb we n mams n gese: A Pɩɛɛr yeela tũudmã taoor dãmb sẽn da kis a Zezi la sẽn kɩt tɩ b kʋ-a wã t’a vʋʋgame. Ra tõe n tũu ne a yõore. La a Zezi sã n da pa vʋʋge, a Pɩɛɛr na sak n maan woto sɩda? A Pɩɛɛr ne karen-biis a taabã ra kɩsa sɩd t’a Zezi vʋʋgame, la tɩ yaa yẽ n get koe-moonegã yelle. A vʋʋgrã leb n kɩtame t’a karen-biisã kɩs sɩd tɩ bãmb me sã n ki, b na n wa vʋʋgame. Wala makre, a Etɩɛn kʋʋbã sasa, a wilgame t’a tẽeda ne a sũur fãa t’a na n wa vʋʋgame.—Tʋʋ. 7:55-60.

14. Bõe n kɩt tɩ y kɩs sɩd t’a Zezi vʋʋgame?

¹⁴ Naase, d tara kaset sẽn wilgd t’a Zezi rɩta naam, la tɩ yaa yẽ la kiris-neb tigingã Zu-soaba. Kiris-neb hakɩkã sõor tara paasgo. A Zezi sã n da pa vʋʋge, ra na n yɩɩ woto sɩda? Tõe tɩ d ra pa na n tol n wʋm tɩ b gomd a yell meng ye. La bũmb wʋsg n kɩt tɩ d tõe n kɩs sɩd t’a vʋʋgame, la tɩ yaa yẽ n get koe-moonegã yell dũniyã gill zugu.

¹⁵ D sẽn mi t’a Zezi vʋʋgame wã kõta tõnd raood tɩ d moond koɛɛgã. Sẽn sɩng ne a Zezi wakatã n tãag masã, Wẽnnaam bɛɛbã makame n na n kɩt tɩ kiris-nebã bas koɛɛgã moonego. Wala makre, b tũnuga ne sɩdã kɩɩsdba, b yiisa noy n gɩdg koe-moonegã, n yaal koe-moondba, n nams kẽer la b kʋ sãnda menga. La Biiblã pĩnd n yeela woto: “Zab-teed nins fãa neb sẽn maand n na n zab ne foomã ka na n tõog ye.” (Ezai 54:17) Tõnd pa zoet a Sʋɩtãan poorẽ dãmbã ye. A Zezi sõngda tõnd wa a sẽn pʋlmã. (Mat. 28:20) D tõe n kɩsa sɩd tɩ baa tõnd bɛɛbã sẽn maand fãa, b pa na n tõog tɩ d bas koɛɛgã mooneg ye.

16, 17. a) Bõe yĩng tɩ d tõe n yeel t’a Zezi vʋʋgrã wilgdame t’a sẽn zãms nebã bũmb ninsã yaa sɩda? b) Zã 11:25 goamã wilgdame tɩ Wẽnnaam kõ a Zezi tõog t’a na n maan bõe?

¹⁶ A Zezi vʋʋgrã wilgame t’a sẽn zãms nebã bũmb ninsã fãa yaa sɩda. A Poll yeelame tɩ Kiristã sã n da pa vʋʋge, kiris-nebã tẽeb la b koe-moonegã ra na n yɩɩ zaalem. Biibl-mit a yembr yeelame me tɩ sã n da mikame tɩ Kiristã pa vʋʋge, kiris-nebã yaa yalemb b sẽn belg tɩ b tẽed ziri. Sẽn paase, a Zezi kibarã sẽn be evãnzil-dãmbã pʋgẽ wã ra na n yɩẽ-la kibar bal sẽn gomd rao sẽn yɩ yam soab la nin-sõngo, t’a bɛɛb yõk-a n kʋ. La a Zezi vʋʋgame, tɩ wilgdẽ tɩ bũmb nins a sẽn zãms nebã, la a sẽn yeel beoog-daarã wɛɛngẽ wã fãa yaa sɩda.—Karm-y 1 Korẽnt dãmb 15:14, 15, 20.

¹⁷ A Zezi yeelame: “Mam yaa vʋʋgr la vɩɩm. Ned ning sẽn tẽed maam, baa yẽ sã n ki, a na paam vɩɩm.” (Zã 11:25) A gom-kãensã na n sɩd pidsame. A Zeova kõ-a-la tõog t’a na n vʋʋg neb nins sẽn na n tɩ rɩ naam ne-a saasẽ wã, la neb milyaar-dãmb sẽn na n vɩɩmd tẽngã zug wakat sẽn kõn sa yĩnga. A Zezi sẽn ki tɩ yɩ maoongã ne a vʋʋgrã wilgdame tɩ kũum pa na n le wa zĩnd ye. D sẽn mi woto wã kɩtame tɩ d tar daood toog buud fãa taoore, baa sã n na n tũu ne d yõore.

18. A Zezi vʋʋgrã kɩtame tɩ d kɩs sɩd ne bõe?

¹⁸ A Zezi vʋʋgrã kɩtame tɩ d kɩs sɩd tɩ b na n kaoo nebã bʋʋd tɩ zems ne a Zeova noyã. A Poll yeela pagb la rap sẽn da kelgd-a Atɛn tẽngã pʋgẽ woto: “Wẽnnaam yãka raar tɩ rao ning bãmb  sẽn yãkã na n kao dũniyã bʋʋd tɩrga. La bãmb kõo nebã fãa bãnd sẽn wilgd tɩ bõn-kãng yaa sɩda, b sẽn vʋʋg a Zezi wã yĩnga.” (Tʋʋ. 17:31) Vẽenega, Wẽnnaam yãka a Zezi t’a na n yɩ tõnd bʋ-kaooda. D tõe n kɩsa sɩd t’a na n kaoo bʋʋdã ne tɩrlem la nonglem.—Karm-y Ezai 11:2-4.

19. D sẽn tẽed tɩ Kiristã vʋʋgame wã kɩtame tɩ d rat n maan bõe?

¹⁹ D sẽn tẽed t’a Zezi vʋʋgame wã kɩtame tɩ d rat n maan Wẽnnaam daabã. A Zezi sã n da pa ki tɩ yɩ maoongo, la a ra pa vʋʋge, d ra na n ket n beẽ-la yel-wẽndã la kũumã yembd pʋgẽ. (Rom 5:12; 6:23) A sã n da pa vʋʋge, d ra pa na n tẽed manegr ye. Tõe tɩ tõnd me ra na n yeta woto: “Bɩ d rɩ la d yũ, tɩ bõe, beoogo, tõnd na n kiime.” (1 Kor. 15:32) La d pa vɩ yõ-noogrã yĩng ye. D sẽn mi tɩ sẽn ki-bã na n wa vʋʋgame wã noom-d lame, la kɩt tɩ d rat n sak a Zeova d vɩɩmã nens fãa pʋsẽ.

20. Wãn to la a Zezi vʋʋgrã wilgd t’a Zeova sɩd yaa kãsenga?

²⁰ A Zezi vʋʋgrã wilgame t’a Zeova sẽn ‘yaa neb nins sẽn baood yẽ wã roandã’ sɩd yaa kãsenga. (Heb. 11:6) Yɩɩ ne pãn-kãsenga, la ne yam la a Zeova vʋʋg a Zezi t’a tɩ be saasẽ n pa le tõe n ki ye. A sẽn maan woto wã, a wilgame t’a tõe n pidsa a pʋlemsã fãa. Wala makre, a sẽn da pʋlem tɩ “yageng” la a na n tʋm t’a wa wilg tɩ yẽ n segd n yɩ yĩngr la tẽng naabã. Sẽn na yɩl tɩ pʋlen-kãng pidsi, a Zezi sẽn yaa yagengã ra segd n kiime la a vʋʋge.—Sɩng. 3:15.

21. A Zeova sẽn pʋlem tɩ sẽn ki-bã na n wa vʋʋgame wã, wãn to la nafd yãmba?

²¹ A Zeova sẽn pʋlem tɩ sẽn ki-bã na n wa vʋʋgame wã pa noom-y sɩda? Biiblã yeela woto: “Ad Wẽnnaam yirã bee ninsaalb sʋka. Wẽnnaam na n zĩnda ne nebã. Bãmb na n yɩɩ Wẽnnaam neba, la Wẽnnaam mengã na n paa ne bãmba. Wẽnnaam na n yẽesa nintãm fãa sẽn be b ninẽ wã. Kũum kõn le zĩnd ye, la sũ-sãoong wall yãbre, wall toog kõn le zĩnd ye, bala, dẽenem bũmba fãa loogame.” Yɩɩ tʋm-tʋmd a Zã la b taas koe-kãngã. Rẽ poore, b yeel-a-la woto: “Gʋlse, bala, gom-kãensã yaa vẽenega, la b yaa sɩda.” Ãnd n vẽneg tʋm-tʋmd a Zã gom-kãensã? Yaa a Zezi Kirist. Yɩ a sẽn ki n lebg n vʋʋgã poore.—Wil. 1:1; 21:3-5, Kãab-paalgã Koe-noogo.